Ki o le Perisitua

O le pule e taitai ai le galuega a le Atua

O aso uma lava, atonu e te maua ai le aafiaga o le tatalaina o faitotoa e ala i le faaaogaina o se ki. O le umiaina o ki e mafai ona faatusa i se tagata ua i ai le pule ma le faaaogaina. O ki o le perisitua o loo umia e auauna a le Alii ua faatagaina ai i latou e taitai pe faapefea ona faaaoga le pule ma le mana o le perisitua i le galuega o le faaolataga ma le faaeaga.

O Iesu Keriso o loo umia ki uma o le perisitua e faatatau i Lana Ekalesia. Na Ia faaee atu i luga o Ana Aposetolo taitasi ki uma e faatatau i le malo o le Atua i le fogaeleele. O le Peresitene o le Ekalesia e na o le pau lea o le tagata ua faatagaina e faaaoga uma na ki o le perisitua.

O peresitene o malumalu, peresitene o misiona, peresitene o siteki, epikopo, ma peresitene o korama e umia foi ki o le perisitua lena e faatagaina i latou e pule faamalumalu ma taitaia le galuega ua tofia i latou e fai. Ona o ki o le perisitua, ua mafai ai ona tatou maua sauniga, feagaiga, faamanuiaga, ma mana tatou te manaomia ina ia toe foi atu ai e mau faatasi ma lo tatou Tama Faalelagi ma lo tatou Faaola ma avea e faapei o i Laua.

O A Ki o le Perisitua?

O ki o le perisitua o aia tatau ia o le au peresitene, po o le mana ua tuuina mai e le Atua i le tagata e pulea ma taitai ai le malo o le Atua i luga o le fogaeleele (tagai Mataio 16:15–19). O ki o le perisitua e taua e taitai ai le talaiina o le talalelei ma le taitaiina o sauniga o le faaolataga.

Vaaiga aoao i le Autu: Perisitua

Taiala e faatatau i le suesueina o le talalelei: Perisitua Arona, Perisitua Mekisateko, Toefuataiga o le Perisitua

Vaega 1

Na Toefuatai Mai e Avefeau Faalelagi Ki o le Perisitua i o Tatou Aso

I le taimi o Lana galuega i le olaga nei, na tuuina atu ai e Iesu Keriso “ki o le malo o le lagi” ia Peteru, Iakopo, ma Ioane (tagai Mataio 16:18–19; Mataupu Faavae ma Feagaiga 7:5–7). Faatasi ai ma le maliliu o Iesu Keriso ma Ana Aposetolo, na leiloloa ai le perisitua ma ki o le perisitua mai le lalolagi mo le tele o seneturi.

I le 1829, na toe foi mai ai Ioane le Papatiso i le lalolagi ma toefuatai mai le Perisitua Arona ma ona ki i le Perofeta Iosefa Samita (tagai Mataupu Faavae ma Feagaiga 13; Iosefa Samita—Talafaasolopito 1:67–72). E lei leva mulimuli ane, ae toefuatai mai e Peteru, Iakopo, ma Ioane le Perisitua Mekisateko ma ona ki (tagai i le Mataupu Faavae ma Feagaiga 27:12–13).

O isi avefeau faalelagi, e aofia ai Mose, Elaia, ma Elia, na faaali atu ia Iosefa Samita i le Malumalu o Katelani ma tuuina atu le pule sili atu e faataunuu ai le galuega o le faaolataga ma le faaeaga (tagai Mataupu Faavae ma Feagaiga 110:11–16).

Mea e mafaufau i ai

Faatusatusa le Mataupu Faavae ma Feagaiga 110:1–16 ma le Mataio 17:1–9. Na faapefea ona tutusa le aafiaga o Iosefa Samita ma Oliva Kaotui i le Malumalu o Katelani ma lea na maua e Peteru, Iakopo, ma Ioane i luga o le Mauga o Liua?
Faitau le Mataupu Faavae ma Feagaiga 65. O a nisi o auala o loo saunia ai e le Atua le lalolagi mo le Afio Mai Faalua o Iesu Keriso e ala i ki o le perisitua ua Ia tuuina mai i Ana auauna? O a auala e mafai ona saunia ai oe lava ma isi mo le Afio Mai Faalua o Iesu Keriso?

