Mataupu 14

Augatupulaga o le Talalelei

Sa faatuina ma aoao e le Atua lana talalelei i le amataga, ma faaalia i se tulaga fou i le tele o augatupulaga e ui o se vaitaimi o le liliuese, ma ua toe faatuina nei i lenei tausaga mulimuli. Na fiafia Peresitene Polika Iaga i lenei “augatupulaga o augatupulaga uma,” i le taimi mulimuli o lea na ia faapea mai ai, “o le a tulaga maualuga i le ofoofogia ma le mamalu nai lo se isi augatupulaga ua ofoina atu i le fanau a tagata i luga o le fogaeleele”(DBY, 442).

Aoaoga a Polika Iaga

Sa muai faaali e le Atua le ata o le faaolataga ia Atamu i le tino, ma e mai lena taimi sa Ia toefuataiina Lona malo mai lea taimi i lea taimi e ala i Ana perofeta.

Ole ata tele ua taua o le ata o le faaolataga—o le faatulagaga o mataupu faavae, manatu, ma galuega faataunuuina e faatatau i le poto uma o loo iai i le faavavau (DBY, 56) … [sa] fausiaina i le lagi mo le togiolaina o tagata mai le agasala, ma lo latou toefuataiina i le afioaga o le Atua (DBY, 448).

Pe a faatulagaina lenei malo i soo se tausaga [i le fogaeleele], o le Agaga o le a ola ai i loto o e ua faatuatua, ao lona vaega vaaia o loo i ai i tagata, ma tulafono, sauniga, fesoasoaniga, malo, ofisa, tagata e pulea galuega, maisi mea faaopoopo e tatau ai ina ia atoatoa lona faaaogaina ina ia maua ai le faamoemoega o loo manaomia [vaai Mose 6:7; MFF 22:3] (DBY, 441).

Atamu. Sa iloa le Atua i le lalolagi e ana fanau … e pei ona iloa e le tasi o le isi. O Atamu sa mafuta ma lona Tama o le sa tuuina o ia i luga o le fogaeleele e pei ona tatou mafuta ma o tatou matua faaletino. Sa masani ona asiasi mai le Tama i lona alo o Atamu, ma talanoa ma savavali ma ia; ma o fanau a Atamu sa mafuta foi ma ia, ma o mea e faatatau i le Atua ma le lagi sa masani ai tagata i le muai vaitaimi o lo latou aumau ai i le fogaeleele, e faapei … o a tatou togalaau i a tatou ava ma fanau, poo le faapei o le ala i le Vasa Pasefika i le tagata faimalaga masani [vaai Mose 3:15–21; 4:14–30; 5:4–5, 9, 12; 6:51] (DBY, 104).

Tatou te fiafia e faapea atu mai le aso na fausia ai Atamu ma tuuina i le faatoaga i Etena e oo mai i le aso, sa le suia le ata o le faaolataga ma faaaliga o le finagalo o le Atua i tagata, e ui o le tagata mo le tele o tausaga sa le i fiafia i ai i latou, ona o le liliuese ma le amioletonu. E leai se faamaoniga o maua i le Tusi Paia e faapea, o le Talalelei e ao ona avea mea e tasi i aso o Isaraelu, o le isi i aso o Keriso ma ana Aposetolo, ma le isi i le senituri e 19, ae ui i lea, i le tulaga faafeagai, ua poloaiina i tatou e tutusa le Atua i vaitaimi uma, ma o lana fuafuaga lenei mo le faaolaina o lana fanau e tutusa lava. O le ata o le faaolataga e tasi, e mai le amataga o le lalolagi seia oo i le gataaga [vaai Mose 6:51–68] (DBY, 104–4).

O le Talalelei sa i ai i le fanau a tagata mai le taimi o Atamu seia oo i le afio mai o le Mesia, o lenei talalelei a Keriso e mai le amataga seia oo i le gataaga [vaai Mose 5:58–59; MFF 20:25–26] (DBY, 103-4).

Enoka.Sa iai ia Enoka le poto ma le atamai mai le Atua sa itiiti tagata sa maua, na savavali ma talanoa ma le Atua mo le tele o tausaga; ae peitai, e tusa ai ma le talafaasolopito sa tusia e Mose, sa tele sona taimi sa faatuina ai lona malo i tagata. O le toaitiiti sa mulimuli ia te ia sa maua le fiafia o le atoatoaga o le Talalelei, ae o le toatele o le lalolagi sa latou teena (DBY, 105).

