Iloa ma Faamamalu i le Aigaatua

O le Atua le Tama, o Lona Alo o Iesu Keriso, ma le Agaga Paia o le Aigaatua lea. Sa aoao mai Peresitene Polika Iaga i le Au Paia e tapuai i le Atua le Tama ma faia tatalo ia te Ia i le suafa o Iesu Keriso. Sa ia aoao atili o le Atua le Tama, sa avea o ia ma se tama i se tasi o paneta, o le ua “manumalo mai i le tiga o loo tatou savalia nei; sa ia maua ni lagona, sa ia puapuagatia ma fiafia, ma iloa mea uma ua tatou iloa e uiga i galuega mamafa, puapuaga, ola ma le oti o lona soifua faaletino” (DBY, 22).

Aoaoga a Polika Iaga

Sa faatulagaina e le Atua le Tama ma pulea lalolagi e tele, fausia le tagata, ma o se peresona e mafai ona iloa ma tapuai iai.

Tatou te talitonu i le Atua e tasi, tasi le Puluvaga ma le tasi le Agaga Paia [vaai Mataupu Faavae o le Faatuatua 1:1] E le mafai ona tatou talitonu mo na o sina taimi o le Atua e leai sona tino, vaega, faanaunauga, poo ni uiga. O uiga e na o se peresona faatulagaina lava e mafai ai ona faailoa mai. O uiga uma o loo faaalia mai, o taunuuga ia o le ola faatulagaina (DBY, 23).

O nisi e mananao ina ia tatou talitonu o le Atua o loo i mea uma. E le sao lea. E le o iai i mea uma ma iai i tagata uma e faapei ona i ai o le Tama ma le Alo i se tagata e toatasi (DBY, 23–24).

O le Atua ua faapea ua iai i mea uma i le taimi e tasi; ma ua faapea mai le Salamo, “Ou te sola i fea ai ou luma?” [Salamo 139:7]. O loo iai o Ia i ana foafoaga uma e ala i ona aafiaga, e ala i lona malo, agaga ma le mana, ao ia lava o se peresona o le tino faalelalolagi, ma ua faia i tatou i lona faatusa (DBY, 24).

O nisi ua talitonu po ua manatu o le iloa o le Atua, o le a faaitiitia ai o ia i sa tatou fua faatatau; ae ou te fai atu ina ia ou malamalama i soo se mataupu faavae poo se tagata, i le lalolagi poo i le lagi, e le mafai ona faaitiitia ai lona tauaogaina moni ia te au, ao le isi itu, e faateteleina ai; ma o le tele o lou iloa o le Atua, o le sili atu foi lena ona pele ma taua o ia ia te au, ma o le faateleina foi lena o ou lagona faaeaina ia te ia (DBY, 18).

Ia avea tagata uma ma uo a le Atua [vaai Iakopo 2:23] DBY, 18).

O le tusiata tautaua, pule ma le taitai, ma pule moni o lå na te faatonutonuina lenei galuega, ua le o iloa e o tatou mata faanatura. Ua ia soifua i se isi lalolagi; o loo iai o ia i se isi soifuaga; sa ia manumalo mai i le tiga o loo tatou savalia nei; sa ia maua ni lagona, sa ia puapuagatia ma fiafia, ma iloa mea uma ua tatou iloa e uiga i galuega mamafa, o pupuaga, o le ola ma le oti o lona soifua faaletino, aua ua ia manumalo atoatoa mai ai, ma ua maua lona palealii ma le faaeaga ma o loo iai ki ma le mana o lona Malo; sa ia faia ana tulafono, ma faia lona finagalo i fanau a tagata, i le Au Paia ma e agasala, ma maua ai tulaga e fetaui ma ana fuafuaga i malo ma nuu ma pulega, ina ia aafia ai i latou uma i lona mamalu ma le atoatoa o lana galuega (DBY, 22).

Ua ia pulefaamalumalu i le anoanoai o lalolagi o loo suluia ai lenei paneta laitiiti, ma le miliona ma miliona o lalolagi ua le mafai ona tatou vaai iai; ae peitai ua ia silasila i mea itiiti o ana foafoaga, e leai ma se meaola e sola ese mai ma lana silasila; ma e leai ma se isi o latou e le i faia e lona atamai ma lona mana (DBY, 20).

