O le Lalolagi o Agaga

Ao ia lauga atu i le sauniga o le maliu o Elder Thomas Williams, sa tautalagia ai e Peresitene Polika Iaga le lalolagi o agaga e faapenei: “E masani pea ona tulai mai le fesili lenei i mafaufau o tagata—’Ou te moomoo maimau pe ana ou iloa le mea lea ou te alu agai i ai!’ E mafai ona e sailia? Ioe, o le a e alu atu i le lalolagi o agaga, lea o loo i ai le Uso o Thomas. O lea ua ulu atu nei o ia i se isi laasaga maualuga atu faaletagata, lea ua i ai nei lona agaga, nai lo le taimi ao faatasia ma lona tino. ‘Aisea e le mafai ai ona ou vaai ia te ia? Aisea e le mafai ai ona ou talanoa ma lona agaga? Ou te moomoo maimau pe ana mafai ona ou vaai i lo’u toalua po o lo’u tama ma talanoa ma ia!’ E leai se mafuaaga e tatau ai ona e talanoa, ma e le sa’o foi le tatau ona e talanoa i ai; atonu o le a e misia le faamoemoega atoa o lou olaga pe afai e te maua lenei avanoa, ma o le a tutusa lava foi le tofotofoina o le faatuatua ia te oe, e le o se ala faigata mo oe e te savali ai, e le o se taua matautia e tau ai, pe o se matuai manumalo foi e te mauaina, ma o le a e misia lava le faamoemoega o lou olaga. O loo sa’o lava le tulaga e pei ona i ai, aua o lenei veli e tatau ona tapunia; e le tatau ona tatou vaai atu i le Atua, tatou te le vaai atu foi i agelu, tatou te le talanoa atu foi ia i latou sei vagana ai o le matuai usiusitai atoatoa i mea o loo ia manaomia mai, ma le faatuatua ia Iesu Keriso (DNSW, 28 July 1874, 1).

Aoaoga a Polika Iaga

O agaga o e ua oti e o atu i le lalolagi o agaga.

Afai o le a e oti, o fea e te alu i ai? I le lalolagi o agaga (DBY, 376).

O agaga amioleaga ua latou tuua lenei olaga ma o atu i le lalolagi o agaga, pe o le a latou amioleaga ea iina? Ioe (DNW, 27 Aug. 1856, 3).

Afai e tuua e agaga o latou tino, … o le a latou saunia e vaai, faalogo ma malamalama i mea faaleagaga… . Pe mafai ea ona e vaai i ni agaga i totonu o lenei potu? Leai. A faapea e pa’i atu le Alii i ou mata ina ia mafai ai ona e vaai, e mafai la ona e vaai i agaga? Ioe, e pei lava ona e vaai i tino, e pei ona vaaia e le auauna a [Elisaia] [vaai 2 Tupu 6:16–17]. Afai o le a faatagaina e le Alii, ma o lona finagalo e tatau ona faia, o le a mafai ona e vaai i agaga na ua latou tuua lenei lalolagi, e pei lava ona e vaai nei i tino i ou mata (DBY, 376–77).

O Iesu na ia tatalaina le faitotoa o le faaolataga ia i latou i le lalolagi o agaga.

O Iesu o le tagata muamua lea na ia alu atu ma talai i agaga i le falepuipui, o loo ia umiaina ki o le Talalelei o le faaolataga ia te i latou. O na ki na tuuina atu ia te ia i le aso ma le itula na ia alu atu ai i le lalolagi o agaga, ma o na ki na ia tatalaina ai faitotoa o le faaolataga i agaga i le falepuipui (DBY, 378).

