O le Faamatalaina o le Talalelei

Ua iloa e le lalolagi o Polika Iaga o se tagata faatoa fanua maoae o le sa faatonuina le faaleleia o se toafa togavao e avea o se nofoaga matagofie. E sili atu le taua, o ia o se faiaoga maoae o le talalelei toefuataiina a Iesu Keriso o le sa musuia le muai Au Paia e ola i mataupu faavae manino o se talitonuga e tautino atu ai i tagata uma le avanoa e toe foi atu ai i le afioaga o le Atua.

Aoaoga a Polika Iaga

O le talalelei a Iesu Keriso e aofia ai se faatulagaga o tulafono ma sauniga e oo atu ai i le faaolataga.

Olo tatou talitonuga e le o se mea e sili atu pe itiiti ifo foi nai lo le tulafono moni o le lagi — o le faatulagaga o tulafono e puleaina atua ma agelu. Ua pulea ea i latou e le tulafono? Ioe. E leai se meaola i le faavavau uma sei vagana ua pulea e le tulafono (DBY, 1).

O le Talalelei o le Alo o le Atua ua faaalia, o le ata poo se faatulagaga o tulafono ma sauniga, afai e usitaia ma le faamaoni o le a mafai ona faamaonia le toe foi atu o tagata o loo nonofo i lenei lalolagi i le afioaga o le Tama ma le Alo. O tulafono o le Talalelei ua le sili ae pe itiiti ifo foi nai ni nai mataupu faavae o le faavavau ua faaalia i tagata, e mafai ai ona latou toe foi atu i le lagi na o mai ai (DBY, 1).

Afai tatou te talanoa i le tulafono selesitila ua faaalia mai le lagi, o lona uiga, o le Perisitua lea, ua tatou talanoa e uiga i le mataupu faavae o le faaolataga, o se faatulagaga sili o se malo, o tulafono ma sauniga, e mafai ai ona tatou saunia e ui mai le tasi faitotoa i le isi, mai le tasi fitafita i le isi, seia tatou oo atu i le afioaga o lo tatou Tama ma le Atua (DBY, 130).

Tatou te maua le upumoni, ma iloa, i vaega uma o le agaga, o le Talalelei o le mana o le Atua i le faaolataga; o le ala lena i le ola e faavavau (DBY,90).

O lo tatou talitonuga, e tusa ai ma mea uma e faia e le Atua, o se faatulagaga o le tulafono ua tonu. Ua ia faatulagaina tulafono ma sauniga mo le malo ma le lelei o fanau a tagata, e vaai pe usitai i latou ma faamaonia lo latou agavaa i le ola e faavavau e ala i le tulafono o le lalolagi selesitila (DBY, 1).

E lei faia e le Alii tulafono faapea e tatau ona ou mulimulitu’i i se faiga patino e fai ai o’u seevae. Na te lei faia se tulafono faapea e tatau ona sikuea luma o lou seevae pe umi foi, pe tatau foi ona i ai sou ofu talaloa e fai se fusi i lalo tonu o ou lima, ma se fele e tau i ou tapuvae; poo le i ai foi o sou peleue e pei o lea o loo ou ofuina nei. O le atamai, i se itu patino, sa tuuina atu i le ua mama ma le ua agasala, e faaaoga taitoatasi, e ese ai mai lo latou mauaina o le tulafono o le Perisitua pe leai foi, pe sa latou faalogo muamua i ai pe leai (DBY, 63).

Ua e iloa o se tasi lenei tulaga uiga ese o lo tatou faatuatuaga ma le talitonuga, ia aua lava nei fesili atu i le Alii e faia se mea e aunoa ma se manao e fesoasoani ia te ia i mea uma e mafai ona tatou fai; ona fai ai lea e le Alii o mea uma o lo o totoe. E le mafai ona ou fesili atu i le Alii na te fai se mea ou te le manao ou te faia (DBY, 43).

O le talalelei a Iesu Keriso e aofia ai upumoni uma.

