O Le Auaunaga Faafaifeautalai sa Ou Manaomiaina
E alala le tusitala i São Paulo, Pasila.
O au o se tagata o le Ekalesia, ae sa ou manaomiaina foi ni faifeautalai.
Ina ua atoa le 17 o ou tausaga, sa leai uma ni au uo. Sa latou masii mamao atu, sa auauna atu i ni misiona, pe sa le toe fia avea ma au uo. E ui lava sa ia te au lou aiga, sa ou lagona pea le tuuatoatasi. Sa ou lagona sa leai se lagolago mai i fafo o lou aiga, ma sa le mafai ona ou fiafia i isi e ui i au taumafaiga.
I se tasi o aso, sa o mai ai ni faifeautalai fou na tofia i la matou uarota i lo matou fale e faailoa mai i laua. Sa la fesili mai pe mafai faapefea ona laua fesoasoani ia i matou. Ou te lei popole i tala sa latou faia aua sa na o lou faanoanoa ma le tuuatoatasi sa ou mafaufau i ai. Ona fai mai lea o faifeautalai la te fiafia i lau fesoasoani e aoaoa atu nisi o a laua lesona. Sa ou te’i! Aisea o le a la fai mai ai i se fesoasoani mai se tasi e moni e le o tulaga lelei faalelagona?
Sa ou talia pea, ma sa ou alu i nisi o lesona ma i laua. E le gata sa fesoasoani faifeautalai i tagata sa la aoaoina ae sa avea foi ma se uunaiga lelei ia te au.
Ina ua siitia ese se tasi o alii faifeautalai, sa ou iloa ai sa sili atu ona lelei lou olaga talu ona ou amata faaaluina le taimi ma faifeautalai. Sa tele ni mea sa ma tutusa ai ma le isi alii faifeautalai sa sau i le eria, ma sa faaauau pea ona ou faaaluina le taimi ma faifeautalai. Sa laua uunaia, aoao, ma lagolagoina au. Sa la fesoasoani ia te au ia sili atu ona lagona lelei i aso faigata. E ui i le faigata ona la tautatala i lau gagana ma o laua taimi pisi, sa faia e faifeautalai le taumafaiga e fesoasoani ia te au. Sa fesoasoani faifeauatalai ia te au ia iloa e le o tuuatoatasi au. Sa vaavaai mai le Tama Faalelagi ma Lona Alo, o Iesu Keriso ia te au ma fesoasoani mai ia te au e ala i isi tagata.
Ina ua alu ese lena faifeautalai fou, sa ou faafetai ia te ia mo le avea ma se meafaigaluega i aao o le Alii e laveai au. Ou te faafetai sa ia sau i lena misiona faapitoa aua sa avea o ia ma faamanuiaga ia te au.
Ao lei oo i lenei taimi, sa toeitiiti i ai le manao ia te au e auauna atu i se misiona, ae a o ou vaai i nei faifeautalai, sa faatupulaia lou naunau e auauna atu. Toeitiiti ou alu foi i lau misiona, ma ou te faamoemoe e tuu atu mea uma o ia te au i le Alii e pei ona faia e faifeautalai.
Ao lei o mai lena vaega muamua o faifeautalai i lou aiga, ou te manatua le lagonaina o le tuuatoatasi i se tasi o po ma tatalo. Sa ou ole atu i le Atua ma lou loto atoa e auina mai tau lava o se uo e tasi e fesoasoani ma lagolagoina au. Sa tali le Alii i lau tatalo i se auala e lei mafaufauina—e ala i le auina mai o faifeautalai. Ou te iloa o loo soifua Iesu Keriso ma o Ana auauna ia faifeautalai.