Sauniaina o se Nofoaga mo le Alii

Saunia e Epikopo Gérald Caussé

Epikopo Pulefaamalumalu

O taimi uma ou te faalogo ai i le tala o le soifua mai ma le galuega i le lalolagi a le Faaola, ou te mafaufau i o tatou tiutetauave faaletagata lava ia e saunia nofoaga e faafeiloai ai mo Ia mo le aso e toe afio mai ai o Ia.

I le tausaga ua tea a o lei oo i le Kerisimasi, sa ou auai i se taumafataga o le afiafi na saunia e faamamalu ai se taitai maualuga a Farani e le o se tagata o le Ekalesia. Sa faia le taumafataga i le Fale a Joseph Smith Memorial i le Aai o Sate Leki, Iuta.

Ae ou te lei nofo i lalo i la matou meaai, sa matou aveina la matou malo faaaloalogia i le faamalama e matamata ai i le fogafale 10, lea e maua ai e tagata asiasi se vaaiga matagofie o le Lotoa o le Malumalu. Sa toetoe lava a faamaneta le vaaiga, ma le Malumalu o Sate Leki o loo tu matilatila i moli feemoemoai. Sa matou tutu ai iina mo ni nai minute, toetoe lava a lemagagana.

I le matou toe foi atu i le fale o le taumafataga, sa fesiligia i matou e le taitai i se fesili sa lei faamoemoeina: “Mata tou te talitonu i le iuga o le lalolagi?” Sa taitai atu lenei fesili i se talanoaga musuia e uiga i le Afio Mai Faalua o le Alii ma le taua mo i tatou uma ina ia saunia e talia o Ia i le aso o Lona toe afio mai.

Ao ou mafaufau e uiga i le malumalu faatoa matou faamemelo i ai, sa oo mai se manatu matagofie i lou mafaufau: “I Lona afio mai, o le a iu ina maua e Iesu se nofoaga matagofie e aumau ai!”

Ua tusia e le Taiala i Tusitusiga Paia e faapea o se malumalu o le “mea moni lava o le maota lea o le Alii.”¹ I nisi upu, e le na o se nofoaga o le faatusa. O malumalu o lo tatou tisipenisione o ni maota ua saunia ma faapaiaina lea e mafai ona Ia afio mai ai faaletino. Sa fetalai mai le Alii e tatau ona atiina ae Lana Ekalesia ina ia “faapotopotoina o lou nuu o le feagaiga i se tino e tasi i lena aso pe a Ou alu atu i lou malumalu” (MF&F 42:36; faaopoopo le faamamafa).

Oka se eseesega maoae ma le amataga faatauvaa a le Faaola i le olaga faaletino. O Ia, le Tupu o tupu ma le Alii o alii, sa soifua mai i se fale o manu faatauvaa ma faataoto ai i se faatanoa vao “aua latou te le ofi i le fale … e tali ai malo” (Luka 2:7). I le taimi o Lona laitiiti, sa lei fiafia pea Iesu i le mafanafana o se fale tumau, e pei o le taimi na sosola atu ai Lona aiga i Aikupito e sola ese mai le leaga o se pule saua (tagai Mataio 2:13–14).

Tatou te le mailoa faamatalaga o le taimi a Lona aiga i Aikupito, ae e mautinoa sa soifua o Ia ma Ona matua i le olaga malolosi o tagata sulufai—o se olaga e faatusa i na olaga o le toatele o tagata sulufai i o tatou taimi o e sa sosola ese mai i nofoaga o le taua ma feteenaiga faalemalo i Aferika ma Sasae Tutotonu.

E oo lava i Lona olaga matua, sa faailoa mai e Iesu e Na te lei mauaina se fale e masani. I se tasi o aso, sa alu atu ai se tagata ia te Ia ma faapea atu, “Le Alii e, ou te mulimuli atu ia te oe i mea uma e te maliu atu i ai.” Sa tali atu le Faaola, “E fai lua o alope, e fai foi mea e momoe ai manu felelei; a o le Atalii o le tagata, e leai se mea e moe ai o ia” (Luka 9:57, 58).

Ou uso e ma tuafafine, o taimi uma ou te faalogo ai i le tala o le soifua mai ma le galuega a le Faaola i le lalolagi, ou te mafaufau i o tatou tiutetauave faaletagata lava ia e saunia nofoaga e faafeiloai ai mo Ia i le aso e toe afio mai ai o Ia. O le a se mea e mafai ona tatou faia?