O le upumoni uma e mo le faaolataga o fanau a tagata — mo le lelei ma le aoaoga — mo le faalauteleina o mataupu faavae o le malamalama faaleatua; ma o le malamalama faaleatua o le mea moni — upumoni, ma o upumoni uma e tau atu i le Atua (DBY, 11).

Ia e naunau e te talia le upumoni, e tusa lava poo fea e sau ai; e leai se eseesega, i soo se vaega. E tusa lava pe na maua mai le Talalelei ia Iosefa Samita, po o Peteru, o lå sa soifua i le taimi o Iesu. Pe maua mai i se tasi tagata poo se isi. Afai ua valaauina e le Atua se tasi ma tuuina atu e talai le Talalelei ua lava lena ia te au ou te iloa ai; e le afaina poo ai lava, pau le mea ou te fia iloa o le upumoni (DBY, 11).

“O le faa-Mamona,” e pei ona silafia e tagata e aofia ai mataupu faavae uma e faatatau i le ola ma le faaolataga, mo le taimi nei ma le ola e faavavau. E le afaina poo ai o loo iai le upumoni. Afai ua iai le upumoni i se tasi e le talitonu i le lotu ua avea lena tagata ma “Mamona.” O le upumoni ma mataupu faavae moni o loo iai i le lalolagi, ma i latou ua tele o i latou, ua iai i lenei Ekalesia. E uiga i lo latou ola mama, e toatele i latou o loo ola mama, e pei lava o i tatou. O mea lelei uma, matagofie, ma tauleleia e avea ma vaega o lenei Ekalesia ma le Malo. “O le faa-Mamona” e aofia ai upumoni uma. E leai se upumoni e lå a le Ekalesia ia. O le ola, ola e faavavau; o se fiafiaga sili; o le atoatoaga o mea uma i atua ma le faavavau o atua (DBY, 3).

I se isi itu, afai o le “faa-Mamona” e le o lou olaga lea, ou te le iloa pe iai sou olaga. Ou te le malamalama i se isi lava mea, aua ua iai le atoatoaga o mea uma e oo mai ai le fuafaatatau o le malamalamaaga o tagata. Afai e le o aofia ai nei mea, o mea uma lava o loo i le lagi ma luga o le lalolagi, ua le o lea e pei ona faamoemoe iai (DBY, 2).

Ou te fia fai atu i au uo matou te talitonu i mea lelei uma. Afai e te maua le upumoni i le lagi, lalolagi, poo seoli, o loo maua i a tatou mataupu faavae. Ua tatou talitonu iai; o a tatou ia; ua tatou fai atu ai (DBY, 2).

Ua aofia ai i le talalelei amio mama uma, loto mama uma, malamalama uma, poto uma, o mea sili uma, ma mea lelei uma. Na te faailoa mai se faatulagaga o tulafono ma sauniga (DBY, 3).

O lenei ata o loo aofia ai faatulagaga uma o mataupu faavae moni i luga o le fogaeleele, pe faaleagaga, amio mama, mataupu faafilosofia, poo le faalemalo; o loo aofia ai tulafono lelei uma ua uma ona fai mai le taimi o Atamu seia oo mai i le aso; ua aofia ai tulafono o malo, aua ua sili atu ia i le poto ma le mama, o loo iai mataupu faavae o le aso, mai i mea uma lava, ma aumaia faatasi le upumoni i se faatulagaga e tasi, ae aveese mea le aoga e faasalalau iinei ma iina (DBY, 3–4).

