Alofa po o le Tuinanau

Saunia e Joshua J. Perkey

Mekasini a le Ekalesia

Afai e mafai ona tatou malamalama lelei po o le a le uiga moni lava o le tuinanau, e mafai ona tatou aoao pe faapefea ona aloese ai ma faia filifiliga ia faalatalata atili atu ai i tatou i le Agaga Paia.

Tuinanau.

E mautinoa lava o se upu mataga. O le toatele o i tatou e le fia mananao e mafaufau i ai, ma e mautinoa lava e le fia aoao e uiga i ai. O le upu e faaosofia ai se lagona le mama, se mea leaga—e faatosina ae sese.

O loo i ai se mafuaaga lelei mo lena mea. Afai “o le manao i tupe o le pogai lea o mea leaga uma lava” (1 Timoteo 6:10), ona mautinoa lava lea o le tuinanau o lana uo faalilolilo. E le mama ma e faataumaoi. O le tuinanau e suia tagata, mea, ma e oo lava i manatu i ni mea faitino e umiaina pe fia maua mai e faamalieina ai se manaoga. Ae afai ua tatou iloaina lena mea, aisea tatou te mananao ai ia iloa atili e uiga i ai?

Aua afai e mafai ona tatou malamalama lelei po o le a moni lava le uiga o le tuinanau, e mafai ona tatou aoao pe faapefea ona mamanuina o tatou mafaufauga, lagona, ma faatinoga ina ia mafai ona tatou aloese ma manumalo ai i ona faatinoga. O lenei mea o le a taitaiina atu i tatou i se fesootaiga vavalalata ma le Agaga Paia, lea e faamamaina o tatou mafaufauga ma faamoemoega ma faamalosia i tatou. Ma o le a taitai atu ai i se olaga e sili atu le fiafia, filemu, ma le olioli.

Faamatalaina o le Tuinanau

Tatou te matele ina mafaufau muamua lava faapea o le tuinanau o le i ai lea o ni lagona le talafeagai ma malolosi o le tosina atu faaletino i se isi tagata, ae e mafai foi ona tuinanau atu pe manaonao i soo se mea lava: tupe, mea totino, mea faitino, ma, ioe, o isi tagata (tagai i le Taiala i Tusitusiga Paia, “Tuinanau”).

O le tuinanau e faamalosia se tagata e saili ia maua mai se mea lena e feteenai i le finagalo o le Atua. E aofia ai soo se lagona po o se manao lena e uunaia ai se tagata ia taulai atu i mea o le lalolagi po o ni faiga manatu faapito—mea patino e fiafia i ai, manaoga, fiafiaga, ma le fiafia i meaai—nai lo le tausia o poloaiga a le Atua.

I se isi faaupuga, o le manao i mea e feteenai i le finagalo o le Atua po o le manao ia maua mea i se ala e feteenai i Lona finagalo o le tuinanau lea, ma e taitai atu ai i le le fiafia.¹

O Le Matautia o le Tuinanau Faalefeusuaiga

E ui lava ua uma ona lapataiina i tatou agai i le tuinanau o se ituaiga o manaoga lautele, i lona tulaga faalefeusuaiga o le tuinanau e faapitoa lava le matautia. Na lapatai mai le Faaola: “Ai se vaai atu i le fafine ina ia manao i ai, ua uma ona mulilua ma ia i lona loto.” (Mataio 5:28).

Na lapatai soo mai aposetolo anamua e faasaga i le tuinanau i lenei tusiga. I le avea ai na o se faataitaiga se tasi, na tau mai e le Aposetolo o Ioane faapea, “Aua o mea uma lava o i le lalolagi, o le tuinanau o le tino, ma le tuinanau o mata, ma le faalialia o lenei olaga, e le mai le Tama ia, ae mai le lalolagi” (1 Ioane 2:16; tagai foi i le fuaiupu 17; Roma 13:14; 1 Peteru 2:11).

