Aoaoina o le Aiga

“Tatou ola ina ia tumau le agaga o lo tatou talitonuga i totonu ia i tatou, ona tatou maua ai lea o le filemu, olioli, fiafia ma le faamalieina, lea e avea ai ma ni tama tausaafia, tina tausaafia, fanau tausaafia, o ni aiga, tuaoi, nuu ma aai tausaafia. O se mea aoga lena e ola ai, ma ou te manatu e ao i le Au Paia uma o Aso e Gata Ai ona tauivi mo lenei mea” (DBY, 204).

Aoaoga a Polika Iaga

O le aiga o se mea na faavaeina e le Atua mo le taimi nei ma le faavavau.

Afaapea o tagata uma ua taua o se Au Paia o Aso e Gata Ai, o se tagata moni ua faapaiaina ma amiotonu, o lona uiga o o tatou fale o le a avea ma parataiso, o le a leai se mea e faalogoina, leai se mea e lagonaina, leai se mea e iloaina, ae na o le vivii ae i le suafa o le Atua, i le faia o lo tatou tiute, ma tausia ana poloaiga (DBY, 203).

Afai e mauaina e se alii ma se tamaitai o laua lava faaeega paia ma faamauga [i le malumalu mo le faavavau], ma maua ni a laua fanau mulimuli ane, o na fanau o ni suli agavaa ia o le Malo ma ona faamanuiaga ma folafolaga uma, ma na o i latou lava na o ni [suli moni] i lenei lalolagi (DBY, 195).

O le sauniga o le faamauga e ao ona faia iinei … o le ava i le tane, ma fanau i matua, ma isi foi, seia atoatoa le filifili o augatupulaga i le sauniga o le faamauga agai i tua i le Tama o Atamu; o lea, ua poloaiina i tatou e faapotopoto faatasi i tatou lava, ina ia o ese mai Papelonia, ma faapaiaina i tatou, ma atinaeina le Siona o lo tatou Atua, … seia faapaiaina le fogaeleele ma saunia ai mo le nonofo faatasi ma le Atua ma agelu (DBY, 407).

E tatau i matua ona aoaoina a latou fanau ina ia tausia poloaiga a le Atua

Tatou te vaaia se pepe i lima o lona tina. O le a le mea ua oo mai ai lenei pepe iinei? O le a se faamoemoega i le foafoaina o lenei pepe meamea? … Ua outou vaai la i lenei faavae, o lona amataga, le fatu o le malamalama o loo tino mai i lenei pepe, ua fuafuaina ina ia tupu ma faalauteleina seia oo ina avea ma se alii [po o se tamaitai], ona oo atu ai lea i le tulaga o le avea ma se agelu, ma faaauau atu ai lava seia oo i le faaeaga e faavavau. Ae o le faavae lenei… . O iinei lava le nofoaga muamua tatou te aoao ai, o le amataga lenei o lo tatou alualu i luma e faavavau (DBY, 205–6).

E masani lava ona ou manatunatu ma faapea ane, “e matuai talafeagai lava mo tina, o i latou ia ua avea ma faiaoga muamua o a latou fanau ma o i latou foi ia e faia se aafiaga muamua i o latou mafaufau mu’amu’a, ina ia faaeteete lelei.” E tatau ona latou matuai faaeteete ina ia aua lava ne’i o latou matua’ia se manatu sese i le mafaufau o se tamaitiiti! E le tatau ona latou aoaoina atu ia te i latou se mea sei vagana ua latou iloa ua sao i tulaga uma. E le tatau ona latou fai atua se upu, aemaise lava i le faalogo a le tamaitiiti, e le sa’o (DBY, 206–7).

Ia amata e tina ona latou amata aoaoina a latou fanau a o laiti i latou, o iina o le a outou aoaoina ai i latou ina ia alolofa i le Alii, ma tausi i ana poloaiga (DBY, 206).

