Faamasinoga e Faavavau

“Ua ou oo mai nei i le faaiuga,” na faailoa mai ai e Peresitene Polika Iaga e faapea, “e tatau ona faamasinoina i tatou e tusa ai ma a tatou galuega i la le tino ma e tusa ai foi ma manatunatuga ma faamoemoega o le loto”(DNW, 17 AAug. 1869, 2; tagai foi i le MFF 137:9). Na ia aoao manino mai faapea o alii uma ma tamaitai o le a latou iloaina lenei faamasinoga: “O le a faamasinoina tagata malamalama uma taitoatasi … . e tusa ai ma ana galuega, faatuatua, faanaunauga, ma le faamaoni po o le le faamaoni i luma o le Atua; o uiga eseese uma o lona tagata o le a mauaina lona taui tonu po o le le tonu foi, ma o le a faamasinoina o ia e tusa ai ma tulafono o le lagi” (DNW, 12 Sept. 1860, 2).

Aoaoga a Polika Iaga

O le a faamasinoina i tatou e tusa ai ma a tatou galuega, upu, manatu, ma lo tatou tali atu i le upu moni.

O se lalolagi lenei tatou te faamaonia atu ai i tatou lava. O le olaga o se tagata o se taimi o le tofotofoina, lea e mafai ai ona tatou faamaonia atu ai i le Atua, i lo tatou valea po o le lå lava o le malamalama, i o tatou vaivaiga faaleagaga, ma mea o loo manumalo ai le tiapolo, o i tatou o fanau a lo tatou Tama, ma o ia tatou te maua mai ai le malamalama ma o loo tatou agavaa e avea ma taitai i a tatou fanau—ina ia avea ma alii o alii ma tupu o tupu—ina ia tatou maua le pule atoatoa i lena vaega o o tatou aiga lea o le a faapaleina i le malo selesitila i le mamalu, tino ola pea, ma le ola e faavavau (DBY, 87).

Ua ou iloa o le aso o le faamasinoga o le a le pine ae oo mai ia te outou ma au; ma e muamua mamao atu o le a tatou tuuina ifo ai nei tino i le eleele ma o atu i le lalolagi o agaga. Ma ou te iloa a o tatou taooto ai, o le a oo mai ai le faamasinoga ia i tatou, ma o loo tusitusia lava lena mea; “o le mea e pa’u i ai le laau e i ai pea ia” [vaai Failauga 11:3], po o se isi faaupuga, a tuua i tatou e le oti ona oo mai ai lea o le faamasinoga (DBY, 382).

O le oti e laugatasia uma ai pulega malo sili ona malolosi ma i latou o e aisi; ma o i latou uma e tatau ona tutu i luma o le nofoa faamasino o Keriso e tali atu e tusa ai ma a latou galuega na faia i la le tino nei (DBY, 445).

Ia tuu atu uma i tagata taitoatasi ina ia talitonu pe a ia fiafia i ai ma mulimuli atu e tusa ai ma talitonuga o lona lava mafaufau, aua ua saoloto tagata uma e filifili pe teena; latou te filifili e auauna i le Atua po o le teenaina o ia. Ua ia te i tatou Tusitusiga Paia o le upu moni paia, ma ua tatou saoloto e talitonu i ai pe teena. Ae ao lava ona tatou o atu i luma o le faamasinoga a le Atua mo nei mea uma, ma e tatau ai ona tatou tuuina atu se faamatalaga ia te ia aua o loo ia te ia le aia e valaauina ai i tatou ina ia tuuina atu se faamatalaga o a tatou galuega na faia i la le tino (DBY, 67).

O le taimi ma le malosi e mafai ai ona galue, o mea na e moomia e le lalolagi atoa o tagata, ma o loo tatou nofo aitalafu uma i le Atua mo le malosi e faaaogaina ai le taimi e faamanuiaina ai ma o le a ia moomia mai ia i tatou uma taitoatasi se faamatalaga auiliili o lo tatou faaaogaina o lenei malosi (DBY, 301).

