O le Olaga o se Tala Faatino: O Le Fuafuaga o le Faaolataga i ni Vaega se Tolu
E alala le tusitala i Niu Ioka, ISA.
O le manatu lenei ua faavaeina i se saunoaga, “O Le Tala Faatino ma le Fuafuaga,” na fofogaina e Peresitene Boyd K. Packer (1924–2015), Peresitene o le Korama a Aposetolo e Toasefululua, i se faeasaite a le Ofisa o Aoga a le Ekalesia mo le autalavou matutua i le aso 7 o Me, 1995.
O loo tatou i ai i le ogatotonu o se tala faatino e tolu vaega, lea tatou te le malamalama atoatoa i ai, ae o le taulai atu ia Keriso o le a fesoasoani tatou te maua ai se iuga e faavavau ona fiafia.
Ata © iStock/Thinkstock
Ua faamuiti moli. Ua sisi i luga le ie pupuni mafiafia lanumumu. Ua minoi tagata ua oofu i teuga o loo siomia ai oe e fai ia faatinoga. O ai le tama autu? O ai le tama leaga? E faigata ona iloa.
O loo e tu i le tulaga ogatotonu, e le o mafai ona e iloa le uiga o ia mea uma. E foliga mai o loo malamalama tagata uma i le mea o loo tupu ae vagana ai lava oe. “O le vaega 2 lenei,” na musumusu atu ai se tasi o tagata faatino atatifaga. “Tilotilo foi laia i le anotusi lenei.”
Atonu e le o i tatou uma o ni tama faatino atatifaga, ae peitai o le manatu o se tala faatino faapena e le o mamao lava mai le mea moni. Vaaifaalemafaufau i le fuafuaga o le faaolataga, lea e ta’ua foi “o le fuafuaga sili o le fiafia” (Alema 42:8), o se tala faatino e tolu ona vaega. O le vaega 1 o le mea na tatou o mai ai, o le vaega 2 o lo tatou olaga i le lalolagi, ma le vaega 3 o le mea tatou te o i ai. I le taimi o le vaega 2, e leai so tatou manatua o lo tatou olaga ua mavae, ma e itiiti [lo tatou] malamalama e uiga i lo tatou lumanai, ae o le mea e lelei ai, o le talalelei a Iesu Keriso—o le anotusi o le tala faatino—ua tuu ai lo tatou olaga faitino i le tulaga e malamalama atoatoa i ai.
Vaega 1: Malamalama i o Tatou Amataga
Mai tusitusiga paia ma tuleiga a perofeta soifua, tatou te aoao ai e uiga i lo tatou muai olaga (tagai Aperaamo 3:22–24). Ae tatou te le’i o mai i le lalolagi, na tatou auai i se fono faatasi ma lo tatou Tama Faalelagi. Na tatou iloa ai o le a tatou o mai i le lalolagi ia maua se tino, maua ni fanau, fetaiai ma mea faafeagai, ma tuputupuae i le malamalama ma le upumoni. Afai na tatou usiusitai ma na avea atili e faapei o Keriso, e i ai se aso e mafai ai ona tatou toe mafuta faatasi ma lo tatou Tama.
Ona o le a tatou faia ni mea sese i le aluga o le olaga, na filifilia ai Iesu Keriso e avea ma o tatou Faaola e totogi le tau o le agasala. Na puapuagatia o Ia mo i tatou taitoatasi, ma ona o Lana taulaga, e mafai ai ona faamamaina i tatou e ala i le salamo.
Ae peitai, o Satani (po o Lusifelo, e pei ona ta’ua ai o ia i le muai olaga) na tetee ma saili e aveese lo tatou gafatia e filifili ai i le sao po o le sese. Na amataina se Taua i le Lagi. Ona o lona faiaina, na tuliesea ai Satani mai le lagi, faatasi ma agaga o e sa filifili e mulimuli ia te ia (tagai Mose 4:1–4).
E ui ina tatou le manatua lenei muai olaga, ae ua tatou iloa sa tatou folafola atu e faia mea uma tatou te mafaia e toe foi atu ai i le afioaga o le Atua pe a tatou o mai i le lalolagi. Ma na Ia folafola mai ia i tatou le faitalia, e mafai ai ona tatou filifili e mulimuli ia te Ia.
Vaega 2: Faaaogaina o lo Tatou Faitalia
O lenei la ua tatou i ai nei i le vaega 2, ma ua tuuina mai e le Atua le anotusi e toe taitai atu ai i tatou ia te Ia—o le talalelei a Iesu Keriso. O la tatou luitau o le faaaoga o lo tatou faitalia e mulimuli ai i le anotusi [talalelei] ina ia mafai ona tatou saunia e toe foi atu i lo tatou Tama Faalelagi (tagai Aperaamo 3:25). E pei o se tala faatino lavelave e tumu i soamanatu autu, o lo tatou olaga faitino e mafai foi ona faigata. Ua tumu i faaosoosoga, tofotofoga, ma mea faalavefau o soo se ituaiga. Ae o le mea moni e faapea, o le vaega 2 e faatatau uma lava i le filifili pe o le a tatou mulimuli i aoaoga a Keriso ina ia mafai ona tatou avea atili e faapei o Ia.
Ua tuuina mai e tusitusiga paia le mamanu tonu lava mo le fiafia, ua uunaia i tatou e “fetaomi atu i luma, ma taumamafa fiafia i le afioga a Keriso, ma tumau e oo i le iuga” (2 Nifae 31:20). Tatou te tuputupu ae a o tatou osia ma tausia feagaiga, usitai i poloaiga, ma salamo pe a tatou agasala. A tatou faaaafia atoatoa i tatou lava i tusitusiga paia ma aoaoga a o tatou perofeta, o le a tatou taulai atu i le fuafuaga lea na tatou malilie i ai ma le fiafia e mulimuli ai i le vaega 1.
Vaega 3: Opoopoina o le Faavavau
E ono oti o tatou tino faaletino i le faaiuga o le vaega 2, ae e le uma ai le tala iina. O le mea moni, o le vaega 3 e leai ni pupuni e tosoina ai—e faavavau (tagai Aperaamo 3:26).
Ona o le Togiola a Iesu Keriso, o le a toetutu ai le fanau uma a le Atua o e na o mai i le lalolagi. O le a se mea e mafai ona sili atu le fiafia nai lo o le toetutu? (tagai MF&F 93:33).
E toetoe o tagata uma o le a maua foi se tikeri o le mamalu, e faalagolago lea i a latou galuega: o le malo telesitila, ma lona mamalu e pei o fetu; o le malo teresitila, ma se mamalu e pei o le masina; po o le malo selesitila, ma le mamalu aupito maoae ua pei o le la (tagai MF&F 76:50–113). I le malo selesitila o le a tatou mafuta faatasi ai ma le Tama ma le Alo. O se vaega itiiti o tagata o le a tumau i le “eleelea pea” (2 Nifae 9:16) ma e lafo i le pouliuli i fafo, lea e le mafai ai ona latou alualu i luma.
Mata O Le A Sau Tala O Le A I Ai?
Afai tatou te mulimuli i le talalelei a Iesu Keriso i le vaega 2, o le vaega 3 o le tatou tala faatino o le a sili atu ona matagofie nai lo o le mea tatou te mafaufauina. Ua amata lou olaga faitino. Ua faagaioi le faatinoga. O le a se mea o le a e faia i le aluga o lou olaga faitino?