Mana e Tumau Ai
E alala le tusitala i Iuta, ISA.
Faatasi ai ma se vae na gau ma se loto nutimomoia, sa ou manaomia ai le faamalologa. Sa mafaia ona o le faamoemoe.
Pe tusa ma se masina a o lei oo i lo’u 16 tausaga, sa matou o ai ma le matou aiga i se malaga sopo auala i le Iunaite Setete e asiasi i nisi o nofoaga o le talafaasolopito o le Ekalesia. Sa lei afaina ia te au le nofo ai i totonu o le taavale mo se taimi umi tele ona sa fiafia lava lo matou aiga i taimi uma. Ou te manatua le oso ai i totonu o le taavale i le aso na maea ai ona matou asia ia Winter Quarters, Nebraska. Sa matua timuga lava. Sa ou oso i le nofoa pito i tua, toso mai se palanikeke, ma faapupuu ma faalogo i le timu a o ou moe.
O le mea na sosoo ai sa ou manatuaina o le lagonaina e pei o loo ou taavilivili ma le le mataofiofia. Mulimuli ane, sa ou iloaina na sesee atu le matou taavale ma fetoai ma le pa sima i lalo o se alalaupapa i luga ae o le auala sa matou o ai. Ou te tau manatuaina le fai mai o se tagata ia te au ua gau lo’u vae ma ua matou agai atu mo se taotoga.
I le mavae ai o lena faalavelave a o amata ona toe faasolosolo malosi mai le falemai, sa sau lo’u tama i totonu o lo’u potu. Sa ia nofo mai i ou talaane i luga o lo’u moega ma aapa mai ma uu lo’u lima. Sa pei lava na ou lagonaina ma iloa le mea o le a ia tau mai.
“Pele,” sa ia fai mai ai, “o e iloaina le mea o loo e i ai?”
“O le falemai,” sa ou tali atu ai.
“O e iloaina le mea na tupu?”
“Sa tatou lavevea i le taavale.”
“Ua tau atu e se tasi ia te oe se tala e uiga i le isi vaega o lo tatou aiga?”
Sa ou nofo ona tali atu lea leai.
Sa ia fai mai o le a sologa lelei tagata uma—sei vagana ai lo’u tina. Sa lei sao mai o ia.
Sa ou faamoemoeina e lagona se faanoanoa lofituina i le taimi lava lea, ae leai. I le muai faateia ai o au, i se auala, mo se mafuaaga, sa ou lagonaina ai le filemu, o se lagona matagofie e mafai ona ou faalagolago i le Atua o le a lelei mea uma.
I le taoto ai iina i le falemai, sa ou manatuaina se tasi o nofoaga patino o talafaasolopito o le Ekalesia sa matou matamata ai i le lua aso a o lei tupu le faalavelave: Martins Cove, Wyoming. E toatele piaonia na maliliu iina mai le fiaaai ma le afaina i le kiona ma le tau malulu. Sa ou manatua le vaaia o ni faaputuga maa na tuu i luga o tuugamau ma mafaufau i le tele o le faatuatua na faia e le isi vaega na totoe o le au paionia e piki i luga a latou taavale tosolima ma faaauau le malaga. O lena tala na faagaeetia ai au. A o ou mafaufau i lena aafiaga, sa ou iloa ai sa tutumau le au paionia ma e ao foi ia te au ona tumau, e aofia ai le faamalosi mo ou tei laiti.
O lo’u lagona muamua lava o le filemu sa tumau ia te au mo le isi vaiaso na sosoo ai ma le afa. Sa ou saofai i se nofoa faataavale ma matamata atu i mea faapapa mai le faamalama o le falemai i le Aso Fa o Iulai ina ua taia au—ua mou atu lo’u tina. O le a le i ai o ia i lo’u faauuga i le aoga maualuga. O le a le i ai o ia iina pe a ou mauaina ou faaeega paia i le malumalu. O le a le i ai o ia i la’u faaipoipoga. Ua maliu o ia.
O iina sa amata ai ona matua faasolo faigata. Sa matautia le tiga o lo’u vae, ma sa le oso so’u fia ai. Sa ou matamata i le TV e aunoa ma le vaai i ai, ma sa tele lava ina ou moe. Sa popole lo’u aiga ia te au ona sa ou lei tagi tele.
