O le Aualofa ma Tiute Taitasi

O le Aualofa a Tamaitai o Navu, sa faatulagaina e le Perofeta o Iosefa Samita, o se auala taua e fesoasoani ai i e matitiva ma faamalosia tuafafine i Navu mai le 1842 seia oo i le 1844. Mulimuli ane ai ina ua tagatavaleina Iosefa, sa le faaauauina le Aualofa mo ni nai tausaga. I le 1854, e ala i le uunaiga a le galuega a tuafafine mo e matitiva, sa faatuina ai e Polika Iaga ia Aualofa i nisi o uarota i Iuta. Ina ua auina atu e le Iunaite Setete ia le autau a Johnson i Iuta i le 1857, peitai ane, o le faapotopotoga o uarota, e aofia ai ma Aualofa, ua le toe i ai foi. I le taufaaiuga o le 1867 sa finagalo ai Peresitene Iaga e le mafai ona faamalieina lelei manaoga o e matitiva e aunoa ma le faatulagaina o tuafafine. Sa ia taloina Epikopo ina ia toe faatuina ia Aualofa: “O lenei, Epikopo, o loo ia te outou ni tina popoto ua avea ma a outou ava … ; e ao ona latou faatulagaina se Aualofa mo Tamaitai i uarota taitasi. O loo i ai ia i tatou ni tina talenia se toatele, ma ua manaomia la latou fesoasoani i lenei mea. O nisi ua manatu o se mea faatauvaa lenei, ae leai; ma o le a outou iloa o tuafafine o le autu o lenei gaioiga. Tuu atu ia i latou le faatuatuaga o lo outou atamai ma le iloa, ia faatauanauina i latou, faatonutonu ma faasinosino i latou i le atamai ma le atoatoa, ma o le a latou maua avanoa mo e matitiva, ma maua auala e fesoasoani ai ia i latou faasefulu lona vave nai le mafai e le Epikopo” (DEN, 14 Dec 1867, 2). I aso nei, o loo galulue faatasi tuafafine o le Aualofa , e faaleleia o latou aiga ma nuu ma faatuina le malo o le Atua.

Aoaoga a Polika Iaga

Ua fesoasoani tina o le Aualofa e tausia e matitiva, mamai, ma puapuagatia.

Ei ai sau lauga puupuu mo ou tuafafine. Ou te manao ia outou, i lalo o le taitaiga a o outou Epikopo ma tagata atamamai, e faatuina a outou Aualofa, ma faatulagaina outou lava i lalo o le taitaiga a o outou taitai (DBY, 218).

Filifilia tina e malamalama lelei e avea ma o outou taitai, ma ia maua fautuaga mai alii o le malamalama ma ia outou galulue i le auala e tatau ai, ma ia faamasani i uiga tamalii o loo i ai ia te outou o tamaitai (DNSW, 28 Apr. 1868, 2).

Afai e tagi atu se tuafafine mo se fesoasoani mo e puapuagatia ma matitiva, e le taumate ona manuia o ia, aemaise pe a tagi atu o ia ia i latou o tamaitai. Afai e te faia lenei auala o le a e fesoasoani i manaoga o e matitiva e sili atu nai lo le auala o loo faia nei (DEN, 14 Dec. 1867, 2).

Ou te fai atu nei i le Au Paia o Aso e Gata Ai, afai tou te fafaga i e matitiva ma le agaga atoa ma le lima foai o le a le mafai e outou poo a outou fanau ona aisi i se falaoa. E sa’o tagata i nei mea, e sa’o i latou i le faatuina o Aualofa a Tamaitai, ina ia faafiafia ai loto o e ua oti a latou tane ma e ua leai ni matua i faamanuiaga e tele ma le saoloto o loo sasaa atu i o latou luga (DBY, 217).

Tuafafine, o outou iloa ni tamaiti i lo outou tuaoi ua matitiva ma leai ni seevae? Afai ua outou iloa, ou te fai atu ia te outou Aualofa a Tamaitai, sii ae i nei tamaiti ma fesoasoani i mea o loo latou manaomia, ma ave i latou i le aoga. Ma afai tou te iloa nisi talavou, tina matutua pe faaleogalua o loo manaomia le fesoasoani, saili ni mea latou te fai ina ia mafai ona ola ai latou lava; ae aua le fesoasoani i e paie, aua o le fesoasoani ia i latou e malolosi ae le mananao e galulue, ua leaga lea i soo se nuu (DBY, 217).