Sa talanoa Enoka ma aoao i ona tagata i se vaitaimi e tusa ma le toluselau ma le onosefulu tausaga, seia saunia e ia i latou e ulufale atu i lona malologa, ona ia maua lea o le mana e aveolaina ai o ia ma ona tagata, faatasi ma vaega sa latou nonofo ai, o fale, faatoaga, fanua, manu ma mea uma [vaai Mose 7:68–69] (DBY, 105).

O Enoka ma ona tagata sa aveesea mai le fogaeleele, ma e sa faaauau pea le atoatoa o le amioletonu o le lalolagi, seia faatamaiaina i latou i le lolo i ona po o Noa; ma, “e faapei o taimi o Noa, e faapena foi aso o le afio mai o le Atalii o le Tagata” [vaai Kenese 6:5; Mose 6:26–7:69] (DBY, 105).

Noa. I le amataga, ina ua maea ona saunia lenei lalolagi mo tagata, sa amatalia le galuega a le Alii i luga o le laufanua ua taua nei o le konetineta o Amerika, sa faia ai le Faatoaga o Etena (DBY, 102).

Na auina mai e le Alii lana talalelei i tagata; na ia faapea mai, o le a ou tuuina atu i lou atalii o Atamu, na te tuuina atu ia Metusela; ona tuuina atu lea e Metusela ia Noa (DBY, 105).

I aso o Noa, i aso o le opeopea o le vaa, sa ia auina tagata i se tasi vaega o le fogaeleele; sa vaevaeina le fogaeleele, ma o iina sa faatuina ai lona malo [vaai Kenese 6:1–8:21] (DBY, 102).

Aperaamo. Sa faatuatua Aperaamo i le Atua moni, sa ia lafoaia tupua a lona tama ma sa faauuina i le Perisitua e tusa ma le faatulagaga a Mekisateko [vaai MFF 84:14], e mulimuli i le faatulagaga a le Alo o le Atua [vaai MFF 107:2–3], ma le folafolaga o le faatoateleina o ana fanau ma e leai se gataaga; pe a outou maua le Perisitua paia, e tusa ma le faatulagaga a Mekisateko, ua faamauina i o outou luga, ma le folafolaga o le a faatoateleina a outou fanau e pei o fetu i le lagi, ma pei o le oneone i le matafaga, ma o ou faamanuiagae leai se gataaga, ua ia te oe le folafolaga a Aperaamo, Isaako, ma Iakopo, ma faamanuiaga uma sa faauuina ai i latou [vaai Kenese 12:2–3; 13:16; 14:18–19; 15:5; Aperaamo 1:2–4, 18–19; 2:9–11; MFF 84:14] (DBY, 106).

Mose. Sa iai le talalelei i fanau a tagata mai aso o Atamu seia oo i le afio mai o le Mesia; o le talalelei lenei a Keriso e mai le amataga seia oo i le gataaga. Aisea la na tuuina mai ai le tulafono a Mose? O le taui o le le usiusitai o le Fanauga a Isaraelu, le au filifilia a le Atua; o le fanau na ia filifilia lavae avea ma ona tagata, ma o i latou ua ia fetalai o le a tuu i ai lona suafa. Sa matua teena e le fanau a Aperaamo o ia ma ana poloaiga sa fetalai mai ai le Alii ia Mose, “O le a ou tuuina atu ia te oe se tulafono e avea o se taiala e aumai ai i latou ia Keriso” [vaai Kalatia 3:24].Ma o lenei tulafono e faigata; o le tulafono faaletino [vaai MFF 84:23–27] (DBY, 104).

Afai ua faamama ma faapaiaina i latou, semanu e le malaga le Fanauga a Isaraelu mo le tausaga e tasi faatasi ma Mose a o le i maua o latou faaeega paia ma le Perisitua Mekisateko [vaai MFF 84:23] (DBY, 106).

Iesu Keriso. Sa galue Iesu e faatuina le Malo o le Atua i luga o le fogaeleele. Sa ia tuuina mai tulafono ma sauniga o le malo [vaai Mataio 16:18–19; Efeso 1:22–23; 4:11–15] (DBY, 29).

O le Perisitua ma le atoatoaga o le talalelei o le malo sa leiloa mai le fogaeleele i le taimi o le Liliuese Tele.