O lo tatou Tama oi le Lagi sa ia foafoaina agaga uma sa iai muamua, poo le a iai foi, i luga o lenei fogaeleele [vaai Eperu 12:9]; ma o i latou o agaga sa soifua mai i le lalolagi e faavavau. Ae o le Alii i lona mana ma le atamai sa faatulagaina se malumalu faaletino mo le tagata. Sa muai avea i tatou ma agaga, ae mulimuli ane ua faitino (DBY, 24).

Ua tusia ua silafia e le Atua mea uma ma o ia te ia le mana uma [vaai 1 Nifae 9:6] (DBY, 20).

O Ia o le pule i lalolagi. O lana aoaiga e matutu ai le sami, ma o vaitafe ua avea ma nuu naumati. Ua ia fuatia le sami i lona alofilima, ma na fuatia le lagi i le aga, ma na fuatia le eleele o le lalolagi i le fua faaofuofu, ma na fuatia mauga i le fua, ma mauga iti i le fua faatautau; o atunuu ia te ia ua tusa i latou ma si mea sinasina ifo i se pakete, ma ia siitia ia nuu tu tai e peiseai o se mea itiiti lava; o lauulu o o tatou ulu ua faitaulia e ia, ma e leai se manu iti e pau i le eleele e aunoa ma lo tatou Tama; ma ua ia silafia manatu ma mafaufauga uma o le loto o tagata ola uma, aua ua iai o ia i mea uma e ala i le mana o le Agaga – o lona fesoasoani, o le agaga Paia. O ia o le Tama o tagata uma, e pule i mea uma, o le ua iai i mea uma lava, o loo i totonu foi ia te outou uma [Efeso 4:6]; ua ia silafia mea uma e uiga i lenei lalolagi, ma ua silafia mea uma e faatatau i le miliona o lalolagi faapenei (DBY, 19).

Ua ia tuuina mai le tino, gaioiga ma le ola i lenei lalolagi faaletino; ua ia faia ia malamalama iti ma malamalama tetele e sili atu le pupula i lo fetu i le lagi; ua ia tuuina atu ia i latou o latou aso ma o latou tau, ma ua faailogaina o latou puleaga. Ua ia faia le ea ma vai ina ia maua ai le ola, ma ufiufi ai mauga iti ma fanua laugatasi i mea fetolofi, ma faia le tagata e pule i ana foafoaga (DBY, 18).

O le Atua o le tupuga, o le puna o le malamalama; poo ai lava o loo iai, poo le tagata i luga o le fogaeleele, o le agaga i le lalolagi o agaga, o agelu o loo mau i le faavavau o Atua, poo le poto pito i faatauvaa o loo i tiapolo i seoli. Ua oo mai mea uma ona o le, malamalama, mana, ma le ola ua latou maua mai le Atua—mai le puna lava e tasi ua tatou maua mai ai o tatou. O mea lelei uma ua foaifuaina mai e le Atua [vaai Iakopo 1:17]. O mea fou uma e maua mai i suesuega faasaeanisi, e moni ma aoga i tagata ua tuuina sao mai faaaliga mai le Atua, ae peitai e toaitiiti latou te iloa lenei mea. Ua tuuina mai ma le manatu e saunia ai le ala mo le manumalo silisili o le upumoni, ma le togiolaina o le lalolagi mai le mana o le agasala ma Satani (DBY, 18).

E toatele ua taumafai e suesue i le Uluai Tupuaga (Atua) o mea uma; ae faapei o le faigofie i se loi ona faitau o le oneone o le lalolagi. E le tatau i le tagata, ma lona poto faatauvaa, ona malamalama i le faavavau, … E faapei ona faigofie i se lago ona saili le talafaasolopito o le tagata e tau lava i lona amataga e faapei ona malamalama le tagata i le Atua o le Foafoaga o mea uma, faamalamalama le faavavau, ma faailoa mai mea e le faamatalaina ua faatulagaina e tagata popoto mai le amataga.