Ma o loo faaauau pea lapataiga i le aso.² Ua faamatala mai e Elder Jeffrey R. Holland o le Korama a Aposetolo e Toasefululua faapea: “Aisea ua avea ai le tuinanau ma se agasala matautia? Ia, e faaopoopo atu i le faatamaiaina o o tatou agaga e ala i le tulieseina o le Agaga, ae ou te manatu o se agasala aua na te faaleagaina le sootaga aupito maualuga ma sili ona paia ua tuuina mai e le Atua ia i tatou i le olaga nei—o le alofa o se alii ma se tamaitai i le tasi ma le isi, ma le naunau o le ulugalii e aumai ni fanau i se aiga ua faamoemoe ina ia faavavau.”³

O le faatagaina o le manao faaletuinanau e faatupulaia ua avea ma amataga o le tele o faatinoga o le agasala. O le mea na amata i le na o se vaai atu lava e foliga e mama e mafai ona tuputupu ae ma avea ma se le faamaoni le mama faatasi ai ma ona taunuuga matautia uma. E mafua ona o le tuinanau e tuleieseina le Agaga Paia ma tuua ai i tatou ua vaivai i isi faaosoosoga ma agasala ma mailei a le fili.

O filifiliga matautia a le Tupu o Tavita o ni faataitaiga faanoanoa ia i le malosi tele ma le ogaoga e mafai ona oo i ai lenei lagona. Na vaai atu Tavita ia Patisepa o taele ma na tuinanau atu ia te ia. O le tuinanau na manao ai ina ia faatino, ma na ia aumaia o ia ma la momoe. Ma, i se taumafaiga sese ia nanaina lana agasala, na poloaiina ai e Tavita le toalua o Patisepa ia tuuina i le taua i se nofoaga e mautinoa ai le fasiotia (tagai i le 2 Samuelu 11). O le taunuuga, na le maua e Tavita lona faaeaga (tagai i le MF&F 132:38–39).

Atonu e foliga matuia le tulaga o Tavita, ae ua mautinoa lava le faamaonia ai o le autu: o le tuinanau o se faaosoosoga matautia. O le toilalo ai e mafai ona tatou faia ai ni mea e le mafai ona faia e se tasi e sao le mafaufau. O le mea moni faapea e matautia lava, e faigofie ona faaosofia, ma e malosi tele i le faaosoosoina o i tatou e liliu ese mai le Agaga Paia ma uunaia lo tatou manao ia faia se mea e faasa ua atili ai le sili atu ona matautia. E mafai ona faaosofia i le matamata i ata leaga, faalogologo i musika le lelei, po o le faia o amioga militino le tatau. O le taimi lava lea, e mafai ai e lagona faaletuinanau ona uunaia se tagata e saili ata leaga. O lenei fesootaiga faifai soo e matuai matautia lava ma matuia.⁴

O le tuinanau o se natura taufeusuaiga e faaleagaina ma faavavaia ai fesootaiga uma lava, o se tasi e sili le taua o le fesootaiga patino lea a se tasi ma le Atua. “Ma e moni Ou te fai atu ia te outou, e pei ona Ou fai atu muamua, o ia o lē e vaai atu i se fafine i le manao i ai, pe afai e mulilulua ni isi i o latou loto, o le a latou lē maua le Agaga, ae o le a latou faafitia le faatuatuaga ma o le a matataʼu” (MF&F 63:16).

E pei ona aoao mai Elder Richard G. Scott (1928–2015) o le Korama a Aposetolo e Toasefululua, “O feusuaiga le mama e tulai mai ai se pa pupuni i faatosinaga a le Agaga Paia ma avanoa lelei uma e siitia ma faamalamalmaina ai. O feusuaiga le mama e mafua mai ai lagona malolosi faaletino ma faalogona taufaaoso. E i ai taimi na te faatupuina ai se lagona faatosina e taaina atu ai le ua solitulafono i se agasala sili atu.”⁵

O Le Mea E Le O Le Tuinanau

O le mafaufau ai po o le a le tuinanau, ae e taua foi le malamalama po o le a le mea e le o le tuinanau ma ia faaeteete e aua le faailogaina mafaufauga, lagona, ma manaoga tatau o se tuinanau. O le tuinanau o se ituaiga o manao, ae e i ai foi manaoga amiotonu. Mo se faataitaiga, e mafai ona tatou mananao i mea e lelei ma tatau na o le a fesoasoani e faataunuu ai le galuega a le Alii.