O le fanauga a tagata, o le a faamasinoina e tusa ai ma a latou galuega, e tusa lava pe lelei pe leaga. Afai o aso o le olaga o se tagata e faatumulia i galuega lelei, o le a tauia lava o ia e tusa ai. I le isi itu, afai o ona aso e faatumulia i galuega leaga, o le a ia mauaina lava e tusa ai ma na galuega … . O afea o le a iloa ai e tagata o le vaitaimi lenei e tatau ai ona latou amata ona faataatia le faavae o lo latou faaeaga mo le taimi nei ma le faavavau, ma o le taimi lenei latou te atinaeina ai ma fua mai ai ni fua lelei i le mamalu ma le viiga o le Atua, e pei ona faia e Iesu? (DNW, 13 Apr. 1854, 1).

O i latou uma o e talitonu, e i ai loto faamaoni, ma latou te fua mai ni fua o le amiotonu, ma o le au filifilia a le Atua ma e fai ma suli o mea uma. O i latou uma e tetee e usiusitai i poloaiga a le Alii ma sauniga o lenei fale, o le a faamasinoina i latou e tusa ma mea na latou tautatala i ai, o le a faasalaina i latou e pei ona latou faia nei, o le a faamauina i latou e le agavaa ma o le a leai so latou tofi faatasi ma e amiotonu (DBY, 383–84).

“Ia,” o le faapea mai lea a se tasi e taumatemate, “afai la ou te mautinoa lo’u mauaina o se tulaga o le mamalu e sili atu nai lo lenei, ou te matea la o le a ou le toe tigaina fua la e toe saili se isi tofi.” Ae, ia e alu la ma faia lena pe afai o lou manao lea, aua ua tofu tagata uma i le lalolagi ma le avanoa. Ua talaiina le Talalelei, ua toe i ai le agasala, o nisi ua feoti faaleagaga ma o nisi ua faatautava agai i le [talalelei]—o nisi ua mauaina ae o nisi e leai; ae o le agasala lenei o tagata—ua tauina atu ia te i latou le upu moni ae ua latou teenaina. O le agasala lenei a le lalolagi. “Ua oo mai le malamalama i le lalolagi, ae ua sili atu le alolofa o tagata i le pogisa nai lo le malamalama, aua o a latou gaoioiga sa leaga” [vaai Ioane 3:19]. O le fetalaiga foi lena a Iesu i ona aso. Tatou te faapea atu, o le Talalelei lenei o le ola ma le faaolataga, ma o i latou uma o le a latou mauaina, o le a avea ma i latou le mamalu, viiga, tino ola pea ma le ola e faavavau; afai latou te teenaina, ua latou le maua lo latou avanoa (DBY, 384).

Afai e oo mai le pupula o le malamalama o le Atua i se tagata, ma ia teenaina, o lona lava lena faasalaga (DBY, 383).

O mataupu faavae o le ola e faavavau ia ua faatulagaina i o tatou luma, ua faamoemoeina ina ia faaeaina ai i tatou i le mana, ma faasaoina ai i tatou mai le pala. Afai tatou te filifili e ui i le ala faafeagai ma talia ma faataitaia mataupu faavae na e tau atu i le oti, o le sese o le a ia i tatou lava. Afai tatou te toilalo i le mauaina o le faaolataga o loo tatou sailia, e tatau ona tatou faailoaina atu ua mautu uma ia i tatou lava taui uma e faatatau mo i tatou e ala lea i a tatou galuega, ma sa tatou galulue e tusa ai ma le filifiliga tutoatasi ua tuuina mai ia i tatou, ma o le a faamasinoina i tatou e tusa ai ma a tatou upu, pe faamaoniaina i tatou po o le faasalaina (DNW, 17 Aug. 1859, 1).

O le a faamasinoina i tatou mo le ola ai e “tusa ma le malamalama sili ua [tatou] maua.”

