O Leo o Le Au Paia o Aso e Gata Ai
O Se Sauniga Faamanatuga A Agelu
I nai aso ina ua maea le aso Faafetai, sa amata ona mai lau tama tama e tolu tausaga o Drew. Sa ala o ia i taeao taitasi, ai lana meaai o le taeao, sauni mo le aso ma sa foliga na manuia, ae ina ua faagasolo le aso, sa amata ona vaivai ma sa le fia ai.
Sa faaauau ai lava lenei faiga mo ni nai vaiaso. Na iu lava, i le aso Faraile, le aso 18 o Tesema, sa ou siiina ai Drew i totonu o le ofisa a le fomai i le 3:00 i le aoauli. Sa le mafai e Drew ona tu pe savali ma o lona pau sa sesega.
Sa ou autilo atu i le fomai ma fai atu, “O le tulaga lenei e oo i ai o ia i aoauli ma afiafi uma mo vaiaso e tolu ua tuanai.” Sa tasi a le vaai a le fomai ia Drew ma taofia vave loa o ia i le falemai. Sa faia e fomai ni suesuega ae sa le mautinoa le mea sa faaletonu ia te ia.
I le aso na sosoo ai, sa siitia atu ai Drew i le isi falemai. I le taeao o lena aso Sa, sa ou lagona le faavaivai. I le mavae ai o le tele o suesuega mo le lua aso mai i falemai eseese, sa leiloa e se tasi le mea sa faaletonu i lou atalii. E faaopoopo i lena mea, o le aso Sa ao lei oo i le Kerisimasi. O lau sauniga faamanatuga e sili ona fiafia i ai o le tausaga atoa o le polokalama o le Kerisimasi ma o le a ou misia uma pese matagofie ma lauga i lo matou uarota.
Ao matou savavali atu ma lou toalua ma Drew agai i le potu o le falemai lea o le a faia ai se sauniga faamanatuga, sa ou faanoanoa. Sa ou alu atu i le laulau lea sa i ai ni polokalama, piki se polokalama e tasi, ma savali pea i luma ma autilo i lalo ae ou taia loa i se tasi.
Sa ou autilo i luga ma fai atu, “Faamalie atu,” ae sa leai se tasi iina. Ao ou vaai atu i le potu lea e faia ai le faamanatuga, sa pei o se fale matamata. I luga o le tulaga sa i ai ni nofoa ma ni masini faaleotele, se piano, ma se laulau sa seti mo le faamanatuga ma ni nai nofoa i tua. Sa lei tumu le potu ae sa i ai fanau sa mamai ma o latou matua, e toatele sa i ai a latou IV e mafai ona feaveai.
Ao ou vaai solo i le potu, sa ou lagona le i ai o ni agelu. Sa matou nonofo i lalo ma sa tafe ifo loimata i lalo o ou foliga a o ou lagona le alofa o le Atua mo Lana fanau o e sa mamai ma mafatia, sa i ai i se falemai soo se ituaiga o gasegase i le taimi sili ona matagofie o le tausaga.
Sa avea o se sauniga faamanatuga sili ona matagofie i lou olaga.
Sa lei iloa lava e fomai le mea sa faaletonu ia Drew. Sa ia maua ni vailaau e togafiti ai ona tiga ona tea lea mai le falemai i le aso na sosoo ai. Na te lei toe maua ni faaletonu talu mai lena taimi, ae o lena sauniga faamanatuga o le Kerisimasi o le a tumau ia te au e faavavau.