I le talutalu fou o le Ekalesia Kerisiano ua tatou malamalama sa tele le masalosalo i ona tagata e uiga i o latou talitonuga ma faiga, ma o le faateteleina o nei manatu masalosalo na tupu ae ai le vaevaeina i vaega. E oo lava i taimi o le Au Aposetolo sa tele le feeseeseaiga, aua sa tatou faitau o nisi o sa Paulo, o nisi o sa Apolo, o nisi o sa Kefa [vaai 1 Korinito 1:10–13]. O tagata o na aso sa i ai mea e fiafia i ai, o i latou sa aoaoina mataupu faavae ese e le talia ma faasalalauina faalauaitele (DBY, 107).

Aisea ua latou o ese mamao ai mai le ala o le upumoni ma le amiotonu? Aua ua latou tuua le Perisitua ma ua leai se taiala, leai se taitai, leai se auala e sailia ai le mea moni ma le mea e le moni. E faapea sa aveesea le Perisitua mai le Ekalesia, ae le o le sa’o lea, sa alu ese le Ekalesia mai le Perisitua ma faapea ona alualu sese ai, ua o ese mai tulafono a le Alii, ma faia isi sauniga [vaai Kalatia 1:6–8; 2 Timoteo 1:15; 3 Ioane 1:9–10] (DBY, 107).

Aua o le taimi tonu lea na amata ai mai mea itiiti ona latou soli o le tulafono, liliu ese le sauniga, ma solia le feagaiga e faavavau, ma o le talalelei o le malo sa faatuina e Iesu i ona aso ma le Perisitua ua aveesea mai le fogaeleele [vaai Isaia 24:5; 2 Tesalonia 2:1–12; Faaaliga 12:6; MFF 1:15] (DBY, 107).

Ua toefuataiina e le Alii Lana Talalelei ma le pule o le Perisitua i le tisipenisione mulimuli lenei e ala mai i le Perofeta o Iosefa Samita.

E tele augatupulaga ua oo mai ma mou atu e aunoa ma le faamanuiaga e faalogo ai i le leo o le Talalelei, ua oo mai ia outou e ala ia Iosefa Samita— sa faaalia mai ia te ia mai le lagi e agelu ma faaaliga. Ua ia i tatou le Talalelei ma ki o le Perisitua paia [vaai MFF 1:17–23, 30; 27:5–13; 110:11–16; 128:18–21] (DBY, 107–8).

O i tatou o ni tagata, o lo tatou tulai mai ma le alualu i luma mai le amataga, o le galuega a le Atua lo tatou Tama oi le Lagi, i lona poto ua ia silafia ai le alagatatau o le amatalia o le toe faatuina o lona malo i luga o le fogaeleele (DBY, 108).

Ae faapei ona i ai i aso o lo tatou Faaola, e faapena foi i aso o lenei tisipenisione fou. Sa le o gatasi ma lagona, aganuu, ma muai manatu o tagata Amerika. E lei oo mai le avefeau i se faifeau o se tasi o ekalesia ua maea ona faatuina, sa ia le faaaogaina la latou faaliliuga o Tusitusiga Paia. Sa le i afio mai le Alii ma au tau a le lagi i le malosi ma le mamalu sili, pe auina mai foi ana avefeau [ofutau], e leai lava se mea sei vagana ai le upumoni mai le lagi, e fesootai ai ma le ua agamalu, lotomaulalo, o le tupulaga e maualalo lo latou amataga, o le ua sailiili ma le naunautai i le poto o le Atua. Ae sa ia auina mai lana agelu i lenei tagata e le iloa e nisi, o Iosefa Samita le itiiti, o le na mulimuli ane avea ma Perofeta, Tagatavaai, ma Tali faaaliga, ma o le [Alii] ua ia faatonuina o ia ina ia aua nei auai atu o ia i se tasi o lotu o lena vaitaimi, aua ua sese uma i latou; aua ua latou mulimuli i manatu o tagata ae le o le Alii o Iesu; ma o loo i ai sana galuega e ao ona fai, pe afai e tusa ai ma lona faatuatua ia te ia [vaai Joseph Smith—History 1:11–26] (DBY, 108).

