O Leo o Le Au Paia o Aso e Gata Ai
Matauila Lanu Moana e Tasi
Ata na tusia e Allen Garns
Sa i ai se feeseeseaiga a lou tina ma lou tama i le auala e teuteu ai lo matou fale i le Kerisimasi. Sa faalelelei lou tama i le pikiina o lanu, o lea la o le lanu mumu, lanu meamata, ma le lanu enaena sa foliga tutusa ma le manaia ia te ia. Ae peitai, sa foliga susulu ma matagofie le lanu moana. Sa ia lagolago malosi foi i le au futipolo, a le Iunivesite a Polika Iaga e ona lanu a le aoga e aofia ai le lanu moana.
Talu ai o lona lanu e sili ona fiafia i ai o le lanu moana, sa ia manao ai e tuu i luga moli lanu moana. Ae sa fai mai lou tina o le lanu moana e le o se lanu o le Kerisimasi, o lea o tausaga uma lava e tautau faalelei ai e Tama ia moli lanu mumu, lanu meamata, ma le lanu paepae o le Kerisimasi i luga o le latou fale. Ina ia taufaalili ia Tina, na te suiina se tasi o matauila i se lanu moana sesega. A e vaai lelei, e te iloa atu se matauila e tasi lanu moana i moli lanu mumu, lanu meamata, ma lanu paepae.
O tausaga taitasi e susulu mai ai le matauila lanu moana mai se nofoaga ese. O nisi taimi sa natia i le tulimanu lea e le iloa atu e se tasi, ae o nisi taimi na te tuuina i luga o le fale taavale po o le faapaologa i luma. Sa avea o se taaloga malie i le va o Tina ma Tama.
I se tasi o tausaga, sa faafuasei lava ona maliu Tama ae toe lua ni aso oo i le Kerisimasi. I lana sauniga, sa faamatala ai le tala o le matauila lanu moana e tasi e na te tautauina i tausaga uma. O le po na sosoo ai, sa autilo atu lou tina i fafo o le faamalama. I leisi itu o le auala, sa susulu mai ai i moli papae i luga o le faapaologa i luma a lana tuaoi, o se moli lanumoana e tasi. I totonu o ni nai aso, sa faaopoopo e le toatele o tuaoi ma uo ni matauila lanu moana i a latou moli Kerisimasi. O nisi sa teuteuina foi laau atoa i le lanu moana.
Ou te faafetai sa faaalia e uo ma tuaoi a lou tina lo latou alolofa mo ia e ala i le teuteuina [o o latou fale ma laau] i moli lanu moana. Sa latou fesoasoani mai ia te au e iloa le uiga o le “faanoanoa faatasi ma e e faanoanoa; … ma faamafanafana atu ia te i latou o e e manaomia le faamafanafanaga” (Mosaea 18:9). Ou te faafetai sa tuuina mai e le Tama Faalelagi le meaalofa o Lona Alo. Ona o Iesu Keriso, o le a ou toe vaai i lou tama.