O Le Mana Paia o le Alofa Tunoa
Saunia e James J. Hamula
O Le Fitugafulu
Mai se saunoaga o le Faigalotu o Aoga a le Ekalesia, “His Grace Is Sufficient for You,” na tuuina atu i le Iunivesite o Poloka Iaga–Hawaii i le aso 3 o Iuni, 2014. Mo le saunoaga atoa, alu i le broadcast.lds.org.
O le alofa tunoa ua faamoemoe e mafai ai e i tatou ona tausia atoatoa atili ia poloaiga ma ola atili faapei o Keriso, seia tatou atiina ae ai le tino o Keriso.
Faamatalaga mai le They Brought Their Little Children, saunia e Walter Rane, e le mafai ona kopiina
Mai i uiga uma o Iesu Keriso, atonu o le uiga aupito sili ona taua, o Ia e “tumu i le alofa tunoa” (Ioane 1:14). I tusitusiga paia o le faaupuga alofa tunoa e tele ina faasino i le natura paia ma le mana e faamanuia ai, tuuina atu o meaalofa, po o le isi itu ia lelei le amio i tagata. Ua tuu e le Lomifefiloi a le Tusi Paia i le itu lenei: “O le manatu autu o le upu [alofa tunoa] o uiga paia o le fesoasoani po o le malosi. … O le alofa tunoa o le mana gafatia” (“Alofa Tunoa”). E na te faatagaina le tagata e faia ma avea ai ma mea e le mafai ona ia faia ma le mafai ona avea ai pe a tuu na o ia.
Tatou te manaomia uma lea mana gafatia. O i tatou o atalii ma afafine o le Atua. Ona o lenei mea, ua tatou maua le gafatia e avea ai e pei o Ia.
Lo Tatou Tulaga Le Gafatia i le Agaga ma le Tino
A o mafai ai ona faamoemoe tatou te ausiaina le “tumu o Keriso” (Efeso 4:13), tatou te le mafai ona faia na o i tatou lava. Ua foafoaina i tatou taitoatasi i ni mea se lua—o se agaga e faavavau ma se tino faaletino (tagai Aperaamo 3:18). E oo mai lo tatou agaga e faavavau i le lalolagi ua i ai ni filifiliga sa faia i le muai olaga. O nei filifiliga i le amataga o ni vaega o a tatou amio, uiga, ma le atamai faaleagaga. Ae taua ai, e leai ni agaga se lua e tutusa (tagai Aperaamo 3:19). E i ai i agaga taitoatasi se aofaiga o le atamai faaleagaga, po o le malamalama ma le upumoni (tagai MF&F 93:36), e tusa ai ma ana filifiliga i le amataga. Ao mafai ai e o tatou agaga taitoatasi ona taunuu i lona tino faitino i le fanau mai ma le mama ma mama aiai, ma e oo lava i le tamalii ma le tautaua, e leai se tasi o o tatou agaga ua atoatoa le atiinaeina i le faatumuina ia Keriso. E mafai ona tulitulimatagauina le atoaga o le agaga i le taimi o le aoaoina i le olaga faitino ma aafiaga faaopoopo o le lalolagi o agaga, ae o le atoaga o le agaga e le iu ina faataunuuina seia oo i le Toetutu.
E faaopoopo i le le atoatoa o i ai nei a o tatou agaga, o o tatou tino faitino e le atoatoa foi. E ui e matagofie i laua, o o tatou tino faitino e tatau ona pala, faaleagaina, ma oti ma i manaoga, fia galala, ma manaoga tatou te lei fetaiai muamua. I lea tulaga e matua faigata ai ona faalagolago atoa le tino i le finagalo o le agaga. E tele ina gauai atu le agaga i mea e fiafia i ai le tino. O nisi o agaga maoae sa o mai i le lalolagi sa tauivi e faatoafimalie o latou tino faaletino. “Ua faanoanoa lou loto ona o lou tino,” na alaga ai Nifae. “Ua siosiomia au, ona o faaosoosoga ma agasala ua faigofie ona lavelavea ai au” (2 Nifae 4:17, 18; tagai foi fuaiupu 27).