O le a nei le valaauga ma le tiute o le fanau a tagata? E le tatau ona sailiili i le amataga o Atua – e le tatau ona taumafai ona suesue i le loloto o le faavavau sa iai, o loo iai, ma o le a iai, e le tatau ona taumafai e suesue tuaoi o le avanoa le tuaoia, e tatau ona latou saili le mafuaaga o lo latou iai nei, ma auala e faatinoina ai, i auala e sili ona manuia ai mo lo latou lelei ma le faaolataga, le atamai ua latou maua. E ao ona latou saili ina ia iloa ma malamalama atoatoa i mea e mafai ona latou malamalama ai, ma faamasani i latou i le mafuaaga o lo latou iai iinei, e ala lea i le suesue ma le filifiliga i le mana sili mo se malamalamaaga ma le suesue faaeteete i tusi sili ona lelei (DBY, 25).

O Iesu Keriso, o le Alo e Toatasi o le Tama i le tino, ua togisala mo agasala a i latou uma ua salamo.

E talitonu tagata o le Au Paia o Aso e Gata Ai ia Iesu Keriso, o le Alo e toatasi o le Tama [i le tino], o le na afio mai i le vaeluaga o aso, faataunuu lana galuega, sauaina i le sala ma totogi le aitalafu o le muai agasala a le tagata i le tuuina atu o ia lava, sa toe faatuina mai le tuugamau, ma afio ae i lona Tama; ma e faapei ona afio ifo Iesu i lalo o mea uma, e faapea foi ona afio ae ai o ia i luga ae o mea uma. Matou te talitonu e toe afio mai Iesu Keriso, e pei ona tusia e uiga ia te ia: “Ao latou tulimatai ae i le lagi a o afio ae o ia, faauta foi, o tagata e toalua ua tutu mai ia te i latou ma ofu sisina; ua la fai mai, O outou tagata o Kalilaia e, se a ea le mea tou te tutu ai ma vaavaai ae i le lagi? O Iesu lena ua aveina ae nai ia te outou i le lagi, e faapea ona toe afio mai o ia e pei ona afio atu i le lagi na outou vaavaai i ai. [Galuega 1:10–11]” (DBY, 26).

O lo tatou faatuatua ua faatumauina i le Alo o le Atua, ma e ui atu ia te ia i le Tama (DBY, 26).

O le Au Paia uma ma isi tagata uma lava ua alagatatau i ai le faaolataga, ma i latou uma lava sei vagana i latou ua agasala i le Agaga Paia, ua mafai ona latou iloa nei o Iesu le Keriso i le ala lava e tasi sa iloa ai e Peteru [vaai Mataio 16:13–19]. E le maua e tagata lenei malamalama mai vavega, e ui ina lagolagoina e ni mea patino ina ia faamalosia ai le tagata talitonu. O vavega a Iesu sa iloa e tagata Iutaia, ae sa latou tuuina atu lava o ia ina ia maliu ona o se taufaasese i tagata ma o se ua ulufia o ia e temoni (DBY, 28).

Sa finagalo Iesu e faatuina le Malo o le Atua i luga o le fogaeleele. Sa ia tuuina atu tulafono ma sauniga o le malo (DBY, 29).

E le i fai fua e ia se mea. Sa ia faia vavega ma faataunuuina galuega lelei i le lalolagi; ae sa le i faia e ia lava se mea. Sa ia faapea mai, “Ao ou vaai i lou Tama ao ia faia, ona faia foi lea e au” [vaai Ioane 5:19]. “Ou te le i sau e fai lou lava loto, ao le finagalo o le na auina mai au” [vaai Ioane 5:30]. E ao ona tatou oo mai i se faaiuga e le i tuuina mai e le Alo o le Atua se pulega saua, pe faia se mea e faailoa ai lona mana, lona mamalu, poo lana galuega i le fogaeleele, sei vagana ai ua oo mai le finagalo ma le agaga o lona Tama (DBY, 26).

