Seia Tatou Toe Feiloai
O Le Natura Moni o le Atua
Saunia e Elder Jeffrey R. Holland
O Le Korama a Aposetolo e Toasefululua
Mai le “O Le Silisiliese o le Atua,” Liahona, Nov. 2003, 70–73.
O Iesu Keriso o le faatinoga atoatoa o le tausiga atoatoa a le Tama.
Fafine ua Faamaloloina, saunia e J. Kirk Richards
Ina ua mavae atu augatupulaga o perofeta sa taumafai e aoao le aiga o le tagata i le finagalo ma le auala o le Tama, sa masani lava ona tau le faamanuiaina, o lea na auina mai ai e le Atua i le lalolagi, i Lana lava taumafaiga silisili ina ia tatou iloa o Ia, Lona Alo Pele e Toatasi ma le atoatoa, na foafoaina i Lona lava faatusa ma uiga, ina ia ola ma auauna atu i tagata i luitau o le olaga i aso taitasi.
O le afio mai i le lalolagi ma se tiutetauave faapena, ina ia faataunuuina tiute o Elohima—fetalai ai pei ona Ia fetalai, faamasino ma auauna atu, alofa ma lapatai, onosai ma faamagalo atu e pei ona Ia fai—o se tiute e matuai lofituina ai ma e le mafai e outou ma au ona malamalama i ai. Ae i le faamaoni ma le naunautai lea e aofia ai i uiga o se tamaitiiti paia, na mafai ai e Iesu ona malamalama i ai ma sa Ia faia. Ae, ina ua amata ona oo mai faaneetaga ma le faamamaluga, sa Ia faafoi atu uma lava le viiga i le Tama.
“O le Tama … na faia galuega,” na Ia fetalai atu ai ma le faamaoni. “E le mafai e le Atalii ona fai o se mea, na o ia lava; a o mea na te vaai atu i le Tama o faia: o [mea foi e faia e Ia], o loo faia foi ia lava mea e le Atalii” [Ioane 14:10; Ioane 5:19]. I se tasi taimi na Ia fetalai ai: “O au nei ou te tautala i mea ua ou iloa i lou Tama” [Ioane 8:38]. …
… Mafatia nisi o le lalolagi i le taimi nei ona o le matua le fiafia i manatu sese e uiga i le [Atua o lo tatou Tama Faavavau]. O loo i ai foi ma se tulaga ua tauau ina falala atu i ai i lagona vavamamao ma le Tama, e oo lava ina matuai motuese mai lava ma Ia, pe afai foi sa latou talitonu ia te Ia. … I nisi o tulaga, (ma e mautinoa lava, i nisi o tulaga, o se faaliliuga na misi) o le Tusi Paia, e vaai atu ai nei tagata i le Atua le Tama ma Iesu Keriso Lona Alo ma faapea e matuai eseese lava, e ui lava ina o loo taua le mea moni i le Feagaiga Fou, o le Alo o le Atua e tasi ma o ia lava lea, o loo galue e pei ona sa Ia faia i lalo o le taitaiga a le Tama, o Ia lea e le liliu o “ananafi, o le aso, ma le faavavau.”1 …
O le fafagaina la o e sa fia aai, faamalolo i e mamai, aoaiina tagata pepelo, ole atu mo le faatuatua—o Keriso lena o loo faaali mai ia i tatou le ala o le Tama, o Le e “alofa tunoa ma alofa mutimutivale, e telegese lona toasa, e onosai ma tumu i le agalelei.”2 I Lona soifuaga aemaise lava i Lona maliu, na faailoa mai ai e Keriso, “O le alofa lenei o le Atua ua ou faaali atu ia te outou, e faapena foi ia te au.” I le faatinoina atoatoa e le Alii o le tausiga atoatoa a le Tama, i lo Laua puapuagatia ma le fetufaai o le faanoanoa mo agasala ma lototiga o le toatele o i tatou, tatou te iloa ai le uiga tonu o loo i totonu o le folafolaga: “Aua ua faapea lava ona alofa mai o le Atua i le lalolagi, ua ia aumai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau. E lei auina mai e le Atua lona Atalii i le lalolagi ina ia faasala i le lalolagi; a ia faaolaina le lalolagi ia te ia” (Ioane 3:16–17).