Malamalama i le Pule i le Ola: Faailoilo o Lapataiga ma Puipuiga

Saunia e Kenichi Shimokawa, PhD

Tautua a le AAG mo Aiga, ofisa i Iapani

Ina ua 16 tausaga o Kevin, na tatala le faaipoipoga a ona matua. O le taimi lava lea, na ia taofia ai le faaaogaina o ana fualaau mo le mai maliu, lea na fesoasoani ia te ia e faaleleia ai lona mafaufau. E aunoa ma le iloaina na maua o ia i le faaletonu o le mafaufau, na amata ona fefe o ia, vaivai le tino ma ese le tulaga, ma matautia le faavauvau. Na foliga mai e lei fesoasoani fualaau. Na oo i se tulaga na ia lagonaina le matua le lava i mea uma, ma ia filifili ai e pule i lona ola e aunoa ma le faailoaina i isi o lona faamoemoega.

Na faamatalaina e Kevin le aso na ia taumafai ai e pule i lona ola: “Sa ou tagi. Sa ou matuai le lava lava, na matuai vaivai lou loto. Na o lou vaai atu lava i tagata, ma manao i se tasi, soo se tasi, e fai mai, ‘O seki oe?’ E pei ona sa ou manao tele i lena mea, sa ou faalogoina ia leo nei [i totonu o lou ulu] o fai mai, ‘Ua tatau ona e oti.’ … O le taimi atoa na ou tauanauina ai au lava e aua [le faia lena mea], ae sa matua malosi lava ia leo, sa le mafai ona ou teenaina.”¹

Ae paga lea, e leai se tasi na vaaia lona faavauvau. I le mautinoa faapea e leai se tasi na popole mo ia, na ia taumafai ai loa e pule i lona ola—ae sa faaolaina faavavega.

E mafai ona tatou lagonaina nisi o lona faanoanoa lofituina ma le tagi atuatuvale, le leoa mo se fesoasoani?

O le pule i le ola o se tasi lea o tofotofoga sili ona faigata i le olaga faaletino, e le gata mo i latou o loo puapuagatia i mafaufauga o le pule i le ola ae faapea foi mo aiga o loo feola. Na saunoa Elder M. Russell Ballard o le Korama a Aposetolo e Toasefululua: “I lau faamasinoga, e leai se taimi e sili atu le faigata mo se aiga nai lo se taimi e pule ai se tasi e pele i lona ola. O le pule i le ola o se aafiaga matautuia faaleaiga.”² I le mafaufau ai i le natura matautia o lenei tofotofoga, sei tatou talanoa (1) po o a mea ua tatou iloa e uiga i le pule i le ola, e aofia ai ona faailoga lapatai ma mea e mafai ona tatou faia e puipuia ai; (2) po o a mea e mafai ona fai e aiga o feola ma nuu; ma le (3) po o a mea e manaomia ona tatou faia uma lava e faamalosia ai lo tatou faamoemoe ma le faatuatua ia Keriso ina ia aua ai nei tatou lotovaivai.

Malamalama i le Pule i le Ola

E sili atu ma le 800,000 tagata e faamutaina o latou soifua i le pule i le ola i tausaga taitasi i le lalolagi atoa.³ O lona uiga e tai 40 sekona ma faamutaina e se tasi i le lalolagi lona soifua. E foliga mai e sili atu ona maualuga le fuainumera moni ona o le pule i le ola o se mataupu maaleale ma e faasaina i nisi atunuu ma o lea e le mafai ai ona lipotia. O le pule i le ola o se mafuaaga lona lua lea o le feoti o tagata e i le va o le 15 ma le 29 tausaga le matutua. I le tele o atunuu, o le pule i le ola e sili atu le maualuga i tagata ua ova ma le 70 tausaga le matutua. E tuusao lava pe ala mai isi, o le pule i le ola ua aafia ai se vaega tele o lo tatou lalolagi.

Faailoga Lapatai

Afai ua sili atu le mamafatu o luitau o le olaga nai lo tatou malosi e gafatia ai, e mafai ona tatou lagonaina le matautia o le popole. Afai ua le gafatia ona tauave le lotovaivai faalelagona, e mafai ona nenefu le mafaufau o se tagata ma taitai atu ai i le lagonaina faapea o le oti ua na o le pau lea o le tali. Atonu latou te lagonaina faapea e leai se tasi e mafai ona fesoasoani, lea e mafai ona taitai atu ai i le faaesea mai tagata ma faateleina ai le faavauvau ma lagona o le nofoai ma le leai o se faamoemoe, e iu lava ina taitai atu ai i le mafaufau faapea o le pule i le ola ua na o le pau lea o le tali.

