O Upu Faaperofeta i se Nofoaga sa Lei Mafaufauina
Sa nofo le tusitala i Atenitina a o auauna atu lana tane o se peresitene o le misiona.
O se mekasini sa tuulafoaia o le a suia ai le olaga o Oscar Castro e faavavau.
Sa papatisoina Oscar Castro ma faamauina i le mavae ai o le mauaina o se lomiga o le konafesi aoao i le Liahona i totonu o le fale sa ia masii atu i ai.
Ata na tusia e Dan Burr; atapue na tuuina mai e le tusitala
O le aso na tuua ai e le ava a Oscar o ia ma le la fanau laiti e toalua, o se tasi o aso sili ona faigata o lona olaga. Sa anoanoai ni faaiuga sa manaomia ona faia. Sa ia saili mo se galuega, ma o lea la ua ia manaomia se nofoaga fou e nofo ai. Sa foliga atu ia te ia ua faaleagaina lona olaga. Sa ia mafaufau ua lava ia lea, ma e semanu o le tulaga lava lea pe a na leai si ana fanau aulelei e toalua.
I San Juan, Atenitina, e le tele ni fale e maua e lisi atu i le ituaiga o tupe sa maua e Oscar. Ae sa i ai se tamai fale i se pitonuu saogalemu e lei leva ona tuua e se vaega o alii talavou, o lea sa nofolisi ai loa Oscar ma sauni ai e amata se olaga fou ma lana fanau.
I lo latou fale fou, sa taatitia solo ai ni mekasini ma ni tusi i luga o le fola, ma i le mavae ai o se aso atoa o faamama ma tuu ese mea sa maua ai, sa saofai ifo ai i lalo Oscar ma matamata i se tasi o mekasini. Sa maileia o ia e le itulau i fafo mo se mafuaaga. I lalo ifo o le ulutala, Liahona, sa i ai se ata o se toeaina matua o loo tu i luga o se olo ma saunoa atu i tagata. Sa faamanatu atu e lea tagata ia te ia ata o perofeta o le tusi paia.
Sa susue e Oscar le mekasini ma amata ona faitau, “Ua iloa uma e i tatou taitoatasi e tatau ona tatou tau atu i tagata tatou te alolofa i ai, tatou te alolofa ia i latou. Ae o mea ua tatou iloaina e le o taimi uma e atagia atu ai i mea tatou te faia.”1 Sa mafaufau Oscar i upu malolosi sa feupuai ai i le tele o taimi i lo la va ma lona toalua. Sa ia manao e aoao lana fanau ina ia lelei atu nai lo lena. Sa faaauau pea ona faitau Oscar i le mekasini, ma amata ai ona ia lagonaina le tuputupu ae o le faamoemoe i lona loto. A o lei maea le vaiaso, ua uma ona ia faitauina tusiga uma ma manao ai ia iloa atili nisi mea.
I se masina mulimuli ane, sa savalia ai e ni faifeautalai se toalua le pitonuu a Oscar. Sa alu atu Oscar ia i laua ma fesili atu i ai pe o i laua o ni faifeautalai o le Au Paia o Aso e Gata Ai ma pe fia foi se tau e maua ai nisi mekasini faapena a le Ekalesia. Sa tau atu e faifeautalai ia te ia o le tau e na o le 20 minute lava o lona taimi.
O le aso na sosoo ai sa asiasi atu ai faifeautalai ia Oscar i lona fale. Sa faamatala atu i ai e Oscar lona masii atu ma maua ai tusi tuai, mekasini, ma tamaitusi ia na ala ai ona ia iloa e uiga i le Ekalesia. Sa ia faamatala atu o le tusiga muamua lava na ia faitauina sa fesootai tonu lava ma lona olaga i lea taimi. Ua ia iloaina nei le taua o le aiga ma sa manao ai ia iloa atili e uiga i le afiafi faaleaiga ma le tatalo faaleaiga. Sa ia tau atu i faifeautalai isi mea ua ia aoaoina e uiga i le Ekalesia, e aofia ai Iosefa Samita ma le Toefuataiga o le talalelei.
Sa ia pulatoa atu i fofoga o faifeautalai ma faapea atu i upu e fia faalogo lava i ai faifeautalai uma: “Ou te talitonu o Iosefa Samita o se perofeta a le Atua.” Sa valaaulia o ia e faifeautalai ia papatisoina, ma i loimata i ona fofoga, sa taliaina ai e Oscar. I ni nai vaiaso mulimuli ane, sa papatisoina ai Oscar Castro ma faamauina o se tagata o le Ekalesia.
Sa sauniaina e le Alii Oscar, ma sa salamo lona agaga ma saunia e aoao ma tuputupu ae. I lena aso le mafaagaloina ma le faagaeetiaina, o le agaga o savali sa i ai i totonu o le lomiga o le konafesi aoao i le Liahona sa ootia ai le loto o Oscar. Sa lei iloaina e e na umiaina muamua lea fale le aafiaga o le a i ai i le tuua o ni nai mekasini a le Ekalesia, ae o savali o le talalelei i na mekasini na avea ma se meafaigaluega taua faafaifeautalai. I le taitaiina atu o ia i upumoni sa ia sailia, na latou suia ai le olaga o Oscar e faavavau.