Faatupuina o le Lotofaafetai, Lotomaualalo, ma le Faamaoni.

O Peresitene Polika Iaga e talitonu ma sa soifua e tusa ai ma mataupu faavae moni ma faigofie. Mai lona malamalamaaga i mea na ia oo i ai i le avea ma se kamuta ma se konekarate, na ia aoaoina ai ina ia faatauaina tagata faigaluega faamaoni o e sa fausiaina puipui malolosi, tautauina faitotoa e le toe manaomia ona faaleleia, ma latou te lei tuua foi ia nofoaga sa latou faigaluega ai ma ni meafaigaluega po o ni fao a le tagata pule i totonu o a latou taga. Na ia fautuaina tagata i soo se galuega ina ia “pupula o latou mata ma vaai ma malamalama i le taua o le faamaoni ma le amiotonu” (DNW, 2 Dec. 1857, 4). Na uunaiina foi e Peresitene Iaga ia uluai Au Paia o e na mafatia mai tofotofoga e pei o sauaga, matitiva, ma le fia aai ina ia taliaina puapuaga ma le lotofaafetai ma le lotomaualalo, aua e moni lava o le a faamalosia i latou e le Alii i o latou puapuaga. O ana saunoaga ma lona soifuaga na faamamafa mai ai lo tatou tiute ina ia faaali atu le faamaoni ma le lotofaafetai e ala lea i le faaleleia atili o soo se mea ua faamanuiaina ai i tatou e le Alii.

Aoaoga a Polika Iaga

O le iloa o le aafiaga o le Alii i o tatou olaga e faatupuina ai le lotofaafetai

Ou te leiloa se isi agasala, sei vagana ai le agasala e le mafaamagalaoina, e sili atu nai lo le agasala, o le le lotofaafetai (DBY, 228).

Atonu ou te fai atuina se faamatalaga e faatatau i aso faigata. Ua outou iloa ua uma ona ou fai atu ia te outou, afai lava e i ai se tasi ua fefe i le oti ona o le fiaai, e mafai lava ona alu ese o ia, ma alu atu i le mea o loo tele ai meaai. Ou te le o mafaufau lava i se matautia itiiti o le fiaai, sei vagana lava ua tatou aina le miula mulimuli, e amata mai lava i le pito o le taliga seia oo atu i le pito o le siusiu, ou te le o fefe i le oti ona o le fiaai. E toatele tagata i le taimi nei e le o mafai ona maua ni galuega, ae le o toe mamao ae tele galuega e galulue ai, ma o le a tatou le toe pagatia mo se isi mea mo lo tatou lelei. Ou te faafetai ai mo faamanuiaga a le Alii lea e mafai ona vaaia; ou te faafetaia foi mo nei taimi faigata ua ou mauaina mai ia te ia. Na ou tauina atu ia te outou, i le tele o tausaga ua tuanai, o’u lagona e tusa ai ma o latou faanoanoaga, o lo latou faatuatua, o le lotofaafetai ma le faamalo, ma lo latou iloatinoina o le alofa o le Alii ma le auala na saunia ai e le Alii ana faamanuiaga. Na matuai ootia lo’u agaga, i le vaai atu i le faamaimau, ma le faatauga o lagona o nei tagata i le faaaogaina o o latou faamanuiaga e tele. O le tele o tagata e le amanaiaina faamanuiaga a le Alii, ma ua latou saunia e faifai i le Atua o le na ia tuuina atu na faamanuiaga. Sa latou mananao i auro ma siliva, nai lo le falaoa ma le sana, ma le falaoamata lelei, ma fualaau faisua sili ona lelei sa ola ai i le fogaeleele. Sa latou le amanaiaina na faamanuiaga, ma ua latou ta’ufaatauvaaina ia faamanuiaga filifilia a le Alii lo latou Atua (DNW, 6 Feb. 1856, 4).