Fesoasoani i manaoga o tagata taitasi o loo manaomia le fesoasoani i o outou tuaoi. O loo i ai lea i le gafatia ma le malosi o le Aualofa a Tamaitai pe a le i ai i le malosi o Epikopo (DBY, 218).

Tagai ane ia outou i le avea ai o outou o Aualofa i lenei aai ma totonu o mauga. Vaai i o outou tulaga! Ia mafaufau mo outou lava, ma filifili pe tou te galulue ma aoao aafiaga o loo ia te outou, ma tuuina atu lena aafiaga mo le faia o mea lelei ma fesoasoani ai i e matitiva o loo i ai i tagata (DNW, 14 Aug. 1869, 2).

O faamaumauga o galuega a nei Aualofa o Tamaitai o le a tausia, ma o le a iloa ai i latou sa faatuatua i le tauaveina o fautuaga ua tuuina atu ia i latou ina ia mafai ai ona latou faalauteleina lo latou valaauga maualuga iinei i le fogaeleele (MS, 31:269).

O Tuafafine o e faaaoga ma le atamai a latou meatotino e mafai ona faalautele i le galuega a le Atua.

Ou te manao ina ia manatu ane o tatou tuafafine i la tatou Aualofa. Matou te fiafia e faapea atu e toatele i latou ua maea ona faia mea e tele. Matou te mananao ina ia latou faaauau pea i luma. I la tatou Aualofa matou te mananao ina ia faailoa atu ni mea se tele e faaalualu ai i luma. Matou te mananao i o tatou tuafafine ua tele le tomai e aoao i tamaitai talavou ina ia aua nei naunau mo le faaleleia o manaoga o loo miti i ai, ae ia tau o mea o loo latou manaomia moni. O le manao e leai sona tuaoi… . Ua tatou vave ona tatou tuu atu i manaoga o o tatou loto, ae afai ua taitaiina i tatou e le atamai, o le a sao la tatou faamasinoga, ma o le a tatou iloa ai o le a mafai ona tele le faaleleia (DBY, 218).

Tamaitai, afai o outou le auala e faamalosia ai nei tagata e nofo aitalafu ma maua ai e i latou le faanoanoa, pe i ai ea la se mea e manaomia ai outou? Ou te manatu e i ai, aua o le a faamasinoina outou e tusa ai ma a outou galuega. Pe le faamaumau tupe ea tamaloloa faapei o fafine? Ioe, e faapena lava, ma e faapena foi le valea (DBY, 213).

O se tagata tausi fale lelei o le a ia faasao ma faaaoga lelei tupe ma aoao i ana fanau e avea ma tagata tausi fale lelei, ma auala e vaai lelei ai mea uma ua tuuina atu i la latou vaavaaiga (DBY, 213).

Ia mautinoa e le o faamaimauina e lau fanau falaoa ma isi meaai. Afai ua i ai sa outou falaoa ua le faaaogaina, tuuina atu mo e matitiva, ma vaai ua le faaleagaina e lau fanau. Aua nei o latou faaleagaina lavalava lelei, ae ia faaaoga lavalava e anagata ma umi ona faaaoga, ma faapolopolo i mea uma e mafai ai, ma tuuina atu e faaputu mo i latou e matitiva (DNW, 29 May 1861, 2).

E ao ona tatou aoao le auala tatou te maua ai faamanuiaga uma, ma avanoa uma ua tuuina mai e le Atua ia i tatou, ma iloa ona faaaoga o tatou taimi, taleni ma a tatou gaioiga uma mo le faaleleia o lona malo i luga o le fogaeleele (DBY, 53).

O le taimi o loo tatou i ai iinei, o lo tatou ola lea, o a tatou mea aoga, o tupe, o manuia, ma o lena taimi e ao ona faaaogaina lelei (DBY, 217).

