Aoao Atu i le Ala a le Faaola

Saunia e Feiloai ma le Atua

Saunia e Devin G. Durrant

Fesoasoani Muamua, o le Au Peresitene Aoao o le Aoga Sa

O le Aoga Sa o se vaega taua e fesoasoani ia i tatou uma e saunia ai e feiloai ma le Atua. O e faia [le Aoga Sa] ma se faamuamua?

I le Tusi a Mamona, sa talai atu e Amoleka se lauga mamana e uiga i le Togiola a Iesu Keriso (tagai Alema 34). Mai i fuaiupu matagofie i totonu o lenei mataupu, o se tasi o fuaiupu e taua ia te au o le taimi na taua ai e Amoleka, “Aua faauta, o le olaga lenei o le taimi lea mo tagata e saunia ai e feiloai ma le Atua” (Alema 34:32).

O le talitonu o le faamoemoega o lenei olaga ia “saunia e feiloai ma le Atua,” e mafai ona tatou fesili ifo ia i tatou lava fesili nei: O le a le mea o ou faia i aso taitasi, ma masina taitasi e saunia ai mo lena faatasiga matagofie ma lo tatou Tama Faalelagi? E faapefea ona ou filifili e faaalu le taimi taua ua tuuina mai ia te au?

E Faapefea ona Tatou Saunia?

E tele auala e mafai ai ona tatou faaalu lo tatou taimi e saunia ai e feiloai ma le Atua. Mai lea vaiaso i lea vaiaso, ou te talitonu e mafai ona tatou malilie o le itula aupito sili ona taua o le vaiaso o le taimi e faaalu i le aai ma feinu i le faamanatuga, faafouina o a tatou feagaiga ma le Tama Faalelagi, ma mafaufau e uiga i le alofa mai ia te Ia ma le faamoemoe e mafai ona tatou maua uma se taunuuga o le Togiola a Lona Alo, o Iesu Keriso.

Ou te talitonu foi o le itula tatou te faaaluina i a tatou vasega o le Aoga Sa e mafai ona i ai se aafiaga sili atu i la tatou tapenaga i lo le mea ua tatou iloaina. Ae ina ia tatou faaaoga lena avanoa, atonu tatou te manaomia le suesue pe faapefea ona tatou o atu i le Aoga Sa.

O le faamoemoega o le Aoga Sa o le “faamalosia lea o le faatuatua o tagata taitoatasi’ ma aiga’ i le Tama Faalelagi ma Iesu Keriso e ala i le aoao atu, aoao mai, ma le faaaumeaina.”¹ O nei elemene taua o le liuaina e taua i la tatou taumafaiga e saunia e feiloai ma le Atua. Matou te fiafia i le galulue ai o faiaoga i le Ekalesia atoa e faaleleia o latou tomai e aoao atu e faaaoga ai le Aoao Atu i le Ala a le Faaola ma fonotaga a aufono a faiaoga.

Ae o le faaleleia o le aoao atu lava ia e le lava. E tatau ona fetaui ma o tatou taumafaiga e aoao atu i le ala a le Faaola. Sa ia fetalai e tatau ona tatou aoao “e ala lava i le suesue ma le faatuatua foi” (MF&F 109:7)? O le faatuatua o se mataupu faavae o le faatino. E tatau ona tatou faia pe afai tatou te manano ia iloa (tagai Ioane 7:17).

E mafai e a tatou vasega o le Aoga Sa ona uunaia lenei ituaiga aoao atu ma le aoao mai pe afai o ni nofoaga saogalemu e faasoa ai aafiaga sa ia i tatou ma uunaiga sa tatou lagonaina i le aluga o le vaiaso ao aoao ma faaaoga tusitusiga paia e saunia ai mo le vasega. Ao tatou “aoao i le tasi mataupu faavae o le malo … ona faagaeetia ai o tagata uma” (MF&F 88:77, 122).

Ta‘ua le Sapati o se Aso Fiafia

Sa valaaulia e le Au Peresitene Sili talu ai nei i tatou taitoatasi ia “ta‘ua le sapati, o se aso fiafia” (Isaia 58:13) i o tatou olaga. O le aafiaga o le tolu itula o sauniga o le aso Sa e fesoasoani ia i tatou e ausia ai lena sini.

Ma lena amioga, sei ou fai atu se isi fesili: Aisea i nisi taimi tatou te le filifili ai e taliaina atoa le avanoa e tuuina mai e le Aoga Sa?

I tausaga lata mai nei, ua ou molimauina ai le tele o “filifiliga” o le Aoga Sa i le taimi o le Aoga Sa, e aofia ai le asiasi atu i ala savali, faatautaia e taitai o le uarota o faatalanoaga, aoaoina e taitai o le siteki o o latou tagata i le uarota, ma le tuuina atu e taitai o le autalavou o atugaluga o le polokalama.

Faatasi ai ma le tele o le pisi o o latou taimi, ou te malamalama i le aisea e mafai ai ona faaaoga le taimi o le Aoga Sa e faia ai isi mea. Ae oka se faamanuiaga mo tagata uma pe a tuuese e taitai o le uarota se itula e auai ai i talanoaga o le talalelei faatasi ma tagata o o latou lafu!

Ou te talitonu ua e oo i nisi o faataitaiga o le “le amanaia o le Aoga Sa.” Mo se tasi mafuaaga po o se isi, ua lagona e le toatele o i tatou i nisi o taimi e le tele so tatou manuia mai i vasega o le Aoga Sa e pei ona tatou mananao ai. Ua ou aoaoina, o le oa o lou aafiaga o le Aoga Sa e iloiloina i le tele o lou tapenaga ma auai e pei o lou faiaoga. Sa tusia e Brother Tad R. Callister, Peresitene Aoao o le Aoga Sa, “O taimi uma lava tatou te suesue ai i tusitusiga paia, o mai i le vasega ia sili laitiiti atu le saunia, auai i talanoaga i le vasega, fai fesili, ma tusia uunaiga mamana, ua amata ona avea atili i tatou faapei o le Atua, ma ua faateleina ai lo tatou malosi e maua ai le olioli o Ia lagonaina.”²

Saunia mo ma Puipuia le Itula o le Aoga Sa

Ou te valaaulia oe e faia le mea sili e saunia ai mo ma puipuia le itula o le Aoga Sa. O tagata taitoatasi o le uarota ma le paranesi, e aofia ai o tatou taitai, e tatau ona i ai le faamanuiaga matagofie e faafeiloai le Atua i lenei itula taua i vaiaso taitasi.