Tatou te fiafia aua o loo ‘au ma i tatou le Alii, aua na luluina i tatou i le vaivai mo se faamoemoega patino o le mauaina o le mana sili ma le atoatoa. O mea uma lava e mafai ai e le Au Paia ona fiafia—i sauaga, aua e tatau lea mo le faamamaina o i latou, ma saunia ai e amioleaga mo lo latou malaia; i le ma’i ma le tiga, e ui lava ina faigata ona tauaveina, aua ua tatou masani foi ma le tiga, ma le faanoanoa, ma mea faigata uma e mafai e le tino ona tumau ai, aua o le fesootaiga e oo mai ai mea uma i o tatou lagona. E i ai mafuaaga tatou te matuai olioli ai aua o loo i ai le faatuatua i le lalolagi, aua o loo nofotupu le Alii, ma e pulea o ia i mea uma o loo i ai i le lalolagi. Pe e te fesili mai ea pe ou te olioli ona o loo pule le Tiapolo i mea uma o le lalolagi, ma ua ia faatosinaina tagata? Ou te matuai mautinoa lava lo’u tali atu ioe; ou te matuai olioli lava i lenei mea e pei o se isi foi mea. Ou te olioli aua ua tigaina au. Ou te olioli aua ou te mativa. Ou te olioli aua ua ou faanoanoa. Aisea? Aua o le a toe siitiaina au. Ou te olioli ona ou te mativa, aua o le a faamauoaina au; ou te olioli i lo’u tigaina, aua o le a faamafanafanaina au, ma saunia e aeae i le matagofie o le atoatoaga o le fiafia, aua e le mafai ona talisapaia le fiafia sei vagana ua onosaia faafitauli (DBY, 228).

Tatou te talanoa e uiga i o tatou tofotofoga ma faafitauli iinei i lenei olaga; ae faapea la e mafai ona outou vaai atu ia te outou lava i le fia afe ma le fia miliona o tausaga ina ua mavae ona faamaonia lo outou faatuatua i lo outou talitonuga i nai tausaga puupuu ua tuanai talu mai lenei taimi, ma mauaina le faaolataga e faavavau ma le palealii o le mamalu i le afioaga o le Atua? Ona toe tepa mai lea i lo outou olaga iinei, ma vaai i faafitauli, o faigata, ma le le fiafia, o faanoanoaga … ; o le a mafua ai ona outou tagiaue, “o le a le uiga o na mea uma? O na mea sa na o mo sina taimi, ae o lenei ua tatou i ai iinei. Sa tatou faamaoni i nai taimi i lo tatou olaga faaletino, ae o lenei ua tatou olioli i le ola e faavavau ma le mamalu, faatasi ai ma le mana e alualu ai i luma i malamalama e anoanoai ma le tele o tulaga le mafaitaulia o le agai i luma, i le olioli ai i le soisoi mai ma le faamaoniga a lo tatou Tama ma lo tatou Atua, ma Iesu Keriso lo tatou uso matua” (DNW, 9 Nov. 1859, 1).

E i ai se isi mea o le a ou ta’uaina nei, ma seiloga tatou te aoaoina ia mea, ou te folafola atu o le a le mafai lava ona tatou mauaina le Malo Selesitila. Ua tatou faapotopoto faatasi mo le faamoemoe e aoaoina mea e tatau ona faia i lenei olaga faapea ma faamanuiaga ua tuuina mai nei ia i tatou. Afai tatou te le aoaoina nei lesona, e mafai faapefea ona faatuatuaina i tatou i oa o le faavavau; aua o le faamaoni i nai mea iti e tofia o ia e pule i mea e tele [vaai Mataio 25:21]… . Afai e faamanuiaina i tatou i le faateleina lea o se lafupovi, ma ua tatou le amanaiaina lea faamanuiaga ua tuuina mai e le Alii ia i tatou, o lona uiga o lea mea ua tatou aumaia le le fiafia ia te Ia, ma ua tatou tuuina atu lava i tatou i le faasalaga. O le a se mea o le a tuuina atu ai e se tama faalelalolagi ni faamanuiaga i luga o sona atalii, faatasi ma lona fiafia ma le faamalieina, ae o loo faaauau pea ona le amanaiaina e lena atalii ma faatalale i ai? A mavae se taimi, o le a aveesea ai lagona fiafia o le tama, ma tuuina atu ai na faamanuiaga i luga o se atalii e sili atu ona agavaa. E sili atu le alofa mutimutivale o le Alii nai lo tatou; ae atonu e i ai lava se vaega e aveeseina ai Ana meaalofa, pe afai tatou te le taliaina ma le agaga faafetai ma tausia faalelei na faamanuiaga pe a tatou mauaina. Tuu atu i tagata ina ia tausia faalelei a latou povi ma solofanua, ma o le tagata na te le faia faapea o le a ia aumaia i ona luga le faasalaga e tusa ai ma le faamasinoga (DNSW, 29 Oct. 1865, 2).

