O Lesona mai ia Tina
Saunia e Elder Jairo Mazzagardi
O Le Fitugafulu
A o ou tuputupu ae, soo se taimi lava matou te mauaina ai se tupe, e ave ai lava e lo’u tina tupe pepa sili ona lelei—tupe pepa ia e le maanuminumi tele pe palapala—ma avatu i le faifeau o le lotu matou te o i ai. Sa ia faia lenei mea i lona olaga atoa. Sa ia fai mai, “O le mea lenei e a le Atua.” O na upu ua tumau pea ia te au talu mai lena taimi. Ina ua papatisoina au i Le Ekalesia a Iesu Keriso o le Au Paia o Aso e Gata Ai o se tagata matua, sa lei faigata mo au ona totogi le sefuluai ona sa aoao a’u e lo’u tina ia usiusitai i lena tulafono.
Sa aoao foi a’u e lo’u tina ia faamaoni, e tusa lava pe oo ina faia ai ni mea faigata. Sa toto e lo matou tuaoi ituaiga eseese uma o laau aina suamalie ma fualaau aina fai sua. O nisi taimi e falala mai ai ana laau aina suamalie i le pito o le matou pa. Sa i ai se taimi na ou tauina ai nisi o ia fua ma avatu i lo’u tina. Sa ia tepa mai ia te au ma faapea mai, “E le o ni a tatou mea na.” Sa ou le mafai ona talitonuina. Sa ou fai atu, “O le a le uiga o lau tala? O loo i le tatou pito o le tatou pa!” Ae sa ia toe fai mai, “E le o ni a tatou mea na.” Ona ia uu lea o lo’u lima ma ma savavali atu i le fale o le matou tuaoi. Sa ma talosaga atu mo se faamagaloga mo le tauina o fua o ana laau. Sa fai mai lo’u tina a matou mananao i se mea, e manaomia ona matou mauaina ma le faamaoni.
Atonu o ou matua e le o ni tagata o le Ekalesia, pe e te le ioeina foi i taimi uma a la filifiliga. Ae e mafai lava ona e aoaoina ni mataupu faavae moni mai ia i laua, e pei o le faamaoni, tiutetauave, ola-tutoatasi, ma le galue malosi. O na mataupu faavae o le a avea ma ni faamanuiaga silisili i lou olaga.