Foaiina Atu o La’u Tupe o le Misiona
Ata na tusia e Joshua Dennis
Na ou auai i le Ekalesia a o lumanai lo’u aso fanau lona 21. Na ou lagonaina se naunautaiga malosi e auauna atu i se misiona, peitai ane sa ou i ai i ni tulaga faigata. Ona na tuua i matou e lo’u tama, o lea na ou fesoasoani ai i lo’u tina ma o’u uso laiti e toatolu i tulaga tautupe. Na toetoe o a’u tupe uma na alu i lo’u aiga. O le vaitaimi lena, e le itiiti ifo ma le £500 (660 tala Amerika) sa manaomia muamua ae e te le’i talosaga mo se misiona. I le mavae ai o le lua tausaga o faaputu, sa na o le £250 la’u tupe na i ai.
Na uma atu lea manaoga tautupe ae oso mai le isi. Na aafia lo’u uso laitiiti ifo i se faafitauli ma na sala tupe ai e £240. Na fai mai lo’u aiga e nono atu le tupe ia te ia—na toetoe lava o la’u tupe uma na i ai. Na foliga mai o se filifiliga i le va o se misiona ma lo’u uso, e ui ina sa ia folafola mai e toe totogi mai i le taimi na te mafaia ai. Sa ou tauivi ma lea tulaga ma sailia ai se fautuaga mai lo’u epikopo. Sa ia fautuaina a’u e fesoasoani atu i lo’u uso. Sa ou mulimuli i lana fautuaga ma totogi le sala. Na ou iloa o le mea sa’o lea e fai, ae sa ou manao lava ia ou alu i se misiona.
Sa ou mafaufau, o le a umi ni tausaga e toe tau sefe ai se tupe, ae na ala i le tatalo faamaualalo, na ou maua ai ni musumusuga e uiga i le lumanai. Na ta’u mai e le Agaga e aua ne’i ou faamoemoe ia toe totogi mai e lo’u uso la’u tupe, ma o le a ou alu i la’u misiona i le tausaga e sosoo ai. Na lua tausaga o tau sefe le tupe na ou tuuina atu i lo’u uso, ae na ta’u mai e le Alii ia te a’u, o le a faaluaina lena aofaiga i le faaiuga o le tausaga.
Sa ou masalosalo ae na faaauau pea, ma o vaivaso uma lava mo le 10 vaiaso na sosoo ai, na tupu ai se vavega. Na faalogo se tagata o le autalavou matutua o le uarota i lo’u foaiina atu o le tupe o la’u misiona ma tuuina mai se £100 mo la’u misiona. O le vaiaso na sosoo ai, na tuuina mai ai e se tasi tagata o le autalavou matutua se £100 mo le mafuaaga lava lea e tasi. Na faalotomaulaloina a’u ma amata ona ou salamo ona o lo’u le talitonu.
Mulimuli ane, na talosaga mai lo’u falefaigaluega mo ni tagata e ofo atu e fia vaea (o se faatosinaga tautupe i tagata faigaluega o e ofo atu e faamavae mai galuega). Sa ou ofo atu ae ou te le’i faamoemoe o le a faamatuu mai a’u, ona sa latou faaaluina ni tupe se tele i a’u aoaoga faamasani. Sa fesili mai le pule pe aisea na ou manao ai ou te vaea, o lea na ou faamatala atu i ai e uiga i la’u misiona. Sa ia tuuina mai se siitaga o lo’u totogi lea na aofia ai nai vaiaso i tua atu ma talia la’u talosaga mo le vaea. Sa ia tuuina mai foi se ponesi mo lo’u faamavae i le galuega.
Sa ou maua se galuega le tumau, lea na iu ina ou faigaluega tumau ai ina ua uma le lua vaiaso. Sa latou ofoina mai foi ia te a’u ni ova taimi i faaiuga o le vaiaso. Sa ou talia ia Aso Toonai uma lava. E le’i leva lena mea, ae ou auina atu loa o’u pepa o le misiona ma valaauina ai e auauna atu i le Misiona a Enelagi Lonetona Bristol. E le’i atoa se tausaga ae ou sefeina le £2,500. O le mea moni e faa-10 le aofai o le tupe na ou foaiina atu na ou mauaina. I le Luka 6:38 o loo faapea mai: “Ia outou foai atu, e foaiina mai ai ia te outou; e foai mai e i latou i lo outou lava le pulupulu le fua lelei, e lolomi ma luluina, ma tumu ma solo i tua. Aua o le fua tou te fuaina atu ai, e fuaina mai ai ia te outou.”
Ou te iloa na faamanuiaina a’u ona o lo’u usiusitai ma faatuatua i le mulimuli ai i le fautuaga a lo’u epikopo.