Tali mai Taitai o le Ekalesia
Auala e Sui Ai
Saunia e Elder Jeffrey R. Holland
O Le Korama a Aposetolo e Toasefululua
Mai se lauga sa faia i se faigalotu i le Iunivesite o Polika Iaga i le aso 18 o Mati, 1980.
Pe a ua e agasala ma iloa le ogaoga o au measese, o lau luitau aupito taua o le, ia talitonu e mafai ona e sui, ma e mafai ona avea oe o se tagata ua ese. O le le talitonu i lena mea, e manino lava o se auala lea faaSatani na mamanu e faalotovaivai ma faafaiaina ai oe. O le salamo e le o se upu le lelei. E sosoo atu i le faatuatua, le upu aupito faamalosiau i le vaogagana a Kerisiano. E mafai ona e sui! E mafai ona avea oe ma soo se mea e te manao e avea ai oe i le amiotonu.
Afai e i ai se auega e le mafai ona ou talia, o le tagi le lelei, faanoanoa, ma le vaivai, “Ia, ua pau lava o le mea ua ou oo i ai.” Afai e te fia talanoa e uiga i uiga faaalia faalotovaivaia, o le tasi lena o uiga e faalotovaivaia ai a’u. Faamolemole taofi au tala e uiga i le “Ua pau lava o le mea ua ou oo i ai.” E toatele tagata na ou faalogo i ai i lena faamatalaga, o e na mananao e agasala ma faaigoa ai o le tulaga o le mafaufau. Ma ou te faaaogaina le upu agasala e taaofai ai se vaega tele o mausa lea e aumaia ai le lotovaivai ma le le mautinoa ma le leai o se faamoemoe.
E mafai ona e suia soo se mea e te manao e sui, ma e vave lava ona e faia. O se isi foi mea sese faaSatani le talitonu e faapea, e umi ni tausaga ma le faavavau o salamo ai. E tutusa lelei lava le umi e salamo ai ma le umi e te fai mai ai “O le a ou sui”—a ia mo’i lava. Ioe, o le a i ai faafitauli e fofo ma faaleleiga e fai. Atonu e lelei ona e faaalu—e moni, e sili ai le faaalu—o lou olaga o totoe i le faamaonia o lou salamo tumau. Peitai, o le suia, tuputupu a’e, faafouga, ma le salamo, e mafai ona oo mai mo oe i le taimi lava lea e pei foi ona sa tupu ia Alema ma Atalii o Mosaea.
Aua ne’i le malamalama. O le salamo e le faigofie pe leai se tiga pe talafeagai. E mafai ona avea o se ipu oona mai seoli. Ae e na’o Satani lava e manao ia e manatu, o se faailoaga talafeagai ma manaomia o le agasala e sili atu ona mataga nai lo o le tumau ai. E na o ia lava o le a fai mai, “E le mafai ona e sui. E te le sui. E umi tele ma faigata tele ona sui. Togi loa le solo. Tuu loa. Aua le salamo. Ua pau lava o le mea ua e oo i ai.” O lena mea, a’u uo e, o se pepelo e fanau mai i le atuatuvale. Aua ne’i outou talitonu i ai.