O lenei, tuafafine, afai tou te mafaufau i nei mea, o le a outou vaai i lena taimi o mea uma o loo i le fogaeleele, ma e ao ona outou manatu ai o lo outou taimi e taua, e mauoa, ma afai e faaaoga ma le faautauta, o le a aumai ai mea e faaopoopo i lo outou ola filemu, talafeagai, ma le maliega. E ao ona tatou mafaufau i lenei, aua le toe nofonofo ma piilima, faamaimau taimi, aua o le tiute o alii taitasi uma ma tamaitai o le faia o mea uma, mea e mafai ina ia faaalualu ai i luma le malo o le Atua i le fogaeleele (DBY, 214).

O tamaitai e ao ona “faalautele, faaalualu i luma ma faamamalu le ola o loo latou maua.”

O iinei tamaitai talavou, faaleogalua ma matutua, o e o loo i ai le tomai e tusa ma mea ua latou ola mai ai… . Ou te amata i le faapea atu i ou tuafafine, o lo latou tiute taua i luma o le Atua, o o latou aiga ma o latou taitai, le faaaoga o i latou lava i le galuega ua tofia i ai i latou, e tusa ai ma lo latou tomai, ina ia mafai ona faalautele, faaalualu ai i luma, ma faamamalu i le ola o loo ia i latou (MS, 31:267).

Ia tausi tuafafine ia i latou lava, ma faalalelei ia i latou, ma afai e i ai so outou e talitonu i uputuu ma valea ma faapea mai o le faamaualuga lenei, e mafai ona ou faapea atu ua le iloa e outou le faamaualuga o le agasala i luma o le Alii, ua outou valea foi i le matagofie o le lagi, ma le lalelei o loo i ai i le faapotopotoga a le Atua. Afai ua outou vaai i se agelu, o le a outou vaai i se vaaiga lalelei ma le matagofie. Ia fai outou e avea faapei o ni agelu i le lelei ma le matagofie (DBY, 215).

O Eva o le igoa poo le tau na faauuina ai lo tatou uluai tina, aua o ia ua avea ma tina o tagata ola uma o e soifua i luga o lenei fogaeleele. O loo ou vaavaai mo se faapotopotoga ua fuafuaina ina ia faapei o nei tagata soifua (MS 31:267).

Faataga mai au, tuafafine, ou te fai atu, ua faauuina i tatou i le tomai e olioli ma puapuagatia ma fiafia ai. Tatou te fiafia ea i mea ua faatiga? Leai; ao mea ua matagofie ma lelei (MS 31:267).

Suesue i le sologa lelei ma le mama i a outou galuega eseese. Faamatagofie i o outou aai ma tuaoi. Faalelei i o outou aiga, ma faamatagofie i o outou loto i le alofa tunoa o le Atua (DBY, 200).

E mafai ona ou faapea atu i tuafafine, afai e i ai ni a outou taleni silisili, tulai ma faasusulu atu lo outou malamalama. Faamaonia atu i o outou tuaoi ma nuu tou te mafai ona aoao i tuafafine ua e manatu ua valea ma le amanaia (DNW, 15 Iuni 1859, 2).

E pei lava ona masani ona ou ta’u atu i ou tuafafine i le Aualofa a Tamaitai, o loo i ai iinei tuafafine o e, ana i ai ni o latou avanoa e aooga ai, semanu ua avea i latou o ni tagata atamamai i matematika, poo suetusi lelei e faapei o soo se alii; ma ua matou manatu e tatau ona i ai ni o latou avanoa e aooga ai i nei lala o le poto, ina ia mafai ai ona latou galueaina le malosiaga ua faauuina ai i latou. Matou te talitonu o tamaitai e aoga e le gata i le faamamaina o fale, fufulu ipu, teu moega, ma tausi tamaiti, ma e ao foi ona latou tutu i tua o laulau, suesue faaloia, poo le faafomai, poo le avea ma tausi tusi lelei ma ia mafai ai ona fai pisinisi i soo se taimi, ma faia nei mea ina ia faalauteleina ai lo latou aoga mo le lelei o le sosaiete lautele (DBY, 216–17).

