O Leo o Le Au Paia o Aso e Gata Ai
Sa Fesoasoani Kapeteni Moronae ia te Au e Aoao Atu le Aoga Tulagalua
Ata na tusia e Allen Garns
Sa ou i ai i le lotolotoi o se tausaga faigata i le aoaoina o tamaiti 13 ma le 14 tausaga le matutua. Faatoa ou foi mai lava i le fale mai se fonotaga le fiafia faatasi ai ma le sui pule sa siakia sa’u iloiloga lata mai. I le avea ai ma se faiaoga fou ma manaomia ona fatua’i le tele o au lesona, sa ou tauivi ai e faatumauina le faia o meaaoga ma le naunau o tamaiti aoga. O le mea e masani ai o le faaiuga o le talanoaga na manaomia ai lo’u faia faamalosi o au tamaiti aoga e faia se filifiliga—fai o meaaoga po o le oo i faafitauli—ma tulitatao ai i au lapataiga.
Sa ou tuua le fonotaga ma le faanoanoa ma le lofituina. Sa ou faia se manatu ia avea lenei fonotaga ma fesili o le aso pe a ou suesueina au tusitusiga paia i le aso na sosoo ai. O le mea e ofo ai, sa oo mai tali ia te au a o ou faitauina le Tusi a Mamona.
Sa ou tatalo ia iloa mai tusitusiga paia i lena taeao le auala e avea ai ma se faiaoga e lelei atu. Sa aoao au e le Agaga Paia a o ou faitau e uiga ia Kapeteni Moronae i le Alema 44. I le vaega lenei o le tala, sa siomia ai e Kapeteni Moronae ma sa Nifae ia sa Lamana i le vaitafe o Saitonu ma latou matatau ai lea na mafua ai ona lafoai e sa Lamana a latou auupega. Sa faaauau ona ou faitau, ma mafaufau i le auala ou te fia avea ai e faapei o Kapeteni Moronae i le potuaoga: poloai atu, mautinoa, ma faamanuiaina.
Sa ou faitau i le talanoaga ma matauina ai sa tau atu e Moronae ia Saraemina ma sa Lamana sa fai faamalosi i latou e faia se filifiliga: “Ia outou tuu mai a outou auupega o le taua ia te i matou, ma … o le a matou faasaoina o outou ola, pe afai tou te o i lo outou ala ma le toe o mai e tau faasaga mai ia te i matou” a le o lea “afai tou te le faia lenei mea, … o le a ou faatonu atu i ou tagata ia latou o atu ia te outou” (Alema 44:6, 7). Sa ou iloaina sa ia faia le mea na ta’u mai e lo’u taitai ia te au e fai! “Tuu atu ia i latou ni filifiliga se lua, ma toetulitatao i ai,” sa ia fai mai ai. I le mafaufau ai i lena mea, sa ou sii mai ai le mautauave a Moronae, “Faauta, o le a tatou faauma le taua” (Alema 44:10).
I le faaauupegaina ai i mataupu faavae sa ou aoao ai mai se tala i tusitusiga paia e uiga i se tasi o a’u toa, sa ou toe foi atu i le vasega ma le mautinoa ma la’u fuafuaga o le taua. Sa i ai sa’u tamai faatusa o Kapeteni Moronae, ma sa tuu lava i totonu o le taga o lo’u ofutino i le aluga o le tausaga a’oga atoa e fai ma faamanatu o le auala na aoao ai au e Kapeteni Moronae ia puleaina se potuaoga o le aoga tulagalua. A o ou tuu atu i a’u tamaiti aoga ni filifiliga se lua, sa faaleleia a latou amio, sa fai a latou meaaoga, ma sa matou fegalegaleai lelei atu. Sa maea le tausaga, ma sa faigata pea, ae faatasi ai ma le tatalo sa taliina ma le mana o tusitusiga paia, sa mafai ai ona ou “faauma le taua.”