Matou te mananao ina ia lava a tatou osigataulaga ina ia faia ai le finagalo o le Atua i le saunia lea ina ia avatu i latou na i le malo selesitila o e latou te lei mauaina le avanoa e faalogo ai i le Talalelei ao i ai i la le tino, ona o le mafuaaga faigofie, aua e le mafai e i latou o loo i le lalolagi o agaga ona auai i sauniga i le maota o le Atua. Ua latou pasi atu ma faigata, ma ua latou oo i le tulaga latou te mafai ai lava ona auai mo le faamagaloina o a latou lava agasala faapea ma lo latou faaeaga, ae ui i lea o loo i ai lo latou faatuatuaga i a latou uo, o a latou fanau ma fanau a a latou fanau ina ia faia nei sauniga mo i latou, ina ia mafai ai ona avatu i latou i le malo selesitila o le Atua (DBY, 406)..

Faatusatusa i latou o loo i ai i le lalolagi o e ua faalogo i le Talalelei i o tatou aso, ma le fia miliona o e latou te lei faalogo i ai, pe ua tuuina atu foi i ai ki o le faaolataga ia i latou, ma o le a e faapea ifo ai e pei foi o au, o loo i ai se galuega silisiliese e faataunuuina i le lalolagi o agaga (DBY, 377).

Mafaufau i le miliona ma miliona ma miliona o tagata na ola ma maliliu e aunoa ma le faalogo i le Talalelei i le lalolagi, e aunoa ma ki o le Malo. Latou te lei saunia mo le mamalu selesitila, ma sa leai se mana e mafai ai ona saunia i latou e aunoa ma ki o lenei Perisitua (DBY, 378).

O le Tama o Samita [Iosefa Samita le Matua] ma Kalosi [Samita] ma le Uso o [Eteuati] Paterika, ioe, ma isi Au Paia lelei uma, o loo matuai pisi lava i latou i le lalolagi o agaga e pei foi o outou ma au i le taimi nei. O loo mafai ona latou vaai mai ia i tatou, ae le mafai ona tatou vaai atu ia i latou seiloga e matala o tatou mata. O a a latou mea o loo fai iina? O loo latou talai atu, o loo talai atu i taimi uma, ma saunia le ala mo i tatou ina ia faatelevave ai la tatou galuega i le fausiaina o malumalu iinei ma soo se mea (DBY, 378).

O galuega a soo se tagata faatuatua o le a faaauauina pea e pei lava o le galuega a Iesu, seia oo lava ina ia togiolaina mea uma, ma tuuina atu i le Tama. O loo i ai se galuega maoae o loo i o tatou luma (DBY, 378).

O agaga o loo i totonu o nei tino i lenei lalolagi, a latou tuua nei tino o le a latou o atu sao i le lalolagi o agaga. E a! O se faapotopotoga toatele o agaga o loo i ai iina, o loo fegalegaleai faatasi ma isi, e pei ona latou faia iinei? Ioe, uso e, o loo latou faatasi ai iina, ma afai latou te faifaimea faatasi, ma tuufaatasia, i vaega ma faapotopotoga e pei ona latou i ai iinei, o lo latou avanoa lena. E leai se masalosalo, tele pe itiiti ifo, o loo latou vaai, faalogo, talanoa ma faifaimea faatasi, o e lelei ma e leaga. Afai e o atu Toeaiina o Isaraelu i nei aso e gata ai ma talai atu i agaga i le falepuipui, o le a latou faifaimea faatasi ma i latou, e pei lava foi ona faia e o tatou Toeaiina faatasi ma e amioleaga i la le tino nei, pe a latou o atu e talai atu ia i latou (DBY, 378).

O le lalolagi o agaga o se nofoaga lelei lea e mafai ona i ai le tuputupu ae ma le alualu i luma.

Afai o le a e oo i le lalolagi o agaga, o mea uma iina o le a foliga mai e pei lava o mea o loo i ai nei. O le a masani agaga ma agaga o loo i ai i le lalolagi o agaga—o le a latou talatalanoa, ma faia soo se ituaiga fesootaiga eseese ma isi e pei ona masani ai a o latou i ai i la le tino. O iina, e pei foi o iinei, o le a tutusa mea uma, ma o le a e malamalama foi i mea iina e pei lava ona e malamalama i ai iinei. O le a outou vaai i ai iina i agaga ia matou te talanoa atu ai o loo malolosi; latou te le momoe. Ma o le a outou aoaoina ai o loo latou tauivi ma lo latou malosi— e galulue ma le maelega e pei o soo se tagata taitoatasi ina ia faataunuuina se mea i lenei lalolagi (DBY, 380)..