O tuafafine i la tatou Aualofa o Tamaitai ua latou faia le tele o mea lelei. E mafai ona e tau mai le aofai o mea lelei e mafai ona faia e tina ma afafine o Isaraelu? Leai. E le mafai. Ma o le lelei ua latou fai o le a mulimuli ia i latou i le faavavau uma (DBY, 216).

Fautuaga mo Suesuega

Ua fesoasoani tina o le Aualofa e tausia e matitiva, mamai, ma puapuagatia.

O a faamanuiaga sa folafola mai e Peresitene Iaga mo i latou o e “fafaga i e matitiva ma le agaga fiafia ma le lima foai”? O a nisi o faamanuiaga e mafai ona oo mai i tagata taitasi, aiga, poo nuu pe a tatou fetufaai a tatou oa? Aisea e taua ai le faia o lenei mea ma le agaga fiafia?
Aisea e “leaga ai i soo se nuu” le ave o le fesoasoani ia i latou o e e mafai ae le mananao e galulue? Aisea e taua tele ai le mataupu faavae o le galue?
Na fautua mai Peresitene Iaga i tuafafine e “fesoasoani i manaoga o tagata taitasi o loo manaomia i lo outou tuaoi.” O a ituaiga o manaoga o tagata? O a ni manaoga patino ua outou iloa i mea o outou i ai? E faapefea ona outou fesoasoani ia i latou o loo manaomia le fesoasoani i o outou aiga, le uarota poo le paranesi, poo le nuu?
E faapefea e tuafafine o le Aualofa ona “faaaoga lo latou aafiaga e fai ai le lelei”? O anafea na e iloa ai tuafafine o le Aualofa ua faatinoina ni mea se tele i le aufaatasi nai lo le taitoatasi o tina ia i latou lava?
E faapefea ona e lagolago i le galuega a le Aualofa? O a faamanuiaga ua e maua e ala i le Aualofa?

O Tuafafine o e faaaoga ma le atamai a latou meatotino e mafai ona faalautele i le galuega a le Atua.

Sa fautuaina e Peresitene Iaga tuafafine o le Aualofa e aoao i tamaitai talavou ina ia faamalie i mea e tatau ona maua ae le o mea e mananao ina ia maua. E faapefea ona e iloa le eseesega “o manaoga o loo miti i ai” ma “mea moni o loo manaomia”? E faapefea ona tatou aoao ina ia tatou malilie i mea ua tatou maua nai lo le manao i mea tatou te le maua?
Aisea e taua ai le faaaoga o a tatou meatotino ma le atamai ma faasaoina ai tupe? Aisea e avea ai le ola faapolopolo o le Au Paia ma fesoasoani i le atinaeina o le malo o le Atua? E faapefea ona outou faaaogaina ma le atamai a outou meatotino?
Sa faasino e Peresitene Iaga ia le taimi o se “tupe,” “o lo tatou manuia,” ma le “tamaoaiga.” Aisea e taua tele ai le taimi? E faapefea ona tatou mautinoa ua tatou faaaoga lo tatou taimi ma le atamai?

O tamaitai e ao ona “faalautele, faaalualu i luma ma faamamalu le ola o loo latou maua.”

E faapefea ona tatou “faalautele, faaalualu i luma ma faamamalu le ola ua [tatou] maua nei”?
E faapefea ona tatou fesoasoani i le “faatulagaina ma le mama i a outou galuega”? Aisea e taua ai le faatulagaina ma le mama? O le a le uiga o le “faamatagofie lou loto i le alofa tunoa o le Atua”? E faapefea e le tamaitai o le Au Paia ona “saunia [latou lava] e faapei o ni agelu i le lelei ma le matagofie”?
Aisea e taua ai i tamaitai ona faaleleia a latou taleni? O a taleni e mafai ona outou fesoasoani mai ai i le fausiaina o le malo o le Atua? E faapefea ona outou fesoasoani e faaleleia atoa le malo o le Atua e ala i a outou gaioiga i aso uma?

Ata vane o Eliza R. Snow (1804–87). E masani ona taua o le “tusi solo a Siona,” o ia o le uluai failautusi o le Aualofa a Navu. Sa ia auauna o se peresitene aoao lona lua o le Aualofa mo le 20 tausaga.