O Fanau Iti ma le Faamanatuga
E alala le tusitala i Iuta, ISA.
Sa lagonaina e le ma fanau laiti e taua le faamanatuga ia i maua. Sa ono mafai ona ma faia nisi mea sili atu e fesoasoani ai ia i latou ia iloa sa taua foi ia i latou.
Pe sa e tomanatu ea pe aisea tatou te faatagaina ai tamaiti e lei papatisoina ona taumamafa i le faamanatuga? Pe tau ea na ona faia e taofia ai i latou mai le tauaimisa ma le pisapisao i le fia mananao i se fasi falaoa? Pe tau ea na ona faafaigofie ai o le faatautaiga o le sauniga, tau na ona tausia o le filemu?
Leai e le o lena. Ou te talitonu o loo i ai ni mafuaaga loloto atu. Ou te talitonu i lenei mea ona ou te talitonu ina ua fetalai Iesu Keriso “o tagata uma,” o le uiga o Lana fetalaiga o tagata uma. Ma pe a Ia fetalai atu i se motu o tagata, Na te le tavavaeeseina lava se tasi.
Ina ua faalauiloa atu e le Faaola toetu le faamanatuga i Lona nuu i Amerika, sa Ia faamamafa atu e faapea na i ai i le sauniga se uiga faapitoa mo i latou sa papatisoina.1 E faapena foi, sa Ia poloaiina ai Ona soo ia “avatu [le faamanatuga] i le motu o tagata.”2 O lena motu o tagata sa aofia ai ma “fanau iti.”3
A faaleo mai i aso nei e i latou e umia le perisitua ia tatalo o le faamanatuga, latou te ole atu i le Tama Faalelagi ia faamanuia ma faapaia le areto ma le vai “i agaga o i latou uma” o e e fetagofi i ai.4 [Latou] Uma. O tagata taitasi e tagofia—ua aofia ai ma tamaiti taitasi.
Afai o le fetagofi atu i le areto ma le vai, e maua ai e fanau nei faatusa e fai ma faamanuiaga i o latou agaga mama, e tatau lava la ona i ai se auala e fesoasoani ai ia i latou ia maua se uiga i le sauniga.
Faatasi ai ma lenei malamalamaaga, ou te toe tepa ai i tua i aso a o laiti la’u fanau. Sa ma faia ma lo’u toalua se galuega lelei tele i le faafifilemuina o i latou i le taimi o le faatautaiga o le faamanatuga. Ou te manatu sa latou lagonaina sa taua le sauniga ia i maua. Ae sa ono mafai ona ma faia nisi mea sili atu e fesoasoani ai ia i latou ia iloa sa taua foi ia i latou.
O le a se mea sa ono mafai ona ma faia? Sa ono mafai ona ma manatuaina e mafai foi e fanau laiti ona tausia ia folafolaga o loo i le tatalo o le faamanatuga. E mafai ona latou malamalama, i a latou lava ala iti ae mamana, le uiga o le “manatua pea” o Iesu. E mafai ona latou tautino atu e “tausi i ana poloaiga.” E mafai foi ona latou faaali atu ua latou “loto e avea i o latou luga le suafa” o Keriso, ma le iloaina o le a le pine ae latou mauaina lena avanoa pe a papatisoina i latou ma faamauina.5
Ae a le faafouina o feagaiga? Ua aoao mai taitai o le Ekalesia e faapea, a tatou aai ma feinu i le faamanatuga, ua tatou faafouina feagaiga uma ua tatou osia ma le Alii.6 E le o i ai i fanau laiti ni feagaiga e faafou.
Ou te toe mafaufau i le taimi a o laiti le ma fanau. Sa le mafai ona ma fesoasoani ia i latou e toe tepa i tua i feagaiga, ae sa ono mafai ona ma fesoaosani ia i latou e tepa i luma. Ou te vaai faalemafaufau ia te au lava ma se atalii talavou po o se afafine i se taeao o se Aso Sa.
“A valu tausaga lou matua,” ou te faapea atu, “o le a papatisoina oe ma maua le meaalofa o le Agaga Paia. O le a e osia se feagaiga. O le feagaiga e te osia i lena taimi o le a pei o folafolaga e te osia i le taimi nei pe a e tagofia le faamanatuga.
“A ou tagofia le faamanatuga i le taimi nei, o le a ou faafouina la’u feagaiga o le papatisoga, e pei ua ou toe osia foi na folafolaga. O le a e i ai iina faatasi ma a’u, ae o le a e le faafouina se feagaiga. E le i oo i le taimi e te osia ai se feagaiga. Ae, e mafai ona e faataitai e osia se feagaiga. O taimi uma e te tagofia ai le faamanatuga, e mafai ona e saunia ina ia papatisoina ma faamauina. I lena ala, o le a e saunia ai pe a atoa lou valu tausaga.”
Afai e foliga mai e le masani ai ona faaaoga le upu faataitai i lenei ala, mafaufau i le mea lenei: I se faatulagaga migao, e mafai ona fesoasoani se tama i lana fanau ia saunia mo le sauniga o le papatisoga e ala i le faaali atu ia i latou o le auala o le a latou tutu faatasi ai i le vai ma e ala i le faasoa atu o upu o le tatalo o le paptisoga. Na te le faatinoina le sauniga i lena faatulagaga. I se lagona, na te fesoasoani i lana fanau ia faataitai. I lena auala, o le a latou le popole ai e uiga i se mea o le a tupu pe a latou ulu atu i vai o le papatisoga. Ou te talitonu e mafai foi e tina ma tama ona fesoasoani i fanau ia faataitai ona osia ma tausia le feagaiga o le papatisoga. E mafai ona avea sauniga faamanatuga taitasi ma se sauniga faataitai paia mo fanau iti a o latou fetagofi i faatusa o le Togiola a le Faaola.
O lea ou te toe foi atu ai i lau fesili muamua. Aisea tatou te faatagaina ai fanau e lei papatisoina ona taumamafa i le faamanatuga? Pe tau ea na ona “tausia o le filemu”? E leai. Tatou te fesoasoani i a tatou fanau iti ia taumamafa i le faamanatuga ina ia mafai ai ona latou manatua lo latou Faaola ma tausia Lona filemu—o se filemu e le pei o soo se mea e mafai ona ofo mai e le lalolagi.7 Tatou te fesoasoani ia i latou ia saunia e maua lena filemu i se faaputuga tele atu ma saga tele atu i le lumanai, pe a oo i le taimi o le a latou osia ma tausia ai feagaiga faatasi ma Ia.