Afai o le a ola outou tina e tusa ai ma lo outou talitonuga faalelotu, o lona uiga o le alofa ma le mata’u i le Atua o le a outou aoaoina ai pea ma le sa’o a outou fanau i le ala o le ola ma le faaolataga, i le aoaoina o i latou i le ala e tatau ona latou ui ai, a oo ina latou matutua o le a le mafai ona te’a ese ai [vaai Faataoto 22:6]. Ou te folafola atu ia te outou lenei mea, e moni e pei o le susulu o le la, o se upu moni e faavavau. E toilalo lava tagata o le Ekalesia i lenei tiute (DBY, 206).

Tausi lau fanau ina ia alolofa ma matata’u i le Alii; suesue i a latou fuafuaga ma o latou uiga, ma feutagai lelei ma i latou e tusa ai ma o latou uiga ma fuafuaga, ae aua lava ne’i e faasa’oina i latou i le taimi o le ita; aoao i latou ina ia latou alolofa ia te oe nai lo le fefefe ia te oe, ma ia avea pea e le aunoa ma au tausiga faapelepele, lou aoaoina o fanau na tuuina atu ma le alofa e le Atua ia te oe, i le taua o faaaliga a le Atua, ma le matagofie o mataupu o lo tatou talitonuga paia a o iti i latou, ina ia latou tutupu ae ma avea o ni alii ma ni tamaitai matutua ae o loo latou manatua pea ia faaaliga a le Atua ma mataupu o lo tatou talitonuga paia ma aua ne’i faagaloina le upu moni (DBY, 207).

Matua, ia aoao i a outou fanau le taua o le tatalo atu i le Atua e ala i upu ma faataitaiga; aoao ia i latou le ala e ola ai, le auala e maua mai ai mea o loo i le lalolagi ina ia ola ai, ma aoao atu ia te i latou tulafono o le olaga ina ia mafai ona latou iloa pe faapefea ona faasaoina i latou i le soifua maloloina ma talai atu i isi. Ma afai e faatonutonuina i latou i mataupu o le Talalelei, ia aoao atu i ai e moni na mataupu, ma o na upu moni na auina mai le lagi mo lo tatou faaolataga, ma o le Talalelei e aofia ai upu moni uma o loo i le lagi, o loo i le lalolagi, po o i seoli; ma aoao atu foi ia te i latou, o loo umia e i tatou ia ki o le ola e faavavau, ma e tatau ona latou usiusitai ma tausia ia sauniga ma tulafono e faatatau i lenei Perisitua paia, lea na toe faaalia ma toefuataiina mai e le Atua mo le faaeaina o le fanau a tagata (DBY, 207).

Afai tatou te le faia se taumafaiga e aoao ai a tatou fanau, e aoao ma faatonu i latou e uiga i nei upumoni faaalia, o le a i o tatou luga le faasalaga, i le avea ai ma matua, pe o se isi foi tulaga (DBY, 207).

A o taitaiina e matua e ala i faataitaiga, o loo laua fesoasoani e faataatia se ala amiotonu mo lo laua aiga.

E le tatau lava ona tatou faatagaina i tatou ina ia aoaoina a tatou fanau i se isi mea ae ola i se isi mea (DBY, 206).

E le tatau ona tatou faatagaina i tatou lava e faia se mea tatou te le mananao e vaai o faia e a tatou fanau. E tatau ona tatou faia se faataitaiga mo i latou tatou te moomoo ina ia latou faataitai i ai. Po o tatou iloaina ea lenei mea? E masani ona tatou vaaia ni matua o matuai mananao lava ina ia usiusitai, amio lelei, fai upu lelei, foliga lelei, leo malu ma laumata fiafia se tamaitiiti po o le fanau foi ae o loo solomua i latou ona tumu i le faataitaio ma le avaavau! E maeu le le fetaui ma le faaletonu o lenei mea! (DBY, 208).

Afai o le a faaauauina pea ona faia e matua ni faataitaiga lelei mo a latou fanau e faataitai i ai faatasi ai ma le faamaoniga a lo tatou Tama o i le Lagi, o le a latou liliuina lagona o a latou fanau i mea lelei, ma o le a naunau foi le fanau i le amiotonu nai lo le amioleaga (DBY, 208).