Alu i le Malumalu

Muamua, ia tatou sauni e talia o Ia i Lona lava matoa—le malumalu. O ai o i tatou e lei moemiti e asiasi i nofoaga sa fanau mai ai le Faaola, soifua ai, ma faia ai Lana galuega i le lalolagi? E toatele, faatasi ai ma osigataulaga e tele, ua faimalaga i le Nuu Paia. Ae e taua tele ona tatou asiasi atu i nofoaga lea atonu o le a Ia afio mai ai i se aso. O se tasi o auala sili, e mafai e i tatou, o ni Ana soo, ona saunia mo Lona Afio Mai Faalua o le o atu soo i Lona maota paia ma noatia i tatou lava ia te Ia e ala i feagaiga paia.

Saunia Lou Fale

Lona lua, e mafai ona tatou faia a tatou fale o nofoaga lea e finagalo le Alii e aumau ai. I tusitusiga paia, tatou te faitau ai i tala e tele o ituaiga o tagata sa faafeiloai ma talimalo i le Faaola i o latou fale. Sei o tatou fesili ifo ia i tatou lava fesili nei: E taliaina ea e le Alii lou fale? Mata o se nofoaga e saogalemu, filemu, ma faatumulia i le Agaga lea Na te lagona ai le toafimalie? E le manaomia ona tetele pe taugata o tatou fale. O se nofoaga e ola ai, e tutotonu i le talalelei ma tumu i aiga ma uo agalelei, o le a fiafia ai o Ia.

Faapotopoto E ua Filifilia

Lona tolu, e mafai ona tatou fesoasoani e faapotopoto Lana au filifilia mai le lalolagi atoa—e tusa poo lona uiga o le tuua o o tatou fale mo se taimi ae fesoasoani e fausia Lona malo i le lalolagi. O le talafaasolopito o le nuu o le Atua o se talafaasolopito o Au Paia sa saunia pea ma naunau e o atu i le mea e finagalo le Alii latou te o ai. Ou te mafaufau i perofeta anamua, e pei o Aperaamo, Isaako, Iakopo, Iosefa, Mose, Liae, ma le toatele o isi. Ou te mafaufau i Aposetolo a le Alii i le meritiana o taimi o e sa faasalalau atu pea le talalelei i le salafa o le Meititirane.

Ua avatu ma o loo avatu pea e perofeta ma aposetolo o aso e gata ai, faatasi ai ma le faitau afe o faifeautalai, le savali a Keriso i le itu uma o le lalolagi. Ua latou naunau e tuua le mafanafana o o latou fale ina ia ofo atu lo latou auaunaga i le tovine a le Alii.

Fesoasoani ia i Latou e Manaomia le Fesoasoani

Mulimuli, o se auala matagofie e saunia ai se nofoaga mo le Alii o le fesoasoani lea i o tatou tuaoi e le o i ai se fale. O aso anamua o le Toefuataiga sa aofia ai taimi lea na le maua ai e le Au Paia ni fale. I lo latou sailiga mo Siona, o le le taliaina ma le amioleaga a o latou fili na masani ai ona faamalosia i latou e tuua o latou fale.

Sa faaaoga e Peresitene Polika Iaga (1801–77) faaupuga musuia nei e faamatala ai lo latou tulaga faigata: “Sa toe aveesea i matou i lea taimi, ma lea taimi mai i o matou fale filemu, ma sa manaomia ai e o matou fafine ma fanau ona ola i laufanua valevalenoa, i le togavao, i luga o auala, ma i faleie, i le ogatotonu o le tau malulu, ma mafatia ai i soo se vaega o faigata, e oo lava i le oti lava ia.”²

O se tasi o aafiaga sili ona faamomoiloto mai lenei vaitau o loo faamamafa ai le tamai nuu o Quincy, Ilinoi, i le taimi o le tau malulu o le 1839. I lena taimi, o lenei nuu o tagata paionia ma fai faatoaga, sa i ai i le auvai o le Vaitafe o Misisipi, e aofia ai pe tusa e 1,500 tagata o loo soifua i ni tulaga faigata. I le ogatotonu o le taumalulu matautia, sa faafuasei ona latou feagai ma le taunuu ai pe tusa o le 5,000 o tagata o le Ekalesia sa sosola ese mai le poloaiga sa tuuina atu e le kovana o Misuri. Sa i ai le au paia i se tulaga o le faigata ma le pagatia, ma le savavali ai e sopoia vai ua aisa o le Misisipi. Faatasi ai ma le maoae o le agalelei, sa faafeiloai e tagata nuu o Quincy i latou i aao mafola, ma tatala o latou fale ma faasoa atu a latou meaai itiiti.