“O au nei ma le Tama e tasi lava i maua,” [Ioane 10:30] ua fetalai mai ai Iesu; e a, e tasi le tino? Leai… . E le sili ae i le toatasi tagata e pei o au ma se tasi o ou atalii e tasi i maua. Afai e maua e lou atalii au aoaoga, ma savali i le ala ua uma ona ou faailogaina mo ia e savali ai, afai o lona faatuatua e tutusa ma au, o lona faamoemoe e tutusa ma au, ma ia faia galuega a lona tama e pei ona faia e Iesu galuega a lona Tama, o lea o lou atalii ua tasi ma au i le agaga (DBY, 28).

Ua faailoa mai e le Alii ia i tatou se fuafuaga e mafai ai ona faaolaina i tatou nei ma le olaga o loo mulimuli mai. Ua faia e le Atua mea uma lava tatou te mananao ai, ma sili atu i mea tatou te mananao ai. O le galuega a Iesu i le lalolagi o le toe aumaia lea o ona uso ma ona tuafafine i le afioaga o le Tama, ua ia faia lana vaega o le galuega, ma o loo taatia la tatou vaega mo lo tatou faataunuuina. E leai se mea e tasi e mafai e le Alii ona ia fai mo le faaolataga o le aiga o tagata ua ia le faataunuuina; ma o loo faatali mo le fanau a tagata e talia le upumoni poo le le talia foi; o mea uma e mafai ona maua mo lo latou faaolataga, e ese mai ia i latou, ua faataunuuina e le Faaola… . Ua avea nei o ia ma Tupu o tupu ma Alii o alii, ma o le a oo mai le taimi o le a tootuli tulivae uma e tautau atu foi e laulaufaiva uma [vaai Mosaea 27:31], i le mamalu o le Atua le Tama, o Iesu le Keriso [vaai Filipi 2:10–11]. O lena lava agaga sa vaai atu iai, ua le o se Faaola, ae o se tagata ua tulia, o le sa faasatauroina i le va o tagata faomea e toalua ma sa agaleagaina i le faatauemu ma le eleelea, o le a faafetaiai e tagata ua na o Ia lava e maua ai le faaolataga (DBY, 27).

O le Agaga Paia o le peresona o agaga e molimau i le upumoni.

O le Agaga Paia, tatou te talitonu, o se tasi o peresona ua avea ma se tasi o le Aigaatua. E le o le tasi o le tagata i totonu o le tolu, poo le tolu tagata i totonu o le tasi; ae o le Tama, Alo, ma le Agaga Paia e tasi i lona taua, e faapei o le agaga o tagata e tolu e loto gatasi i mea uma. O ia o se tasi o peresona e toatolu ua tatou talitonu iai, o la latou tofiga o le galulue ia i latou o le aiga o tagata o e alolofa i le upumoni. Ua uma ona ou taua ua tasi i latou, e faapei o agaga o tagata e toatolu ua tasi. Ina ia e malamalama ai, ou te faapea atu ou te le manao ina ia e malamalama o le Agaga Paia o se peresona e iai sona tino e faapei o le Tama ma le Alo; ae o ia o le avefeau a le Atua e oo atu lona aafiaga e ala atu i galuega uma a le Silisiliese (DBY, 30).

O le Agaga Paia o le [Tama ma le Alo] fesoasoani na te faamanatu mai ia i tatou le upumoni, ma faailoa mai le upumoni fou ia i tatou, ma aoao, taitai, ma faatonu le ala o manatu uma, seia faaatoatoaina i tatou ma saunia e foi atu, ina ia mafai ai ona tatou vaai ma talanoa ma lo tatou Tama oi le Lagi (DBY, 26).