O le taua i le va o le agaga ma le tino ua matua faigata ona o se isi mea moni o le olaga faitino. O o tatou tino faaletino ua foafoaina i anomea o se lalolagi “pau”, lea e tuuina atu ia Satani se “mana [faapitoa] e faatagataotaua [ai]” (2 Nifae 2:29). Sa faia e Peresitene Polika Iaga (1801–77) le faamatalaga lenei: “Aua nei tou faapea o le a tatou saoloto pea i le tino mai i faaosoosoga e agasala,” o lana tala lea. “O nisi ua faapea e mafai i le tino ona latou avea ma tino ma agaga faapaiaina ma mama ai lea latou le toe lagonaina ai aafiaga o le mana o le fili o le mea moni. Pe ana faapea e mafai ona ausia e se tagata lenei tikeri o le atoatoa i la le tino e le mafai ona oti o ia, pe tumau ai i le lalolagi lea o loo i ai le agasala. … Ou te manatu e tatau ona tatou lagonaina i se tulaga fesuisuiai ia aafiaga o le agasala i le umi tatou te feola ai, ma tatau ai ona pasia le tofotofoga o le maliu mulimuli ane.”1
O Le Mana Paia o le Alofa Tunoa
Tatou te manaomia se mana paia lea e mafai ona liua o tatou agaga ma o tatou vaivaiga ma le atoatoa i le lelei faatasi ai ma malosiaga, amio mama, ma gafatia e i ai faatasi. Ma le faafetai ai, o loo i ai sea mana paia; o le alofa tunoa a le Atua. Ua na o le meaalofa o le alofa tunoa a le Atua tatou te “faaopoopo i luga” (Aperaamo 3:26), i lena taimi, tatou te ausia ai le faatumuina ia Keriso. E moni, o le auala lenei sa ausia ai e Keriso Lona atoaga.
E pei ona fetalai le Alii ia Iosefa Samita, “O ia o le e mauaina le malamalama, ma tumau pea i le Atua, e mauaina le malamalama atili; ma o lena malamalama o le a tupu susulu malamalama tele pea lava pea seia oo i le aso e atoatoa ai” (MF&F 50:24). Ae pe a tatou taulimaina ma le faasamasamanoa, tuu ese, e oo ina le amanaiaina ia faamanuiaga mutimutivale tatou te maua mai le Alii, ona “[ua] taofia lea o mea e silisili” mai ia i tatou (3 Nifae 26:10). I ia tulaga, tatou te maua le “tali fua o le alofa tunoa o le Atua” (2 Korinito 6:1) ma iu ai ina “pau o le tagata mai le alofa tunoa” (MF&F 20:32) faatasi.
Ua fautua mai e nei vaega uma, e tatau ona tatou aoao ia onosai ia i tatou lava ma isi i o tatou vaivaiga ma le atoatoa o i ai, ma e tatau ona tatou aoao e tumau i le faagasologa faifai pea e lemafaafitia o le tuputupu ae i le atoatoa.
Faatuatua ia Iesu Keriso
O le malamalama i le auala e tuuina mai ai le alofa tunoa e fesoasoani ia i tatou e malamalama ai pe faapefea e nisi o mataupu faavae ona mafaia atoa ai e le alofa tunoa ona faatumulia i tatou. O le faatuatua ia Iesu Keriso o le mataupu faavae muamua lea e taitaia i tatou ia maua le alofa tunoa (tagai Roma 5:1–2). O le upumoni, faamoemoe, faatinoga, ma molimau mautinoa o vaega taua ia o le faatuatua ma o le auala i le mauaina o le alofa tunoa a le Alii.
Mafaufau, mo se faataitaiga, i le aafiaga a Peteru i le savali i luga o le vai i le Alii. E pei o i tatou i nisi o taimi, sa i ai Peteru ma au aposetolo i le lotolotoi o se vasa sousou. Sa afio ifo Iesu ia i latou, a o savali i luga o le vai ma talosagaina i latou e o atu ia te Ia. Ma le faamoemoe, sa sau ai Peteru i fafo o le vaa i totonu o le vasa sousou ma savali atu i le Alii. O lona faamoemoe ia Keriso, faatasi ai ma le faatinoga naunautai, sa faatagaina ai o ia e maua le mana o le savali i luga o le vai. Peitai, i le vaai atu i le afa ua siomia ai o ia, sa masalosalo ai Peteru ma amata ai ona magoto. “Le Alii e, ia e faaola mai ia te au,” na alaga atu ai. I le tali ai, ua faamaumau e tusitusiga paia sa “aapa atu loa lea e Iesu o lona aao, ua tago ia te ia” (Mataio 14:30–31). Ina ua gauai atu le vaai a Peteru i le Alii ma galue i le faatuatua, sa ia te ia le mana e faia ai le mea sa le mafai ona ia faia na o ia lava—o le savali i luga o le vai.
