Aoao Atu i le Ala a le Faaola
O Le Olioli i le Aoaoina
Saunia e Tad R. Callister
Peresitene Aoao o le Aoga Sa
Ao avea atili i tatou ma tagata aoaoina tuuto, o le a tatou mauaina le olioli faalelagi lea e oo mai i le aoaoina ma le ola ai i le talalelei a Iesu Keriso.
O le tala o loo faamatalaina ai se tamaloa na lauiloa faapea o le tagata e sili ona paie i totonu o le nuu. Sa le naunau o ia e galue, le naunau e saili se galuega. Sa na o le ola mai galuega a isi. Na iu lava ina le toe fia tausia e tagata o le nuu. Na latou filifili e ave o ia ma tuu i fafo atu o le nuu ma tuliesea o ia. Ao ave atu o ia e se tasi tagata o le nuu i se taavale solofanua i le tausiusiuga o le nuu, na lagona e le ave taavale ni lagona o le alofa e uiga ia te ia. Atonu e tatau ona toe tuu tasi atu se avanoa i le tamaloa ua tulieseina. Ma o lea, na ia fesili atu ai loa, “E te manao i se ato saga e amata ai se olaga fou?”
Na tali mai le ua tuliesea, “Ua uma ona aveese pau?”1
Faiaoga ma Tagata Aoao: E Tutusa Tiutetauave e Fai
O nisi taimi tatou te maua ai tagata e mananao ia maua se malamalama faaleagaga e aunoa ma se galuega e fai—e mananao e faamatala atu tusitusiga paia ia i latou ae latou te le faitauina lava. Latou te mananao e faalogologo pe matamata i ni faasologa o ata pupuu malie. Latou te mananao i le faiaoga o le Aoga Sa e faia uma mea uma o le lesona mo i latou ae itiiti sa latou sauniuniga po o o le auai i la latou vaega.
O le faafeagai, na valaaulia e le Faaola i se tasi taimi Ana tagata faalogologo e o i le fale ona e lei mafai ona latou malamalama i Ana upu. Na Ia poloaiina i latou ia tatalo, mafaufau loloto, ma “saunia [o latou] mafaufau mo a taeao,” pe a Ia “toe sau ai ia te i [latou]” (tagai i le 3 Nifae 17:2–3).
O le lesona e faapea: O le tiutetauave e le na o le faiaoga ia sau saunia ae faapena foi le au aoao. E pei lava ona i ai le tiutetauave o le faiaoga e aoao e ala i le Agaga, e faapena foi ona i ai le tiutetauave i le tagata aoao ia aoao e ala i le Agaga (tagai i le MF&F 50:13–21).
Ua tusia i le Tusi a Mamona: “Sa le sili atu le lelei o le sa talai atu nai lo le sa faalogologo, pe sa sili atu foi le lelei o le na aoao atu nai lo le na aoaoina; ma sa faapea ona latou tutusa uma” (Alema 1:26; ua faaopoopo le faamamafa).
O nisi nei o fautuaga mo mea e mafai ona tatou faia e maua ai le olioli lea e oo mai pe a tatou faia la tatou vaega i le aoaoina ma le ola ai i le talalelei.
Aoaoina i le Aiga
Suesue i Tusitusiga Paia
Ua i ai i tagata uma o le Ekalesia se tiute mo lona lava aoaoina o le talalelei; e le mafai ona tatou faamatuu atu lena tiutetauave. O le tele o lena aoaoina e oo mai e ala i le suesueina e le aunoa o tusitusiga paia. Na folafola mai e Peresitene Harold B. Lee (1899–1973): “Afai tatou te le o faitauina tusitusiga paia i aso uma, o le a faasolo ina vaivai a tatou molimau.”2 Na matauina e le Aposetolo o Paulo faapea “ua sili ona amio lelei [tagata Iutaia i Perea] i tagata o Tesalonia, aua ua latou talia le upu ma le fiafia tele,” ona ia faasoa mai lea o le mafuaaga mo lena taliaina: “[Ua latou] saili i Tusi i lea aso ma lea aso” (Galuega 17:11; ua faaopoopo le faamamafa).
