Auauna Atu

I Lana galuega talai i le lalolagi, na faaalu le taimi o Iesu Keriso i le auauna atu ma fesoasoani i isi. Ua faapena foi ona faia e soo moni o Iesu Keriso. Sa fetalai mai le Faaola, “O le mea lea e iloa ai e tagata uma lava o o’u soo outou, pe afai ua outou fealofani” (Ioane 13:35).

Vaaiga Aoao

O i latou e papatiso e osi feagaiga e tauave i o latou lava luga le suafa o Iesu Keriso. Na faamatala e le perofeta o Alema lenei feagaiga i se vaega o tagata fou liliu mai na mananao e papatiso. Na ia matauina lo latou mananao e “o mai i le lafu a le Atua” na aofia ai se naunau e tuuina atu le auaunaga aoga —ia “tauave avega a le tasi, ina ia māmā,” ia “faanoanoa faatasi ma e e faanoanoa,” ma ia “faamafanafana atu ia te i latou o e e manaomia le faamafanafanaga” (Mosaea 18:8–9).

O le Faaola o le faataitaiga sili o le auauna atu. E ui lava sa Ia afio mai i le lalolagi o le Alo o le Atua, ae sa Ia auauna atu ma le lotomaualalo i tagata uma na vagaia o Ia. Na Ia fetalai, “O a’u nei, o loo ia te outou pei o le auauna lava” (Luka 22:27).

Sa faaaoga e le Faaola se faataoto e aoao atu ai le taua o le auauna atu. I le faataoto, na Ia ta’ua ai Lona toe foi mai i le lalolagi i Lona mamalu ma le tuueseeseina o e amiotonu mai e amioleaga. I e amiotonu i lenei faataoto ua Ia fetalai ai: “O mai ai, o outou ua faamanuiaina e lou Tama, ia fai mo outou tofi le malo ua saunia mo outou ao lei faavaeina le lalolagi: aua na ou fia ‘ai, ona outou avane ai lea ni mea ou te ‘ai ai; na ou fia inu, ona outou avane ai lea ni vai ou te inu ai; sa fai a’u ma tagata ese, ona outou talia lea o a’u: na ou le lavalava, ona outou faaofuina lea o a’u; na ou ma’i, ona outou asiasia mai lea o a’u; na ou i le falepuipui, ona outou o ane ai lea ia te au” (Mataio:25:34–36).

O e amiotonu, na le mautonu i lea folasaga, na fesili, “Le Alii e, o anafea na matou iloa ai oe ua fia ‘ai ma matou fagaina oe? po o fia inu, ma matou avane e te inu ai? O anafea foi na matou iloa ai oe o le tagata ese, ma matou talia oe? po o le le lavalava, ma matou faaofuina oe? O anafea foi na matou iloa ai oe ua ma’i, po o i le fale puipui, ma matou o atu ai ia te oe? “ (Mataio 25:37–39).

Ona tali atu lea o le Faaola, “Aua na faia e outou i le tasi o e aupito itiiti o o’u uso nei, o a’u lea na outou faia i ai” (Mataio 25:40).

O avanoa mo le auauna atu i isi e le faatapulaaina. E mafai e upu ma galuega agalelei ona aveesea avega ma faafiafia ni loto. O le faasoaina o le talalelei o se auaunaga sili faatasi ma ni taunuuga faavavau. O le ki moni e tasi i le fiafia o le galue mo le fiafia o isi.

Tusifaamaumau Ou Lagona Uunai