E tatau i le tama ma le tina, o å ua auai i lenei Ekalesia ma le Malo, ona uia se ala amiotonu, ma taumafai i le malosi la te mafaia ia aua lava nei faia se sese, ae ia faia mea lelei i o la olaga; afai e tasi se fanau la te maua pe tasi le selau foi, afai la te faia e pei ona tatau ai ona la faia, fusia i latou i le Alii i lo la faatuatua ma tatalo, ou te le popole pe o fea e o i ai na fanau, a ua fusia i latou i o latou matua i se noataga o le faavavau, ma e leai se malosi po o se mana i le fogaeleele po o seoli e mafai ona tuueseeseina i latou mai o latou matua i le faavavau; o le a toe foi atu i latou i le punavai na puna mai ai (DBY, 208).

O le a alolofa a tatou fanau i le upu moni, pe afai tatou te ola ai i lo tatou talitonuga faalelotu. E tatau i matua ona latou uia le ala lea e mafai ai e a latou fanau ona faapea mai, “Ou te leiloaina lava pe ua faasese pe taufaavalea e lo’u tama se tuaoi; ou te leiloa foi pe na aveina e lo’u tama se mea e le o sana meatotino, e leai, leai lava! E leai, ae na te faapea mai, ‘Atalii, po o le afafine, ia e faamaoni, amiotonu, amio lelei, agalelei, galue malosi, faautauta ma ia tumu i galuega lelei.’ “O ni aoaoga faapena mai matua i a latou fanau o le a tumau pea ia i latou e faavavau, sei vagana lava ua latou faafitia le Agaga Paia (DBY, 209).

E mafai ona tatou taitaia, faatonutonuina, ma faagata se lala fou, ma o le a faapea ona ola agai i le itu tatou te mananao i ai, pe a faapea lena e sao ma tonu le taitaiga. O lea la, afai tatou te si’oina se tamaitiiti maloloina i aafiaga lelei ma le mama, ma tuu atu ia te ia faatonuga e talafeagai ai ma faatumuina ai lona mafaufau i tu ma aga faamaoni, atonu o le a taitaiina ai o ia i le ala o le ola (DBY, 209).

O le Loto-pulea ma le aoaiga ma le alofa e fesoasoani e atinae ai ni aiga malolosi.

Ina ia tatou mauaina le puleaina faaleagaga o i tatou lava, ma ona aafiaga ia o loo siomia ai i tatou, e ala lea i se auala o le loto pulea, o le mea muamua lena e tatau ona tatou mafaufau i ai, o la tatou galuega muamua lena, ae tatou te le’i faia mea e mafai ona fai mo a tatou fanau ina ia ola a’e i le faaolataga e aunoa ma le agasala (DBY, 203).

O le a se mea na e folafolaina atu i lau tama teine laitiiti pe afai na te faia se mea? Na e folafolaina atu ia te ia se meaalofa mo le lelei ona faia o lena mea? “Ioe.” Na e manatuaina? “E leai, ua ou le manatuaina,” o le tala lea a le tina. A faapea e le lelei ona ia faia, pe na e folafolaina atu ea i ai se faasalaga?“Ioe.” Na e tausia lau upu? E leai, e te lei tausia ma ua fuafuaina e le tamaitiiti se faaiuga tonu i lona mafaufau e faapea o loo tauina atu e le tina ia te ia se mea e le moni—e faapea mai o le a ia faia lenei ma lena, ae na te le faia lava. O se lesona faigofie tele mo tina le aoao ina ia faapasi le taimi ma a latou fanau ae le tuuina atu lava i ai se lagona sese. Mafaufau muamua ae e te lei tautala… .Afai e te manao e faia ni meaalofa mo i latou, ia fai; afai na e folafola atu i ai se faasalaga, tausi lau upu, ae ia faaeteete! (DBY, 210).

