Faatomuaga

Sa aoaoina e le perofeta o Polika Iaga le talalelei toefuataiina a Iesu Keriso i se auala faatino faigofie, lea na avatu ai i le Au Paia sa tauivi e fausia se aiga i le vao, musumusuga ma le faamoemoe. E ui ina ua silia ma le senituli ua mavae, o loo fou pea ma momosi ana saunoaga ma talafeagai lelei mo i tatou i ona po nei, a o tatou faaauau pea ona galulue i le fausiaina o le malo o le Atua.

Na folafola mai e Peresitene Iaga e faapea, i le avea ai o i tatou ma tagata o le Ekalesia a Iesu Keriso o le Au Paia o Aso e Gata Ai, ua ia te i tatou le “mataupu aoaoina o le ola ma le faaolataga mo i latou uma e faamaoni i o latou loto” (DBY, 7). Na ia folafola mai o i latou o å mauaina le talalelei i o latou loto, o le a “faatupuina i o latou loto se naunautaiga e iloa ma malamalama i mea o le Atua ia sili atu nai lo se isi taimi i o latou olaga” ma o le a amata ona latou “fesilisili, faitau ma suesue, ma afai latou te o atu i lo latou Tama i le suafa o Iesu, o le a na le tuu aunoaina i latou ma se molimau.” (DBY, 450).

Ua atagia mai i lenei tusi se naunautaiga o le Au Peresitene Sili ma le Korama a Aposetolo e Toasefululua ina ia loloto le malamalamaaga o tagata o le Ekalesia i aoaoga faavae ma ia faatupuina i o latou loto se naunautaiga sili atu ia iloa mea a le Atua. O le a musuia ai ma uunaia tagata taitoatasi, o korama a le perisitua, ma vasega a le Aualofa e fesilisili, faitau, ma suesue, ona o atu ai lea i lo latou Tama oi le Lagi mo se molimau i le moni o nei aoaoga.

E tofu mataupu ma vaega tailua—“O Aoaoga a Polika Iaga” ma “Fautuaga mo Suesuega.” O le vaega muamua e aofia ai ni vaega mai lauga a Polika Iaga i uluai tagata o le Au Paia. O faamatalaga taitasi ua uma ona faamaonia, peitai, o tusi o loo maua mai ai faamatalaga o le a le avanoa mo le toatele o tagata o le ekalesia. E le tau faapea e tatau ona i ai nei uluai tusi ina ia mafai ai ona suesue lelei pe aoao atu foi mai lenei tusi. E le tau faatauina foi e tagata o le au paia nisi tusi faaopoopo e maua mai ai faamatalaga ma e suesue ai ina ia aoaoina atu nei mataupu. O faamatalaga ua tuuina atu i lenei tusi, ma lagolagoina i mau, ua lava ma totoe mo faatonuga. E tatau i tagata o le ekalesia ona faitau ma suesue ma le agaga tatalo i aoaoga a Peresitene Iaga ina ia mafai ai ona maua se malamalamaaga fou i mataupu faavae o le talalelei ma iloa ai le ala e faaaoga ai na mataupu faavae i o latou olaga i aso taitasi. O le suesueina ma le faatuatua ma le agaga tatalo o nei mataupu filifilia, o le a maua ai e le Au Paia o Aso e Gata Ai se malamalamaaga sili atu o mataupu faavae o le talalelei ma o le a sili atu foi ona latou talisapaia atoatoa o aoaoga matagofie ma le musuia a lenei perofeta maoae.

O le vaega e lua o mataupu taitasi o loo aveatu ai se vaega o fesili o le a faamalosiauina ai le tuutuu i le loloto o le tofa, faaaogaina e le tagata lava ia, ma le talanoaina o aoaoga a Peresitene Iaga. E tatau ona tagatagai ma toe saga faitau tagata o le ekalesia i ana saunoaga e uiga i le mataupu faavae o loo talanoaina. O le suesue loloto ma le agaga tatalo i nei aoaoga o le a musuia ai tagata o le ekalesia i tautinoga sili atu a le tagata lava ia ma o le a fesoasoani foi ia i latou ina ia faia se tonu o le a mulimuli i aoaoga a le Faaola o Iesu Keriso.

Afai e mulimulitai ma le agaga tatalo tagata taitoatasi ma aiga i mataupu faavae o loo i lenei tusi, o le a faamanuiaina i latou ma musuia i se naunautaiga ma se faaleagaga sili atu, e pei o uluai tagata o le Au Paia o å na faafofoga i nei upu tuusa’o mai fofoga o le “Liona a le Alii” (HC, 7:434)—o le perofeta, tagata vaai, ma le tali faaaliga, o Peresitene Polika Iaga.

O Faatonuga i Faiaoga

O le aoaoina atu o nei lesona o le a manaomia ai le vave faitauina ma le faaeteete, suesue, ma sauniuniga ma le agaga tatalo. Ia matua faamasani i aoaoga ma fuafua auala eseese e tuuina atu ai ma aoao atu nei mataupu faavae i le vasega. E tatau ona fesoasoani lesona i tagata o le vasega ina ia latou iloa ai le ala e faaaoga ai mataupu faavae i olaga i aso taitasi. Faamalosia talanoaga e uiga i le ala e mafai ai e nei mataupu faavae ona faatosina atu o tatou lagona e uiga i lo tatou Tama oi le Lagi, o Iesu Keriso, o i tatou lava, o o tatou aiga, ma o tatou tuaoi. Valaaulia tagata o le vasega e ola e tusa ai ma mataupu faavae e pei ona aoaoina atu.

Ia faaaofia ai le toatele e mafai ona i ai i le taimi o le lesona e ala i le tofia o i latou e faitau leotele, tali mai i fesili, pe faamatala foi ni mea na oo i ai. E mafai ona e faia ni tofiga faapitoa a o saunia lesona, ma ia nofouta i le tulaga ma’ema’e ma le saunia o tagata o le vasega e auai. Ia aloese mai le feteenai. Ia faalagolago i tusitusiga paia le lagolago atu ma le malamalamaaga. Ia saili ma le lotomaualalo le Agaga o le Alii, ona faamanuiaina lea o uso ma tuafafine e te aoaoina. E pei ona folafola mai le Alii, “O lea, o lå talai atu atoa ma lå talia mai, e malamalama le tasi i le tasi, e faamanuiaina ma olioli faatasi i laua uma”(MFF 50:22).