MATAUPU 31

Faasoasoa Lelei, Galue, ma le Faalagolago o le Tagata ia te ia Lava.

Na silafia lelei e Peresitene Polika Iaga le taua o le galue malosi i le sauniaina lea o le Au Paia ina ia fausia le malo o le Atua. Na ia fautuaina le au paionia,“Nai lo le saili atu o le mea o le a faia e le Alii mo i tatou, ae tatou sailia po o le a se mea e mafai ona tatou faia mo i tatou lava” (DBY, 293). O Peresitene Heber C. Kimball, o se uo lelei a Peresitene Iaga ma o le Fesoasoani i le Au Peresitene Sili sa la galulue i le tele o aso ua tuanai i le faatoaga, ma ia manatuaina mulimuli ane ai na taimi e faapea: “O le [Uso] o Polika Iaga ma a’u sa masani ona ma galulue malolosi faatasi, mo le limasefulu sene, ma totogi e maua a ma meaai ma mea ma te nonofo ai; e maua le ma ta’ifitusefululima sene i le aso pe a ma galulue i le togavao; ma te galulue mai le oso a’e o le la seia oo ina goto, ma le iva i le po pe afai e tau foliga e timu. Ma te faaputuina ma fusifusia faatasi ia vaovao mo se faaputuga e 35 lita o le saito i se aso, ma tata fafie, faatasi ai ma le kiona e pau mai o ma sulugatiti mo le sefuluvalu sene mo se faaputuga fafie, ae o lo ma totogi mo le saito e fitusefululima sene mo se faaputuga”(DNW, 30 July 1862). Na faamamafaina e Peresitene Iaga le taua o le faasoasoa lelei, galue, ma le faalagolago o le tagata ia te ia lava, i lona faapea mai: “O i latou o e faamautuina le ola e faavavau o i latou na e anaana ma faia le upu” (DBY, 290).

Aoaoga a Polika Iaga

E tatau ona tatou galulue malolosi ma faaaoga tatau o tatou taimi ina ia faasaoina o tatou aiga ma fausiaina le malo o le Atua.

Oa mea o loo ia i tatou? O o tatou taimi. Faaaoga e pei ona e manao i ai. Ua tuuina atu le taimi ia te outou; ma afai e faaaluina lenei taimi i le mea e sili e mafai ona fai mo le faalauteleina o le upu moni i le lalolagi, ua faia lava lea mo lo tatou lelei, ma o le a faamanuiaina ai outou; ae afai tatou te faaaluina o tatou taimi i le faapaie ma le faaaoga sese, o le a tauia lava lea ia i tatou.

Tatou te tuuina atu se faamatalaga o aso na tatou faaaluvaleina (DBY, 290).

I le taimi ua atofaina atu i le tagata iinei i le lalolagi, e leai se taimi e faamaimauina po o le faataugaina. A maea se malologa ma sina faamalositino, o le a leai se aso, itula po o se minute e tatau ona tatou faaaluina i le faapaie, ae o minute uma o aso uma o o tatou olaga e tatau ona tatou tauivi ai ina ia faaleleia o tatou mafaufau ma ia faateleina ai le faatuatua i le Talalelei paia, i le alofa, onosai, ma galuega lelei, ina ia mafai ai ona tatou tutupu i le malamalama o le upu moni e pei ona tautalagia ma valoia ma faamaumauina ai (DBY, 290).

O le faapaie ma le faamaimau e le tusa ai ma tulafono o le lagi. Ia faasaoina mea uma e te mafaia, ina ia mafai ona lava ma totoe mea e te faamanuiaina ai au uo ma ou fili (DBY, 290).

O mea uma e fesootai ma le fausiaina o Siona e manaomia ai le galue malosi. O se mea le moni le talanoa e uiga i le fausiaina o se malo e aunoa ma le galue, e manaomia le galue o vaega uma o la tatou faalapotopotoga, poo le mafaufau, faaletino, poo le faaleagaga, ua na o le pau lea o le auala e fausia ai le malo o le Atua (DBY, 291)

Pe le o le fausiaina ea o le Malo o le Atua i le lalolagi o se galuega faaletino e faia i taimi uma? (DBY, 290–91).

O le tamaoaiga sili lenei o loo tatou umia—o le iloatino lea ona faatonutonuina a tatou galuega i le sa’o, i le faaaluina ma le aoga o itula uma mo le faamanuiaina o a tatou ava ma a tatou fanau ma o tatou tuaoi (DBY, 290).