Faamatalaga mai le The Savior Walked on Water, saunia e Walter Rane, e le mafai ona kopiina
Ina ua aveese le gauai atu o le vaai a Peteru i le Alii ma masalosalo, sa faamamao e Peteru o ia lava mai lena mana, sa tuua ai na o ia lava, ma amata ai ona magoto. Ia manatua lelei le tali a le Alii i le alaga a Peteru mo se fesoasoani. Sa “[aapa atu] loa lea” e le Alii Lona aao e faasaoina mai o ia. O lenei aafiaga e faatino ai le mauaina o le alofa tunoa a le Alii i o tatou taimi e manaomia ai.
Salamo
O le salamo o le mataupu faavae lona lua e mafai ai e le alofa tunoa ona faatumulia i tatou. Sa aoao mai Mamona: “O lea, amuia lava i latou o e o le a salamo ma faalogo i le siufofoga o le Alii lo latou Atua; ona o i latou ia o e o le a faaolaina. Ma ia tuuina mai e le Atua … , i lona atoatoa silisili, ina ia mafai ona aumai o tagata i le salamo ma galuega lelei, ina ia mafai ona toefuataiina ia i latou le alofa tunoa mo le alofa tunoa, e tusa ma a latou galuega” (Helamana 12:23–24). Mai lenei mau, e manino lava o se loto salamo ma galuega lelei e tusa ai ma le alofa tunoa.
Mafaufau i le faataitaiga a Alema le Itiiti. O ia, faatasi ai ma atalii o Mosaea, “sa avea i latou ma tagata agasala sili ona leaga” (Mosaea 28:4). Ina ua faaali mai le agelu a le Atua ia Alema, sa fetaiai o ia ma agasala uma ma faigata o lona olaga. I lena taimi sa “tigaina [o ia] i le mafatia faavavau” (Alema 36:12). “O le mafaufau ifo i lou alu atu i luma o lou Atua,” na saunoa ai, “sa matua falo tigaina ai lou agaga i le matau tele” (Alema 36:14). Ae sa manatua e Alema sa tautalagia e lona tama e tusa ai ma le afio mai o Iesu Keriso e togiola mo le agasala a le lalolagi. O lenei manatuaga sa musuia ai o ia e alaga atu i lona loto, “E, Iesu e, oe le Alo o le Atua, ia e alofa mutimutivale mai ia te au” (Alema 36:18). Sa vave, ona ia “[mafai] ona le toe manatuaina [ona] tiga” ma “atuatuvaleina i le manatuaina o [ona] agasala” (Alema 36:19).
Faamatalaga mai ia Alema, Tulai, Saunia e Walter Rane, E le mafai ona kopiina
Sa faafeiloai e le agaga salamo a Alema se mana e faamamaina ma liua ai o ia i se tagata fou. Sa lei toe saili o ia e faaleaga le Ekalesia a le Atua. Ae, mo aso na totoe o lona olaga, sa galue Alema e atiae i luga le Ekalesia e ala i le galue e fesoasoani i isi ia salamo ma maua le Agaga Paia. O le liua a Alema le Itiiti mai le avea ma tagata agasala sili ona leaga i le perofeta a le Atua o se faataitaiga mamana o le mana o le alofa tunoa a le Alii e faamasino tonu ai ma faamamaina ai i tatou uma taitoatasi.
Lotomaualalo
O le mataupu faavae lona tolu o le lotomaualalo. Sa aoao e le Alii Moronae, “Ua lava lo’u alofa tunoa i tagata uma o e faamaulaloina i latou lava i o’u luma; aua afai latou te faamaulaloina i latou lava i ou luma, ma faatuatua ia te au, ona ou faia lea o mea vaivai ma mea malolosi ia te i latou” (Eteru 12:27). O le faia o mea vaivai e avea ma mea malolosi o le galuega a le alofa tunoa.
Afai e manaomia le lotomaualalo, e tatau la ona tatou fesili po o le a le lotomaualalo. I se faaupuga puupuu, o le lotomaualalo o le gauai atu o le loto o se tasi i le finagalo a le Atua ma tuuina atu ia te Ia le mamalu mo mea ua ausiaina. I lenei tulaga, o Iesu Keriso o lo tatou faataitaiga sili. O Lona lotomaualalo ma le usiusitai sa atoatoa le tuuina atu i le taimi o Lana taulaga togiola. Sa tatalo Iesu, “Lo’u Tama e, afai e mafai, ia ave ese lenei ipu ia te au; ae aua le faia lo’u loto, ao lou finagalo” (Mataio 26:39). Ua faatumulia le atoatoa o le alofa tunoa a le Atua i lenei tulaga.