Sa filifilia i le aufono o le faavavau, ae le i taitai ona oo i le faavaeina o le fogaeleele, o ia, o Iosefa Samita, o le tagata, i le tisipenisione mulimuli o lenei lalolagi, na te aumaia le upu a le Atua i tagata, ma maua le atoatoaga o ki ma le mana o le Perisitua o le Alo o le Atua. Sa silasila i ai le Alii ia te ia, ma lona tama, ma le tama o lona tama, ma tagata uma o lona aiga seia oo i tua ia Aperaamo, ma mai ia Aperaamo seia oo i le lolo, mai le lolo seia oo ia Enoka, ma mai ia Enoka ia Atamu. Sa ia silasila i lena aiga ma lena toto ao puna mai i lona amataga seia oo mai i le aso na soifua mai ai lena tagata. Sa muai faamanuiaina o ia i le faavavau e pule faamalumalu i lenei tisipenisione mulimuli [vaai 2 Nifae 3:6–15] (DBY, 108).

Sa galue le Alii mai le tele o seneturi e saunia le ala mo le oo mai o mataupu o lena tusi [Tusi a Mamona] mai le manava o le fogaeleele, e faasalalauina i le lalolagi, e faaali atu i e o loo nonofo ai o loo soifua pea o ia, ma o le a ia faapotopoto, i aso e gata ai, ona tagata filifilia mai itu e fa o le fogaeleele… . Sa poloaiina e le Alii ma faatonuina le mea atoa, mo le aumaia , ma le faatuina o le malo i aso e gata ai [vaai 1 Nifae 13; MFF 20:6–16] (DBY, 109).

O le Tusi a Mamona lenei. Tatou te talitonu o loo iai le talafaasolopito o tagata na muai nofoia le konetineta o Amerika, e faapei foi ona i ai i le Feagaiga Tuai le talafaasolopito o tagata Iutaia. I lena Tusi ua tatou aoao ai sa asiasi Iesu i lenei konetineta, tuuina atu lana talalelei ma faauuina Aposetolo e Toasefululua. Tatou te talitonu i nei mea uma, ma e matou te le fai atu ia te outou tou te talitonu i ai. O le mea o loo matou fai atu ai ina ia outou talitonu i mea o loo tusia i le Tusi Paia e uiga i le Atua ma ana faaaliga i le fanau a tagata. Ia faia lenei mea ma le faamaoni atoatoa ma le naunautai, ona e iloa ai lea e moni le Tusi a Mamona. O le a matala o outou mafaufau ma o le a outou iloa ai … i le Agaga o le Atua o loo matou aoaoina le mea moni (DBY, 109).

O le a le tala a Oliva Kaotui (o se tasi o Molimau e toatolu o le Tusi a Mamona), ina ua mavae lona alu ese mai le Ekalesia mo le tele o tausaga? Sa ia vaai ma tautala i agelu, o e sa faaali ia te ia tusi, ma sa ia tausi i ai. Sa ia tuua le Ekalesia ona ua le ia te ia le alofa i le upumoni; ma ina ua mavae le tele o tausaga o ola toatasi o ia, sa alu ane se alii i lona ofisa faaloia ma faapea ane ia te ia, “Alii Kaotui, o le a sou manatu i le Tusi a Mamona i le taimi nei? E te talitonu e moni ea?” Sa ia tali, “Leai alii, ou te le talitonu i ai!” “Ia” sa fai mai ai le tagata, “Sa ou manatu tele; ua ou faapea ua e vaai i le valea o ou ala ma manatu ai e teena mea sa e faaalia muamua e moni.” “Alii, ua e faasese au; ou te le talitonu e moni le Tusi a Mamona; ua tea lou talitonu i lena mea, aua ua ou iloa moni ia mea, e faapena ona ou iloa o loo e nofo mai nei i ou luma,” “E te molimau pea sa e vaai i se agelu?” “Ioe, e pei lava ona ou vaai atu nei ia te oe’ ma ou te iloa o le Tusi a Mamona e moni” (DBY, 110).

Ua faataatia e Iosefa Samita le faavae o le Malo o le Atua i aso e gata ai (DBY, 458).

Sa ou lagona le fia valaau ma le leotele Aleluia, i taimi uma, pe a ou manatu sa ou iloa Iosefa Samita, le Perofeta sa siitia e le Alii ma faauuina, ma o le na tuuina i ai ki ma le mana e atinae ai le Malo o le Atua i le fogaeleele ma tutumau ai. O nei ki ua tuuina atu mo nei tagata, ma o loo ia i tatou le mana e faaauau ai le galuega sa amatalia e Iosefa Samita, seia saunia mea uma mo le afio mai o le Atalii o le Tagata. O le galuega lenei a tagata o le Au Paia o Aso e Gata Ai (DBY, 458).