O le a lo tatou tiute? O lo tatou tiute o le faaleleia lea o faamanuiaga uma ua tuuina mai e le Alii ia i tatou. Afai na te tuuina mai le laueleele, ia faaleleia; afai na te tuuina mai ia i tatou le avanoa e fau ai fale, ia faaleleia; afai na te tuuina mai ia i tatou ava ma fanau, taumafai e aoao i latou i auala o le Alii, ma faaeaina i latou mai le sese, o le ta’ufaatauvaaina, ma le tulaga amioleaga o tagata… . I lona alofa tunoa na ia valaauina ai le Au Paia o Aso e Gata Ai mai le lalolagi, ua faapotopotoina i latou mai isi atunuu, ma tuuina atu ia i latou se nofoaga i le lalolagi. O se faamanuiaga ea lenei? Ioe, o se tasi lenei o faamanuiaga e mafai e tagata ona latou olioli ai, o le saoloto lea mai amioga leaga a tagata leaga, mai puapuaga ma le pisapisao o le lalolagi. O lenei faamanuiaga e mafai ai ona tatou faaali atu i lo tatou Tama o i le Lagi, o i tatou o ni auauna faamaoni; ma le isi mea e sili atu, o se faamanuiaga lea e maua ai le avanoa e toe faafoi atu ai ia te ia mea na ia tuuina mai mo i tatou… . Ona manino ai lea o mea e foliga mai o ni au mea, o le mea moni lava e le o ni au mea ia, ma o le a ou toe tuuina atu i le Alii pe a ia toe valaau mai; o ana mea ia, ma o ia e pule ai i taimi uma. Ou te le pule ai, ma e le o ni a’u mea lava (DN, 20 June 1855, 4).

E aunoa ma se tulaga se tasi o le olaga [po o] se itula o se malamalamaaga o se tasi e le o faamanuiaina ai i latou uma o loo latou suesueina, ma faamoemoe ina ia faaleleia atili ai lo latou malamalamaaga ua latou mauaina (DNW, 9 July 1862, 1).

O i latou e lotomaualalo latou te iloaina lo latou faalagolago i le Alii.

E tatau ona tatou lotomaualalo ma ia avea faapei o tamaiti laiti i o tatou lagona—ina ia lotomaualalo ma avea faapei o se tamaitiiti i la le agaga, ina ia mafai ai ona tatou mauaina le pupula muamua o le malamalama o le agaga o le Talalelei, ona tatou mauaina ai lea o le avanoa o le tuputupu ae, o le faateleina o le atamai, i le faautauta, ma i le malamalama (DBY, 228).

O i tatou ua na o se meanoa sei vagana ai le mea na faia ai i tatou e le Alii (DNW, 28 Oct. 1857, 5).

Afai e vaaia e se tagata ia ni mea i lo latou foliga mai, … afai na te iloaina o loo ia faafiafia i le Atua ma ona uso a tagata, o loo matuai sili lava lona fiafia, ma ia lagonaina le faateleina o lona lotomaualalo ma lona naunau atu i le finagalo o le Atua. Afai e faamaualuga ma faasausili se tagata, o le a faatumulia o ia i viiga taufaasese ma o le a tiga ai o ia; ae le mafai ona tupu lena mea pe afai e faateleina lona faatuatua i le Atua (DBY, 228).