O lo tatou tiute ma valaauga, o faifeau uma o le faaolataga ma le Talalelei, e faamaopoopo mai mea moni ma teena mea sese. Poo le upumoni o loo maua ia i latou ua le talitonu i se lotu, poo å talitonu i le alofa tunoa o le Alii, poo le Ekalesia i Roma, poo le Metotisi, Ekalesia Egelani, Pepetereane, Papatiso, Faapotopotoga o Uo, Au Saaluu, poo se tasi lava o le tele o talitonuga ma vaega eseese, o e o loo iai ni nai mea moni, o le matafaioi a Toeaiina o lenei Ekalesia (Iesu, le Uso Matua, o loo i le ao) e aoao upumoni uma lava i le lalolagi e faatatau i le ola ma le faaolataga, i le Talalelei o loo tatou talaiina, … i le au saeanisi, filosofia, poo fea lava e maua ai i atunuu uma, ituaiga, gagana eseese, ma nuu ma aumaia i Siona (DBY, 248).

O le poto ma le atamai uma ma mea lelei uma e manao i ai le loto o le tagata, o loo i ai i totonu o le lio o le faatuatuaga ua tatou talia (DBY, 446).

O loo aofia ai mea moni uma o loo i ai i le lagi ma le lagi o lagi– o mea moni uma o loo iai i luga o le fogaeleele, i le loloto o le fogaeleele, ma i le lagi o fetu; i le aotelega o loo aofia ai uma upumoni o loo iai i le faavavau uma o le Atua (DBY, 448).

O lo tatou talitonuga e fuafua, faamasino, ma aofia ai le atamai uma i le lalolagi—o mea uma ua faaalia e le Atua i tagata. Ua faaalia e le Atua upumoni uma o loo iai nei i le lalolagi, pe faasaeanisi pe faalelotu. O le lalolagi uma i lalo o lana silafaga aua ua latou iloa ma fiafia iai; o loo latou nofo aitalafu ia te ia mo mea uma, ma e ou te faafetai ia te ia mo mea uma (DBY, 2).

O lo tatou talitonuga o loo aofia ai saeanisi uma o loo iloa e tagata, agelu, ma atua. E tasi le faatulagaga moni ma o le saeanisi o le olaga; o isi mea uma e tau atu i le oti. O lenei faatulagaga o loo amata mai i le Puna o le Ola (DBY, 2).

O le a tumau le upumoni pe a mavae le sese. O le a tumau le ola pe afai o i latou ua teena upu o le ola e faavavau ua foloina e le oti. Ou te fiafia i le upumoni aua e moni, aua e matagofie ma fiafia, aua e mamalu i lona natura, ma e talafeagai ona moomoo iai, faatuatua ma le manatu i le atamai o meaola uma i le lagi poo le lalolagi (DBY, 9).

Ou te fiafia i lenei, aua o le upumoni e manatu e tutoatasi; e faalagolago i luga o mea moni e faavavau ma e tumau, ao isi mea uma, o le a le pine ona faaumatia (DBY, 11).

O latou uma e ola e tusa ai ma tulafono ua tuuina mai e le Alii i ona tagata, ma ua maua faamanuiaga ua saunia mo e faatuatua, ua tatau ona latou iloa mea a le Atua mai mea e le o le Atua ia, le malamalama mai le pouliuli, e sau mai le lagi ma lena e sau mai i se isi mea. O lenei le maliega ma le faamafanafanaga o loo fiafia ai le tagata o le Au Paia e ala i le ola ai i lo latou talitonuga; o le poto lenei e ao ina maua e tagata ola uma (DBY, 35).

E ese le faigofie o le ola i le upumoni. Pe na e mafaufau ea i ai, a’u uo e? Pe na e mafaufau ea i ai i lea mea, o’u uso e ma tuafafine? I tulaga uma lava o le olaga, e le afaina poo iai i e lotomaulalo pe maualuluga, o le upumoni o le faasinoala sili ma le faigofie e taitaiina ai o tatou olaga (DBY, 11).

O lo tatou talitonuga i se tulaga faigofie o le upumoni. O loo iai uma i lenei faaupuga e tasi—o loo iai le upumoni uma, poo fea lava e maua ai, i galuega uma a le Atua ma tagata o loo mafai ona vaai iai pe leai foi i mata faaletino (DBY, 2).