O le suesue i tusitusiga paia i aso uma o se vaega taua i le atinaeina o lo tatou faaleagaga. E leai se isi mea e mafai ona suitulaga atoatoa mo le leai o se suesuega i tusitusiga paia i la tatou faatulagaga o aso taitasi. Mo lenei mafuaaga, ua tatau ai ona faatulaga se taimi mo le suesueina o tusitusiga paia, ae le o le taimi o totoe.
O nisi atonu e faapea mai, “Ae e leai sou taimi mo le suesueina o tusitusiga paia i aso uma mai isi ou tiute e tele i le olaga.” O lenei fuaitau ua faamanatu mai ai ia te au le tala i tagata ta laau e toalua na faia se tauvaga e iloa ai po o ai e tele atu laau e taina i se aso. Na amata le tauvaga i le oso ae o le la. O itula taitasi e aluese atu ai le tamaloa laitiiti i le togavao mo le 10 minute pe a. O taimi uma lava na te faia ai lenei mea, e ataata lava le isi ma le mautinoa, ua ia manumalo i le tauvaga. E le aluese lava le tamaloa lapoa mai lana tulaga, e le taofia le taina o laau, e le malolo lava.
Ina ua faaiu le aso, na ofo le tamaloa lapoa i le iloaina o lana tama o loo la tauva, lea na foliga mai na faamaumauina le tele o le taimi, na sili atu ona tele laau sa ia taina nai lo ia. “Na faapefea ona e faia ae sa tele atu malologa sa e faia?” na ia fesili atu ai.
Na tali mai le tagata na manumalo, “Oi, sa ou faamataina lau toi.”
O taimi uma lava tatou te suesue ai i tusitusiga paia, o loo tatou faamataina la tatou toi faaleagaga. Ma o le vaega faavavega e faapea, afai tatou te faia faapea, o le a sili atu ona tatou faaaogaina ma le atamai o tatou taimi o totoe.
Saunia Mamao
Ua faaalia e suesuega faapea ua na o se vaega itiiti o tagata o le Ekalesia e muai faitau i tusitusiga paia e talanoaina i vasega o le Aoga Sa. E mafai e i tatou taitoatasi ona fesoasoani e suia lenei tulaga. E mafai ona tatou tauaveina la tatou vaega o le aafiaga e aoao ai e ala i le o mai i le vasega ua lava saunia, ua uma ona faitau tusitusiga paia ma saunia e faasoa atu ni manatu. O la tatou sauniuniga e mafai ona avea o se meaalofa faaleagaga tatou te tuuina atu i tagata uma o le vasega.
Aoaoina i le Vasega
Auai i le Vasega
O le poloaiga ia tatala o tatou gutu (tagai i le MF&F 60:2–3) e aoga e le gata i se tulaga faafaifetautalai ae faapea foi i totonu o se potu aoga. Pe a tatou auai, tatou te valaaulia le Agaga, lea e mafai ona molimau i le moni o a tatou faamatalaga ma faamalamalamaina ai o tatou mafaufau i nisi manatu. Ma le isi, o la tatou auai e ono uunaia ai mafaufauga o se tasi ma faamalosia ai lona auai.
O lenei auala, ua tatou mulimuli ai i se mataupu faavae faafaiaoga lea na aoaoina e le Alii: “Tuu atu i tagata e tautala taitoatasi mai ae tuu i isi tagata uma e faalogologo i ana upu, ina a uma ai ona tautala mai tagata uma o le a faapea ona mafai ona faagaeetia ai o tagata uma” (MF&F 88:122; ua faaopoopo le faamamafa). O nisi taimi o le auai i le vasega e le faigofie; e manaomia ai lo tatou faia o se mea tatou te le fia faia. Ae o le faia o lenei mea e faateleina ai le tuputupu ae o tagata uma o i le vasega.
Faamaumau ni Lagona
Sa ou tauaveina mo se taimi uma lava ni kata avanoa i le lotu ma sailia manatu faaleaoaoga faavae po o uunaiga faaleagaga e mafai ona ou tusia. E mafai ona ou fai atu ma le faamaoni ua matuai faamanuiaina lava au. O lenei auala na suia ai lau vaai; ua taulai atu ai ma faateleina lou aoaoina; ua faateleina ai lou fiafia i le lotu.