E foliga mai ia te au, mai lava i lo’u tamaitiiti seia oo mai i lenei aso, ua na o se meanoa lava le talanoa e uiga i e na ola i lenei lalolagi ua faapea ona leiloloa atu—o le talanoa e uiga i lo’u tama ma lo’u tina, ma o outou foi matua, po o outou augatuaa, o e na ola ma le faatuatua e tusa ai ma le malamalama sili na ia te i latou; ae talu ai ona latou te lei mauaina le feagaiga e faavavau ma le Perisitua paia, o lea e tatau ai ona latou o atu i seoli ma le afi i le faavavau uma. E leai se uiga ia te au; sa le i ai foi se uiga ia te au, ma e le o i ai lava (DBY, 384).

O se alii po o se tamaitai e tatau ona iloa ala o le Atua ao lei mafai ona latou amioleaga. E mafai ona agasala tagata, e mafai ona amioletonu, e mafai ona amioleaga, o e lei faalogo lava i le ata o le faaolataga, o e lei masani lava i le talafaasolopito o le Atalii o le Tagata, pe na faalogo foi i le suafa o le Faaola, ma atonu, na faalogo foi i le talafaasolopito o lona soifuaga ao i ai i le lalolagi, ae sa aoaoina ni talitonuga sese i a latou aganuu ma aoaoga; ae ina ia amioleaga, i le tulaga malamalama lelei o le upu, e tatau lava ona i ai so latou malamalama i le amioatua (DBY, 384).

E tusa ai ma le olaga faaletino, e faitau miliona tagata o le lalolagi o loo ola e tusa ai ma le malamalama sili ua latou maua—e tusa ai ma le atamai sili ua latou maua. Ua ou tauina soo atu ia te outou o le a latou mauaina lava e tusa ai ma a latou galuega; ma o i latou uma, o e na ola e tusa ai ma mataupu faavae sili na latou mauaina, pe na mafai foi ona latou malamalama i ai, o le a latou mauaina le filemu, mamalu, faamafanafanaina, olioli ma le palealii lea o le a sili atu nai lo le mea na latou faatalitali i ai. O le a le oti lava i latou i le oti faaleagaga (DBY, 384).

Afai e i ai se tulafono a [tagata], e le afaina po o ai na faia, ma latou faia le mea sili latou te iloa ai pe faapefea ona fai, o le a latou mauaina se mamalu e sili atu i o outou mafaufauga, e ala lea i soo se faamatalaga e mafai ona ou tuuina atu; e le mafai ona outou mafaufauina se vaega itiiti o le mamalu o le Atua ua sauniaina mo ana fanau, o le galuega a ona aao (DBY, 385).

Ou te faapea atu i faifeau uma o loo i ai i le lalolagi, ou te le popole lava i ai pe o i latou o ni Kerisiano, Faapaupau po o ni [Mosalemi], e tatau ona outou ola e tusa ai ma le malamalama sili ua outou maua; ma afai tou te faia o le a outou mauaina le mamalu uma ua leva ona outou nofo sauni i ai (DBY, 384–85).

O tagata uma o le a fai ma o latou tofi se malo o le mamalu sei vagana ai atalii o le malaia.

O le au soo o Iesu sa nonofo faatasi ma ia. O fea o le a o i ai le isi toatele? I malo ua saunia mo i latou lea o le a latou mau ai ma tumau ai. O le a aumaia e Iesu, e ala i lana lava togiola, atalii ma afafine uma o Atamu, sei vagana ai lava atalii o le malaia, o le a lafoina i latou i seoli. O isi o le a mafatia i le toasa o le Atua—o le a puapuagatia i mea uma e mafai ona poloaiina mai e le Alii mai o latou lima, pe mafai foi ona poloaiina e le faamasinoga mai ia te i latou; ma afai o le a latou puapuagatia ona o le toasa o le Atua seia oo ina latou totogiina le tau uma o loo manaomia, o le a mafai ai ona aveesea i latou mai le falepuipui o agaga. Pe o se aoaoga matautia ea lenei e talaiina atu? O nisi latou te mafaufau e matautia; ae e moni lava o soo se tagata lava e lå agasala i le alofa tunoa, ma avea ma se agelu a le Tiapolo, o le a aumaia ina ia mautofi i se malo o le mamalu (DBY, 382).

