Perisitua Mekisateko

O le mana ma le pule a le Atua e faamanuia ai Ana fanau

Ua saunia le Tama Faalelagi e fesoasoani ia te oe ia maua le mana faaleagaga ma le taitaiga i lou ala i le ola e faavavau. O le pule o le perisitua a le Atua ua mafai ai ona maua nei faamanuiaga mo fanau uma a le Atua o e filifili e o mai ia te Ia. Na aoao mai le Perofeta o Iosefa Samita: “O le Perisitua Mekisateko … o le auala lea e faaali mai ai le poto uma, aoaoga faavae, le fuafuaga o le faaolataga, ma mataupu taua uma mai le lagi.”¹ E ala i le mana o le Perisitua Mekisateko, e mafai ai e atalii ma afafine uma o le Atua ona osia feagaiga ma maua sauniga e fesoasoani ia i latou ia avea faapei o le Tama Faalelagi ma Iesu Keriso (tagai Mataupu Faavae ma Feagaiga 76:52–60; 84:19–22).

O Le A Le Perisitua Mekisateko?

O le perisitua o le mana ma le pule e faavavau na foafoaina ma pulea ai e le Atua le lagi ma le lalolagi. E lua perisitua i le Ekalesia a Iesu Keriso: o le Arona ma le Mekisateko. O le Perisitua Mekisateko o le perisitua maualuga pe sili atu ma e faaee atu lava i taimi uma i luga o auauna a le Atua pe a i ai le atoatoaga o le talalelei i luga o le fogaeleele. E ala atu i ki o le perisitua ma le pule o le perisitua ua faamatuu atu, ua faatagaina ai auauna a le Atua e talai atu le talalelei, faatautaia sauniga o le faaolataga ma le faaeaga, ma pulea le malo o le Atua i luga o le fogaeleele.

Vaaiga aoao i le autu: Perisitua Mekisateko

Taiala e faatatau i le suesueina o le talalelei: Perisitua Arona, Ki o le Perisitua, Toefuataiga o le Perisitua

Vaega 1

E Faamatuu Atu e le Atua le Pule ma le Mana o le Perisitua i Ana Auauna

Ata

O Peteru, Iakopo, ma Ioane o loo faauuina Iosefa Samita

I le talafaasolopito atoa, ua faamatuu mai ai e le Atua le pule o le perisitua i Ana auauna e galulue ai i Lona suafa ma fesoasoani i le faaolataga ma le faaeaga o Ana fanau. Na aoao mai Iosefa Samita, “Na i ai i perofeta uma le Perisitua Mekisateko.”²

I aso anamua, sa taʼua le perisitua “o le Perisitua Paia, e tusa ma le Faatulagaga a le Alo o le Atua. Ae ona o le faaaloalo po o le migao i le suafa o Lē Silisili, ina ia aloese ai mai le ta’u soo o le suafa [o le Alii],” na faaigoaina ai le perisitua o le “Perisitua Mekisateko” (Mataupu Faavae ma Feagaiga 107:3–4). O Mekisateko o se faitaulaga sili amiotonu ma se perofeta i taimi o le Feagaiga Tuai. I le faaEperu, o le igoa Mekisateko o lona uiga o le “tupu o le amiotonu” (Taiala i Tusitusiga Paia, “Mekisateko,” Gospel Library).

I le Feagaiga Fou, ua tatou aoao ai sa faauuina e Iesu Ona soo ma tuu atu ia i latou le pule o le perisitua (tagai Luka 9:1–2; Ioane 15:16; Eperu 5:1–10). I luga o le Mauga o Liua, sa maua ai e Peteru, Iakopo, ma Ioane ki o le perisitua. Faatasi ai ma na ki, sa i ai i Aposetolo le pule e faaauau ai le galuega a le Ekalesia a Keriso ina ua mavae Lona Afio Ae (tagai Taiala i Tusitusiga Paia,“Liua,” Potutusi o le Talalelei; tagai foi Mataio 16:15–19; 17:1–9; Galuega 1:21–26; Efeso 4:11–13).