O le a tatou o atu ma galulue ma aumaia le auro mai mauga ina ia fola i lalo, pe afai tatou te savavali i auala e fola i auro. O loo savavali nei agelu i o latou vaiaai lanu auro, ma ua ia te i latou le laau o le ola i totonu o lo latou parataiso, ma e tatau ona tatou mauaina lena auro ma tuu ai iina. Afai tatou te mauaina ni vaiaai e folaina i le auro, o i tatou lava e tuuina ai iina. A tatou fiafia i se Siona ona o lona matagofie ma le mamalu, o le a i ai lava pe a tatou fausiaina. Afai tatou te nonofo i le aai o le Ierusalema Fou, o le a i ai talu ai ona sa tatou faataatia le faavae ma atiae ai i luga. Afai e le faaumaina e i tatou taitoatasi le galuega, ona tatou faataatiaina lea o le faavae mo a tatou fanau ma fanau a a tatou fanau, e pei ona faia e Atamu. Afai o le a faasaoina i tatou i se vaa e pei ona sa i ai o Noa ma lona auaiga, o le a faasaoina i tatou pe a tatou fausiaina. Afai e talaiina atu le Talalelei i atunuu, e mafua mai ona ua talaiina atu e … Toeaiina o Isaraelu le talalelei i vaega uma o le lalolagi (DBY, 291).

O lo’u faatuatua e le taitaiina atu ai au ina ia ou mafaufau o le a saunia e le Alii mo i tatou ni puaa tunu vilivili, o ni falaoa ua uma ona faapata, ma isi; o le a ia tuuina mai ia i tatou le malosi ina ia mafai ai ona totoina le saito, ia maua mai fua o le laueleele, ia faia ni malutaga, ia maua mai ni nai laupapa e fai ai se pusa, ma a oo mai le seleselega, ma tatou maua le saito, e mo i tatou ina ia faasaoina—ia faasaoina le saito seia tasi, lua, lima, po o le fitu tausaga o mea e faaaogaina ua i o tatou lima, seia oo lava ina lava mea e tausia ai le ola na faasaoina e tagata ina ia [saunia] ai le falaoa [mo] i latou lava ma i latou o le a malaga mai iinei e saili mo le saogalemu (DBY,291–92).

Ua saunia e le Alii mea e tele i le lalolagi mo lo tatou faaaogaina.

Ou te faapea atu i o’u uso ma tuafafine, o mai ma ia tatou aoao ina ia tatou faapotopotoina uma mai elemene e tele o le olaga, ma faaliliuina i mea tatou te mananao ma fiafia i ai [vaai MFF 59:18–20]. Aua nei o tatou tutumau ai i le le amanaiaina, faatasi ma i latou ua le amanaiaina, ae ia tatou faaali atu i e ua le amanaiaina ina ia latou atamamai (DBY, 294).

Ua faataunuuina e le Alii lana vaega o le galuega; ua ia siosiomiaina i tatou i elemene e aofia ai le saito, aano o manu, laau, vulu, silika, fualaau, ma soo se mea e atinae ai, faamatagofie ma faamamalu ai le Siona o aso e gata ai, ma o la tatou galuega la o le faaaogaina o nei elemene i mea tatou te mananao i ai ma moomia, e tusa ai ma le malamalama ua tatou mauaina nei ma le atamai e mafai ona tatou mauaina mai le lagi e ala lea i lo tatou faamaoni. O le auala lenei o le a toe aumaia ai e le Alii Siona i le lalolagi, ma e leai lava se isi auala (DBY, 294).

O lo tatou tiute le mataala ma le maelega i le faia o mea uma tatou te mafaia ina ia lagolagoina ai i tatou lava, ina ia atinaeina Lona Malo, ina ia puipuia i tatou lava mai o tatou fili, ina ia faia ma le atamai a tatou fuafuaga, ma ia faataunuuina soo se auala e mafai ai ona faavaeina le Malo o le Atua i le lalolagi, ma ia faapaiaina ma sauniaina i tatou lava ina ia nonofo i Lona afioaga (DBY, 294–95).

Ona o le i ai o lo tatou lauelele lafulemu i lenei vanu, ma fatulaau e toto, e le tatau ona tatou fesili atu i le Atua e fafaga i tatou, poo le mulimuli ia i tatou ma se falaoa ma tauanau mai ina ia tatou aai ai. O le a le faia e ia lea mea, ou te le mafaia foi, pe a faapea o au o le Alii. E mafai ona tatou fafaga i tatou lava iinei; ae afai o le a i ai se tulaga o le a le mafai ai, o le a lava le taimi o le Alii e faaali mai ai se vavega e tausia ai i tatou (DBY, 294).