O le a toatele e faamaoni lo latou faatuatua nai lo le liliuese. O se vaega o nei tagata o le a o atu i le malo selesitila, ae o isi o le a le mafai ona ulu atu ai iina, talu ai sa latou le usitaia se tulafono faaselesitila; ae o le a latou mauaina se malo e lelei foi e pei ona latou naunau ma ola agai i ai (DBY,383).

O nei mamalu eseese uma ua faauuina ina ia talafeagai ma tulaga o tagata (DNW, 13 Aug. 1862, 2).

Ua tatou faitau i le Tusi Paia e faapea e i ai le pupula o le la, o le isi pupula o le masina, ma le isi pupula o fetu [vaai 1 Korinito 15:40–42]. le tusi o Mataupu Faavae ma Feagaiga [vaai MFF 76], o nei mamalu e taua o le telesitila, terasitila ma le selesitila lea e sili ona maualuga. O lalolagi nei, e eseese vaega, po o maota, i le maota o lo tatou Tama. O lea la o na alii, po o na tamaitai, ua leai se isi mea latou te iloa e uiga i le mana o le Atua, ma aafiaga o le Agaga Paia, nai lo le matuai taitaiina e le isi tagata, ma tuu atu lo latou malamalama, ma faapipii atu lo latou faatuatua i le isi, o le a le mafai lava ona ulu atu i le mamalu selesitila, ina ia faapaleina e pei ona latou tulimatai atu i ai, o le a le mafai lava ona avea i latou ma Atua. E le mafai ona latou puleaina i latou lava, pe tautatala foi pe pule i isi, ae tatau ona faatonutonu-ina i latou i soo se mea faatauvaa, e pei o se tamaitiiti. E le mafai ona latou faatonutonuina i latou lava, ae o Iakopo, Peteru, po o se isi tagata e tatau ona faatonutonuina i latou. E le mafai lava ona avea i latou ma Atua, e le faapaleina e avea ma pule ua i ai le mamalu, tino ola pea, ma ola e faavavau. E le mafai lava ona latou pule ma le mamalu, silisiliese, ma le mana i le malo selesitila. O ai o le a i ai? O i latou o e totoa ma musuia i le tutoatasi moni o le lagi, o i latou o le a o atu ma le totoa i le galuega a lo latou Atua, ma tuua ai isi e fai mea latou te loto i ai, ua latou fuafua e fai le mea tonu, e ui lava o isi tagata uma ua latou fuafua e tatau ona latou ui i le auala faafeagai (DBY, 382–83).

Afai o tagata amioleaga, i a latou agasala, i lalo o le tulaga o le matuai mananao lava e savavali atu i le afioaga o le Tama ma le Alo faatasi ma i latou o e ua talitonu o le a faasaoina tagata uma—ma o le a le tuua e Iesu se tasi, o le tulaga o le a i ai i latou o e amioleaga o le a sili atu ona tiga ma le mafai ona gafatia nai lo le nofo ai i le lepa afi ma le teio. O aoaoga a tagata e le fetuutuunai, latou te talitonu o le a alu i seoli se pepe e oti e le’i atoa se futu o lona umi, ae o le mulilua, o le faitaaga, o le gaoi, o le pepelo, o le tauto pepelo, o le fasioti tagata, ma isi ituaiga tagata amioleaga faapena, afai latou te salamo i luga o le tuugamau, e tusa ai ma lea lava aoaoga, o le a faamalosia atu i latou i le afioaga o le Tama ma le Alo, lea pe afai e mafai ona latou ulu i ai, o le a avea lea ma seoli ia i latou (DBY, 385).