Mafaufau e uiga:

I le manao ia maua se tupe. O le manao lava ia, o le manao i se tupe e le leaga. E lei faapea mai Paulo o le tupe o le pogai o mea leaga uma. Na ia faapea mai, “o le manao i tupe o le pogai lea o mea leaga uma” (1 Timoteo 6:10; faaopoopo le faamamafa). O aoaoga a Iakopo ua faaopoopoina nisi faamatalaga: “ae tou te lei saili mo le oa, ia outou saili mo le malo o le Atua. Ma pe a uma ona outou maua o se faamoemoe ia Keriso o le a outou maua oa, pe afai tou te sailia, ma ia outou saili e fai ai mea lelei—e faaoofu ai e ua le lavalava, ma fafaga ai e ua fia aai, ma faasaoloto e ua faatagataotauaina, ma avatu ai le fesoasoani i e ua mamai ma puapuagatia” (Iakopo 2:18–19).
O le i ai o lagona tatau faalefeusuai i lou toalua. O na lagona na tuuina mai e le Atua e fesoasoani e faamalosia ai, faamausaliina ai, ma lotogatasi ai se faaipoipoga. Ae e mafai ona i ai lagona le tatau i se toalua. Afai tatou te saili le faataunuuina mo na o i tatou lava, pe na ona faamalieina ai o tatou lava manaoga po o lagona, e mafai ona tatou see atu i ni manaoga faaletuinanau, ma e mafai ona faatamaia ai se sootaga faalefaaipoipoga. O le ki i le sailia ma le faatumauina o sootaga vavalalata faaletino e talafeagai i se faaipoipoga o le i ai lea o se faamoemoega mama ma le alofa.

O le mataupu faavae taua o le sailia lea o mea mo le faamoemoega sao—o le fausia o le malo o le Atua ma le faateleina o le lelei i le lalolagi. I le isi itu, o le tuinanau e uunaia i tatou e o ese mai tuaoi talafeagai, ma faamaasiasi ai e o tatou manaoga le Atua, tetee i tagata, ma faaliliuina mea faitino, oa, ma e oo lava i le mana i mea leaga lea e faaleagaina ma faatamaia a tatou mafutaga.

O Le Mafuaaga Tatou te Vaivai Soo ai i le Tuinanau

I le tuuina mai o le mafuaaga ua faataumaoi ai ma matautia le tuinanau, aisea la ua matuai faaosoosoina ai ma taatele ai? Aisea ua tatou tuu atu soo ai na te faatoilalo i tatou? I le itu i fafo, atonu e foliga mai o le manatu faapito po o le leai o se loto pulea o le autu tonu lea o le tuinanau. O mea moni na e aofia ai, ae o le pogai moni lava o le tuinananu e masani lava o le leai o se faamoemoe. Atonu e gauai atu tagata i le tuinanau i se taumafaiga le manuia e faatumu se avanoa i lo latou olaga. O le tuinanau o se lagona pepelo, o se suitulaga le lelei mo le alofa moni, tulaga faatauaina moni, ma le faatumauina o le avea ma soo.

O le puleaina lelei faalelagona, i se tasi itu, o se tulaga o le loto. “Aua e pei ona manatu o ia i lona loto, ua faapea lava o ia” (Faataoto 23:7). Po o fea lava tatou te tuu i ai lo tatou taulai faalemafaufau ma le faaleagaga o le a iu lava ina avea ma uunaiga malosi i o tatou mafaufau, lagona ma faatinoga. Soo se taimi lava tatou te lagonaina ai i tatou lava ua faaosoosoina i le tuinanau, tatou te manaomia ia suia lena faaosoosoga i se mea e sili atu le talafeagai.