I seneturi na sosoo ma le maliliu ai o Aposetolo a le Alii, sa leiloa ai le pule o le perisitua mai le lalolagi. I o tatou aso, na toefuatai mai ai le Perisitua Mekisateko e ala mai ia Peteru, Iakopo, ma Ioane i le Perofeta o Iosefa Samita ma Oliva Kaotui (tagai Mataupu Faavae ma Feagaiga 27:12–13; Iosefa Samita—Talafaasolopito 1:72). Mulimuli ane, sa tuuina atu e isi avefeau faalelagi ia ki o le perisitua i luga o i latou i le Malumalu o Katelani i Ohaio, ISA (tagai Mataupu Faavae ma Feagaiga 110:11–16).

Mea e mafaufau i ai

Na folafola mai e Peresitene Dallin H. Oaks, “O le perisitua o se mana ma le pule paia a le Atua e umia ona ua faatuatuaina, e faaaoga mo le galuega a le Atua mo le manuia o Ana fanau uma. O lePerisitua e le o i latou ua faauuina i se tofi o le perisitua po o i latou o ē faaaogaina lana pule. O alii o loo umiaina le perisitua e le o le perisitua. E ui e le tatau ona tatou faasino atu i alii ua faauuina o i latou o le perisitua, ae e talafeagai le faasino ia i latou o ē umia le perisitua.³ Aisea e taua ai le iloatino o le va o le perisitua ma ē umia le perisitua?

Gaoioiga mo le aoao faatasi ma isi

Sa saunoa Peresitene Gordon B. Hinckley , “O loo i ai iinei le perisitua. … Ua tatou iloa, aua ua tatou vaai i ai, i le mana o lenei perisitua. Ua tatou vaai i ma’i ua faamalolo, o pipili ua savavali, ma le oo mai o le malamalama ma le poto ma le iloa ia i latou sa i ai i le pogisa.”⁴ O a faamaoniga ua e vaaia o loo faagaoioia le mana ma le pule o le perisitua a le Atua i le Ekalesia a Iesu Keriso i o tatou aso?

Aoao atili

Alema 13:14–19; Mataupu Faavae ma Feagaiga 84:23–26; 107:2–8, 18, 42–52
“Mataupu 8: O Le Perisitua Faavavau,” Aoaoga a Peresitene o le Ekalesia : Iosefa Samita (2011), 101–13

Vaega 2

E ala i Feagaiga ma Sauniga o le Perisitua Mekisateko, e Mafai ai ona E Saunia e Toe Foi Atu i le Afioaga o le Atua

Ata

tamaitai ma se tamaitiiti i fafo o le malumalu

Na aoao mai Peresitene Polika Iaga, “O le Talalelei ma le Perisitua o auala ia e faaaoga e le [Atua] e faaola ma faaeaina ai ana fanau usiusitai i le mauaina faatasi ma ia o lea lava mamalu ma le mana e faapaleina ai i pale o le mamalu, tino ola pea ma ola e faavavau.”⁵ I lalo o le taitaiga a i latou o loo umia ki o le Perisitua Mekisateko, e mafai ona tatou osia feagaiga ma le Atua ma maua sauniga paia e manaomia e maua ai le ola e faavavau.

Mea e mafaufau i ai

A maua e se alii le Perisitua Mekisateko ma faauuina i se tofi i le perisitua, e ulu atu o ia i “le tautoga ma le feagaiga o le perisitua.” Faitau le Mataupu Faavae ma Feagaiga 84:33–44. O a mea ua osifeagaiga ai se e umia le perisitua e fai? O le a le folafolaga paia e faia e le Atua ia i latou o e mauaina ma faalauteleina o latou valaauga?

Gaoioiga mo le aoao faatasi ma isi

Valaaulia tagata o lau vaega e faitau le Mataupu Faavae ma Feagaiga 84:17–22 ma talanoaina mea na faaali mai e le Alii e uiga i le perisitua. Ina ia faamanino le uiga o le fuaitau, mafaufau e faasoa atu “mealilo o le malo” o “upumoni faaleagaga lea e na o faaaliga lava e iloa ai” (Taiala i Tusitusiga Paia, “Mealilo a le Atua,” Potutusi o le Talalelei). Atonu e aoga foi le faamalamalama atu o le mana o le amioatua o le mana o le amiotonu, lea tatou te iloa ai le Atua ma avea ai e faapei o Ia (tagai Bruce R. McConkie, The Promised Messiah [1978], 589). O a ni auala e mafai ai e sauniga paia ona taitai atu i tatou ia malamalama i le Atua ma saunia i tatou ia avea atili e faapei o Ia?