Afai ua faaalia e se tasi soo se faailoga nei o le lapatai matautia,⁴ ua tatau loa ona tatou sailia vave se fesoasoani mai se fomai o le mafaufau po o auaunaga o faalavelave faafuasei e pei o leoleo:

Faia o ni taufaafefe e faatiga pe fasiotia i latou lava
Sailia o ala po o ni tulaga e fasiotia ai i latou lava
Talanoa pe tusitusi e uiga i le oti, vaivai o le a oti, po o le pule i le ola

O faailoga nei e mafai ona faaalia ai se tulaga e itiiti le manaomia vave, ae e le tatau ona tatou faatali e aapa atu ma saili se fesoasoani mo le tagata ua faaalia soo se faailoga nei:

Faaalia le leai o se faamoemoe ma ua leai se mafuaaga e toe ola ai
Faaalia le saua po o le ita po o le saili e taui ma sui
Le mafai ona pulea le amio
Lagona ua maileia
Faateleina lo latou faaaogaina o ava malosi po o fualaau faasaina
Aloese mai uo, aiga po o tagata lautele
Lagonaina le popole po o le tetee po o le faafuasei ona fesuisuiai amioga
Faigata na moe po o le moe i taimi uma
Lagonaina ua avea i latou ma avega mamafa i isi

E le o tagata uma e taumafai e pule i le ola e faailoaina atu i isi o latou faamoemoega, ae o le toatele e faaalia ni faailoga lapatai e pei o [faailoga] nei. O lea ia mataala ai i faailoga nei!

E tusa lava pe e le o maua gofie le fesoasoani faafomai, o le mana o le alofa popole moni lava o uo ma aiga e mafai ona aoga tele.

Puipuiga

Afai ua manao se tasi e pule i le ola, ua i ai i aiga ma uo se matafaioi taua tele. E pei ona aoao mai Alema, e tatau ona tatou “tauave avega a le tasi, ina ia māmā; … faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga” (Mosaea 18:8, 9).

O nisi nei o mea e fesoasoani i aiga ma uo e mafai ona fai:

Aapa atu ma faalogo ma le alofa. E pei ona fautua mai Elder Ballard, “E leai se mea e sili atu le malosi nai lo le lima alofa lena e mafai ona opo maia i latou o loo tauivi.”⁵ “E tatau ona tatou vaai ia i latou … e ala atu i se vaaiga mai fofoga o le Tama Faalelagi,” na aoao mai ai Elder Dale G. Renlund o le Korama a Aposetolo e Toasefululua. “Ona faatoa mafai lea ona tatou lagonaina le popole tele o le Faaola mo i latou. … O lenei vaaiga lautele e matala ai o tatou loto i le le fiafia, fefe ma le lototiga o isi tagata.”⁶

Fesoasoani i mea moni. Afai o le tagata o loo tupu ai se faafitauli e aafia lona saogalemu ma mea autu e manaomia, ofo atu e saunia le fesoasoani faaletino, ae tuu atu i le tagata e filifili pe talia pe leai. Mo se faataitaiga, afai o se tagata ua fia pule i le ola ona ua leai se galuega, o le fesoasoani ia i latou e sue ni galuega e tuuina atu ai ia i latou avanoa e filifili mai ai ma fesoasoani e faasaoloto i latou mai le lagonaina o le le aoga.

Fesili i ai pe o mafaufau e pule i le ola. Afai o e popole o se tasi ua faavauvau ma ua faaalia faailoga lapatai o le pule i le ola, fesili i ai pe o latou mafaufau e pule i le ola. O le faia o lena mea e ono faigata, ae e sili le iloaina e ala i le fesili sao lava po o latou mafaufau e pule i le ola. E mafai foi ona tatala ai le faitotoa mo le tagata ia talanoa ai e uiga i o latou faafitauli ma popolega.

O faataitaiga o na fesili e ono faapea “E foliga mai ua tele naua na mea mo se tasi e taulimaina. Pe o e mafaufau e pule i le ola?” po o le “Faatasi ai ma na tiga uma ua e oo i ai, o loo ou mafaufau pe o e fuafua e te pule i le ola.” Afai latou te le o fia pule i le ola, atonu o le a latou tau atu ia te oe.

Afai e te lagonaina latou te le o talanoa mai e uiga i mafaufauga o le pule i le ola, faalatalata i uunaiga a le Agaga ia iloa ai le mea e fai. Atonu e uunaia oe ia tau lava o le nonofo ma i latou seia mafai ona latou talanoa sao atu ia te oe.

Nonofo ma le tagata ma saili se fesoasoani. Afai ua faailoa atu e se tasi ia te oe ua fia pule i le ola, nonofo ma le tagata ma tuu atu latou te talanoa ia te oe e uiga i mea o loo latou mafatia. Afai latou te talanoa e uiga i auala faapitoa ma le taimi mo le pule i le ola, fesoasoani i le tagata e faafesootai se telefoni o faalavelave po o se matagaluega o faalavelave faafuasei o mafaufau i le lotoifale.

