O Leo o Le Au Paia o Aso e Gata Ai
O Agelu e Suafa ia Mr. ma Mrs. Dunn
Ata na tusia e Wilson Ong
Sa ou matamata i le TV ina ua valaau mai lo’u tina e tau mai ia te au lona tuagane, si o’u Uncle o Floyd ua 92 tausaga le matua, ma lona toalua, o Aunt Mili, sa gasegase i le fulū na sa leai se meaai i lo la fale. Sa le lava foi lo la malolosi e o ai i le faleoloa e faatau mai se meaai. Sa leai se aiga o Uncle Floyd ma Aunt Mili na lata ane, o lea sa leai ai se tasi e fesoasoani ia i laua.
Sa tomanatu lou tina pe mafai ona ou fesoasoani i ai. Ua na o au le tagata o le Ekalesia i lena vaega o lou aiga, ma sa valaauina foi au e fesoasoani atu i ni tulaga faapenei muamua. O le faafitauli sa ou nofo i Iuta, ISA, ae o lou aunt ma lou uncle sa nonofo i Hemet, Kalefonia, ISA.
Sa ou fai atu i lou tina e tuu mai ni nai minute sei mafaufau ai po o le a se mea e fai. Sa i ai sau uo sa nofo latalata i Hemet, o lea sa ou valaau ai ma fesili i ai pe na te silafiaina se tasi i Hemet. Sa ia tau mai ia te au se tamaitai sa la faigaluega faatasi i le Malumalu o Redlands Kalefonia e suafa ia Sister Dunn o se peresitene o se Aualofa iina.
Ina ua tali mai e Sister Dunn le telefoni, sa ou amata fai atu, “Talofa, Sister Dunn. E te le iloaina a’u, ae o lo’u igoa o Nancy Little, ma ou te nofo i Iuta. O a’u o se tagata o le Ekalesia, ae o lo’u aunt ma lo’u uncle e nonofo i Hemet e le o ni tagata o le ekalesia. Ua gasegase uma i laua ma ua leai se meaai i lo la fale.” Sa ou tau atu ia te ia le mea o loo nonofo ai i laua, lea sa mamao mai le mea sa i ai o ia, ma faamalamalama atu i ai na o le pau le mea ou te fia mauaina o se faamatalaga e uiga i se faleaiga e lata ane ia i laua e mafai ona tilivaina ni meaai.
Ae, sa augani mai Sister Dunn o le a la aveina ma lona toalua ia meaai i lo’u aunty ma lo’u uncle. O loo i ai se la supo ma ni falaoa na fai i le fale, ma o lea faatoa uma ona tao e lona tina ni kuki. Sa ou tetee atu i ai ae sa finau mai pea o ia.
I ni nai itula mulimuli ane, sa valaau mai ai Sister Dunn ma faamautinoa mai ia te au ua lelei mea uma. Mulimuli ane sa valaau mai lo’u tina e tau mai ia te au le tala a uncle Floyd e uiga i le la asiasiga. Sa ia fai mai, “Sa taunuu mai ni agelu i lo’u fale e suafa ia Mr. ma Mrs. Dunn. Sa la o mai ma ni lima tutumu i meaai: fualaau aina suamalie, fualaau faisua, supo na fai i le fale, falaoa, ma kuki. O kuki aupito sili ia ona lelei ua ou ai ai.” O le asiasiga a le au Dunn i lo’u uncle, sa fesoasoani ia i laua i o la manaoga, ona sii lea e Brother Dunn lo’u Aunty vaivai o Mili, sa mafatia mai le faama’i o le Galo o Mea, mai lona moega i se nofoafaataavale i totonu o le umukuka ina ia mafai ai e Sister Dunn ona fafaga ia te ia.
Ina ua valaau atu Uncle Floyd i lo’u tina e tau atu ai ia te ia le asiasiga, sa tagi o ia. Sa ia fai mai na te lei feiloai muamua lava i ni tagata agalelei ma agaalofa faapenei. Sa ia tau atu i lo’u tina ua matua laki lava a’u i le nofo ai i Iuta ma siosiomiaina e “na Mamona uma.”
I le fa aso mulimuli ane ina ua mavae le asiasiga, sa savali atu ai Uncle Floyd i lana pusameli ae see ai ma pa’u. Sa tau lona ulu i lalo ma i le fa aso mulimuli ane ae maliu o ia. E ese ai mai se tamaitai tausimai, o Brother ma Sister Dunn o tagata mulimuli ia sa vaai i ai lo’u uncle ae lei maliu o ia.
Ou te faafetai mo le faataitaiga FaaKeriso a se tasi o o’u uso a Aualofa na nofo i le faitau selau o maila le mamao, o se tasi ou te lei feiloai lava i ai, sa fesoasoani i lo’u aunt ma lo’u uncle.