O Leo o Le Au Paia o Aso e Gata Ai
Tuuina atu o le Olioli
Ata na tusia e Stan Fellows
O maua ma lou toalua sa avea o ni faifeautalai e auauna atu i Tarbes, Farani, i Atu Mauga o Pyrenees. O le Vaeluapo ao lumanai le Kerisimasi, sa matou filifili ai e o i le aai i Verdun Plaza e tuu atu ni kopi o le Tusi a Mamona. Sa leai ni tagata i le auala, ma sa amata ona matou fesili ifo ia i matou lava po o le a le mea o le a matou faia i nei mau tusi e tele. Sa faafuasei lava, ona matou vaaia se alii talavou sa foliga e le iloa le mea e alu i ai.
Sa matou o atu ia te ia ma ofoina atu ia te ia se Tusi a Mamona. Sa amata ona olioli ao ia faalogo ia i matou o talanoa e uiga i le talalelei. Sa ia faamatala, e na o ia le po o le Kerisimasi ma e na te faitauina le Tusi a Mamona ma ia le lagona ai le tuua nao ia.
Ina ua alu, sa matou toe autilo solo i le auala ma vaaia ai se fafine o loo savali lemu agai mai ia i matou i le po malulu. Sa matou vaaia se sulu o le fiafia i ona foliga ina ua matou tuuina atu ia te ia se Tusi a Mamona. Sa ia tau mai ia i matou sa avea o ia ma se fafine ua oti lana tane lata mai nei ma sa fiafia sa matou popole e uiga ia te ia. Sa ia fai mai sa matua fiafia ia matou. Ao ia savali ese atu, sa matou vaaia ai lona uuina o le tusi i lona fatafata.
Sa matou tufaina i lena po kopi uma o le Tusi a Mamona sa matou aumaia mai matou. O le toatele o tagata sa matou tuuina atu i ai tusi sa tuuatoatasi, le fiafia, ma manaomia tele le alofa. Sa matou toe foi i le fale i lena po ma se lagona loloto sa matou mauaina le meaalofa silisili o le Kerisimasi ona o le olioli sa mafai ona matou tuuina atu i isi.