O le faasalaga a le Atua e pule ai lava le Atua. E tumau e faavavau, aua o le a leai lava se taimi faapea o le a le faasalaina ai tagata, ma e tatau ai lava ona i ai se seoli e auina atu i ai i latou. O le a le umi o le a mau ai le tagata ua faasalaina i seoli, ou te leiloa, ou te leiloa foi po o le a le ituaiga tiga o le a latou oo i ai. Afai e mafai i soo se auala ona tatou mafaufauina po o le a le tele o le amioleaga o loo latou tausalaina ai, atonu o le a mafai ona tatou mautinoa le tele o le puapuaga o le a latou mauaina. O le a latou mauaina e tusa ai ma a latou gaoioiga na faia ao i ai i la le tino. O le faasalaga a le Atua e faavavau, ae le o faamaonia ai faapea o se tagata amioleaga o le a tumau ai e faavavau i se tulaga o le faasalaina (DBY, 383).

Fautuaga mo Suesuega

O le a faamasinoina i tatou e tusa ai ma a tatou galuega, upu, manatu, ma lo tatou tali atu i le upu moni.

Na aoao mai Peresitene Iaga faapea “o le olaga o le tagata o se taimi o le tofotofoga.” O le a le mea tatou te “faamaonia atu i le Atua” i le taimi o lo tatou olaga faaletino?
O a mea o le a faamasinoina ai i tatou i le aso o le faamasinoga? (Vaai foi Alema 12:14; 41:3.)
O ai le au filifilia a le Atua?
Na saunoa mai Peresitene Iaga faapea o le a “faamasinoina i tatou e tusa ai ma a tatou upu.” E faapefea ona tatou iloaina “pe [o le a] tauamioto- nuina i tatou pe faasalaina”?
Na aoao mai Peresitene Iaga faapea o le a faamasinoina i tatou e tusa ai ma le faaaogaina o o tatou taimi. Aisea e taua tele ai le faaaogaina o o tatou taimi? E faapefea ona e faamasinoina le ala o loo e faaaogaina ai lou taimi i le taimi nei? Pe ua e aoao mai ea mai isi tagata o le Ekalesia, uo, ma tuaoi pe mafai faapefea ona faaaogaina ma le tatau le taimi?

O le a faamasinoina i tatou mo le ola ai e “tusa ma le malamalama sili ua [tatou] maua.”

O a ni tulaga po o ni mea foi i olaga o tagata o le a faigofie ai le faamasinoga a le Alii ia i latou? E mafai faapefea ona tatou faatatauina lenei aoaoga i le auala tatou te manatu ai mo isi tagata e ese o latou talitonuga mai ia i tatou?
E tusa ai ma le saunoaga a Peresitene Iaga, o a ni tulaga o le a mauaina ai e tagata i le olaga a sau le “filemu, mamalu, faamafanafanaga … e sili atu nai lo le mea na latou tulimatai atu i ai”?

O tagata uma o le a fai ma o latou tofi se malo o le mamalu sei vagana ai atalii o le malaia.

Aisea o le a le mafai ai e tagata amioleaga o e na oti i a latou agasala ona mau faatasi ma le Tama ma le Alo? (Vaai Mamona 9:3–4; MFF 88:22.)
Na faapea mai Peresitene Iaga o fanau a le Tama Faalelagi “o le a latou mauaina se malo lelei e pei ona latou ola ma naunau i ai.” E mafai faapefea ona tatou fuafuaina pe o tatou ola agavaa i le mauaina o le malo o loo tatou naunau i ai?
Na aoao mai Peresitene Iaga faapea o tagata uma lava sei vagana ai atalii o le malaia, o le a latou mautofi i se malo o le mamalu. O le a se mea o loo aoaoina ai oe e uiga i le naunautai o le Tama Faalelagi i le faamasinoga tonu ma le alofa tunoa? O le a se mea ua aoaoina ai oe e uiga i Lona alofa mo Lana fanau?