O loo femisaai, ma fefinauai tagata, i le sailia lea pe faapefea ona pulea e le tasi le isi, ma pe faapefea ona mauaina uma le tamaoaiga o loo i ai i le lalolagi… . Ae faapea la tatou te o atu ma galueaina uma mea o loo i ai i totonu o le lalolagi, ma luga o le fogaeleele ma ia faaaogaina, e i ai ea se mea tatou te le mauaina? E leai, e lava mea uma mo tagata uma. Ona vaai lea i nei mea e pei ona i ai, le Au Paia o Aso e Gata Ai, ma outou e le o ni Au Paia o Aso e Gata Ai, ia vaai atu i mea na e pei ona i ai. Ma ou te faamoemoe ma tatalo mo outou, e le o ni tagata o le Au Paia o Aso e Gata Ai, ma i latou o loo avea ma Au Paia o Aso e Gata Ai, ina ia tatou maua le filemu i le taimi ao tatou i ai iinei, ina ia mafai ona tatou fausia a tatou ogaumu aasa, tatalaina o tatou nofoaga mo le maina, fausia o tatou auala, suatiaina le eleele, mulimuli i a tatou fefaatauaiga faapisinisi e aunoa ma le faalavelaveina; ina ia mafai ona tatou auai atu i le galuega o le faamatagofieina o le lalolagi (DBY, 295).

E tatau ona tatou faautauta i le faaaogaina o mea ua tuuina mai e le Alii ia i tatou.

O ‘oa o se malo po o se atunuu e le aofia lea i le tele o tupe ae o le tamaoaiga o ona eleele ma le galulue o ona tagata (DBY, 297).

O le taimi ma le malosi e mafai ai ona galue, o mea na e moomia e le lalolagi atoa o tagata, ma o loo tatou nonofo aitalafu uma i le Atua mo le malosi e faaaogaina ai le taimi e faamanuiaina ai ma o le a ia moomia mai ia i tatou uma taitoatasi se faamatalaga auiliili o le faaaogaina na tatou faia i lenei malosi; ma o le a le gata foi e moomia e ia se faamatalaga o a tatou galuega, ae o a tatou upu ma mafaufauga o le a faamasinoina foi (DBY, 301).

O meatotino uma o loo i ai i le fogaeleele o le malosi lena ma galuega a alii ma tamaitai galulue… . O galuega e fausia ai o tatou falelotu, malumalu, fale faamasino, fale faafiafia ma faleaoga lelei; o galuega lea e aoaoina ai a tatou fanau, ma faamasani ai i latou i le tele o vaega eseese o aoaoga, lea e mafai ai e i latou ona malamalama i isi gagana ma a latou lava foi gagana, faapea ma vaega eseese uma o le atamai lea e malamalama ai le fanau a tagata (DBY, 300).

Aua lava nei faamaimauina se mea. Ia faautauta lelei, faasao i mea uma, ma o a mea e te mauaina e sili atu nai lo mea e mafai ona e faaaogaina e outou lava, ia outou fai atu i o outou tuaoi e fesoasoani ia te outou i le faaaogaina (DBY, 292).

Ia faaaogaina mea uma ma le filemu ma le faigofie, ia faaaoga mea uma, aua nei i ai se mea e faamaimauina (DBY, 292).

Aua nei e mafaufau o loo lava le falaoa o loo ia te oe ina ia tuufau ai lau fanau e faamaimau se fasi mea o lena falaoa. Afai e i ai i se tagata le faitau miliona o fatu saito ma sana, e le o lava lona tamaoaiga lena e … na te saluina ai sina fatu se tasi i le afi; ia tuu atu e aina e se mea ona toe foi atu foi lea i le eleele, ma ia faapea ona faataunuuina ai le faamoemoega na ola ai. Ia manatua, aua nei faamaimauina se mea, ae ia tausia lelei mea uma (DBY, 292).