O ai se tasi e i ai sana mafuaaga sili e faafetai atu ai i lona Atua—o se tagata e leai sona lagona malosi po o ni amioga faatiapolo e faatoilaloina, po o le tagata na te taumafai i aso taitasi e faatoilaloina, ae peitai ane ua afaina i se agasala ? Ua faatoilaloina le malosiaga o lona malosi, faatuatua, ma le faamasinoga tonu, ma ua agasala ai o ia i ana taumafaiga faatiapolo, e ui lava o loo tauivi i ao ma po ina ia faatoilaloina. O ai e i ai se mafuaaga e matuai loto faafetai ai? O le tagata e leai ni ona lagona malolosi e faatoilaloina e mafai ona savali pea i le ala o le lotomaualalo, nai lo le faalialiavale o lona amiotonu e sili atu nai lo lona uso. O loo tatou i ai i se galuega, e ala lea i le manatu atu i isi o o tatou uso ma sootaga faaletagata, ina ia faateleina pe faaitiitia le faaaumea ia i latou o loo amioleaga. E tatau ona tatou tutumau ai i lenei mea seia oo ina faamamaina e le Alii o saito mai otaota o saito—seia oo ina faapotopotoina e amiotonu, ma fusifusia i latou o e amioleaga i fusi ma saunia e susunuina [vaai i le MFF 86]—seia oo ina tuueseeseina o mamoe mai ‘oti [vaai Mataio 25:31–34]. O i latou e leai ni o latou lagona malolosi latou te fetaiai i lea aso ma lea aso, i lea tausaga ma lea tausaga, e tatau ona savavali i le ala o le lotomaualalo; ma afai e faafuasei ona oo mai ni sese i uso ma tuafafine o le Ekalesia, e tatau ona faatumulia o outou loto i le agalelei—faaleusoga, ma lagona faaagelu—ina ia le amanaiaina o latou sese i le mea e gata mai ai (DNW, 22 Aug. 1860, 1).

O loto o e agamalu ma lotomaualalo e tutumu i le olioli ma le mafanafana e faaauauina pea (DBY, 228).

O i latou e faamaoni, e faamaoni ia i latou lava, o isi tagata, faapea ma le Alii.

E tatau i tagata ona faamaoni, e tatau ona latou ola faamaoni i luma o lo latou Atua, ma faamamaluina o latou valaauga ma lo latou aumau ai i le lalolagi. E te fesili ifo pe talafeagai lenei mea? Ioe, o aoaoga faavae ua tatou mauaina e aveesea ai loto faamaualuluga (DBY, 232).

E moomia ona tatou aoao, faataitai, suesue, iloa ma malamalama pe faapefea ona nonofo faatasi ia agelu. Afai ae oo atu lenei lalolagi i le tulaga o le faamaoni ma le tonu atoatoa, o le a outou le mauaina ai lava se tagata mativa; e leai se isi e oge, o le a lava ma totoe mea uma. O alii, tamaitai, ma fanau uma o le a latou maua mea uma latou te moomia pe a latou faamaoni. Afai o le toatele o le lalolagi e le faamaoni, o le a avea lea ma mafuaaga o le matitiva ai o nisi o tagata faamaoni, aua o tagata le faamaoni latou te auauna ma faatamaoaigaina lava i latou i vaega a tagata faamaoni (DBY, 232).

Sa ou taumafai e taofia le le faamaoni i tagata taitoatasi, ma ou taumafaia lenei auala ina ia latou faamaoni. Afai ou te faafaigaluegaina se kamuta ma totogiina o ia e tolu tala i le aso, ae tolu aso na te faaaluina e fau ai se faitotoa lea e mafai e se tagata galue lelei ona faia i le aso e tasi, pe tasi foi ma le afa faitotoa e faia e le tagata galue lelei i le aso e tasi, ou te le manao e totogiina o ia mo le tolu tala i le aso mo lena galuega. Ae peitai e i ai nisi iinei e le o toe i ai se faamasinoga tonu, leai se fuafua lelei, po o se manatu foi i le sao ma le sese, nai lo le manao e totogiina mo le galuega latou te lei faatinoina; ma ua latou mafaufau ua latou faamaoni: ae peitai o se matuai le faamaoni lava lena e pei o se isi lava mea i le lalolagi (DNW, 2 Dec. 1857, 4).

