Malamalama i le Talafaasolopito o le Ekalesia e ala i le Suesue ma le Faatuatua
O le aso, tatou te aoao ai e uiga i mea ua tuanai e ala i vaega le atoatoa o le talafaasolopito. A o tatou suesue i nei faamaumauga, e ao ona tatou manatua e le avea nei mea ma sui uma o mea ua tuanai.
Ata ua leva o le Aai o Sate Leki, faaaloaloga a le Church History Archives
O le talafaasolopito e loloto atu lona uiga nai lo na o le taulotoina o aso ma mea moni mo se suega. O aso uma e ao, faasaosao, ma faasoa atu ai e tagata e nafa ma le teuina o talafaasolopito, tagata e vaaia faletusi, ma tagata tusitalafaasolopito i le Faletusi o Talafaasolopito a le Ekalesia, faamaumauga o mea ua tuanai e fesoasoani ia tatou iloatino ai le aao o le Atua i le talafaasolopito o le Ekalesia ma i o tatou lava olaga taitasi. O le malamalama i lo tatou talafaasolopito e aofia ai se faagasologa o le aoaoina ma le iloaina lena e mafai ona faamalolosia ai a tatou molimau, fesoasoani e puipuia ai mai le le mautonu, faamatala mai tala e sili ona manaia, iloatino ai aoaoga faavae moni, ma faaalualu ai i luma o tatou manatu. A o tatou “maua se malamalama o talafaasolopito” o le a tatou fesoasoani foi i le ausiaina o “le faaolataga o Siona” (MF&F 93:53).
I le avea ai ma tusitalafaasolopito, ua faapea ona ou talisapaia ai lo tatou aoao e uiga i le talafaasolopito “e ala lava lea i le suesue ma le faatuatua foi” (MF&F 88:118). E tuufaatasi le faatuatua ma le suesue a o tatou talisua ma le agaga tatalo i tusitusiga paia, faitau ma manatunatu i le tele o punaoa o talafaasolopito, fai fesootaiga i le va o fuaitau o mau ma punaoa o talafaasolopito, mafaufau i faamatalaga i totonu o anotusi e tatau ai, vaavaai mo mamanu ma autu, ma aumaia ai ni lesona e faatatau i ai. O nei faiga masani e fesoasoani tatou te malamalama ai i mea moni e uiga i talafaasolopito ma maua ai tali i a tatou fesili. E mafai ona fesoasoani ni nai mataupu faavae, tatou te mafaufau ai i le talafaasolopito i auala e fetala’i ai o tatou mafaufau i se malamalamaaga loloto atu.
Ua le o toe i ai ni mea o le vaitaimi ua tuanai—ua na o ni fasi vaega o loo totoe
Mai la tatou vaaiga i le taimi nei, ua tele lava ina le toe i ai ni mea o le vaitaimi ua tuanai. Ua maliliu atu tagata; ua muta foi o latou aafiaga. Ae peitai, o loo totoe fasi vaega o mea ua tuanai—o tusi, o apitalaaga, faamaumauga o faalapotopotoga, ma meafaitino faaletino. O le aso, e mafai ona tatou aoao ai e uiga i mea ua tuanai, e ala i fasi vaega o loo totoe. O taimi uma e leiloloa ai faamatalaga i le va o le taimi ua tuanai ma le taimi nei. E ao ona tatou suesue i faamaumauga o loo i ai ae ia manatua e le o i ai uma mea ua tuanai.
Mafaufau i le faataitaiga e tasi [lenei]: Pe a lauga atu Iosefa Samita i le Au Paia, e masani ona leai ni ana lauga tusitusia na saunia, ma sa le’i faia foi ni puega o le leo po o ni vitio. E ui atonu na tusitusi e ni nai tagata na auai ia ni faamatalaga po o ni manatu tusitusia, ae na laiti foi na faamatalaga na i ai pea. O le mea lea, e le mafai ai ona tatou faapea atu, ua tatou iloa mea uma na saunoa i ai Iosefa Samita, e ui lava e mafai, mo se faataitaiga, ona sii mai faamatalaga a Uilifoti Uitilafi e uiga i le lauga a Iosefa.