E le tatau i matua ona faamalosia a latou fanau i le faia o se mea, ae taitai ia te i latou, ma tuuina atu i ai le malamalama ao saunia o latou mafaufau e taliaina. Atonu e talafeagai le faasalaga i le taimi e tatau ai, ae tatau i matua ona puleaina a latou fanau e ala i le faatuatua ae le o le sasa, i le taitaiina lea o i latou i le agalelei ma faataitaiga lelei i mea moni ma paia (DBY, 208).

E mafai ona ou iloaina atu i lenei aofia ni alii se toatele o e na latou tuliesea a latou fanau mai ia te i latou e ala lea i le faaaogaina o le sasa. Afai o loo i ai le saua, o le a leai foi se lagona alofa i loto o vaega uma e lua; o le a sili atu i le fanau ona o ese mai le tama nai lo le faatasi ma ia (DBY, 203).

I a tatou galuega e faia i aso uma, po o le a lava le ituaiga, o le Au Paia o Aso e Gata Ai, aemaise lava ia i latou o loo umia tofiga taua i le Malo o le Atua, e tatau ona faatumauina se mafaufau lelei, e le gata i le fale ae o fafo foi. E le tatau ona latou faatagaina ni faafatiatamai ma ni tulaga le manuia e faaleagaina ai lo latou natura ma mafua ai ona latou popole ma ua le fiafia e fegalegaleai i le fale, o le tautala i upu faatiga ma matuitui … , e tupu ai le faasiasia ma le faanoanoa i o latou fale, e avea ai i latou ma ni tagata taufaafefe nai lo le alofagia e o latou aiga. E le tatau lava ona faatagaina le ita ina ia tupu i totonu o o tatou loto, ma upu e afua mai i lagona ita, e le tatau ona faatagaina e alu ese mai o tatou laugutu. “O le tali filemu e liliueseina ai le ita, ae o le upu faatiga e tupu ai le ita” [Faataoto 15:1]. “O le lotoa o le sauaga lea, ma o le ita o le tafega lea” [Faataoto 27:4]; ae “o le mafaufau o le tagata e faagesegese ai lona ita, o lona viiga foi lea ina ua le manatua lona agaleagaina” [Faataoto 19:11] (DBY, 203–4).

Ua outou vaai, faalogo ma molimauina se feeseeseaiga i le va o fanau— o nisi o outou ua outou vaai i ai, afai e leai—ma o le a ou tuuina atu ni nai upu e tusa ai ma o outou olaga i le lumanai, ina ia mafai ona outou maua ni fanau e le feainai, e le tauaimisa. O le laasaga muamua lava, o le avea lea o outou ma ni tagata lelei pea. Aua nei outou faatagaina outou ia feita ma maua le le fiafia… .E matua fefeu lava fanau e toetoe a oia o latou ponaivi i lo latou malolosi. E matua tele naua le fefeu—o le ola, malosi ma galuega, e tatau ona latou faatuatuanai i ai; ma o le a tauaimisa le au laiti. Aua nei outou lotoita. Ia outou tiga alofa ma i latou ma faafilemu i latou. Ia aga vaivai ma tausaafia (DBY, 209–10).

I mea na ou oo i ai, na ou aoao mai ai, o faigata sili lea e i ai i ni tauaiupuga ma feeseeseaiga i le va o le alii ma le alii, o le tamaitai ma le tamaitai, fanau ma fanau, matua ma fanau, uso ma tuafafine, tuafafine ma tuagane, e aliae mai ona o le le lava o le malamalama o le tasi i le isi (DBY, 203).

Fautuaga mo Suesuega

O le aiga o se mea na faavaeina e le Atua mo le taimi nei ma le faavavau.

Aisea e taua tele ai le faamauina o aiga mo le faavavau? (Vaai MFF 128:18.) E mafai faapefea e lo tatou malamalamaaga i le taua e faavavau ma le paia o le natura o sootaga faaleaiga ona fesoasoani ia i tatou i a tatou fesootaiga ma tagata o le aiga?
O le a se mea e mafai ona e faia ina ia faamalosia ai sootaga faaleaiga i le va o augatupulaga i lou aiga? E mafai faapefea e ou uiga ona aafia ai ou tuaa ma e tupuga mai ia te oe?