Tuu atu ia i [tagata galulue uma] ina ia taumafai e faaleleia atili … . Ua i ai se matuai alualu i luma i nei tagata, ma o le a tatou faaauau pea ona faaleleia. Tatou saili atu i le Alii mo le poto ma le faautauta.… ma ia faaauau ai pea ona faaleleia, seia tatou oo atu i le tulaga o le faamaoni i a tatou galuega ma upu; ina ia mafai ona ou faafaigaluegaina se tagata galue i maamora na te fausiaina se puipui ma o le a ia faia ma le faamaoni, ma ia faapea ai foi i isi tagata faigaluega. Ma afai o le a le galue se tagata ina ia maua ai lona totoga, o le a ia le talosagaina pe aveina foi… . E le mafai lava ona oo mai le faamaoni i loto o tagata faapena; o le latou tulafono o le tusia lea o mea ua latou maua ma ia maua mai mea uma latou te mafaia, e tusa lava pe faamaoni pe leai, ma tatalo atu mo nisi mea se tele (DNW, 2 Dec. 1857, 5).

Oi talofa ia i latou o e faapea mai o latou o le Au Paia ae le o faamaoni. Ia outou faamaoni ia te outou lava, ona outou faamaoni ai lea i tagata o le Au Paia o Aso e Gata Ai (DBY, 231–32).

E tatau ona aoaoina fanau ina ia faamaoni, ma e tatau ona latou tutupu ae ma le lagona i totonu o i latou e faapea e le tatau lava ona latou aveina se pine e le o sa latou pine; aua nei aveeseina se mea mai le mea sa i ai ae ia tuu mea uma i le tulaga na i ai. Afai latou te mauaina se mea, ia saili atu i le tagata e ana lea mea. Afai e i ai se mea a lo latou tuaoi e ono faaleagaina, ia tuu i se mea e aua ai nei faaleagaina, ma ia atoatoa ona faamaoni o le tasi i le isi (DNW, 23 Oct. 1872, 5).

O loto faamaoni e tutupu mai ai gaoioiga faamaoni—o faanaunauga paia e fua mai ai galuega o loo faatinoina. Ia faataunuuina a outou feutagaiga ma ia tausia ma le paia a outou upu. Ou te le fia faauo i se tagata na te faia se folafolaga ae le faataunuuina. O le upu moni, faigofie, faamaoni, ia sa’o, faamasino tonu, alofa tunoa, agalelei, faia o mea lelei i tagata uma ae aua nei agaleaga atu i se tasi, e maeu le faigofie ona ola ai i na mataupu! E sili faaafe atu lona faigofie nai lo le faataitaia o le taufaasese! (DBY, 232).

E sili mamao atu ona faamaoni; ia ola sa’o iinei, ma faagalo ma teena le tiapolo, nai lo le le faamaoni. O se ala sili lea ona faigofie i le lalolagi o le faamaoni,—ia sa’o i luma o le Atua; ma afai o le a aoaoina e tagata lenei mea, o le a latou faataitaia loa ma ola ai (DBY, 232).

Fautuaga mo Suesuega

O le iloatinoina o galuega a le Alii i o tatou olaga e seleseleina ai le lotofaafetai.

