Seia Tatou Toe Feiloai
O Le Atamai Faalelagi o le Ekalesia a le Alii
“E Le Tulemoe o Ia, e le Moe Lava,” Liahona, Iul. 1983, 5–8. Ua faalaugatasia faailoga ma mataitusi tetele.
Ua faataunuuina e le Atua Lana galuega e tusa ma Lana lava fuafuaga sili.
Ata pue na saunia e Mary Ouzounian, faaaloaloga a le Falemataaga o Talafaasolopito o le Ekalesia
O le atamai faalelagi o le faatulagaga o lenei galuega ma valaauga e avea ma taitai ua manino lava. O le Au Pulega Aoao o ni tagata taitoatasi uma, e tofu lava le tagata ma ona lava uiga faaalia. E aumai e i latou taitoatasi i o latou tiutetauave se eseesega lautele o poto masani ma talaaga. A tulai mai ni mataupu e talanoaina i aufono faaleautaitai o le Ekalesia, e saoloto uma i latou e faaali o latou manatu. A matauina e se tasi lena faagasologa mataina o faagaoioi, e mataina tele le molimauina o le mana o le Agaga Paia o uunaiaina nei tamalii. E eseese lava o latou manatu ae e le faaalia ma le mateletele, ma e faamaluluina lava manatu i le gasologa ma oo ai ina autasi i le lotogatasi. “O lo’u fale o se fale o le maopoopo,” ua fetalai mai ai le Alii (tagai MF&F 132:8). I le molimauina ai o lenei faagasologa i le galuega, ua ou lagonaina ai se faafouga faifai pea o le faatuatua. …
Ua faaalia e nisi le popolega e faapea e foliga mai o le Peresitene o le Ekalesia e ao lava ona avea ma se toeaina matua, lea ou te tali atu ai, “O se faamanuiaga!” O le galuega o lenei tisipenisione sa muai faatulagaina e ala mai i le tufugaaao [o le Atua] le Perofeta o Iosefa Samita. Sa talavou ma malosi o ia i lena taimi, o se tasi sa lei mafaufau o ia pe fua ana faaiuga i uputuu o ona aso. O lona mafaufau sa talavou lea sa mafai e le Alii ona mamanuina e pei o le mamanuina o se omea fou ma iila a o Ia amataliaina Lana galuega.
O le taitai na sosoo ia Iosefa sa talavou foi i le taimi na fetaiai ai ma tiutetauave ogaoga o le taitaiina o se nuu atoa sa asaina le vao e faatoa se nuu fou.
Ae o mea faavae o la tatou aoaoga faavae ua faatulagaina lelei, ma ua tatou mautu ma le mausali o se nuu, seia oo ina toe poloaiina e le Alii se isi gaoioiga. Tatou te le manaomiaina nisi auala fou e fai ai ni mea. Tatou te manaomiaina le tuuto atu ma le usiusitai i mataupu faavae paia ua fetalaia. Tatou te manaomiaina le faamaoni i lo tatou taitai, o le ua tofiaina e le Atua. O ia o lo tatou perofeta, lo tatou tagatavaai ma le talifaaaliga. E le mafai lava ona tuua i tatou e aunoa ma se perofeta pe afai o le a tatou ola agavaa mo se perofeta. E le manaomia ona talavou o ia. Ua ia te ia ma o le a faaauau pea ona ia maua ni alii talavou ifo [ia te ia] e faimalaga i le lalolagi atoa i le galuega o le auauna atu. O ia o le faitaulaga sili pulefaamalumalu, o le e umiaina ki uma o le perisitua paia, ma o le siufofoga o faaaliga mai le Atua i Lona nuu.
E i ai se muagagana anamua e faapea, “Autalavou mo le faatinoga. Aumatutua mo le atamai.”
I lo’u manatu o loo i ai se mea e matua faamautinoa mai lava i le iloaina e faapea mo le lumanai ua muai vaaia e ao ona i ai se tatou Peresitene o le ua faautauta ma aoaoina, tofotofoina ma faaosoosoina, o lona faamaoni aiai i le galuega ma lona amiosao i le faataunuuina o le galuega ua mamanuina i le tele o faigata o le galuega, ua lava lona faatuatua, ma lona latalata i le Atua ua faafaileleina i le tele o tausaga. …
E le manaomia ona tatou fefefe i le lumanai pe afai tatou te taofimau i mataupu faavae ua faaalia.