Auaunaga i le Ekalesia
o A’u Aso Sa e Faatumulia i Auaunaga
E alala le tusitala i Kalefonia, ISA.
E faatumulia o’u Aso Sa, ae ou te lagona le loto faafetai o loo mafai ona ou auauna atu e aunoa ma ni faigata e pei ona sa fetaiai ma taitai anamua o le Ekalesia e pei o Elder Parley P. Pratt.
Ata na tusia e Chidy Wayne
O le taeao o le Aso Sa. I o’u luma atu ua i ai sa’u faatulagaga 12 itula o fonotaga, faatalanoaga, faamauga, ma faauuga. O le a ou amata i le tasi nofoaga autu o le siteki ma faaiu i se isi falelotu i le isi itu o le taulaga—e [faia nei] mea uma i se aso vevela tele.
Ou te tulimatai atu lava i fonotaga taitasi, faatalanoaga, faamauga, ma faauuga. Ae o ananafi, a o ou mafaufau i le pisi tele o le a ou i ai, sa ou faatagaina sina lagona o le faanoanoa mo au lava—seia oo ina ou tatalaina le Tusi o le Talaaga o le Soifuaga o Parley P. Pratt ma amata ona faitau mai le mea sa gata ai la’u faitau talu ai. Sa ave faapagota ia Elder Pratt, faatasi ai ma Iosefa ma Ailama Samita ma isi, i taimi o aso faigata i Misuri. Ina ua uma ona avatu i Initipene, sa lokaina le Usoga i se faletalimalo ma momoe ai i luga o le fola ma se fasi poloka laau e aluluga ai.
I se tasi taeao malulu, ma le toulu o le kiona sa ala ae ai Elder Pratt, ma, sa aunoa ma le iloaina, sa sola ese ai mai le faletalimalo. Sa ia agai atu i le itu i sasae e oso atu i totonu o le taulaga ma agai atu i totonu o fanua lata ane. Ina ua mavae ona savali pe tusa ma se maila (1.6 km), sa tau atu ai Elder Pratt i se vaomatua, sa ufitiaina e le kiona ona tulaga savali atoa ai ma laau sa mafai ona lafi ai.
Sa ia mafaufau i ona tulaga faigata. O le faaauau pea i le itu i sasae o lona uiga o le sola atu lea i se isi setete, i se nofoaga e mafai ona ia auina atu ai se tusi i lona aiga ina ia faatasi ma ia. O le toe foi atu i le faletalimalo o lona uiga o le falepuipui ma le moliaina i ni soligatulafono mamafa. E ui sa faaosoosoina ia sola ese, ae sa mafaufau Elder Pratt i “faafitauli, po o le oti foi” o le a ia faamatua’ia i isi pagota pe afai o le a ia sola ese.
A o ia le mautonu ai, sa ia manatua se mau: “Aua ai se fia faasaogalemuina lona ola, e maumau ai ia te ia; a o le faamaumau lona ola ona o a’u o le a toe maua e ia, o le ola lava e faavavau” (tagai Mareko 8:35; MF&F 98:13).
Sa toe foi atu Elder Pratt i le faletalimalo. Sa sosoo ai ma masina o sauaga i totonu o le falepuipui—sa aunoa ma se aiga, faamalosiauga a le Au Paia, po o le tomai e auauna atu ai i lona valaauga faaaposetolo.1
Sa tapuni le tusi, ma ou mafaufau loloto i puapuaga a le Au Paia anamua—o nisi o i latou o ou tuaa. Ona o la latou molimau e uiga i le talalelei ma lo latou faatuatua ia Iesu Keriso, sa latou onosaia ai le agaleagaina ma le sauaina. Ona o lo latou tutumau, ua mafai ai ona ou auauna atu ma tapuai saoloto i le asō, ma aufaatasi ma i latou i le faatuatua ma le molimau.
A o ou sauniuni mo lenei aso Sapati, o loo saogalemu lo’u aiga, o loo tulimatai atu i se aso o tapuaiga i se falelotu toafilemu. O le faaaumea a le Au Paia o le a faafiafiaina ai lo matou aso. O le a matou olioli faatasi ma i latou i le faatinoina o faamauga ma faauuga, faataunuuina o tiutetauave, ma le faamalosia o le faatuatua. O le a matou aai ma feinu i le faamanatuga, ma manatuaina lo tatou Faaola ma Lana taulaga togiola. Ma o le po nanei o le a matou potopoto faatasi ai i le matou fale e faitau le Tusi a Mamona ma tatalo faatasi a o lei taooto i lalo i moega mafanafana ma aluga lelei o matou ulu i aluga malū.
Ua faatumulia o’u Aso Sa. Mo lena mea ou te faafetai ai lava ma ua faamanuiaina ai au.