Na fautua atu Peresitene Iaga i le Au Paia e tatau ona latou lotofaafetai mo falaoa, sana, ma fualaau faisua nai lo auro ma siliva. O a mea e tatau ia i tatou taitoatasi ona tatou maua ai le lotofaafetai? (Vaai foi MFF 59:7, 21.) O faapefea ona faaali atu le lotofaafetai i le Atua, i lou aiga, ma isi?
O le a sou manatu aisea na aoao ai e Peresitene Iaga le Au Paia ina ia olioli i sauaga, o ma’i, tiga, ma puapuaga? O a faamanuiaga e mafai ona maua mai i nei tulaga? E mafai faapefea ona avea puapuaga ma tofotofoga mo lo tatou lelei? E mafai faapefea ona tatou aoao ina ia tatou talisapaiaina ma faatauaina faigata o le olaga a o tatou i ai i taimi faigata?
Na saunoa mai Peresitene Iaga e faapea, “Ua tatou i ai iinei mo le faamoemoega o le aoaoina o mea tatou te faia ao i ai i lenei olaga faapea ma faamanuiaga ua tuuina mai nei ia i tatou.” O le a se mea o le a tupu pe afai tatou te le faaali atu le lotofaafetai e ala lea i lo tatou aoao po o a mea e faia i o tatou faamanuiaga ua i ai nei? (Vaai foi Mosaea 2:20–21.) O le a se mea e mafai ona tatou faia e faaali atu ai lo tatou agaga faafetai mo o tatou faamanuiaga? E mafai faapefea ona tatou faaleleia atili faamanuiaga taitasi ua tuuina mai e le Alii ia i tatou”?

O i latou e lotomaualalo latou te iloaina lo latou faalagolago i le Alii.

Na saunoa Peresitene Iaga i le manaomia lea ona avea o i tatou faapei o se tamaitiiti ina ia “mauaina le pupula muamua o le malamalama o le agaga o le Talalelei” ma faapea mai e mafai ai e se tagata ona tuputupu ae i le poto ma le faautauta. O a ni faamaoniga ua e vaaia ia te oe lava faapea ma isi ua e faamaonia ai e moni lenei mea? O a ni uiga o i ai i fanau e mafai ai ona taitaiina atu tagata matutua ina ia lotomaualalo?
Na aoao mai Peresitene Iaga, “O i tatou ua na o se meanoa sei vagana ai le mea na faia ai i tatou e le Alii.” E mafai faapefea ona tatou iloa le mea o loo finagalo le Alii e faaaoga i ai i tatou? O le a faapefea ona mafai e le Alii ona taitaiina i tatou e lo tatou lotomaualalo? (Vaai foi Mosaea 3:19.) O faapefea ona taitaiina e le Alii lou olaga ma fesoasoani atu ia te oe ina ia avea ma se tagata sili ona lelei?
Na faapea mai Peresitene Iaga, “O le tagata e leai ni ona lagona malolosi e faatoilaloina e mafai ona savali pea i le ala o le lotomaualalo, nai lo le faalialiavale o lona amiotonu e sili atu nai lo lona uso.” E mafai faapefea e lo tatou faatusatusaina o o tatou malosiaga ma vaivaiga o isi ona taitaiina atu ai i tatou i le faamaualuga? O a faamanuiaga e oo mai ia i latou o e lotomaualalo? (Vaai foi Eteru 12:27.)

O i latou e faamaoni, e faamaoni ia i latou lava, o isi tagata, faapea ma le Alii.

E mafai faapefea ona avea agelu o ni faataitaiga i o tatou aiga ma nuu i le auala e tatau ona tatou ola ai faatasi ma isi?
Na faamatala mai e Peresitene Iaga e faapea, i totonu o se nuu o tagata faamaoni o le a leai lava se tasi e le maua ni mea ma o le a lava ma totoe mea uma. Aisea e moni ai lenei mea? E faapefea ona aafia o tatou nuu i le le faamaoni? E faapefea ona faamanuiaina o tatou nuu i le faamaoni?
E mafai faapefea ona tatou aoaoina a tatou fanau ina ia faamaoni? Aisea e taua ai le faamaoni i tulaga uma o o tatou olaga?
E tusa ai ma le saunoaga a Peresitene Iaga, o le faamaoni “e sili faaafe atu ona faigofie nai lo le faataitaia o le taufaasese” ma o le “ala sili lea ona faigofie i le lalolagi.”