O agaga e masani i agaga e pei foi ona masani o tino i isi tino, e ui ona o agaga o loo faia i se mea e matuai matagofie ma manino lava i lenei faalapotopotoga. Latou te savavali, talanoa, ma fai a latou fonotaga; ma o agaga o alii lelei e pei o Iosefa ma Toeaiina, o e na latou tuua lenei Ekalesia o loo i le lalolagi mo sina vaitaimi ina ia latou galulue i se isi lalolagi, o loo matuai galulue ma lo latou malosi uma ma o atu mai lea nofoaga i lea nofoaga ina ia talai atu le Talalelei, ma o loo faatonutonuina i latou e Iosefa, i lona faapea atu, o atu ia o’u uso e, ma afai latou te faalavelave ane ia te outou, ia o atu i ai ma poloaiina i latou ina ia o ese. O loo ia te outou le Perisitua e mafai ai ona outou faataapeina i latou, ae afai e i ai se isi o i latou e manao e faalogo i le Talalelei, ia talai atu ia i latou (DBY, 379).

E mafai ona ou talanoa atu e faatatau i le tuua o a tatou uo, ma tatou o atu i le lalolagi o agaga, aua ua faatele ona ou tau latalata atu ina ia ou malamalama i le faavavau ina ia ou matuai faatinoina ai se faatuatua tele ina ia naunau ia ou ola ai nai lo se isi taimi i lo’u olaga atoa. O le pupula ma le mamalu o le isi nofoaga lea e sosoo ai e le mafaamatalaina. E le o se avega ina ia avea ma faafaigata ia te i tatou pe a tatou agai i luma i le lumanai ma ia faaeteete ina nei o tatou pauu i lalo. Ua tatou vaai i o tatou talavou, o loo tautevateva ma pauu lava i lalo. Ae i se mea mamao lava, e maeu le eseese! Latou te agai i luma ma le faigofie ma e pei o le uila. Afai tatou te mananao e asiasi i Ierusalema, po o lenei, po o lena, po o se isi nofoaga—ma ou te matea o le a faatagaina i tatou pe afai tatou te naunau i ai—o le a tatou i ai, i le vaai atu i ona aai. Afai tatou te fia vaai ia Ierusalema e pei ona i ai i aso o le Faaola; pe tatou te mananao foi e vaai i le Faatoaga o Etena ina ua faatoa foafoaina, o le a tatou i ai iina, ma o le a tatou vaai i ai e pei lava ona i ai faaleagaga, aua sa muai foafoaina faaleagaga ona faaletino ai lea, ma o western islands, or in China, we are there; in fact, we are like the light of the morning. … God has revealed some little things, with regard to his movements and power, and the operation and motion of the lightning furnish a fine illustration of the ability of the Almighty (DBY, 380).

loo tumau pea i le faaleagaga. Ma afai tatou te mananao ina ia tatou vaai i le lalolagi i lona faatoa foafoaina, pe atonu foi tatou te fia asiasi atu i soo se aai tatou te fiafia i ai o loo i ai i lona laueleele. Afai tatou te mananao ina ia tatou malamalama pe o faapefea ona latou ola iinei i nei atumotu i sisifo, po o Saina, o loo tatou i ai lava iina; o le mea moni, e pei lava i tatou o le malamalama o le taeao… . Ua faaalia mai e le Atua nai mea laiti e faatatau i ana fuafuaga ma lona mana, ma o le fuafuaga ma le gaoioiga a le malamalama e faamatalaina mai ai le mafaia e le Silisiliese (DBY, 380).

