Fesili & Tali
“Ua tau mai e nisi tagata ia te au ou te manaomia ni uo e le tutusa o matou tulaga faatonuina ina ia mafai ona faamalosia ai ou tulaga faatonuina. E moni ea lenei mea?”
O le mea laualuga lava, o le faamalosia o ou tulaga faatonuina e sau mai le aoaoina ma le ola ai i le talalelei a Iesu Keriso, ma e mafai e uo ona fesoasoani pe faalavelave foi ia te oe i le faia o lena mea. E i ai se faatosinaga tele lava a uo ia te oe—mai le auala e te mafaufau ai, tautala ai, ma amio ai e oo lava i le tagata e avea ai oe. Ua fautua mai le Mo le Malosi o le Autalavou, “Filifili ni uo e tutusa a outou tulaga faatauaina ina ia mafai ona outou fefaamalosiauai ma uunaia e le tasi le isi i le ola ai i tulaga faatonuina maualuluga” ([2011], 16). O nei ituaiga o uo e fesoasoani ia te oe ia ola i le talalelei a Iesu Keriso, tausisia ou tulaga faatonuina, ma avea ai oe ma tagata e lelei atu.
Peitai, e le o tagata uma tou te fegalegaleai faatasi o le a tutusa o latou tulaga faatonuina ma oe po o ni tagata foi o le Ekalesia. E taua le faauo i tagata uma ma ia taulimaina i latou i le ala e taulimaina ai e le Faaola i latou—i le alofa ma le agalelei. A o e faaauau pea ona ola i ou tulaga faatonuina, e mafai ona avea oe ma se “faaaoao i e ua faatuatua, i le upu, ma le amio, ma le alofa, ma le loto, ma le faatuatua ma le le gaoia. (1 Timoteo 4:12). E ala atu i lau faataitaiga, o le a latou vaaia ai le auala ua faamanuiaina ai oe e ala i le ola ai i tulaga faatonuina maualuluga, ma e mafai ona e faamalosia i latou ia faia foi lea mea e tasi.
Saili atu i le taitaiga a le Agaga Paia—ma maua le lototele e faatino ai Ana uunaiga—a o e filifilia ni uo ma taumafai e faamalosia ou tulaga faatonuina.
Uo Moni
O lou tausaga muamua lava i le aoga tulagalua sa ou popole ai ina nei le mafai ona maua ni au uo o e e faaaloalogiaina ou tulaga faatonuina. I le mavae ai o sina taimi puupuu sa oo ina ou faauo atu i se tamaitiiti o le vasega, ma sa ou tau atu i ai o au o se Mamona. Sa ia fesili mai ia te au e uiga i lena mea, o lea sa ou tuu atu ai ia te ia se tamaitusi o le Mo le Malosi o le Autalavou. Sa amata i lena aso ona ia le toe palauvale i ou luma. Afai o au uo o ni uo moni lava, o le a latou faaaloalogia au faaiuga ma fesoasoani ia te oe ia tausisia ou tulaga faatonuina.
Candela M., 13 tausaga, Buenos Aires, Atenitina
Mulimuli i Fautuaga a Perofeta
O nisi taimi e faigata ai ona tetee atu i faaosoosoga pe afai tatou te mio faatasi pea ma ni uo e faia ni filifiliga leaga pe taumafai foi e tulei i tatou ia faia ni filifiliga leaga. Ua tau mai e perofeta ia i tatou i le tamaitusi o le Mo le Malosi o le Autalavou e faapea o uo “o le a faatosinaina le auala e te mafaufau ai ma amio ai, ma e oo lava foi ina fesoasoani e fuafua le tagata o le a avea ai oe” ([2011], 16). Ou te manatu e tatau ona i ai ni a tatou uo e naunau e faaaloalogia o tatou tulaga faatonuina ma faaali mai le naunau ia i tatou i le tausiga o o tatou tulaga faatonuina.
Calvin W., 16 tausaga, Arisona, ISA
Manatua Ou Tulaga Faatonuina
O uo e le tutusa o outou tulaga faatonuina e mafai ona faavaivaiina moni ma olopalaina ai i lalo ou tulaga faatonuina. Ina ua ou faatoa auai atu i lau aoga fou, sa ou taumafai lava ia taugamalie ma isi e ala i le fai atu o nisi o tala e ono tautatala ai tagata na siomiaina au. Sa toeitiiti lava a galo ia te au nisi o ou tulaga faatonuina a o taumafai ai ia faapei o tagata uma. Ua ou iloaina nei ina ia fausia ou tulaga faatonuina, e te manaomiaina ni uo e lagolagoina ma tutusa o outou tulaga faatonuina. Ou te faafetai na iu lava ina ou mauaina ni uo faapena ona na latou faamanatu mai ia te au ou tulaga faatonuina.
Logan J., 15 tausaga, Iuta, ISA
Faatumau le Maualuga o Ou Tulaga Faatonuina
O uo e eseese tulaga faatonuina e le mafai ona faamalosia ai ou tulaga faatonuina, ae e ala i le avea ma au uo, e mafai ona e avatu ia i latou se faataitaiga lelei e mulimuli ai. A i ai ni au uo e tutusa o outou talitonuga, e mafai ona uunaia oe e faatumauina le maualuga o ou tulaga faatonuina ma fesoasoani ia te oe e tu atu mo le mea sao.
Warren S., 14 tausaga, Oregon, ISA
O Uo Lelei o Se Faamanuiaga
Afai e le tutusa ou tulaga faatonuina ma au uo, e mafai ona atili faigata ai ona faamalosia ou lava tulaga faatonuina. O le faitauina o le Mo le Malosi o le Autalavou na fesoasoani ia te au i taimi uma e filifili ni uo lelei e faaaloalo ia te au. O le taimi nei o loo ou saunia e auauna atu i se misiona, ma ou te iloa o le i ai faatasi ma tagata e tutusa ou tulaga faatonuina e fesoasoani ia te au ia faatumauina le faamaoni i le talalelei.
Nair M., 19 tausaga, Buenos Aires, Atenitina
Pipiimau i le Ai Uamea
O le i ai o ni uo e i ai ni tulaga faatonuina lelei o le mea tonu lava lena e te manao i ai. E te manao ina ia siomia oe lava i uo o le a fesoasoani ia te oe e tausi i poloaiga ma faaosofia oe ia ola amiotonu. Ia faatumauina se uu malosi i le ai uamea, lea e tau atu i le laau o le ola, ae le o le fale tele ma le ateatea. O le siomiaina o oe i le amioletonu o le a taitai atu i faaosoosoga. Ia fai ni uo lelei o e o le a faatosinaina oe e ola i le talalelei.
Annie P., 13 tausaga, Iuta, ISA
Tatalo ia Maua ni Uo
Ina ua matou masii atu ma lo matou aiga i se setete fou, sa ou tatalo pea ina ia maua ni uo o e e mafai ona matou talanoa e uiga i le talalelei. A o ou tatalo, sa ou lagona le faamafanafanaina, ma i ni nai masina mulimuli ane sa ou maua ni uo maoae. Na mafai ona ou faatuatuaina la latou lagolago, ma na latou fesoasoani ia te au ia atiae se alofa sili atu mo le talalelei. Ou te iloa e taua ia uo ma e mafai ona latou faafaigofieina mo i tatou le ola ai i le talalelei.
Sarah P., 16 tausaga, Rio de Janeiro, Pasila