O Leo o Le Au Paia o Aso e Gata Ai
Faafeiloaiina o Iesu
Ata na tusia e Dan Burr
I le mavae ai o ni vaiaso o le naunautai, sa iu ina oo i le Vaeluapo ao lei oo i le Kerisimasi. Toetoe o tagata uma o lo matou aiga sa i ai faatasi ma matou—o Tinamatua ma Tamamatua Fletcher, o o ma afafine e toatolu ma o latou taitoalua ma fanau. Sa amata ona pogisa ma sa ola moli teuteu o le auala. Sa susulu fale i teuteuga matagofie ao mumu fiafia ai moli Kerisimasi i faamalama.
Sa matou sauni e o i le Faaaliga o le Soifua Mai o Iesu, lea sa faia e le Ekalesia mo le tele o tausaga i Calgary, Alberta, Kanata. O Vaeluapo ao lei oo i le Kerisimasi uma, sa matou fiafia e o i le faaaliga sa i ai uma asini, mamoe, Au Makoi, leoleo mamoe, fitafita Roma, agelu, ma se masini faaleotele malosi. Sa aumaia le lagona o le filemu, alofa, ma le uiga moni o le Kerisimasi i la matou faafiafiaga pisi.
Sa matou taunuu atu i le Paka o Heritage, lea sa faia ai le faaaliga, ma e lei umi ae matou fiafia i le musika matagofie a le Aufaipese a le Tapeneko Mamona ma le tala o le soifua mai o le Faaola. Sa tolu tausaga o Lauren, le ulumatua o fanau a le ma fanau i lea taimi. Sa fiafia o ia i le vaaiga, o leo, ma le tala sa faatinoina i luma o i matou. Sa sau mai ia matou manava le ea malulu i lalo o le vanimonimo manino, ma feilafi o fetu. Sa matou matamata ao usiusitai tagata sa faatinoina Iosefa ma Maria i le faatonuga a Kaisara Aokuso e o i Peteleema ina ia totogi lafoga. O le fafine sa faatinoina Maria sa “to o ia” (tagai Luka 2:5), ma sa na o le pau le nofoaga la te mafai ona nonofo ai o se fale o manu faatauvaa. O iina, “ua fanau e ia lana tama ulumatua, ua ia aui ia te ia i le ie, ma faataoto ia te ia i le fale povi” (tagai Luka 2:7). O sulu o moli sa suluia ai le maupuepue lea sa matou vaai ai tagata o ni leoleo mamoe o loo leoleoina “i lo latou lafu mamoe [i le po]” (tagai Luka 2:8). Na faafuasei lava, ona faaali mai se tagata iloga o se agelu o loo faaali manino mai i le ea, o loo susulu atu ia te ia se sulu malamalama. Sa faafuasei ona alaga atu Lauren i le alofa, “Iesu, o au, o Lauren!”
O tagata uma sa siomia i matou sa lagona lona faafeiloai ma sa talie lemu, ma fiafia i le faatei a Lauren. Sa manino le faaseseina o ia e uiga ia te ia, ae mo i matou sa faaleleia ai le faaaliga o lena tausaga. Sa iloa e Lauren e silafia o ia e Iesu, ma sa faamanatu mai ia i matou i lo matou malamalama e Na te silafia lava i tatou uma taitoatasi. Sa matou mafaufau pe na i ai ni manatuaga o Lauren e uiga i lona Faaola lea sa ia tuua i tausaga pupuu e tolu na muamua atu. O le faafeiloaiga faafuasei a Lauren sa tuuina mai ai matou le faamoemoe o le a matou iloaina foi o Ia pe a matou feiloai ia te Ia. O lona alofa mo le Faaola ma Lona alofa mo Lauren sa mafanafana ai o matou loto i lena Vaeluapo ao lei oo i le Kerisimasi malulu.