E ala i le mana o le perisitua, o le talalelei o le ala lea o le faaolataga mo fanau uma a le Atua.

O le Talalelei o loo tatou talaiina o le Talalelei o le ola ma le faaolataga. O le Ekalesia o loo fai ai i tatou ma sui o le Ekalesia ma le Malo o le Atua, ma o loo iai le faatuatuaga e tasi, e mafai ai e le fanau a tagata ona toe o mai i le afioaga o le Tama ma le Atua. Ua tuu atu e le Alii lona aao e toe faaleleia mea uma e pei ona iai i le amataga, ma i le faagaioiga o lana Perisitua paia, ua faaolaina ai latou uma e mafai ona faaolaina, faamama mai le lalolagi le agasala ona o le pau ma tuuina atu i le vaavaaiga a le Au Paia (DBY, 4).

O le Perisitua … o le faatulagaga atoatoa lelei lea o se malo, ma o lea foi e mafai ai ona faasaoina le aiga i le tino mai le leaga uma ua aafia ai nei i latou, ma mautinoa ai lo latou fiafia tele mulimuli ane (DBY, 130).

O le Talalelei ma le Perisitua o auala ia ua faia e le Atua e faasaoina ma faaolaina ai lana fanau usiusitai ma latou maua faatasi ai le mamalu e tasi ma le mana e faapaleina ai i pale o le mamalu, le tino ola pea ma le ola e faavavau (DBY, 5).

O gaioiga uma tatou te fai e ao ona pulea e le taitaiga a le Perisitua (DBY, 133).

E leai se sauniga ua auina mai e le Atua i lona lava fofoga, e ala mai i lona Alo o Iesu Keriso, poo fofoga o ana Perofeta, Aposetolo poo Evagelia, ua le aoga lea. O sauniga uma, tulafono uma ma mea manaomia mo le faaolataga o le aiga i la le tino (DBY, 152).

E tusa ai ma sauniga a le Atua, e ao ona tatou faapea ifo ua tatou usiusitai ia i latou ona ua ia finagalo ai; ma o vaega laiti uma o ana poloaiga e iai le mafuaaga faafilosofia o loo iai… . O lena filosofia ua oo atu i le faavavau uma, ma o le filosofia o loo talitonu iai le Au Paia o Aso e Gata Ai. O vaega uma o le upumoni ua maua e tagata uma o le meaalofa a le Atua. Ua tatou maua nei upumoni, ma o atu mai lea mamalu i lea mamalu, mai lea ola e faavavau i lea ola e faavavau, ma maua ai le poto o mea uma, ma avea ai e pei o ni Atua, o Atalii ia o le Atua (DBY, 152).

O le Talalelei a Iesu Keriso o le auala ua tatala— o le faitotoa tatala i le auala mai le lalolagi i le lagi, e ala mai ai faaaliga tuu sao i fanau a tagata i o latou tulaga eseese, e fuafua i o latou valaauga ma tulaga i le faalapotopotoga o loo ola ai. O le Talalelei o le faaolataga o se vaega o le tulafono e aafia ai le malo o loo afio ai le Atua; ma sauniga e aafia ai le Perisitua paia o auala e avanoa ai fanau a tagata i le auala o le ola, e mafai ai ona faalauteleina la latou malaga seia oo ina latou foi atu i le afioaga o le Tama ma le Atua (DBY, 6).

O tulafono ma sauniga ua faaalia e le Alii i nei aso e gata ai, ua fuafuaina e faasaoina ai atalii ma afafine uma o Atamu ma Eva (DBY, 1).

Matou te folafola atu i tagatanuu uma o le lalolagi mai vanu i tumutumu o mauga o i tatou o le Ekalesia a Iesu Keriso o le Au Paia o Aso e Gata Ai… . ma ua ia i tatou mataupu faavae o le ola ma le faaolataga mo i latou uma e faamaoni i o latou loto i le lalolagi atoa (DBY, 7).

