Malosi e Filifili Ai
E alala le tusitala i Kalefonia, ISA.
Auauna atu i se misiona po o le avea o se tagata tino lelei faapolofesa? Sa fesoasoani ia te au se mau ma se upusii sa faasoa mai e lau uo ia te au.
Sa ou fiafia ina ua valaau mai se tamaloa ia te au i se tasi o aso ma fai mai sa ia vaai i ni au faaaliga o tagata tino lelei ma sa manao e avea ma au tagata lagolago. Na te totogiina ou lavalava ma porotini ma totogi lau pasese i Europa ina ia faia ni faaaliga iina. Sa ia fai mai foi e mafai ona ou i ai i totonu o se mekasini. O le avea ma tagata tino lelei o se mea sa ou fiafia i ai, ma o lou faamoemoe sili lea! Na o le pau le faafitauli, sa ou auina atu i totonu au pepa o le misiona i nai aso na muamua atu. Sa ou fai atu i le tamaloa, sei ou mafaufau e uiga i lana ofo ma toe valaau atu ia te ia.
Sa ou fetaiai ma se faaiuga sili ona faigata o lou olaga. Mo ou matua, o le taliaina o le tagata lagolago [sponsor] sa le o se filifiliga. Sa la fai mai, “Atonu e te maua lenei avanoa pe a maea lau misiona.” Ae sa le mafai ona tuu lou mafaufau i ai. Sa ou iloa e tatau ona ou alu i se misiona ma auauna atu i le Alii, ae o lou miti ua avanoa mo au i le taimi nei.
Sa ou fesili i le toatele o au uo i mea latou te manatu e tatau ona ou faia. Sa fai mai nisi e tatau ona ou taliaina le tagata lagolago, ma o isi sa fai mai o le faiga a Satani e faasagatau mai ia te au aua na te le manao e auauna atu i se misiona.
I se tasi aso, sa faasoa mai e se uo lelei ia te au se upusii mai ia Peresitene Ezra Taft Benson (1899–1994): “O alii ma tamaitai o e liliu atu o latou loto i le Atua o le a iloa e mafai ona Ia faia le tele o mea i o latou olaga nai lo mea latou te mafai ona faia. O le a Ia faalolotoina lo latou olioli, faalautele la latou vaaiga, faamataala o latou mafaufau, faamalolosia o latou musele, sii a’e o latou agaga, faatele o latou faamanuiaga, faateleina o latou avanoa, faamafanafana o latou agaga, faatulai uo, ma liligi mai le filemu.”1
O lena upusii sa i ai se aafiaga malosi ia te au. Faapena foi se mau sa ou faitau i ai i le Tusi a Mamona: “Ma afai e tausi e le fanauga a tagata poloaiga a le Atua, e tausi o ia ia te i latou, ma faamalolosi i latou, ma fai ala e mafai ai ona latou faataunuuina o le mea ua ia poloaiina ai i latou” (1 Nifae 17:3).
Faatasi ai ma le fesoasoaniga a lenei upusii ma le mau ma le lagolago a au uo ma le aiga, sa ou filifili ai e auauna atu i se misiona ma sa valaauina e auauna atu i le Misiona a Bolivia Cochabamba.
O le auauna atu i se misiona sa avea o se filifiliga aupito sili ona lelei ua ou faia. Sa ou mauaina faamanuiaga e le mafaitauina a o auauna atu, e aofia ai le faamanuiaina e aoao vave le faaSipaniolo.
Sa faamanuiaina foi e le Alii lou aiga. A o ou i ai i le misiona, sa ou mauaina se imeli mai i ou matua e tau mai ia te au sa alu lou uso matua i le lotu mo le taimi muamua i le 12 tausaga. Sa suia mulimuli ane lana taimi o le galuega ina ia mafai ona ia alu i aso Sa uma, ma sa ia faatuina se sini e faitau le Tusi a Mamona. O lou uso laitiiti foi o le sa tauivi faaleagaga sa faia ni suiga i lona olaga ma faamalosia lona faatuatua. Sa toe toaga lou tausoga ma amata ona toe alu i le malumalu i vaiaso taitasi e faia papatisoga mo e ua maliliu. Sa faamanuiaina moni lava i matou.