Filigā
O le mataupu faavae lona fa o le filiga. E pei ona aoao e Nifae lona nuu, “E faaolaina i tatou i le alofa tunoa, pe a uma mea uma e mafai ona tatou faia” (2 Nifae 25:23). O nisi atonu e faitauina lenei mau e faapea o le a taofia le alofa tunoa a le Atua seia oo ina tatou tuuina atu la tatou taumafaiga sili. Ou te le talitonu o lona uiga lena. O loo i ai lava le tele o faataitaiga o le alofa tunoa a le Atua ua tuuina atu i le tagata e aunoa ma lona faia o se mea. O le mana o le Toetu, mo se faataitaiga, ua tuuina atu i tagata uma e le alofa tunoa a le Atua, e tusa lava po a taumafaiga a tagata taitoatasi. Ou te malamalama i le gagana a Nifae o “mea uma e mafai ona tatou faia” o lona uiga ua tuuina mai le alofa tunoa a le Atua ia i tatou pe a tatou filiga. E pei ona tusia e Elder Bruce C. Hafen, sa avea muamua ma sui o le Fitugafulu, “O le meaalofa o le alofa tunoa a le Faaola ia i tatou e le tapulaa i le ‘maea’ ai o mea uma e mafai ona tatou faia. Atonu tatou te maua lona alofa tunoa ao lei, i le aluga o le taimi, ma le maea ai o le taimi pe a tatou faalautele o tatou lava taumafaiga.”2
Mafaufau i le faataitaiga a le uso o Iareto. Sa faatonuina o ia e fausia ni vaa ma faaaoga i latou e sopoia ai le vasa. I lea laasaga i lea laasaga, sa filiga ai le uso o Iareto e mulimuli i le faatonuga a le Alii. Ao ia faamaeaina [le fauina] o vaa, sa amata ona popole le uso o Iareto i le pogisa i totonu o vaa ma ole atu i le Alii e tuuina mai le malamalama. Ao faigofie ai ona vave ona mafai e le Alii ona tuuina atu i le uso o Iareto le vaifofo, sa Ia fesili atu ai, “O le a se mea tou te mananao ia ou faia ina ia outou maua se malamalama i totonu o o outou vaa?” ((Eteru 2:23). I le tali atu, sa saunia ma le filiga e le uso o Iareto ni maa e 16, ma tuuina atu i le Alii, ma ole atu ina ia pai o Ia ia i latou ia “latou susulu atu i le pogisa” (tagai Eteru 3:1–4).
Sa lei faataunuuina uma e le uso o Iareto mea uma sa tuuina atu e le Alii ia faia e ia, e ui i lea, sa tuuina atu e le Alii Lona mana e fai ma sui o le uso o Iareto, ma le pai atu i maa taitasi ma mafai ai ona latou mauaina le malamalama na manaomia mo le faigamalaga sa faamoemoeina. I le faia o lea mea, sa faaali atu e le Alii Lona ia naunautai ma le saunia e tuuina atu Lona mana paia ia i tatou a o tatou faia ma le naunautai le mea sili e mafai ona tatou faia.
Usiusitai
O le mataupu faavae lona lima o le usiusitai. “Afai tou te tausi i au poloaiga,” na fetalai ai le Alii, “ o le a outou maua le alofa tunoa mo le alofa tunoa” (MF&F 93:20). Ua tuu e Moronae i le auala lenei: “Ma afai tou te faafiti outou lava mai mea e le faaleatua uma, ma alolofa i le Atua ma o outou manatu atoa, mafaufau, ma le malosi atoa, ona lava lea o lona alofa tunoa mo outou, ma o lona alofa tunoa e mafai ai ona outou atoatoa ia Keriso” (Moronae 10:32).