E aoga mo i tatou le tausia faalelei o faamanuiaga na tuuina mai e le Atua ia i tatou; afai tatou te uia le auala faafeagai, ua tatou aveesea le mana ma le mamalu na fuafuaina e le Atua ina ia avea ma o tatou tofi. E mafua mai ona o lo tatou lava faaeteete, faasoasoa lelei, ma le faamasinoga tonu ua tuuina mai e le Atua ia i tatou, lea e mafai ai ona tatou faasaoina a tatou meaai, o a tatou lafu ma fagaga, … o fale ma laueleele, ma faateleina mea uma ua ia i tatou, ao faaauau ai pea foi ona mauaina le mana ma le aafiaga mo i tatou lava o ni tagata taitoatasi ma mo le Malo o le Atua i lona atoatoaga (DBY, 292).

Ia faaaoga tatau mea tou te mauaina ina ia faafiafiaina ai o outou tino ma o outou aiga ma nofo lelei ai, ma faasaoina mea o loo totoe (DBY, 292).

Afai e te manao ia e maumea, ia faasao mea e te mauaina. E mafai e se tagata faavalevalea ona maua ni tupe; ae o se tagata poto na te faasao ma faaaoga mea i lona lava faitalia (DBY, 292).

E tatau ona tatou fausia ni fale lelei ma faatulagaina ni aai matagofie.

Ia tuu atu i tagata e fausia ni fale lelei, totoina ni togavine ma ni togalaau aina, ia faia ni auala lelei, fausia ni aai matagofie ina ia mafai ona maua ai ni fausaga mananaia mo le faaaogaina e le lautele, ma ni tuaoi teuteuina matagofie i ni laau paolo, o ni punavai, ma ni vaitafe manino, ma soo se laau, tamai laau ma fugalaau e mafai ona fuga mai i lenei tau, ina ia avea ai lo tatou nofoaga mauga o se parataiso ma o tatou loto ua tumu i le faafetai i le Atua o Iosefa, i lo tatou faafetaia ma o tatou loto atoa ma faapea ifo, “ ia aua nei faia lo’u loto, ae o lou finagalo, le Tama e” (DBY, 302).

Ia teuteu o outou togalaau, o outou fale, o a outou faatoaga; faamatagofie le aai. O le a avea lea ma mea e faafiafiaina ai i tatou, ma atinaeina ai le tele o mea. O le lalolagi o se lalolagi lelei, o elemene o loo i ai e lelei pe afai o le a tatou faaaogaina mo lo tatou lava faamanuiaina, i le moni ma le amiotonu. O lea ia faamalieina ai i tatou, ma ia tatou o atu ma o tatou loto atoa ina ia tatou maua le soifua maloloina, tamaoaiga, ma le matagofie, ma ia faasaoina i tatou i le tulaga sili lava, ma ia ola i le umi e mafai ona tatou ola ai, ma faia mea lelei uma tatou te mafaia (DBY, 302).

Soo se mea lelei lava tatou te faia e le gata e faaopoopo atu i lo tatou faamafanafanaina ae faapea foi i lo tatou tamaoaiga (DBY, 302).

O a outou aia tatau, o ava, ina ia talosaga atu i a outou tane ina ia totoina ni laau paolo ma ni laau e fua mai, ma avatu ia te outou ni vine ma ni fugalaau e ola i tafatafa ane o outou fale; ma afai e le lava se taimi o a outou tane, ia o atu outou ma totoina e outou lava. O nisi atonu o le a faapea mai,“Oi, o au e leai lava se mea o i ai ua na o se fale ogalaau, ma e leai lava sona taua.” Ioe; e taua tele. Fufulu mama ma teuteu faalelei, ma faasosolo ai ni vine i luga o le faitotoa, ina ia o ane tagata ma faapea ane, “E ese ma le manaia o si tamai fale le la!” O lou avanoa lenei ma ou te manao ia te outou ina ia faagaoioi outou lava i a outou aia e tatau ai (DBY, 200).

Ia faia ni fale lelei; ia aoao ia iloa ona fausia; ia avea ma ni tagata inisinia ma fai pisinisi lelei, ina ia mafai ona outou iloa ona fau se fale, se fale e tuu ai manu, po o se fale teuoloa, ia iloa ona faia se faatoaga, ma ia iloa ona atiae se lafumanu, ma ia tausia lelei e ala lea i le saunia lelei o se malutaga e talafeagai ai mo le tuuina ai i le taimi o le taumalulu; ma ia faamaonia ai lou agavaa mo faamanuiaga uma o le a tautino atu ia te oe nai lo lenei vanu ma mea e mafai ona gaosia mai ai (DBY, 302).