Fautuaga mo Suesuega

O le talalelei a Iesu Keriso e aofia ai se faatulagaga o tulafono ma sauniga e oo atu ai i le faaolataga.

E tusa ai ma Peresitene Iaga, o le talalelei a Iesu Keriso o le “mana o le Atua i le faaolataga.” E faapefea ona faatusatusa lana saunoaga ma le faamalamalamaga a le Faaola o le talalelei i le 3 Nifae 27:13–14?
O le a le matafaioi a le talalelei a Iesu Keriso i le aumaia o le tino ola pea ma le ola e faavavau i tagata? (Vaai Mose 1:39; Aperaamo 3:25.) Aisea tatou te manaomia ai se faatulagaga o ni tulafono ma sauniga e toe foi atu ai i le afioaga o le Atua? O a ni auala e manuia ai fanau a tagata i tulafono ma sauniga a le Atua” (vaai 2 Nifae 2:13, 16)
Sa aoao mai Peresitene Iaga o le Atua e “pulea e le tulafono.” E faapefea ona fesoasoani lo tatou iloa o le Atua e pulea e le tulafono, ia i tatou?(Vaai MFF 82:10.)
Sa faamatalaina mai e Peresitene Iaga le talalelei o se faatulagaga sao. O a ni auala e finagalo le Atua e faaaoga ai la tatou faamasinoga tonu? (Vaai MFF 58:26–29.)

O le talalelei a Iesu Keriso e aofia ai upumoni uma.

Sa aumai e Peresitene Iaga se lui i le Au Paia ina ia saili i le upumoni. Aisea e taua ai lo tatou malamalama o le talalelei a Iesu Keriso o loo iai le upumoni uma? Aisea tatou te talia ai le upumoni poo fea lava e maua ai? O le a se aoaoga tatou te maua mai le saunoaga a Peresitene Iaga e faapea “o upumoni uma lava e tau atu i le Atua”
O le a le aoaoga e maua mai i le saunoaga a Peresitene Iaga e uiga i le talia ma alofa i tagata o isi Ekalesia?
E faapefea ona tatou iloa le eseesega o le upumoni ma le sese (vaai 1 Korinito 2:11, 14; Moronae 7:12–17.) Aisea e taua ai le iloa ona “faapotopoto mea lelei uma ma tetee mea sese uma” i nei aso e gata ai?
E faapefea ona aafia ala tatou te ola ai i lo tatou malamalama lea o le upumoni o le talalelei? Aisea e avea ai le upumoni ma se “taiala moni ma le faigofie e taitaiinaa ai o tatou olaga”? O le a se aafiaga o o tatou olaga pe a tatou ola i le pepelo ma le taufaasese? (vaai MFF 88:86.)

E ala i le mana o le perisitua, o le talalelei o le ala lea o le faaolataga mo fanau uma a le Atua.

O le a le faiã i le va o le perisitua ma le talalelei a Iesu Keriso? Aisea e taua ai sauniga perisitua i le ata o le talalelei?
O le a le tiute o le korama a le perisitua, vaega, ma komiti i le talaiina o le talalelei? O le a le galuega a le Aualofa i le aoaoina o le upumoni ma le atinaeina o le faatuatua i le talalelei a Iesu Keriso? O a ni aoaoga ua e maua mai se tasi o loo faia galuega faa-Keriso? E faapefea ona aafia oe i nei aoaoga?
Ua aoao mai Peresitene Iaga o le talalelei “o le faitotoa matala lea i le ala mai le lalolagi i le lagi.” O a ni matafaioi ua tuuina atu ia i latou ua latou talia le talalelei toefuataiina ina ia faalauteleina ai la latou molimau i lana tulafono, sauniga, ma le upumoni? (Vaai Mataio 28:19–20; Faataoto 22:6.)

Salt Lake Temple — O le Malumalu o Sate Leki i le 1880. Sa lagona e le Au Paia se naunautaiga sili e fausia se malumalu i lo latou Atua.