Tali Atu i se Pule i le Ola

Pe latou te faaalia ni faailoga lapatai pe leai, o nisi tagata e pule lava i o latou ola. Afai ua feagai ai ma le aafiaga matautia o le pule i le ola o se tasi e pele, e masani foi ona aafia tagata o loo feola o le aiga ma uo i le faavauvau mamafa, loloto, ma le faigata. O nisi o auala e tali atu ai e ono aofia ai mea nei:

Maasiasi ma se lagona le lelei
Faateia ma le le talitonu
Ita, mapu, po o le nofosala
Nana le mafuaaga o le oti
Faaesea mai tagata ma faaletonu ai fesootaiga i le aiga
Ua pisi ma oo lava ina aafia i taimi uma i taumafaiga e puipuia le pule i le ola
O se manaoga mamafatu ia malamalama i le mafuaaga
Lagona o le tuuatoatasi ma le teenaina
Tuuaia o le ua oti, o ia lava, isi, ma le Atua
Faateleina o mafaufauga i le pule i le ola po o lagona o le faaleagaina o ia lava
Faateleina le atuatuvale i taimi o aso fiafia ma le atoaga o le tausaga o le maliu⁷

O Mea e Mafai Ona Fai e Aiga o Feola ma Nuu

Aloese mai le faamasino. Ao avea le pule i le ola o se mataupu ogaoga, ua faamanatu mai foi e Elder Ballard ia i tatou: “O le mea moni, tatou te le iloa tulaga atoatoa e faatatau i tulaga uma o le pule i le ola. E na o le Alii e silafia itu uma, ma o ia lava foi lea o le a faamasinoina a tatou amioga i le lalolagi. A faamasinoina i tatou [e le Alii], ou te lagona o le a Ia iloiloina itu uma: o o tatou tulaga faakenera ma vailaau, o tatou tulaga faalemafaufau, o tatou gafatia faaleatamai, o aoaoga ua tatou mauaina, o uputuu a o tatou tamā, o tatou soifua maloloina, ma isi mea faapena.”⁸

Faatagaina ma faaaloalo i le faagasologa faapitoa o le faavauvau o tagata taitasi. O le a faavauvau tagata i auala eseese, aua o la latou faia ma le ua maliu e ese mai lava i isi tagata uma. O lea ia talia ai ma ava i le auala e aafia ai tagata taitoatasi i le faavauvau.

A maliliu e pele ia i tatou, o lagona malolosi ma e mamafatu foi e mafai ona ufitiaina ai i tatou. Ae ui i lea, o le lagonaina o le faavauvau e le faapea ua leai ai se faatuatua. Na fetalai mai le Faaola, “Ia outou nonofo faatasi i le alofa, ia outou fetagisi ai i le toesea o i latou o e e oti” (MF&F 42:45). O le faavauvau o le faailoga o lo tatou alofa mo e pele ia i tatou ua maliliu ma le uiga o le faia ia i tatou.

Fesili atu mo se fesoasoani. Ao e faavauvau, e mafai ona lagonaina le mamafatu o mea. O le aapa atu mo se fesoasoani e mafai ona saunia ai avanoa paia mo isi e alolofa ai ma auauna ia i tatou. O le faatagaina o i latou e fesoasoani e mafai ona avea o se faamalologa ma le malosiaga e le gata mo oe ae faapea foi i latou.

Ia fesootai pea ma isi tagata. O isi tagata e faanoanoa faalilolilo ma e mafai i nisi taimi ona tuuatoatasi, o lea ia fesootai ai pea ma ou aiga ma uo. Aapa atu i lea taimi ma lea taimi i ou aiga ua faavauvau, tausoga, ma uo, ma ofo atu le fesoasoani aua atonu latou te le o o mai ia te oe.

Faalagolago i le Faaola. I le iuga, o le Faaola lava o le punavai o le faamalologa ma le filemu. “O Lana Togiola … maua ai le avanoa e valaau atu ai ia te Ia o lē ua oo i o tatou vaivaiga uma faaletino ina ia faamaloloina i tatou ma tuu mai ia i tatou le malosi e lavātia ai avega o le olaga faaletino. Na te silafia o tatou tiga, ma o loo i ai o Ia iina mo i tatou. E pei foi o le Samaria agalelei, a Ia mauaina i tatou o manunua i tafatafā ala, o le a Ia fusifusi i o tatou manua ma tausi i tatou (tagai i le Luka 10:34 ).”⁹

Ia tatou iloaina e manaomia uma lava ona tatou faalagolago atoatoa atu i le Alii o Iesu Keriso ma Lana Togiola ao tatou saili e fai la tatou vaega. I lena iloaina maualalo, sei tatou saili e malamalama i o tatou aiga ma tuaoi o faavauvau, aapa atu ia i latou i le alofa, ma atiina ae faatasi se faatuatua ma se faalagolago sili atu i le Faaola, lea o le a toefoi mai ma “E soloiesea foi e le Atua loimata i o latou mata; e leai foi se toe oti, opo o se faanoanoa, po o se aue, e leai se toe puapuaga” (Faaaliga 21:4).