E aunoa ma le tuuitiitia o le poloaiga a le Alii e tausi poloaiga po o le poloaiga a Moronae e faafiti outou lava mai mea uma e le faaleatua, e tatau ona tatou malamalama e le faalagolago le alofa tunoa i lo tatou usiusitai atoatoa. Afai e faalagolago le alofa tunoa i lo tatou tausia ma le atoatoa o poloaiga po le faafitia atoatoa o i tatou lava mai i mea uma e faaleatua, o lo tatou le atoatoa faatauanau i le olaga faaletino o le a faavavau ona taofia i tatou mai le mauaina o le alofa tunoa. O le alofa tunoa ua faamoemoe e mafai ai e i tatou ona atoatoa ona lelei le tausiaina atili o poloaiga ma ola atili i se olaga faaKeriso ma e pei o Keriso, seia tatou atiina ae ai le tino o Keriso.
O le poloaiga a le Alii e tausi poloaiga ma le poloaiga a Moronae ia faafiti i tatou lava mai mea uma e le faaleatua e tatau ona tatou faia nei mea i le mea sili tatou te mafaia. E ui e taua o tatou amioga, ae sili ai ona taua ia faamoemoega o o tatou loto.
Mauaina o le Agaga Paia ma le Sailia o Meaalofa o le Agaga
O le mataupu faavae mulimuli o le mauaina o le Agaga Paia ma le sailia o meaalofa o le Agaga (tagai Mosaea 18:16). E moni, ua faatumulia i tatou i le alofa tunoa a le Atua pe a tatou maua le Agaga Paia, aua o le Agaga Paia e tuuina atu ma auina mai ia i tatou mana faapaiaina, gafatia, ma faaatoatoaina.
I lenei tulaga, sa aoao mai e Elder Parley P. Pratt (1807–57) o le Korama a Aposetolo e Toasefululua le mea lenei: “O le meaalofa o le Agaga Paia … e faatelevaveina ia tomai uma, faateleina, faalauteleina, faalapoaina, ma faamamaina ia lagona lelei uma ma faanoanoaga, ma liua i latou e ala i le meaalofa o le atamai, i lo latou faaaogaina tatau. Na te musuia, atinaeina, seleseleina ma faatauaina ia lagona faanoanoa, fiafia, malu, agalelei, ma alofa. Na te musuia le amio mama, lelei, agaalofa, alofa, agalelei, ma le alofa mama. Na te atinaeina uiga lelei o se tagata, o ona foliga ma amioga. Na te faaleleia soifua maloloina, malosi, fiafia, ma lagona lelei. Na te faaolaolaina le malamalama ma le faaletino o le tagata. Na te faamalosia ma tuuina atu le malosi i neura. E le gata i lea, o le sua i ivi, o le fiafia i le loto, o le malamalama i mata, o pese i taliga, ma le ola i le tino atoa.”3
O na faamanuiaga e oo mai ia i tatou ao tatou mauaina le Agaga Paia pe a maea lo tatou papatisoga ma le faamauga. Sa aoao mai Elder Orson Pratt (1811–81) o le Korama a Aposetolo e Toasefululua e faapea “soo se taimi e nofo ai le Agaga Paia i se tagata, e le gata ona ia faamama, faapaia, ma faaatoatoa o ia, e tusa ai ma lona gauai atu i ana uunaiga, ae e tuuina atu ai foi ia te ia ni meaalofa, ua fuafuaina mo le manuia o ia lava ma isi. … Ua tuuina atu nei meaalofa faaleagaga i tagata o le Ekalesia, e tusa ai ma lo latou faatuatua, tulaga, gafatia masani, tiute, ma valaauga; ina ia aoaoina ma le tatau tagata uma, faamauina, faaatoatoaina, ma laveaiina.”4
O Le Lava o le Alofa Tunoa a le Atua
Ua faatumulia Iesu Keriso i le alofa tunoa. Sa mauaina e Keriso oa o Lona alofa tunoa mai Lona Tama ma faia “mo le alofa tunoa” (MF&F 93:12). I se auala faapea tatou te mauaina le alofa tunoa mo le alofa tunoa. O le a faaeeina mai ia i tatou uiga ma amioga uma a le Atua. Mea mulimuli, o lenei mana gafatia ma atoatoa o le alofa tunoa e maua e ala i mataupu faavae o le faatuatua, salamo, lotomaualalo, filiga, usiusitai, ma le sailia o le Agaga ma ana meaalofa.
E Le o Iinei o Ia, saunia e Walter Rane, e le mafai ona kopiina
Ua lava le alofa tunoa a le Alii e siitia ai oe mai le oti ma le agasala ma faaeaina oe i le ola e faavavau. Ua lava e suia ai oe, liua ai oe, ma faaatoatoa ai oe. Ua lava e mafai ai e oe ona faataunuu lou gafatia paia o se atalii po o se afafine o le Atua.