O o Tatou Aiga, O o Tatou Auaiga
Anapogi ma Tatalo mo Ema
O le tusitala e alala i le Itulagi o le Laumua o Tenimaka
Ina ua pa’u lau tama teine mai se faamalama, sa ou manatu o le mea sili ona leaga sa ma fefefe i ai ua taunuu nei.
Ata © iStock/Thinkstock
Faatoa foi mai lava lou aiga mai se tafaoga matagofie. Ina ua mavae le taumafataga o le afiafi sa ou tuu ai le ma fanau toalua, o Markus e fa tausaga ma Ema e tolu tausaga, e taalo i le potumoe pitoaluga o le matou falemautotogi i le fogafale-fa. I Tenimaka, e matala faamalama e pei o ufi faamalama valavala. E masani lava ona loka ia faamalama, ae sa matou fetagofi faavaiti a o matou o i le matou tafaoga ina ia mafai ona faaea le fale i le taimi o le matou malaga.
A o fufulu au ipu, sa faafuasei ona ou lagonaina se mea ua matua sese lava. Sa ou tamoe atu i le potu malolo a o tamoe mai Markus i lalo o le faasitepu. Sa faataio mai o ia ma le fefe, ma faapea mai ua pa’u Ema i fafo o le faamalama—o se faamalama pe tusa ma le 40 futu (12 m) le maualuga mai le alasavali sima. Sa ou tamoe atu i lalo i faasitepu, ma faataio atu pea le igoa o Ema. Sa ou vaaia si au tama teine o taatia mai luga o le sima e peiseai ua uma lona ola. Sa le minoi atoa o ia ina ua ou sii ae o ia i luga, ma sa ou manatu ua faamautuina le mea sili ona leaga sa ou fefe i ai. O lo’u toalua, lea sa mulimuli mai ia te au i fafo, sa ia siiina o ia i ona lima ma vave ona tuu atu ia te ia se faamanuiaga faaleperisitua.
Sa vave ona oo mai le taavale a le falemai, ma sa faia se ma tatalo ma Markus a o galulue le vaega o faalavelave faafuasei ia Ema. Sa lei pine ae matou i ai uma i totonu o le taavale a le falemai ma agai atu loa i le falemai.
I le potu tigaina sa vave ona matou i ai faatasi ma tagata o le matou aiga na o mai e lagolago ia i matou. Sa toefoi atu Markus ma ona tausoga i le fale, ae ma nonofo ai ma si o’u toalua i le falemai, ma le leiloaina lava po o le a se tulaga ia Ema.
Ina ua mavae le mea sa foliga mai o se faataliga umi lava, sa mulimuli ane sau se tasi o fomai ma fesili mai mo se faamatalaga e uiga i le faalavelave. Sa latou fai mai e masani lava o se pa’u mai se maualuga faapea e ono tupu ai ni manuaga i totonu o totoga ma e itiiti lava sina avanoa e ola ai. O loo gau se ivi tua o Ema ma se manu’a i lona ulu, ae o ona maosiosia ua na o ni mea e vave ona toe te’a. Sa fai mai le fomai e masalo sa sapoina o ia e se agelu.
E ui lava o le faasaoina o le ola o Ema o se vavega, ae sa lei malamalama lava o ia ona o ni manuaga i lona ulu. Sa toe faamanuiaina e lo’u toalua ma ni uo mamae se toalua ia Ema. I lena faamanuiaga sa folafola atu ai ia te ia se toe faafoisia atoa o le malosi e aunoa ma soo se faafitauli tumau ma o le a avea lenei mea ma se aafiaga lelei i lona olaga. Sa ou lagonaina se lotofaafetai tele mo le mana o le perisitua. Sa faafofogaina a’u aioiga uma i po uma.
Sa ala ae Ema mai le koma i le fa aso mulimuli ane. I na aso e fa, sa anapopogi ma tatalo ai uo, tagata o le Ekalesia, ma isi mo ia. Sa ou lagonaina ia tatalo a le Au Paia faatuatua na siosiomiaina au, na faamalosia ai a’u ma lo’u aiga. Sa ou lagonaina e peiseai sa opoina au e le Tama Faalelagi i Ona aao ma faatumulia au i le mafanafana.
Sa faia e le matou siteki se anapogi i le aso na sosoo ma le aso na ala ae ai o ia. Matou te talitonu sa faafofogaina e le Tama Faalelagi a matou tatalo ma o le toe ala mai o Ema o se taunuuga tuusao lea o le anapogi. Mai lena taimi sa vave ai lava ona toe faafoisia le malosi o Ema. I le lima aso mulimuli ane sa ia tautala ai i lana upu muamua lava talu mai le faalavelave, ma i le iva aso mulimuli ane sa te’a ai o ia i tua mai le falemai. Sa ia faaaluina le lima vaiaso i se nofoa faataavale ma amata ai loa ana fofogau mo le toe faaleleia o lona tino.
Pe tusa ma se masina talu ona mavae le faalavelave, sa faafuasei lava ona faaletonu lo’u tua mai le siiina o Ema. Sa lofituina a’u i se lagona e le gata o le leai o se malosi faaletino ae ua leai foi se malosi faaleagaga. E mafai faapefea ona ou faaauau ona tausi ia te ia?
I se tasi po sa matua mamafa ai lava ma lē lavātia le ta’usalaina o le leai o se malosi. Sa ou tuua le fale ma tau atu i se nofoa i le paka, lea sa ou tatalo ai i le Tama Faalelagi pe ā ma se itula. Mo le taimi muamua lava i lou olaga, sa ou lagona ai le lofituina o au i le mana faavavega o le Togiola a le Faaola. O tiga uma ma faanoanoaga sa ou tauaveina ua aveesea mai ia te au; o au avega uma sa aveesea mai i ou tauau ina ua uma lena tatalo. Sa i ai pea Ema i le nofoafaataavale, ma sa faia ni togafitiga masani i lou tua, ae sa faamalosia au e faaauau pea.
I le tasi tausaga mulimuli ane, sa mafai ona tamoe Ema, ata, faamatala ni tala, ma mafaufau o se tamaitiiti e fa tausaga le matua e pei ona tatau ai.
Matou te iloa o loo i ai se Tama i le Lagi alofa, e popole mo i tatou ma silafia i tatou taitoatasi. Na te silafia po o a luitau o loo tatou feagai ai. O le a ou le masalosalo lava i vavega Na te tuuina mai ia i tatou e ala i tatalo, anapogi, ma faamanuiaga faaleperisitua.