O le malo lenei e le mafai e i latou [amioleaga] ona faaleagaina, aua o le tisipenisione mulimuli—aua o le atoaga o taimi. O lenei “augatupulaga o augatupulaga uma” o le a tulaga maualuga i le ofoofogia ma le mamalu ua mafai e isi augatupulaga ua ofoina atu i le fanau a tagata i luga o le fogaeleele. O le a toe aumaia e le Alii ia Siona, togiola lona nuu o Isaraelu, faia tulaga manaomia i luga o le fogaeleele, ma faatuina ia tulafono o lona Malo, ma o na tulafono o le a tumau pea (DBY, 442).

Fautuaga mo Suesuega

Sa muai faaali e le Atua le ata o le faaolataga ia Atamu i le tino, ma e mai lena taimi sa Ia toefuataiina Lona malo mai lea taimi i lea taimi e ala i Ana perofeta.

• Sa faapefea ona faamatala e Peresitene Iaga le “ata tele ua taua o le ata o le faaolataga”? (vaai Aperaamo 3:21–28..)

• Ina ua faaalia e le Alii le ata o le faaolataga i tagata ma faatulaga Lona malo i le lalolagi, o le a le mea e manaomia ina ia “atoatoa ai Lona faataunuuina”?

• E tusa ai ma le saunoaga a Peresitene Iaga, o anafea na faaali mai ai e le Atua le ata o le faaolataga ma le perisitua i Ana fanau i le fogaeleele?(Vaai Mose 5:58–59; 6:7.)

• O le a le valaauga faapitoa o perofeta taitasi o e sa taitaiina ia augatupulaga o le talalelei?

O le Perisitua ma le atoatoaga o le talalelei o le malo sa leiloa mai le fogaeleele i le taimi o le Liliuese Tele.

• E tusa ai ma le saunoaga a Peresitene Iaga, aisea na aveesea ai le muai Ekalesia a Keriso mai le fogaeleele?

• O a ni faailoga o le muai Ekalesia a Keriso sa leiloa mai le fogaeleele? (Vaai Iosefa Samita —Talafaasolopito 1:17–20.) O a mea sa fai e tagata o le muai Ekalesia ua o ese “mamao mai ai le ala o le upumoni”? E faapefea ona avea le perisitua “o se auala e maua ai le mea moni ma mea e le moni” i o outou olaga?

Ua toefuataiina e le Alii Lana Talalelei ma le pule o le Perisitua i le tisipenisione mulimuli lenei e ala mai i le Perofeta o Iosefa Samita.

• Sa fesootai atu e le Atua Lana upu moni i le ua agamalu, lotomaualalo, o le tupulaga e maualalo lo latou amataga, “o le ua sailiili ma le naunautai i le poto o le Atua.” O le a le uiga o lenei mea mo oe ma isi uma o loo saili ma le naunautai le upumoni?

• O a uiga sa ia Iosefa Samita na fesoasoani ai te ia e faataunuu ai lona valaauga e avea ma “tagata, i le tisipenisione mulimuli o lenei lalolagi, na te aumaia le upu a le Atua i tagata”?

• O le a le galuega a le Tusi a Mamona e fai i le toefuataiina o le talalelei? (Vaai MFF 20:6–16.) O le a se mea e te aoao mai i le molimau a Oliva Kaotui e uiga i le Tusi a Mamona?

• O le a le molimau a Peresitene Iaga e uiga i le “galuega a tagata o le Au Paia o Aso e Gata Ai”?

O le ata o Peteru, Iakopo, ma Ioane ua toefuataiina ki o tisipenisione ua mavae. O le tisipenisione o le atoatoaga o taimi, ua saunoa mai Peresitene Iaga, “o le a tulaga maualuga i le ofoofogia ma le mamalu nai lo se isi augatupulaga ua ofoina atu i le fanau a tagata i luga o le fogaeleele” (DBY, 442).

O totonu o le faleogalaau ua maea ona toe faaleleia o Peter Whitmer, i Fayette, i Niu Ioka. Sa faatulagaina le Ekalesia i le uluai fale i le aso 6 Aperila 1830.