I isi tulaga, e le’i maua lava vaega taua o le talafaasolopito o le Ekalesia. Mo se faataitaiga, e ui ina i ai a tatou faamaumauga e uiga i le taofia mai o le perisitua mai alii e tupuga mai i Aferika uli, e leai ni faamaumauga o i ai o faamalamalama aloaia mai ai le pogai na amata ai lea faiga. E faapena foi, e le o i ai ni a tatou faamaumauga auiliili o le asiasiga a Peteru, Iakopo, ma Ioane e pei o le auiliili o tala e uiga i le asiasiga a Ioane le Papatiso (tagai Iosefa Samita—Talafaasolopito 1:66–75). E faapena foi, e ui ua ia i tatou faamaumauga o perisitua na taofia mai i alii o augatupulaga o Aferika uli, e leai se faamaumauga na sao mai i lena faatonuga e faamatala ai le mafuaaga na amata ai le faatinoga. I le suesuega o le talafaasolopito, o le le i ai o ni faamaoniga, e le o se pogai talafeagai mo le le mautonu. O le aoao e uiga i le tuanai o se taumafaiga o le faapotopotoina faapena le faatuatuaina ma, pe a mafai, o molimau faamaonia a o faasaoina le faamasinoga mulimuli i luga o vaega o le talafaasolopito lea e le mafai ona tatou malamalama atoatoa i ai ona o le le lava o faamatalaga.
E le tautatala mea moni, ae o tagata faamatala tala
Talu ai e le atoatoa vaega o loo i ai o mea ua tuanai, ua taumafai ai nisi o tagata e sosoo ia vaega ina ia mafai ona faamatala ai se tala. O tala anamua na faamatalaina e i latou na auai i mea na tutupu i le tala, ma na masani ona faamatala ai mea na latou oo i ai ma le pogai na taua ai ia i latou. O nisi o tagata na auai na faamatalaina atu a latou tala i ni taimi se tele i ni aofia eseese. O nisi o mea na tutupu na faaosofia ai le toatele o tagata auai e faamatala atu o latou aafiaga. O isi mea na tutupu na galo seia oo ina toe manatua, ona o se aafiaga mulimuli ane.
O tala e aoina mai ma toe faamatala e isi mo le tele o mafuaaga—e faafiafia ai se aofia, faatau atu ai se oloa, mamanu ai manatu o tagata lautele, pe uunaia ai se suiga. O tala taitasi e avea o se faaliliuga o mea ua tuanai, e fausia i luga o fasi vaega moni ma faaosofia e le manatua, mea e fiafia i ai, ma sini a le faamatala tala. O le taunuuga, o tala e uiga i mea ua tuanai e le atoatoa ma o nisi o taimi e feteenai ai. E ao ona tatou mafaufau ma le faaeteete i taimi uma po o ai o loo faamatalaina ia tala, po o faapefea ona latou faamatalaina, ma aisea ua latou faamatalaina ai.
Na tuuina mai e Iosefa Samita se faataitaiga o le ala e fai ai ni iloiloga o le au faamatala tala ma mea moni. I le 1838, na ia ta’ua ai e faapea, na uma ona i ai “le tele o tala ua faasalalauina e tagata loto leaga ma fai togafiti, e faatatau i le tulai mai ma le alualu i luma O Le Ekalesia a Iesu Keriso o le Au Paia o Aso e Gata Ai.” O le taunuuga, sa ia tusia ai se talafaasolopito na fuafuaina e “tuu atu ai i tagata sailiili uma le mea moni ia maua tala saʼo, e pei ona tutupu mai, e faatatau uma ia te aʼu ma le Ekalesia, e pei ona i ai ia te aʼu le tonu o ia mea” (Iosefa Samita—Talafaasolopito 1:1). O tala uma na faamatala e uiga ia Iosefa Samita e le tutusa le taua pe tutusa foi le sa’o atoatoa. O tala na faamatala e tagata na sili atu ona latalata i mea na tutupu i vaitaimi ua tuanai, atonu e sili atu le faatuatuaina. O tala e sili ona lelei, e tagai i vaega uma o loo maua o mea ua tuanai, ma iloa manatu na afua mai ai.
O mea ua tuanai e ese mai i mea i le taimi nei (ma e le afaina lena mea)
A o tatou saili ia malamalama i fasi vaega o mea ua tuanai ma tala na faamatala e uiga i ai, tatou te iloa ai tagata, nofoaga, aafiaga, ma tu ma aga e ese mai ia i tatou lava. O suiga i mea faasaienisi, tekinolosi, ma agaifanua e maua mai ai ni aafiaga eseese i le fanau mai, tausami, femalagaaiga, aso malolo, tumama, tafaoga faamasani, vai faafomai, ma le oti. O le eseese o faiga faaupufai ma faaletamaoaiga, e fatufatu ai ni aafiaga eseese i aoaoga, filifiliga, saolotoga ma avanoa. O manatu i aso ua tuanai e ese mai i o tatou manatu e uiga i galuega, aiga, auaunaga i tagata lautele, ma le matafaioi ma tulaga o tamaitai ma tagata e fai si ese mai mai le toatele. O tulaga faaletino uma o aafiaga o le tagata soifua, e suia i le aluga o taimi i auala e laiti ma tetele.