O le paie e mafai foi ona mafua ai mafaufauga tuinanau. Afai e le tele ni mea o faaalu ai o tatou taimi, o le a sili atu ona lamatia i tatou i faatosinaga leaga. Ao tatou saili ma le malosi ia auai ma le naunautai i faamoemoega lelei (tagai i le MF&F 58:27) ma tauivi e faaaoga lelei lo tatou taimi, o le a faaitiitia lo tatou gauai atu i mafaufauga tuinanau po o isi uunaiga le lelei.

E pei ona faamatalaina e Elder Dallin H. Oaks o le Korama a Aposetolo e Toasefululua, o manaoga tatou te filifilia e pipii i ai e le gata e aafia ai a tatou faatinoga ae po o ai foi e iu ina avea ai i tatou: “E faaleoina e manao mea tatou te faamuamua, e fatuina e mea e faamuamua a tatou filifiliga, ma o filifiliga e iloa ai a tatou amioga. O manaoga tatou te faatinoina e iloa ai o tatou suiga, o mea ua tatou ausia ma tagata e avea ai i tatou.”⁶

I se isi faaupuga, e tatau ona tatou puipuia e le gata o lagona tatou te faatagaina i tatou lava e faatinoina ae faapena foi mafaufauga na e vave mai pe mafua mai i na lagona. E pei ona aoao mai Alema, afai e le mama o tatou mafaufauga, “o le a tausalaina foi i tatou i o tatou mafaufauga” (Alema 12:14).

O Le Fofo: Alofa FaaKeriso

O le tuinanau e le faapea e le maalofia. Ona ua tuuina mai e le Tama Faalelagi ia i tatou le faitalia, e i ai lo tatou malosiaga i o tatou mafaufauga, lagona, ma faatinoga. E le tatau ona tatou mulimuli atu i mafaufauga ma lagona tuinanau. Pe a aliae ni faaosoosoga, e mafai ona tatou filifili e aua nei faafiafiaina na mafaufauga ma lagona tuinanau.

E faapefea ona tatou faatoilaloina le faaosoosoga e tuinanau? Tatou te amata i le atiina ae o se sootaga lelei ma lo tatou Tama Faalelagi ma filifili e auauna atu i isi. Ma tatou auai i amioga faalelotu i aso uma, e aofia ai le tatalo ma le suesue i tusitusiga paia, lea e valaaulia le Agaga Paia i o tatou olaga. I le iuga, o le fua faalilolilo o le alofa FaaKeriso lea—le alofa mama, faamaoni, alofa moni, ma se manao e fausia le malo o le Atua ma le manatu tasi i Lona mamalu. E faatoa maua lena alofa pe a tatou maua le mafutaga a le Agaga Paia.

O le aveesea o le tuinanau e manaomia ai le tatalo ma le loto lea tatou te ole atu ai i le Atua e aveese na lagona ma saunia, e suitulaga ai, le alofa mama (tagai i le Moronae 7:48). E mafai lenei mea, e pei lava o le salamo i soo se mea, e ala i le alofa mutimutivale o le Togiola a Iesu Keriso.⁷ Ona o Ia, e mafai ai ona tatou aoao e alolofa i le ala na alofa mai ai o Ia ma le Tama Faalelagi ia i tatou.

A faaauau pea ona tatou taulai atu i lo tatou Tama Faalelagi, a tatou ola e tusa ai ma le poloaiga e sili muamua ma le lona lua—ia alolofa i le Atua ma o tatou tuaoi e pei o i tatou lava (tagai i le Mataio 22:36–39)—ma pe a tatou faia mea uma e mafai ona tatou faia e ola ai e pei ona Ia aoao mai, e uunaia o tatou olaga e faamoemoega mama ma faamaoni i se malosiaga e sili atu. Ao tatou tuufaatasia lo tatou manao ma le finagalo o le Tama, e faaitiitia faaosoosoga ma aafiaga o le tuinanau, ae suia i le alofa mama o Keriso. Ona faatumuina lea o i tatou i le alofa mamana lena e suia manaoga leaga o lenei lalolagi i le matagofie o le fausiaina o le malo o le Atua.