Aisea e taua tele ai le tusia o aafiaga faaleagaga tatou te maua i le lotu ma soo se nofoaga? Mafaufau mo se taimi faapea o loo talanoa atu se tina i lana tama talavou ae faapea mai o ia i se tasi taimi, “Tina, o se fautuaga lelei moni lava lena.” Ona ia aumaia lea o se api o faamatalaga ma amata ona tusia uunaiga sa ia maua mai le la talanoaga. O le taimi lava e toe tei ai le tina mai lona ofo tele, mata na te le toe manao e toe tuuina atu nisi fautuaga ia te ia?
E mautinoa lava o le mataupu faavae lava lea e tasi e faatatau i le fautuaga mai lo tatou Tama o i le Lagi. Ao tatou tusia uunaiga Na te tuuina mai ia i tatou, e mautinoa lava Lona tuuina mai o nisi faaaliga ia i tatou. Ma le isi, o le tele o uunaiga tatou te maua atonu e foliga mai i le taimi muamua o ni manatu laiti, ae afai tatou te faafaileleina ma mafaufau loloto i ai, e mafai ona tuputupu ae ma avea o ni manatu maoae faaleagaga.
Na saunoa le Perofeta o Iosefa Samita i le taua o le tusiaina o manatu ma uunaiga: “Afai e te … faaauau ona talanoaina ni fesili taua … ae le tusia i lalo, … atonu, mo le le tusiaina o nei mea ina ua faaali mai e le Atua, ma le le manatu i ai o ni mea e lava le taua, atonu o le a aluese le Agaga … ma e i ai, pe sa i ai, se malamalama tele, o le taua e le iu, lea ua leiloa.”3
O Le Olioli i le Aoaoina
O le aoaoina e matua sili atu nai lo se tiute paia. Ua faatatau foi ia avea o se lagona o le olioli loloto.
I se tasi taimi, na fesiligia ai se tagata matematika anamua e suafa ia Archimedes e lona tupu e vaai pe o le pale fou o le tupu o se auro maoi pe na suia ma le le faamaoni e le faiauro ni siliva mo le auro. Na mafaufau loloto Archimedes mo le tali; ona iu lea ina oo mai le tali. O lona olioli tele i lenei mea ua ia mauaina, e tusa ai la ma le talatuu, sa ia momoe faataamilo i le aai ma alaga atu, “Eureka! Eureka!”—o lona uiga, “Ua ou mauaina! Ua ou mauaina!”
E pei o le maoae o lona olioli i le mauaina o se mataupu faavae faasaienisi, e sili atu le olioli i le mauaina o upumoni o le talalelei a Iesu Keriso: o na upumoni e le gata e tauina mai ia i tatou ae faapena foi ona faaolaina ai i tatou. Mo lenei mafuaaga na fetalai ai le Faaola, “Ua ou fai atu nei mea ia te outou, … ia atoatoa foi lo outou olioli” (Ioane 15:11). Ma mo lenei mafuaaga na “alalaga fiafia atalii uma o le Atua” (Iopu 38:7) ina ua latou aoaoina le fuafuaga o le faaolataga. E pei ona i ai i fatulaau le mana faanatura e tutupu ai, e faapena foi ona i ai i upumoni o le talalelei le mana faanatura e aumaia ai le olioli.
E le na o se poloaiga mamana ia “saili i le aoaoina” (MF&F 88:118), ae o se gaoioiga faaleatua foi. O taimi uma lava tatou te suesue ai i tusitusiga paia, o mai i le vasega ua sili atu le saunia, auai i talanoaga a le vasega, fai fesili, ma tusia uunaiga paia, ua amata ona avea atili i tatou faapei o le Atua, ma faateleina ai lo tatou malosi ia maua le olioli o Ia lagonaina.
Tau ina ia tatou tauivi uma ia avea atili ma ni tagata aoao tuuto, o ni tagata aoao e sili atu le mamana—i le fale, totonu o vasega, ma soo se mea tatou te i ai. A tatou faia o lea, o le a tatou maua le olioli faalelagi lea e oo mai i le aoaoina ma le ola ai i le talalelei a Iesu Keriso.