Gaoioiga mo le aoao faatasi ma isi

Sa faamatala e Peresitene Russell M. Nelson le pule na tuuina atu e Mose, Elaia, ma Elia i le Perofeta o Iosefa Samita i le Malumalu o Katelani. Faitau le faamatalaga lenei ma tagata o lau vaega:
- “O Mose sa tuuina mai ki o le faapotopotoina o Isaraelu … ;
- “O Elaia, o ki o le feagaiga faa-Aperaamo;
- “Ma Elia, o ki o le pule e fai ai faamauga.
- “Na faaee atu e Iosefa Samita ia ki o le perisitua toefuataiina i luga o Aposetolo uma na valaauina i ona aso. Na faasolo lava, o nei ki ua tuuina atu i augatupulaga e oo mai i taitai o le Ekalesia o loo i ai nei. I le taimi nei, o loo umia moni lava e le Peresitene o le Ekalesia ki uma na umia e ‘i latou uma o e na mauaina se tisipenisione i soo se taimi mai le amataga o le foafoaga’ [Mataupu Faavae ma Feagaiga112:31].”¹
E tatau i se a mo le Peresitene o le Ekalesia ona umia nei lava ki o le perisitua i le taimi nei, ia na tuuina atu ia Iosefa Samita?

Aoao atili

Mataupu Faavae ma Feagaiga 2:1–2; 112:30–32; 128:21
Russell M. Nelson, “Ki o le Perisitua,” Liahona, Oke. 2005, 40–44
Gary E. Stevenson, “O Fea o I Ai Ki ma le Pule o le Perisitua?,” Liahona, Me 2016, 29–32

Vaega 2

Tatou te Lagolagoina i Latou e Umia Ki o le Perisitua

Na aoao mai le Perofeta o Iosefa Samita e faapea “o mataupu faavae autu, malo, ma aoaoga faavae o le Ekalesia ua tuuina atu i ki o le malo.”² O lona uiga o ki o le perisitua o loo umia e le Peresitene o le Ekalesia a Iesu Keriso ua faatagaina ai o ia e faatautaia faamanuiaga uma, sauniga, feagaiga, ma faalapotopotoga a le Ekalesia (tagai Mataupu Faavae ma Feagaiga 107:65–67).

E masani ona maua e tagata o le Ekalesia le avanoa i konafesi ma sauniga faamanatuga e lagolago ai taitai aoao ma taitai o le Ekalesia i le lotoifale, e aofia ai i latou o e umia ki o le perisitua. O le lagolagoina e faailoa ai lo tatou talitonuga ia i latou ma lo tatou naunau e lagolago, fesoasoani, ma tatalo mo i latou (tagai i le Mataupu Faavae ma Feagaiga 26:2). E mafai foi ona tatou maua le puipuiga faaleagaga pe a tatou mulimuli ma lagolagoina i latou o e umia ki o le perisitua (tagai i le Mataupu Faavae ma Feagaiga 43:1–7).

Mea e mafaufau i ai

Faitau le Mataupu Faavae ma Feagaiga 90:2–6 e aoao ai upumoni taua e uiga i ki o loo umia e uso o le Au Peresitene Sili. E faapefea ona fesootai ia ki o le malo ma faaaliga e tuu mai e le Atua i le Ekalesia? O le a le mea o le a tupu pe afai tatou te manatu mama i faaaliga e tuuina mai e le Atua ia i tatou e ala mai ia i latou o e umia ki o le malo?

Gaoioiga mo le aoao faatasi ma isi

Faatasi ai ma tagata o le vaega, talanoa i le upumoni e faapea, o i latou uma o e auauna atu i le Ekalesia—alii ma tamaitai—e valaauina i lalo o le taitaiga a se tasi o loo umia ki o le perisitua (tagai Mataupu Faavae ma Feagaiga 42:11). Na aoao mai Peresitene Dallin H. Oaks, “Po o ai lava e galue i se tofi po o se valaauga na maua mai se tasi o loo umiaina ki o le perisitua ua ia faaaogaina le pule o le perisitua i le faatinoina o ona tiute atofaina.”³ O anafea na e lagonaina ai faamanuiaga a le Atua o fesoasoani ia te oe ina ua uma ona vaetofiaina oe e auauna atu i se valaauga o le Ekalesia?

Aoao atili

Mataupu Faavae ma Feagaiga 21:4–6; 35:25; 43:2–6, 12; 107:18–19, 21–22; 124:127–28, 143; Mataupu Faavae o le Faatuatua 1:5
Dallin H. Oaks, “O Le Perisitua Mekisateko ma Ki,” Liahona, Me 2020, 69–72
Henry B. Eyring, “Faatuatua ma Ki,” Liahona, Nov. 2004, 26–29