Ua ou oo i totonu o fale e le talafeagai le tele o vaega mo tamaitai, e le lava se fata e tuu ai a latou paelo i luga, ma latou te faatutuina i luga o le fola, ae peitai ane o le a nonofo ai pea o latou taitoalua iina mo le tele o tausaga, e aunoa ma se alualu i luma i le faia lea o se fata e faatutu ai i luga paelo. Ae peitai o loo ia i latou le malosi, ae o le a latou le faagaoioiina lava (DBY, 198–99).

Tuu atu i le tane na te faia se faaleleiga i lona umukuka ma le fata ipu ma ona potu moe mo le manuia o lona aiga, ma faaleleia ona togalaau, auala savali, ma isi, faamatagofie o outou fale ma autafa o fale, ala sima ma totoina laau paolo (DBY, 198).

E tatau ona avea i tatou ma ni tagata e faalagolago ia i tatou lava o ni aiga ma o ni tagata taitasi.

Matou te mananao ia te outou mai le taimi nei ina ia avea ma ni tagata e ola faalagolago ia i latou lava [vaai MFF 78:14]. Faalogo ia, Isaraelu e! faalogo i ai, tuaoi, uo ma fili, o le mea lenei o loo manaomia e le Alii mai ona tagata (DBY, 293).

O outou le Au Paia o Aso e Gata Ai, aoao ia outou iloa ona tausia outou lava. Afai e le mafai ona outou mauaina mea uma o loo outou manaomia i le aso, aoao ina ia faia e aunoa ma le mea e le mafai ona e faatauina mai ma e totogia; ma ia oo ane i o outou mafaufau le mataupu lenei e tatau lava ona outou ola e tusa ai ma mea ua outou mauaina (DBY, 293).

O ai e tatau i ai le viiga? O tagata latou te tausia e i latou i latou lava po o i latou e faamoemoe pea i le alofa tunoa o le Alii e tausia ai i latou? Ua pei lava ua fai ma masani le faamoemoe faapea o le a tuuina mai pea e le Alii ia i tatou fua o laau aina pe a tatou le totoina ni laau; po o lo tatou le suatiaina foi o le eleele ma luluina ma o le a faasaoina mai ai i tatou mai galuega o le seleselega, e tatau ona tatou tagi atu i le Alii ina ia faasaoina i tatou mai le manaonao, e pei lava o loo tatou ole atu i le Alii ina ia laveaiina i tatou mai aafiaga o lo tatou faavalevalea, le usiusitai ma le faamaimau (DBY, 293).

O le auala tatou te faaali atu ai lo tatou faatuatua ma le mautinoa i le Atua e mo oe ma au ina ia faia mea uma tatou te mafaia ina ia lagolagoina ma tausiaina ai i tatou lava; ma o le nuu e galulue faatasi i o latou loto ma o latou lima, ina ia faataunuuina lenei mea, o a latou taumafaiga o le a tuufaatasia (DBY, 293).

Le Au Paia e o Aso e Gata Ai, aoao. Ua outou aoaoina se mataupu lelei, ma e moni; ae ia aoao atili; aoao ina ia outou iloa ona tausia outou lava; ia teuina falaoamata ma araisa, ma faasaoina mo aso leaga. Tuafafine, aua tou te talosaga atu i a outou tane ina ia faatauina le toe paelo o araisa ina ia faatau mai ai se mea o loo e manao ai i le faleoloa, ae ia fesoasoani atu i a outou tane i le teuina o na mea mo aso e manaomia ai, ma ia i ai pea se teuga meaai mo se tausaga se tasi po o le lua foi e teuina (DBY, 293).

“Nai lo le saili atu o le mea o le a faia e le Alii mo i tatou, ae tatou sailia po o le a se mea e mafai ona tatou faia mo i tatou lava” (DBY, 293)

Soo se mea lava e mauaina e tagata o le Au Paia o Aso e Gata Ai e maua lea e ala mai i tauiviga filiga ma le naunautai lå faatoilaloina (DBY, 294).

Fautuaga mo Aoaoga

E tatau ona tatou galulue malolosi ma faaaoga tatau o tatou taimi ina ia faasaoina o tatou aiga ma fausiaina le malo o le Atua.

• O le a le fautuaga a Peresitene Iaga e uiga i le faaaogaina o “minute uma o aso uma”? (Vaai foi Alema 34:33.) Aisea ua avea ai le taimi ma se meaalofa faapelepele? O a mataupu faavae ua fesoasoani ia te oe i le auala o loo e faaaluina ai lou taimi?