Ae sa maligi tele loimata ina ua matou taunuu mulimuli ane i le aiga i Oregon i se fale tuufua. Sa faafuasei ona ao ia te au ona faataunuu nisi o tiutetauave a lo’u tina, ma sa tele ina taulai mai ou tei ia te au mo se faamafanafanaga. Sa ou taumafai e faamalosi mo i latou. Ae sa lei faigofie.
O le toe foi atu i le aoga sa faigata. Sa faalogo uma tagata i le faalavelave, ma afai sa latou lei faalogo i ai, sa latou faatoa faalogo i ai ina ua faalauiloa atu au e ou faiaoga o le teineitiiti sa lavea i le faalavelave. Sa ou lagona le tuuatoatasi.
Sa faapitoa le faigata ina ua toe faaipoipo lo’u tama i le mavae ai o le iva masina talu ona maliu lo’u tina. Sa ou iloaina o le a lelei lo’u tinafai mo lo matou aiga ma sa matou manaomiaina o ia, ae sa faigata ona fetuunai.
E ui i lea sa lei faanoanoa mea uma i lea taimi. Sa ou lagonaina le tele o le alofa mai lo’u Tama i le Lagi, lo’u aiga, ma ou taitai o le Ekalesia. O mea sa fesoasoani ia te au e faamalolo ma agai ai i luma ina ua mavae le faalavelave o le faia lea o mea faigofie na faamalosia ai lo’u faatuatua. O aso uma sa ou faaaluina ai se itula a o lei moe e faitau ai tusitusiga paia, tatalo, ma tusitusi i la’u apitalaaga sa i totonu o la’u pusatu. I le faalilolilo ai i totonu o la’u pusatu, sa le moomia ai ona ou malosi mo ou tei. Sa mafai ona ou tagi i le tele ou te mafai ai ma sasaa atu lo’u loto i le Atua. Sa ou ta’u sa’o atu ia te Ia le mea sa ou lagonaina ma le tele o lo’u misia o lo’u tina. Ou te iloa sa Ia faafofoga mai ia te au ona o le tele o le alofa mutimutivale agamalu sa ou lagonaina. Sa oo ina paia le avanoa o le pusatu ia te au.
O le faia o na mea faigofie sa fesoasoani ia te au e tumau ai ona fesootai atu i le Atua nai lo le taumamao mai ia te Ia ma lagona le ita. Na ou lei vaai i le faalavelave o se faamanualiaina e le Atua o lo’u aiga. Sa ou lagonaina se mana tele atu ina ia onosai ma gauai atu i Lona finagalo ma agai pea i luma i ou aso faigata. Ma sa i ai ni aso faigata moni lava.
Ina ua uma ona toe faaipoipo lo’u tama, sa ou manao ia faia se faataitaiga lelei mo ou tei, ma sa ou le manao moni e i ai ni ou lagona leaga e faasaga i lo’u tinafai, o lea sa ou faaauau ai pea ona tuu atu lo’u faalagolago i le Atua. O se tasi o gaoioiga i la’u tusi o le Alualu i Luma o le Tagata Lava Ia sa taulai atu i le faaleleia atili o lo’u olaga i le aiga e ala i le faamalosia o la’u sootaga ma se tagata o le aiga mo le lua vaiaso. O le mea taua o le sini sa taumafai ina ia avea e faapei o Keriso ma faaalia le alofa e ala i faatinoga. Sa ou filifili e taumafai i ai ma auauna atu i lo’u tinafai.
I lo matou aiga ua tuufaatasia, sa matua tele le ipu. O iina la sa ou amata ai. A o ou auauna atu ia te ia i le isi lua vaiaso na sosoo ai, sa ou lagonaina le mafai ona alofa i lo’u tinafai ma le onosai e ui lava sa ou tau le fiafia i le tulaga ua i ai. O le taulai atu i le auauna atu ia te ia sa fesoasoani ia te au e taulimaina ia taimi faigata ona sa ou lagonaina le Agaga na faatasi ma au.
Ou te le o malamalama pea i mea uma e uiga i le mafuaaga o le faalavelave na tupu i lo’u aiga, ma o loo i ai pea ni aso faigata. Ae e pei lava o paionia, ua ou tuu atua lo’u faalagolago i le Atua ma ua ou maua ai le mana e tumau ai.