Aoao atili

Mataupu Faavae ma Feagaiga 110:11–16
Henry B. Eyring, “O Aiga ua Osi Feagaiga,” Liahona, Me 2012, 62–65
Kent F. Richards, “O Le Mana o le FaaleAtua,” Liahona, Me 2016, 118–20
Julie B. Beck, “O Le Matalasi o Faamanuiaga,” Liahona, Me 2006, 11–13
“O Le Perisitua Paia— mo le Faamanuiaga o Fanau a le Atua,” Aoaoga a Peresitene o le Ekalesia : George Albert Smith (2011), 45–56

Vaega 3

E Auauna Atu Uma Tamaitai ma Alii i le Ekalesia a Keriso i le Pule ma le Mana o le Perisitua

Ata

tagata o loo faafeiloai e le tasi le isi

E valaauina e le Atua tamaitai ma alii i Lana Ekalesia e fesoasoani i le galuega taua o le faaolataga ma le faaeaga. E ui e na o alii e faauuina i tofi o le perisitua, ae o le mauaina o le pule o le perisitua ma le mana o loo avanoa mo tamaitai ma alii uma e fesoasoani ai ia i latou e faataunuu le galuega a le Atua. E maua taitoatasi le mana o le perisitua a o tausia ma le amiotonu e tagata o le Ekalesia a latou feagaiga ma le Alii. I lalo o le taitaiga a se tasi o loo umia ki o le perisitua, e vaetofia ai tagata taitoatasi e galulue i valaauga o le Ekalesia. E ala i le faaee atu o lima, na te maua ai le pule o le perisitua e faatino ai tiute atofaina. (Tagai Dallin H. Oaks, “O Ki ma le Pule o le Perisitua,” Liahona, Me 2014, 49–52.

Mea e mafaufau i ai

Na aoao mai foi Peresitene M. Russel Ballard: “E matamau lo tatou Tama oi le Lagi i Lona mana. E maua e alii ma tamaitai uma lenei mana e fesoasoani ai i o latou olaga. O i latou uma o e osia feagaiga paia ma le Alii ma e faamamaluina na feagaiga o le a agavaa e maua faaaliga faaletagata lava ia, ia faamanuiaina e ala i auaunaga a agelu, e fagatua ma le Atua, e maua le atoaga o le talalelei, ma mulimuli ane, ia avea ma suli faatasi ma Iesu Keriso i mea uma o i ai a lo tatou Tama.”⁶ Aisea e taua ai le iloa o faamanuiaga paia e le faalagolago i se tagata ua faauuina i se tofi o le perisitua?

Gaoioiga mo le aoao faatasi ma isi

Faitau faatasi ma lau vaega, le saunoaga lenei a Peresitene Russell M. Nelson:

O tamaitai ma alii uma e osia ni feagaiga ma le Atua ma tausia na feagaiga, ma o e auai ma le agavaa i sauniga o le perisitua, e mauaina le avanoa tuusao i le mana o le Atua. O i latou ua maua faaeega paia i le maota o le Alii ua mauaina se meaalofa o le mana o le perisitua a le Atua e tusa ma le paia o a latou feagaiga, faatasi ma se meaalofa o le poto e iloa ai le auala e utuvai ai mai lena mana.

“E tutusa lava le matala o le lagi i tamaitai o e ua maua faaeega paia i le mana o le Atua e tafe mai ia latou feagaiga faaleperisitua e pei ona matala ai foi i alii o loo umiaina le perisitua.”⁷

Talanoaina pe mafai faapefea e soo se tagata agavaa o le Ekalesia ona utuvai mai le mana o le Atua.

Aoao atili

Mataupu Faavae ma Feagaiga 25; 121:34–37, 41–46
Russell M. Nelson, “O Oa Faaleagaga,” Liahona, Nov. 2019, 76–79
Dallin H. Oaks, “O Ki ma le Pule o le Perisitua,” Liahona, Me 2014, 49-52
Jean B. Bingham, “Tutu Faatasi i le Faataunuuina o le Galuega a le Atua,” Liahona, Me 2020, 60-63