E tatau i matua ona aoaoina a latou fanau ina ia tausia poloaiga a le Atua.

O ai e i ai le matafaioi muamua o le aoaoina o le fanau? O le a le taimi e tatau ai i matua ona aoaoina a latou fanau ina ia amiotonu? O le a le fautuaga na tuuina atu e Peresitene Iaga i matua e faatatau i a latou matafaioi i le avea ai ma uluai faiaoga o a latou fanau?
Na saunoa mai Peresitene Iaga faapea e tatau i matua “ona tausia a latou fanau i le alofa ma le mata’u i le Alii.” (Vaai foi MFF 68:25–28.) E mafai faapefea ona e aoaoina le fanau ina ia alolofa ma faaaloalo i le Tama Faalelagi ma Iesu Keriso?
O a mataupu faavae na faailoa mai e Peresitene Iaga mo matua e aoaoina ai a latou fanau? O le a se mea atonu e tupu pe afai e le aoaoina faalelei e matua a latou fanau?

Ao taitaiina e matua e ala i faataitaiga, o loo laua fesoasoani e faataatia se ala amiotonu mo lo laua aiga.

Aisea e avea ai faataitaiga ma se auala sili ona malosi e aoaoina ai fanau? O a ituaiga faataitaiga o loo e faia mo fanau o loo i ou tafatafa?
Na faamatalaina e Peresitene Iaga e faapea o fanau o le a “latou toe foi atu lava i le punavai na puna mai ai.” Aisea e faamafanafanaina ai i lenei folafolaga matua o fanau ua mulimuli atu i amioga leaga ma le agasala? O le a se mea e mafai e matua ona faia mo fanau ua sese ese, ina ia mananao e toe foi atu i o latou aiga?
O a ni uiga taua lelei na outou aoaoina mai o outou matua? O a nisi o uiga taua lelei tou te mananao ina ia aoaoina e a outou fanau mai ia outou? E mafai faapefea ona outou aoaoina atu nei uiga taua lelei? O a ni faamaoniga o ia te oe e iloa ai o loo aoaoina e lau fanau uiga taua lelei mai ia te oe?
E mafai faapefea e “tu ma aga faamaoni” ona fesoasoani i lau fanau ina ia matuai gauai atu i le amiotonu? O a ni tu ma ni aga amiotonu ua faamalosia ai lou aiga? O a ni tu ma ni aga amiotonu e te manao e faavaeina i totonu o lou aiga?

O le Loto-pulea ma le aoaiga ma le alofa e fesoasoani e atinae ai ni aiga malolosi.

O le a le eseesega i le va o le “faamalosi” o fanau ma le “taitaia” o i latou? Aisea e sili atu ai ona aoga le taitaiina o le fanau ina ia aoaoina i le amiotonu?
Aisea e talafeagai ai ona “faatumauina pea se mafaufau lelei” pe a feutagai ma isi, aemaise lava i fanau?
O le tauaimisa ma le feainai o nisi taimi o ni vaega e masani ai o le olaga faaleaiga. Aisea e faasoesa ai nei mea i le aiga? (Vaai foi Mosaea 4:14.) O le a le saunoaga a Peresitene Iaga i le uluai mafuaaga e tutupu ai nei mea? E mafai faapefea ona e siitiaina ia fesootaiga ina ia lelei faapea ma le femalamalamaai i totonu o lou aiga? O le a se mea ua e faia ina ia fesoasoani ai i lou aiga e fefaaaliai ai le alofa o le tasi i le isi mai lea taimi i lea taimi?

Edward Martin family — O Eteuati Matini faatasi ma lona aiga i le 1870. O Eteuati sa avea ma kapeteni o le Aumalaga o Taavale Tosolima a Matini lea na puapuagatia i le 1856. Na soifua o ia ma avea ma tagata pueata i le Aai o Sate Leki.