A tatou oo atu i le lalolagi o agaga e tatau ona tatou mauaina se vaega o lona mana. O iinei, o loo tatou feagai pea ma faafitauli o ma’i ma faama’i o soo se ituaiga. I le lalolagi o agaga o le a tatou saoloto ai mai nei mea uma ma olioli ai i le olaga, mamalu, ma le atamai; ma o loo i ai le Tama e fetalai mai ia i tatou, o Iesu e fetalai mai ia i tatou, ma agelu e fetalai mai ia i tatou, ma o le a tatou olioli ai i le faatasiga ma e tonu ma mama o loo i le lalolagi o agaga seia oo i le toetutu (DBY, 380–81).

A faapea la o se tagata ua i ai le tiapolo i lona loto—ua matuai gauai atu lava i ai i le amioleaga, ma ua oti ai lava i le tulaga lena, o le a ulu atu lona agaga i le lalolagi o agaga ma le faamoemoe e faia le leaga. I se isi itu, afai o loo tatou tauivi ma lea mana uma ma fesoasoani uma na tuuina mai e le Atua ia i tatou ina ia tatou faaleleia ai a tatou taleni, ina ia saunia ai i tatou ina ia tatou mau i le ola e faavavau, ma ua tatou o atu i le tuugamau a o faapea ona tatou faia, pe o le a ulu atu ea o tatou agaga i le isi o latou laasaga faatasi ai ma lena faatulagaga? O le a latou tauivi pea e faia mea a le Atua, i se isi tulaga e sili atu—i le aoaoina, faateleina, tuputupu ae i le alofa ma le malamalama i le upu moni (DBY, 379).

Afai tatou te faatuatua i lo tatou talitonuga, ma pe a tatou o atu i le lalolagi o agaga, o agaga na liliuese—e i ai Lusifelo ma le tasi vaetolu o ‘au o le lagi na o mai faatasi ma ia, ma agaga o tagata amioleaga o e sa ola ai i lenei lalolagi o le a latou aufaatasi uma ma o le a leai lava so latou aafiaga i o tatou agaga. Pe le o se faamanuiaga ea lena? Ioe. O le isi vaega uma o le fanau a tagata e tele pe itiiti ifo foi lo latou mulimuli atu ia i latou, ma e gauai atu foi ia i latou a o latou i ai iinei i la le tino (DBY, 379).

O iinei [o e faatuatua] o le a faafenumiai ma pueina e ia; ae a tatou o atu loa i le lalolagi o agaga o iina o le a tatou pule ai loa i le mana o satani, ma na te le toe mafai ona faapagatia i tatou, ma ua lava ma totoe lea mea ou te iloaina (DNW, 1 Oct. 1856, 3).

Afai ua papatisoina se tasi mo le faamagaloina o ana agasala, ma maliu ai i se taimi puupuu mulimuli ane, e lei saunia lava o ia e olioli ai i le atoatoaga o le mamalu ua folafolaina atu i e faatuatua i le Talalelei; aua e tatau ona aoaoina o ia ao i ai i le agaga, i isi vaega o le maota o le Atua, i le laa mai le isi upu moni i le isi upu moni, mai le atamai i le atamai, seia oo lava ina ia toe mauaina lona tino ma ia ulu atu ai i le afioaga o le Tama ma le Alo. E le mafai ona tatou ulu atu i le mamalu selesitila i lo tatou tulaga o loo i ai nei o le le malamalama ma le pogisa faalemafaufau (DBY, 378–79).

E sili atu ona tele a tatou uo i le isi itu o le veli nai lo o iinei, ma o le a latou faafeiloaia i tatou ma le olioli tele nai lo le faafeiloaiga o oe e ou matua ma uo ina ua e oo mai i lenei lalolagi; ma o le a e matuai fiafia lava pe a outou feiloai ma i latou nai lo lou fiafia pe a e vaai i sau uo i lenei olaga; ma o le a tatou laalaa atu ai mai le isi laasaga i le isi laasaga o le alualu i luma, mai le fiafia i le fiafia, ma mai le isi atamai ma le mana i le isi, o lo tatou fiafia o le a faateleina le matagofie ma le magafagafa ao tatou faaauau pea i upu ma mana o le ola (DBY, 379–80).

