Savali a le Au Peresitene Sili
Manuia i Lenei Olaga
Peresitene Henry B. Eyring
Fesoasoani Muamua i le Au Peresitene Sili
Ia i tatou uma o e ua o mai i lenei olaga faaletino, sa fetalai mai le Faaola, “E maua foi outou e le puapuaga i le lalolagi” (Ioane 16:33). Peitai, na Ia tuuina atu lenei folafolaga matagofie i Ana au soo i le taimi o Lana galuega faaletino: “Ou te tuuina atu ia te outou le manuia, o lou manuia ou te avatu ai ia te outou: ou te le avatu ia te outou faapei ona avatu e le lalolagi” (Ioane 14:27). E toafimalie le iloaina, o lenei folafolaga o le filemu faaletagata lava ia e faaauau pea mo Ana soo uma o le aso.
O nisi o i tatou o loo nonofo i ni siosiomaga matagofie ma toafilemu, ae o loo tatou aafia i lagona faaletagata lava ia o le faigata ma le tauiviga. O isi e lagona le filemu ma le toafimalie atoatoa a o aafia ai i le toesea tele faaletagata lava ia, o faalavelave, ma tofotofoga o loo faaauau pea.
Atonu ua e vaai i le vavega o le filemu ua faaalia i fofoga o se soo a Iesu Keriso pe faalogo ai i ana saunoaga. Ua ou vaaia le filemu i le tele o taimi. O nisi taimi sa i ai i totonu o se potu o le falemai lea e potopoto ai se aiga i autafa o se auauna a le Atua ua lata ona maliu.
Ou te manatua le asiasi atu i se tamaitai i le falemai i ni nai aso ao lei maliu o ia i le kanesa. Sa ou aumaia ou afafine laiti e toalua faatasi ma au aua sa avea lenei tuafafine lelei ma o laua faiaoga Peraimeri i se tasi o taimi.
Sa potopoto faataamilo tagata o lona aiga i lona moega, e mananao e faatasi ma ia i ona taimi mulimuli i le lalolagi. Sa faateia au a o ia saofai ae i luga o le moega. Sa ia aapa mai i ou afafine ma faailoa atu i laua uma, taitoatasi, i tagata taitoatasi o lona aiga. Sa ia saunoa e pei o ou afafine e taualoa o loo faalauiloa atu i le maota o se masiofo. Sa ia maua se auala e fai atu ai se mea e uiga i le avea ai o tagata taitoatasi i totonu o le potu ma se soo a le Faaola. Ou te manatua pea le malosi, le agamalu, ma le alofa i lona leo. Ma ou te manatua ai le faateia i lona ataata fiafia e ui sa ia iloa e le toe umi ae maliu.
Sa ia mauaina faamanuiaga faaleperisitua o le toafimalie, peitai sa ia tuuina mai ia i matou uma se molimau ola i le moni o le filemu o folafolaga a le Alii: “Ua ou fai atu nei mea ia te outou, ina ia outou maua le manuia ia te au. E maua foi outou e le puapuaga i le lalolagi: a ia outou loto tetele; ua ou manumalo i le lalolagi” (Ioane 16:33).
Sa ia taliaina Lana valaaulia, ma e mafai ona tatou taliaina Lana valaaulia, e ui i o tatou tofotofoga ma faigata:
“Ia outou o mai ia te au, o outou uma o e tigaina ma mafatia i avega, o a’u foi e malolo ai outou.
“Ia outou amoina la’u amo, ma ia outou faaaoao ia te a’u; aua o a’u le agamalu ma le loto maulalo: ona maua lea e outou o le malologa mo outou agaga” (Mataio 11:28–29).
E na o le mulimuli i le Faaola e mafai ai e soo se tasi o i tatou ona maua le filemu ma le toafimalie i tofotofoga o le a oo mai ia i tatou uma.
E fesoasoani tatalo o le faamanatuga ia i tatou e iloa le auala e maua ai le filemu i le lotolotoi o faafitauli o le olaga. Pe a tatou aai ma feinu i le faamanatuga, e mafai ona tatou filifili e faamaoni i a tatou feagaiga e mulimuli atu ia te Ia.
Ua tatou folafola atu taitoatasi e manatua le Faaola. E mafai ona e filifili e manatua o Ia i le auala sili e latalata atu ai lou loto ia te Ia. O nisi taimi mo au, o le vaai faalemafaufau ia te Ia o loo tootuli i le Faatoaga o Ketesemane pe vaai o loo Ia valaau atu ia Lasalo e sau i fafo mai le tuugamau. Ao ou vaai faalemafaufau i lea tulaga, ou te lagona se latalata atu ia te Ia ma se loto faafetai e aumaia le toafilemu i lou loto.
E te folafola atu foi e tausi i Ana poloaiga. E te folafola atu e ave i ou luga Lona suafa ma ia avea o Lana molimau. Ua ia folafola mai a o e tausia au feagaiga faatasi ma Ia, o le a faatasi le Agaga Paia ia te oe. (Tagai i le MF&F 20:77, 79.)
E aumaia e lenei mea le filemu i ni auala se lua. E faamamaina e le Agaga Paia i tatou mai le agasala ona o le Togiola a Iesu Keriso. Ma e mafai e le Agaga Paia ona tuuina mai ia i tatou le filemu e oo mai mai le mauaina o le faamaoniga a le Atua ma le faamoemoe o le ola e faavavau.
Sa tautalagia e le Aposetolo o Paulo lenei faamanuiaga matagofie: “A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni” (Kalatia 5:22).
Ina ua faailoa atu e avefeau o le lagi le soifua mai o le Faaola, sa latou tautino atu, “O le viiga i le Atua i mea aupitoaluga, ma le manuia i le lalolagi” (Luka 2:14; faaopoopo le faamamafa). Ou te tuuina atu lau molimau o se molimau ia Iesu Keriso faapea e mafai e le Tama ma Lona Alo Pele ona auina mai le Agaga ina ia tatou maua ai le filemu i lenei olaga, i soo se tofotofoga e ono oo mai ia i tatou ma i latou tatou te alolofa i ai.