Muai Faauuina

“I le muai olaga o agaga, sa tofia ai e le Atua ni agaga faapitoa e faataunuuina ni misiona patino i le lalolagi. Ua taua lenei vaega o le muaifaauuina. O le muaifaauuina e le faapea ua mautinoa ai o ia tagata o le a latou maua ni valaauga po o ni tiutetauave faapitoa. O avanoa faapena e oo mai i lenei olaga o se taunuuga o le faaaogaina ma le amiotonu o le faitaliae pei lava ona oo mai le muai faauuina o se taunuuga o le amiotonu i le muai olaga.

Na muai faauuina Iesu Keriso e faataunuu le Togiola, ma avea ai ma “Tamai Mamoe na fasia mai le faavaega o le lalolagi.”

Ua ta’u mai e tusitusiga paia e uiga i isi o e na muai faauuina. Na iloa e le perofeta o Aperaamo lona muai faauuina ina ua ia maua se faaaliga vaaia lea sa ia vaai ai i le “toatele o e tamalii ma taʼutaʼua” i agaga i le muai olaga i le lalolagi o agaga. Sa ia faapea mai: “Ma sa silasila atu le Atua i ia agaga ua lelei i latou, ma sa tu o ia i le lotolotoi o i latou, ma sa fetalai o ia: O i latou ia o le a Ou faia ma aʼu pule; aua sa tu o ia i le lotolotoi o i latou o ni agaga, ma sa silasila atu o ia ua lelei i latou; ma sa fetalai mai o ia ia te aʼu: Aperaamo e, o oe o se tasi o i latou; sa filifilia oe ae e te lei fanau mai.” Na ta’u atu e le Alii ia Ieremia, “Na a’u iloa oe a o lei faia oe e a’u i le manava; na a’u faapaiaina oe a o lei fanau mai oe, na a’u tofia oe e fai ma perofeta i nuu.” Na muai faauuina Ioane le Papatiso e saunia tagata mo le galuega a le Faaola i le olaga nei.

O le aoaoga faavae o le muaifaauuina e mo tagata uma o le Ekalesia, ae le na o le Faaola, ma Ana perofeta. A o lei foafoaina le lalolagi, sa tuuina atu ni tiutetauave faapitoa i ni tamaitai faamaoni ma sa muaifaauuina foi ni alii i ni tiute faapitoa o le perisitua. A o faailoa atu e tagata o latou agavaa, o le a tuuina atu ia i latou avanoa e faataunuuina ai tofiga na latou mauaina i lena taimi.

Autu Fesootai

Fuafuaga o le Faaolataga