Sa faamatala e se tasi o tagata nuu o Quincy le taunuu ai o nei tagata sulufai: “O le toatele o le Au Paia sa fiafia ina ua maua le malutaga i lou fale mai afa, seia latou maua se nofoaga e nonofo ai. O le tele o po i luga o fola, i le falealuga ma le falealalo, sa ufitia i moega sa tuufaatasi sa le mafai ona tu i soo se mea e aunoa ma le tu i luga o se moega.”³

Mo i tatou o e ua faamanuiaina e nonofo i ni tulaga sili atu ona filemu ma manuia, o nei tala o loo i ai se taua ofoofogia. Latou te aoao i tatou ia avea o ni tagata e saunia pea e aapa atu i tagata sulufai ma le tagolima. Tusa lava pe o tatou nonofo i eria o loo feagai ma se poloaiga o le aveesea o tagata sulufai poo i nuu laiti, pe maotua, o loo i ai le tele o auala e mafai ai ona tatou auauna atu ia i latou o loo tauivi ia maua ni mea itiiti e manaomia o le olaga. E mafai ona tatou saofaga i le tupe o le fesoasoani alofa a le Ekalesia. E mafai ona tatou galulue ma isi o loo i o tatou nuu o e tuuina atu le auaunaga agaalofa ia i latou o e le tagolima. E mafai ona tatou tuuina atu la tatou faauoga ia i latou ua faamalosia e tuua o latou aiga pe a latou o mai i o tatou nuu. E mafai ona tatou faafeiloai ma le faamaoni ni tagata ese o e asiasi mai i o tatou uarota ma paranesi.

O se tasi o a tatou viiga sili ona matagofie e toe faamatala ai le tala o se tagata ese sa mauaina le malutaga i se tagata o alofa mama maoae.

’Ua po; ua lolo
Ua to mai se afa o le tau malulu.
Sa ou lagona lana tagi
Ma ou aumai o Ia i lou fale.
Sa ou tausi Ia ma faalavalava
Ma teu lou moega mona tofaga;
Ae ou moe i lalo, a e pei
Sa ou miti i Etena le faatoaga. …

Ona faailoa mai lea
O lenei tagata ese ia te au.
Tulaga o fao sa i ona aao;
Ua tu mai ou luma le Faaola.
Sa Ia fetalai lou igoa ma tau, fai mai
“Sa e le ma ia te au.
Ia fai lea ma mea e te ola ai; 
Aua o au na e fai i ai.”4

Ou te mitamita i le auai i se Ekalesia e le taofia lava le aapa atu i e matitiva ma le tagolima o le lalolagi. Ua faalotomaualaloina au e le anoanoai o galuega o le alofa ma le alofa mama, laiti ma tetele, na faatinoina i aso taitasi e le Ekalesia ma ona tagata. O nei galuega o le a avea pea ma se vaega taua o le misiona a le Ekalesia aua o Le Ekalesia a Iesu Keriso ma o loo tatou taumafai e mulimuli i Lana faataitaiga.

O Iesu o lo tatou Faaola ma le Togiola. Ou te molimau atu sa ia soifua mai i le meritiana o taimi, o loo soifua o Ia, ma o le a i ai se aso o le Ia toe afio mai ai i le mamalu e pule ma nofotupu i Lona malo i le lalolagi.

E ala i le sauniuni, ou te valaaulia outou e o atu soo i Lona maota paia; fatu se siosiomaga saogalemu, alofa, ma filemu i lou aiga; ma auai i le faapotopotoina o Lana au filifilia mai i tulimanu uma o le lalolagi. Ou te tatalo foi o le a tou lagona se manao faapitoa e aapa atu i le alofa ia i latou o ia te i tatou o e leai ni aiga ma e le tagolima. I le faia o lea mea, o le a e saunia se nofoaga i lou loto ma le aiga e faafeiloai ai le Faaola, ma e moni o Lona toe afio mai o le a avea o se aso matagofie ma ofoofogia.