Ua O e Fagogota
E alala le tusitala i Georgia, ISA.
Sa le manofonofo Hayden i le fia alu e fagota! Pe ana faapea la sa lei sau foi ia Dan. …
“E i ai so’u aiga i lalo nei. Alolofa ia te a’u.” (Tusipese a Tamaiti, 188).
“Uu mai meafagota. O le taimi o le fagota!” Fai mai ai tama.
Sa ataata Hayden a o ia fetilofai solo. Sa malama ma ūū mea uma. Sa na o i laua i le vaitoa atoa!
I le mulimuli atu ai ia tama, sa savali atu ai Hayden i tua o le taavale ma sii ese le pusa o meafagota mai le pusa o le taavale. Sa mamafa, ae sa le afaina lea ia te ia. O le a ia siiina se isi pusa e faaluaina le mamafa e pei o lea pe afai o le fagotaga ma Tama.
Sa milo faatasi ofe fagota a o tosoina mai i fafo e Tama. “E foliga mai ua moe ia Dan,” sa ia fai mai ai. “E mafai ona e fafaguina o ia i luga?”
Sa tau mapuea ia Hayden. “Ia, lelei.”
Sa toeitiiti lava a galo ia te ia sa sau foi lona uso laitiiti ia Dan. O taimi uma lava e tamoe solo ai Dan ma pisapisao. Na te faasesegia ese uma nei ia i’a!
Sa ia tilotilo atu i le faamalama sa matala. “Dan, nofo loa i luga.”
Ae sa moe gapepe pea Dan.
Sa tu Hayden. Faatasi ma se laki, e ono moe ai Dan i le taimi atoa o le malaga.
Sa toso lemu atu e Hayden le pusa o meafagota i le nofoaga fagota a Tama i luga o le auvai.
“Le maunu lea, anufe ma isi mea uma!”
Sa avatu e Tama le pusa o meafagota mai ia te ia. “Faafetai lava.” Ona tepa ae lea o Tama i luga. “O fea lou uso?”
Sa tepa atu Hayden i le taavale. Sa faafuasei ona ia tomanatu pe o le a sona lagona pe afai e ala ae ua na o ia i se nofoaga fou. E le lelei, sa tonu ai ia Hayden. O le mea moni, e masalo lava e matua lagona lava lona fefe. Ae sa na o le lima tausaga o Dan.
“Faatali la, Tama. Ou te toe vave mai lava.” Ae ina ua ia tilotilo atu i totonu o le taavale, ua leai se Dan!
Sa le toe mafai ona lagonaina e Hayden le ūū o iniseti. Sa foliga mai ua filemu mea uma.
“E le o iinei Dan!” Sa alaga atu ai Hayden.
Sa faataalise atu Tama ma vave ona siaki le taavale.
“Masalo lava o loo ia sue ia i ta’ua,” sa fai atu ai Tama. “O lea faatoa minute. E le o mamao ese atu o ia.”
Sa taumafai Hayden ina ia toamalie, ae sa matua atuatuvale lava o ia. “E mafai ona ou faia se tatalo?”
“Ou te iloa o se manatu lelei tele lena.”
Sa faafetai atu Hayden i le Tama Faalelagi mo lona uso laitiiti ma ole atu ina ia la mauaina loa ia Dan ina ia ona le lagonaina le fefe.
Ina ua uma le tatalo a Hayden, sa uma foi ma le tatavale o lona fatu.
Sa tuu atu e Tama lona lima i luga o le tauau o Hayden. “Ae faapefea pe ana faapea o oe o Dan? O fea e te ono alu i ai?”
Sa matauina e Hayden le faitotoa i le isi itu o le taavale sa matala. Masalo sa lei iloa atu e Dan i laua i luga o le auvai. Sa faasino atu Hayden i se alasavali lata ane. “Masalo o le a ou amata savali atu i le auala le la,” sa ia fai atu ai.
Sa la faanatinati atu i lea auala.
O sekone uma sa lagonaina le telegese ma le mamafatu. A o savali, sa faaauau pea ona faia ia tatalo a Hayden i lona loto. I le mavae ai o ni nai laa, sa la tau atu ai i se pioga i le auala ma iloa atu ai Dan i luma atu.
“Dan!” Sa alaga atu ai Hayden.
Sa faliu mai Dana ma ata. “Sole, o fea sa oulua o i ai?”
Sa toe saoasaoa le taimi. Sa tamoe atu Hayden ia Dan ma fusi mau mai o ia.
“Ua ou fiafia lava ua ma maua oe,” sa fai atu ai Hayden. Sa ia faia se tatalo puupuu o le faafetai i lona loto.
Sa ataata Dan. “O fea la ni i’a?”
“Sau, o le a ou faaali atua ia te oe,” sa fai atu ai Hayden. Sa le mataofiofia lona momo’e atu i le vaituloto. “Sei vaai la po o ai e mauaina le i’a muamua. O le a ou fesoasoani ia te oe e fai le maunu o lau matau.”