Mo se faataitaiga, mai la tatou vaaiga i le taimi nei, o le faaaogaina e Iosefa Samita o se maa vaai e faaliliu ai le Tusi a Mamona e foliga mai e matuai ese lava. Ae peitai, i lona vaitaimi, e toatele tagata na talitonu o mea faitino faaletino e mafai ona faaaoga e maua mai ai savali faalelagi. O nei talitonuga na faavae, o se vaega, i tala faaletusi paia lea na faaaoga ai mea faitino mo faamoemoega paia (tagai Numera 17:1–10; 2 Tupu 5; Ioane 9:6). O se faaaliga na maua e Iosefa mo le faatulagaga o le Ekalesia, na faamatala mai ai e faapea, “sa tuu mai ia te ia [e le Atua] le mana mai i luga, e ala i auala na saunia muamua, e faaliliu ai le Tusi a Mamona” (MF&F 20:8). E ui o “ala” na aofia ai se maa vaai faapea ai foi ma le Urima ma le Tumema, e mafai lava ona tatou iloatino le savali faaleaoaoga faavae “e musuia e le Atua tagata ma valaaulia i latou i lana galuega paia i ona po nei … ; ua faaali mai ai o ia lava o le Atua e tasi o ananafi, i le asō, ma le faavavau” (MF&F 20:11–12).
O manatu le faavaea i aso nei ua mimilo ai [uiga] o mea ua tuanai
Talu ai o taimi ua tuanai na ese mai i o tatou vaitaimi, o lea e tatau ai ona tatou faaeteete e aua ne’i o tatou faia ni tala le faavaea e uiga i mea ua tuanai e faavae i o tatou manatu ma tulaga faatauaina i le taimi nei. E le mafai ona tatou faapea, o tagata i aso ua mavae na pei uma lava o i tatou po o le, o le a latou talisapaia o tatou agaifanua po o talitonuga. E le mafai ona tatou faapea, ua tatou iloa mea uma i le taimi nei, ua tatou faitau i punavai uma, po o le, o o tatou malamalamaaga i le taimi nei e uiga i aso ua tuanai o le a le suia lava. E masani lava, o na mea ua tatou manatu o ni faafitauli i taimi ua tuanai, o le mea moni ua na o ni masalosaloga le lelei na faia i le taimi nei.
Mo se faataitaiga, na tau mai e Iosefa Samita, “Ou te le’i fai atu lava ia te outou ua ou atoatoa.”1 Afai tatou te faapea sa le’i faia lava e perofeta ni mea sese, ia atonu o le a tatou tete’i i le iloa o taimi na fai ai e Iosefa [ni mea sese]. Ina ia “faaleleia” lenei faafitauli, e le tatau ona tatou taofimau ma le lotomalo e faapea, sa atoatoa Iosefa pe tuuaia foi le Ekalesia i le taufaavalea. Ae, e mafai ona tatou talia o Iosefa sa o se tagata soifua ma vaai atu ia te ia i le tulaga o isi tala faaletusi paia e uiga i perofeta. O le taunuuga, e mafai ona suia o tatou manatu le faavaea ia iloa o perofeta uma o ni tagata soifua o le mea lea, e i ai foi o latou le atoatoa. E mafai ona tatou lagona le faafetai ona o le galue ma le onosai o le Atua ia i tatou taitoatasi. O le faailoaina o sese i o tatou lava manatu, o nisi taimi o le mea aupito faigata lea o le malamalama i le talafaasolopito.
O le aoaoina o talafaasolopito e manaomia ai le lotomaualalo
Pe a tatou tau atu i talafaasolopito e le o atoatoa, avanoa mo faaliliuga, ma ese mai nai lo le mea na tatou manatu i ai, e tatau ona “tuu atu [lo tatou] faalagolago i le Agaga lena lea na te taitai … ia savali ma le lotomaualalo” (MF&F 11:12). Mai la tatou vaaiga i aso nei, e mautinoa lava ua tele atu mea ua tatou iloa nai lo o mea na iloa e i latou na auai e uiga i le taunuuga o le vaitaimi ua mavae, ae e matuai itiiti foi ni mea ua tatou iloa e uiga i o latou aafiaga o le ola ai i na vaitaimi ua mavae. O tagata o e na ola i taimi ua mavae, na tatau lo latou i ai i o latou vaitaimi ma nofoaga ma tulaga. Ina ia i ai le alofa mama mo o latou eseesega ma le lotomalamalama i o latou aafiaga, e ao ona tatou amata i le lotomaualalo i o tatou lava tulaga faatapulaa. E manaomia le lotomaualalo ia le faamasino atu ai i tagata i vaitaimi ua tuanai e ala i o latou tulaga faatauaina. E manaomia le lotomaualalo e faailoa atu ai tatou te le iloa mea uma, ia faatali ma le onosai mo nisi tali, ma faaauau pea ona aoao. A maua mai ni afuaga fou e tuuina mai ai ni vaaiga fou e uiga i mea na tatou manatu ua tatou iloaina, e manaomia le lotomaualalo e toe faafou ai o tatou malamalamaaga.