• Aisea e faatautee ai le faapaie ma le faamaimau i “tulafono o le lagi”?(Vaai foi Mataupu Faavae ma Feagaiga 42:42).

• Aisea o le a moomia ai ituaiga galuega uma i le fausiaina o Siona? O a ni auala e tatau ai ona tatou galulue faalemafaufau, faaletino, ma faaleagaga ina ia atinaeina ai Siona?

Ua saunia e le Alii mea e tele i le lalolagi mo lo tatou faaaogaina.

• O le a faapefea ona “toe aumaia e le [Alii] Siona i luga o le fogaeleele”? O a ni auala patino e mafai ona tatou fesoasoani ai i le atinaeina o Siona?

• Na saunoa mai Peresitene Iaga e faapea “o totonu o le eleele ma luga o le laueleele … o loo lava mo tagata uma.” Aisea la e te manatu ai o loo tele naua le mativa i le lalolagi? O le a se mea e mafai ona tatou faia i o tatou aiga, faalapotopotoga i le Ekalesia, ma nuu ina ia fetufaai atu ai i isi le mea ua tuuina mai e le Alii ia i tatou? (Vaai foi Iakopo 2:18–19; MFF 104:14–18.)

E tatau ona tatou faautauta i le faaaogaina o mea ua tuuina mai e le Alii ia i tatou.

• Aisea e tatau ai “ona tatou le faamaimauina soo se mea, ae ia tausia faalelei mea uma”? E mafai faapefea ona tatou faaaogaina lenei fautuaga a Peresitene Iaga i le teuina o meaai ma le sauniuni mo faalavelave faafuasei?

• E faapefea ona tatou “aveesea le mana ma le mamalu lea na fuafuaina e le Atua e tatau ona avea ma o tatou tofi”?

• E mafai faapefea ona tatou faaaogaina le fautuaga a Peresitene Iaga, “E mafai e se tagata faavalevalea ona maua ni tupe; ae o se tagata poto na te faasao ma faaaoga mea mo lona lava faamanuiaina”?

E tatau ona tatou fausia ni fale lelei ma faatulagaina ni aai matagofie.

• O le a le saunoaga a Peresitene Iaga e faatatau i le mea e tatau ona faia e le Au Paia ina ia avea ai o latou “fale o se parataiso ma o latou loto ia tumu i le faafetai”? O le a se mea e mafai ona tatou faia ina ia avea ai o tatou fale ma nuu ia sili ona matagofie? (Vaai foi MFF 82:14.) E faapefea ona fesoasoani siosiomaga matagofie ia i tatou i lo tatou faaletino, o lagona, ma le faaleagaga?

E tatau ona avea i tatou ma ni tagata e faalagolago ia i tatou lava o ni aiga ma o ni tagata taitasi.

• O le a le fautuaga a Peresitene Iaga e uiga i lo tatou “ola e tusa ai ma mea ua tatou maua? Aisea e faigata ai i nisi taimi ona mulimuli atu i nei taiala faigofie? O a nisi o auala patino e mafai ai ona tatou mautinoa o loo tatou ola e tusa ai ma mea ua tatou maua?

• Iloilo le saunoaga a Peresitene Iaga e uiga i le tausia o i tatou lava, ma fuafua po o le a se mea o loo e faia ina ia mautinoa ai o le a faalagolago lava lou aiga ia te outou lava i taimi e tulai mai ai ni manaoga. Ia faia se fuafuaga mo le faateleina o lou ola faalagolago ia te oe lava i totonu o lou aiga ma le nuu.

• E faapefea ona avea le galue ma le maelega ma se faataitaiga o le faatuatua? O le a le sootaga i le va o le faalagolago o le tagata ia te ia lava ma le faalagolago i le alofa o Keriso?

• Na uunaiina e Peresitene Iaga le Au Paia ina ia tausia faalelei i latou lava, ae na ia fautuaina foi i latou ina ia lotogatasi i o latou aai. E faapefea ona ogatasi a tatou taumafaiga i le tausia o i tatou lava ma le fausiaina o o tatou aai? O faapefea ona fesoasoani taumafaiga a isi ina ia faateleina ai lou ola faalagolago o oe ia te oe lava?

O se faleoloa tuufaatasi i le Aai o Sate Leki i se vaitaimi o le 1869. Na faamalosia e Peresitene Iaga le galulue i le fale, faasoasoa lelei, ma le faalagolago o le tagata ia te ia lava i le Au Paia atoa.

O William Carter o loo suotosinaina lona fanua i St. George i Utah i le 1893.