O Se Fua mo le Aoaoina

Saunia e Rosemary Thackeray

E alala le tusitala i Iuta, ISA.

Faataitai auala nei e fa e avea ai le afioga a le Atua ma mea manogi i lou agaga.

A o ou talavou, sa ou faaaluina le tele o itula e matamata ai i lo’u tina i le umukuka. Na te faia ni meaai sili ona manogi, falaoa, kuki, ma ni pai mo lo matou aiga. Ina ua mavae sina taimi, sa amata ona ou faitauina ni fua, ma mulimuli i faatonuga, ma faia ni meaai. Sa ou lei tau faalagolago i lo’u tina—sa mafai ona ou faia e au lava ia.

E pei foi o le aoaoina o le kuka, tatou te aoao foi le talalelei ma atiae a tatou molimau e ala i le faatino. Ina ua uma ona tau atu e Liae i lona aiga lana miti e uiga i le laau o le ola, sa fai atu Nifae sa ia manao foi ia “vaai, ma faalogo, ma iloa e uiga i ia mea” e ia lava (1 Nifae 10:17). I nisi upu, mo Nifae sa lei lava le faalogo atu i le molimau a lona tama. Sa ia manao ia aoao le mea ua uma ona iloa e lona tama.

O le fua mo le aoaoina o le talalelei ua i ai ni nai laasaga faigofie. E mafai ona e faaaogaina manatu nei e fa e fesoasoani ai i lou aoaoina o le talelelei faatasi ma lou aiga, i le lotu, po o taimi o au suesuega faaletagata lava ia.

1. Saunia e aoao.

Amata au suesuega faaletagata lava ia i se tatalo. Ole atu i le Tama Faalelagi e fesoasoani ia te oe ia malamalama i mea o loo e faitauina. Tusi i lalo se fesili se tasi pe lua ma saili mo ni tali. O le a tuu atu e le Agaga Paia se molimau e uiga i le upumoni a o e faitau, mafaufau loloto, ma tatalo (tagai Moronae 10:5).

Sauni mo le aoaoina o le talalelei i le lotu e ala i le faitauina o le lesona ae e te lei alu. O lesona o le Sau, Mulimuli mai ia te Au e mafai ona maua i luga o le LDS.org ma i le Gospel Library app.

2. Ia auai [punouai] i lou aoaoina.

• Faitau mo le malamalama O le aofai o itulau e te faitauina po o le saoasaoa foi o lau faitau e le taua lena e pei o lou malamalama i le mea o loo e faitauina. Atonu e ao ona e toe faitauina faatele nisi o fuaiupu. Faaaoga se lomifefiloi e sue ai upu e te le iloaina. Mo se faataitaiga, o le a le uiga o le tisipenisione? E mafai ona e faaaogaina le Taiala i Tusitusiga Paia e sue i ai.

• Fai ni fesili e uiga i mea o loo e faitauina. Atonu e te tuu fesili, “O le a se mea na tupu i Ierusalema i le taimi na o ese ai Liae ma lona aiga? Aisea na le faalogo ai tagata ia Liae?”

• Taumafai e tali fesili nei e tolu e uiga i soo se aoaoga o le talalelei: Aisea na taua ai lenei mea i tagata i lena taimi? E faapefea ona faatatau ia i tatou i le taimi nei? E faapefea ona faatatau ia te au?

• Saili mo ni mamanu ma ni fesootaiga. Mo se faataitaiga, o a ni mamanu i le ala na tali atu ai Nifae i faigata? E faapefea ona pei le malaga a lona aiga i le vao ma le malaga a Isaraelu i fafo o Aikupito?

• Tusi ou lagona ma uunaiga i se apitalaaga. “A o e tusia i lalo ni uunaiga taua, e tele lava ina oo mai nisi uunaiga sili atu. Ma le isi foi, o le malamalama e te mauaina o le a maua i lou olaga atoa” (Richard G. Scott, “Ina Ia Maua le Malamalama ma le Malosi ia Faaaogaina Ai ma le Poto,” Liahona, Aok. 2002, 12, 14). Aemaise lava ia tusi i lalo le uiga o manatu i lou olaga.

• Tusi se ata. O le isi auala e faamaumau ai mea e te aoaoina o le tusi lea o se ata. I se tasi taimi sa ou asiasi atu ai i se uo mo se afiafi faaleaiga, sa faasoa mai e lona tinamatua ni tala patino e uiga i le faatuatua ma le tatalo. A o lei amataina le lesona, sa tufa atu e la’u uo i lana fanau laiti ni pepa ma ni vali ga’o ina ia mafai ai ona latou tusiaina ni ata o tala a o saunoa le tina o lo latou tina matua. O le tusiina o ni ata sa fesoasoani ia i latou ia gauai ma faalogo, ma sa latou faia foi ni fesili a o faagasolo ina ia faamanino ai ni vaega o le tala.

3. Suesue ma ola i le talalelei i aso uma.

O le aoaoina e moomia ai taumafaiga; e manaomia ona tatou faatatauina i tatou lava i le malamalama (tagai Mosaea 12:27). Sa fautuaina i tatou e Elder M. Russell Ballard o le Korama a Aposetolo e Toasefululua ina ia “faamautu se taimi ma se nofoaga e suesue ai tusitusiga paia i se tulaga faaleaso, e tusa lava pe na o ni nai minute” (“When Shall These Things Be?” Ensign, Dec. 1996, 60). A tatou suesue soo, e oo ina faigofie atu le aoaoina. Mo se faataitaiga, ua ou iloaina a ou faitauina moni lava ia mataupu o le Isaia i le Tusi a Mamona (nai lo le faamisiina), e amata ona ou malamalama i ai.

A oo mai i le aoaoina o le talalelei, e le lava le na o le iloa o se mea i le atamai. E manaomia foi ona tatou faatinoina se mea ua tatou aoaoina. A tatou faatinoina pea le upumoni, e faamautu mai e le Agaga Paia ia i tatou, ma tuputupu ae ai la tatou molimau. A tatou ola pea i lena upumoni, e amata ona tatou sui, ma oo ina liua ia Iesu Keriso.

4. Faasoa atu le mea ua e aoaoina.

O le faamatalaina atu i isi o se mataupu faavae o le talalelei i au oe lava upu e fesoasoani ia i tatou ia manatua lena mataupu faavae ma lagona le Agaga, lea e faamalosia ai a tatou molimau. E masani lava o le taimi lelei e faasoa atu ai o le taimi o le afiafi faaleaiga. E mafai foi ona e faasoa atu pe a outou talanoa ma ni uo i le aoga po o ni tagata o le aiga i le taimi o le taumafataga o le afiafi.

A tatou mulimuli i nei laasaga faigofie e fa ma saili atu ma le filiga ia iloa le Faaola, ua folafola mai ia i tatou e faapea “o le a faaali ia te i latou mealilo a le Atua, e ala i le mana o le Agaga Paia” (1 Nifae 10:19).

O Mea e Fa Tatou te Manaomia

“Tatou te le manaomiaina ni fesoasoaniga felanulanuai o suesuega ma e le tatau ona tatou faalagolago atoa i le malamalama faaleagaga o isi. Pau lava le mea tatou te manaomia o le i ai lea o se manao faamaoni e aoao, le mafutaga a le Agaga Paia, o tusitusiga paia, ma se mafaufau ola ma fesilisili.”

Elder David A. Bednar o le Korama a Aposetolo e Toasefululua, “O Se Faatanoa o le Vai Ola” (Faeasaite a le Ofisa o Aoga a le Ekalesia mo talavou matutua, Fep. 4, 2007), 3, si.lds.org.