Fatuina o Lo Maua Taunuuga Fiafia

Saunia e Yuri Kutepov

E alala le tusitala i Voronezh, Rusia.

Sa ou tatalo ina ia maua lau soa e faavavau, ae ou te lei faamoemoe e mauaina o loo ia nofo i ou talaane i luga o le nofoaafi e agai i le malumalu!

Sa avea au ma se tagata o le Ekalesia mo le 10 tausaga ina ua ou mauaina se faamautinoaga e faapea e manaomia ona ou sailia se soa. Sa ou malamalama i aoaoga faavae o le faaipoipoga faaselesitila, ma sa ou tatalo faatauanau ina ia maua sea faaipoipoga ma ia mafai ona fatuina se aiga. Ou te lei iloaina pe faapefea ona ou mauaina se tamaitai o le Au Paia o Aso e Gata Ai i Samara, Rusia, lea sa ou nofo ai, ae sa ou faatuatua o le a fesoasoani mai le Alii ia te au (tagai 1 Nifae 3:7).

I le tausaga 2009, sa valaaulia ai au e auai i se faagasologa o konafesi a le autalavou nofofua matutua e faia i aai e 10 i le Misiona atoa o Rusia Samara. Sa ou faamoemoe o nei gaoioiga atonu o ni avanoa lea e mafai ai ona ou feiloai i lau soa e faavavau.

Sa ou fiafia e auai i konafesi, lea sa faamalieina i le tele o auala, ae sa tele ni masina ua mavae ma ou te lei atiina ae lava se sootaga o tafaoga faamasani.

Sa amata ona ou popole ma ole atu i le Alii e fesoasoani mai ia te au. O le tali, sa oo mai ni manatu i lou mafaufau e lapatai au e faapea, e mafai ona faaosoosoina au e atiae ni faigauo ma ni tamaitai e le o ni tagata o le Ekalesia.

Sa ou iloa sa aoao mai perofeta e tatau ona tatou taumafai e faaipoipo i le malumalu, ma sa ou iloa e le mafai ona i ai se atoaga o le olioli pe afai e le faatasia au ma lou toalua e taumafai e mulimuli i le Faaola. Sa faaauau pea ona ou tatalo ina ia maua le malosi faaleagaga e tetee atu ai i ia faaosoosoga ma ia maua le fesoasoani a le Alii i le mulimuli ai i Lana fuafuaga mo au.

O lea taimi, sa amata ona ou sauni mo lau malaga masani i le Malumalu o Helsinki Finland, lea ou te faaaluina ai se vaiaso.

Sa ou feiloai i isi tagata malaga se toatolu i luga o le nofoaafi, e aofia ai se tamaitai e suafa ia Mariya, lea sa ou iloaina e lei faia se toalua. Sa tosina o ia ia te au i le faaletino uma ma le faaleagaga, ma sa ou mafaufau pe aisea ou te lei feiloai ai i se tamaitai e pei o ia i le taimi muamua. Sa ou mafaufau i tua i lau lapataiga muamua e uiga i le faaosoosoga e amata se sootaga i fafo atu o le Ekalesia.

“Ia malosi,” sa ou mafaufau ai. “Ia faamaoni i au mataupu faavae. O le a e mauaina se tamaitai agavaa ma matagofie i totonu o le Ekalesia.”

I le mafaufau ai e mafai ona ou tau lava o le avea o se faifeautalai tagata lelei ma atonu e faasoa atu le talalelei ia te ia, ma i le manaomiaina o le uunaiga, sa ou toina mai i fafo lau kopi o le Tusi a Mamona e faitau, ma mafaufau pe na te iloa mai. I lou tei ai, sa fai mai Mariya, “Pei uma a ou te iloa le mea e te alu i ai!”

Sa ou vaai ae i luga ma vaaia o loo ia uuina se kopi o le Tusi a Mamona. O ia foi o se tagata o le Ekalesia ma o loo malaga foi i le malumalu.

I le taeao na sosoo ai sa ma faaauaua la ma malaga i Helsinki i le pasi. Sa ou iloa o Mariya e sau mai Voronezh, o se aai i le Misiona a Russia Moscow West. Sa vave ona ou fiafia ia te ia ma tatalo faatauanau mo le taitaiga. O le tali, sa ou maua ni lagona lelei i totonu o lou loto.

“Le Alii e, na o le tasi le ma vaiaso o loo totoe i le malumalu,” o lau tatalo lea. “Faamolemole ia fesoasoani mai ia i maua ia sili atu ona iloa e le tasi le isi i lenei taimi.”

Ma sa ma faia. I va o sauniga i le malumalu, sa ma savalivali ai, aai faatasi, ma o atu i le faleoloa, ma talatalanoa. I le faaiuga o le vaiaso, sa ma o uma i le fale—o Mariya i Voronezh ma au i Samara. Ae sa ma malaga i aai a le tasi ma le isi ina ia faamasani atili, ma i le aso 14 o Setema, 2010, sa ma faaipoipo ai i le Malumalu fou ua faapaiaina o Kyiv Ukraine.

O loo ma nonofo nei ma Mariya i Voronezh ma o loo maua le fiafia. Tatou te malamalama o tala faafagogo ia e faaiu i le fuaitau “ma sa la nonofo fiafia ai lea.” I le olaga moni tatou te fatuina lo tatou lava fiafia i le faaiuga e ala i le faaauau pea ona tuuina atu lo tatou faamaoni i le Alii e ala i le tausia o a tatou feagaiga o le malumalu, faaauau pea ona galulue i le faamalosia o o tatou faaipoipoga, ma taumafai ia avea e pei o Iesu Keriso.

Ma te faafetai mo la maua feiloaiga faavavega ma faamoemoe o la maua tala o le a i ai le faamoemoe ma tuu atu le malosi i isi o loo saili pea mo ni soa e faavavau. O tala a isi atonu e le pei o la maua tala, ae ua ma iloa ma Mariya, po o a lava luitau, e faafofoga le Alii i a tatou tatalo faamaoni. E alofa o Ia ia i tatou ma e popole mo i tatou taitoatasi. A tatou faataga o Ia, o le a Ia taitai lo tatou ala ma faataga mea uma ia manuia mo lo tatou lelei (tagai MF&F 90:24).