A tatou laasia lenei tulaga o le tagata, i le isi laasaga o le alualu i luma, e mafai ona ou faapea atu, tatou te le muta ai iina. E tatau pea ona tatou agai i luma, i le faia o mea lelei uma tatou te mafaia, i le faatonutonuina ma le taitaiina o e uma ua faatagaina i tatou e faatonutonu ma taitai, ona o atu lea i le isi laasaga, ma le isi, seia oo lava ina faapaleina i latou uma o e na faatuatua i lenei lalolagi, ma o le galuega uma e faatatau i lenei lalolagi ua maea, ma o le Faaola, o le na tatou fesoasoani i ai, ua faamaeaina lana galuega, ma o le lalolagi ma mea uma o i ai o le a tuuina atu i le Tama. Ona maua ai lea e nei tagata faatuatua o latou faamanuiaga a o latou pale, ma o o latou tofi o le a faatuina lea mo i latou ma tuuina atu i ai, ma o le a latou o atu ma le malosi i le mauaina ma le foafoaina o lalolagi, ma o le a faateleina e faavavau faavavau lava (DBY, 376).

Fautuaga mo Suesuega

O agaga o e ua oti e o atu i le lalolagi o agaga.

A oti le tino, o fea e alu i ai le agaga? (Vaai foi Alema 40:11–14.) O fea o i ai le lalolagi o agaga? Aisea e le mafai ai ona tatou vaai atu i ai ma talanoa ma i latou o loo i le lalolagi o agaga?

O Iesu na ia tatalaina le faitotoa o le faaolataga ia i latou i le lalolagi o agaga.

O le a le uiga o le faaupuga lea faapea o Iesu “na ia tatalaina le faitotoa o le faaolataga ia i latou i le lalolagi o agaga”? (Vaai foi MFF 138; 1 Peteru 3:18–19.)
Ina ua mavae ona tatalaina e Keriso faitotoa o le faaolataga i le lalolagi o agaga, na faapefea ona talaiina atu le talalelei iina? (Vaai foi MFF 138:30.)
Afai e leai ma se tasi o sauniga nei lea e faatatau i la le tino e faia i le lalolagi o agaga, aisea la e talai atu ai le talalelei i agaga iina? (Vaai foi MFF 138:58–59.) O le a se mea e mafai ona tatou faia mo i latou o loo i le lalolagi o agaga o e latou te lei mafai ona mauaina sauniga o le faaolataga? E mafai faapefea ona tatou auai ma le atoatoa i le togiolaina o e ua maliliu, e tusa lava pe afai e le o i ai se malumalu o latalata atu?
E faapefea ona aafia lou olaga i le lalolagi o agaga i lou olaga i la le tino?

O le lalolagi o agaga o se nofoaga lelei lea e mafai ona i ai le tuputupu ae ma le alualu i luma.

O le a le mea na aoaoina mai e Peresitene Iaga e uiga i le olaga i le lalolagi o agaga? O le a faapefea ona avea le olaga i le lalolagi o agaga e faapei o le olaga i le lalolagi nei? O le a faapefea ona eseese? O a ni vaega o le olaga i le lalolagi o agaga o loo e tulimatai atu i ai?
O a aafiaga ma malosiaga e i ai ia Satani i le lalolagi o agaga?
Aisea e lei saunia ai se tagata faatoa uma ona papatiso e mauaina le atoatoaga o le mamalu? O le a le mea e tatau ona faia e lena tagata ina ia saunia ai mo lenei faamanuiaga? O fea e mafai ona faia ai lea vaega?

Christ preaching in Spirit World — I le va o Lona maliu ma Lona toetu, na alu atu ai le Faaola i le lalolagi o agaga ma amata ai le galuega o le faaolataga i e ua maliliu.