Ua ou faamaonia ma faamalieina, e ala i le malamalama sili ua ou maua, ma e mafai ona faaseseina i le vaai o mata, e mafai ona faaseseina o ia i le faalogo o le taliga, ma le tago o le lima; e mafai ona faaseseina o ia i mea uma ua taua o faalogona faanatura. Ae tasi le mea e le mafai ona faaseseina ai o ia. O le a lena? O le galuega a le Agaga Paia, o le Agaga ma le mana o le Atua i le tagata. Na te aoao ia te ia mea o le lagi; na te taitai ia te ia i le ala o le ola; na te tuuina atu ia te ia ki e mafai ai ona ia tofotofo i le faatulagaga a tagata, ma fautuaina mea a le Atua. E le gata i le Au Paia o loo auai, ma faapotopoto i Siona, ao i latou o nuu uma, konetineta, poo motu o loo ola i le talitonuga sa aoaoina e lo tatou Faaola ma ana Aposetolo, ma Iosefa Samita; ua latou maua le molimau e tasi, o o latou fofoga ua faapupulaina e le Agaga o le Atua, ma ua tutusa le vaai, ua faapupulaina o latou loto, ma tutusa lagona ma le malamalama, ma ua leai se finauga ia i latou e uiga i aoaoga faavae a le Faaola (DBY, 31).

A aunoa ma le mana o le Agaga Paia o le a mafai e le tagata ona agai i le itu taumatau poo le itu agavale mai le sao o le ala o le galuega; o le a mafai ona latou faia mea o le a latou faanoanoa ai; o le a mafai ona latou faia mea sese; pe a latou taumafai e faia le mea sili, faauta ua latou faia mea ua latou le mananao iai (DBY, 31).

Ou te manao e vaai i alii ma tamaitai ua manavaina le Agaga Paia i manavaga uma o o latou olaga, ma ola ai pea i le malamalama o fofoga o le Atua (DBY, 31).

Fautuaga mo Suesuega

Sa faatulagaina e le Atua le Tama ma pulea lalolagi e tele, fausia le tagata, ma o se peresona e mafai ona iloa ma tapuai iai.

O le a le mea na aoao mai e Peresitene Iaga e uiga i le taua o le iloa o le Atua le Tama? (Vaai Ioane 17:3.) E faapefea ona aafia lo tatou va ma tagata ona ua tatou iloa? O a ni mea ua fesoasoani ia te oe e te iloa ai le Atua le Tama?
E faapefea ona “manatu o le aafiaga o le Atua o loo i mea uma i le taimi e tasi”? O a nisi o faataitaiga o popolega o le Tama oi le Lagi i ni “mea itiiti o ana foafoaga”?
O le aoaoga faavae e faapea o le Atua sa avea ma tagata ma e sa maua e ia le alualu i luma ma avea ai ma Atua, o se mataupu tulaga ese i lenei Ekalesia. O le a sou lagona, i lou iloa ai o le Atua, i Lona soifuaga, ua “silafia mea uma ua tatou iloa e uiga i galuega ma puapuaga” o le olaga faaletino?
Sa aoao mai Peresitene Iaga o suesuega lelei ma le faamaonia i le faasaeanisi ma le poto faaletagata ua “tuuina sao mai e ala i faaaliga mai le Atua.” E faapefea ona aoga nei tulaga maualuluga musuia i nei vaega, e fesoasoani e faaalualu ai i luma le galuega a le Atua?
O le a le saunoaga a Peresitene Iaga o “le valaauga ma le tiute o fanau a le Atua”? E mafai faapefea ona faaleleia atili lo tatou malamalamaaga ua i ai, ma faamasani i lo tatou faamoemoega i le lalolagi? O fea tatou te saili ai i lenei malamalama?

O Iesu Keriso, o le Alo e Toatasi o le Tama i le tino, ua togisala mo agasala a i latou uma ua salamo.

O le a le aoaoga a Peresitene Iaga e uiga ia Iesu Keriso ma Lana misiona i le lalolagi?
O le muai mataupu faavae o le talalelei o le faatuatua i le Alii o Iesu Keriso. O a ni auala e mafai ai e le faatuatua i le Alo o le Atua ona suia o tatou olaga? (Vaai Iakopo 4:10–11 ma le Moronae 7:41–42.)
Sa aoao mai Peresitene Iaga e ao i tagata uma o le Au Paia ona latou iloa o Iesu o le Keriso i le ala e tasi sa iloa ai e le Aposetolo o Peteru (vaai Mataio 16:13–19). E faapefea ona iloa e se tagata o Iesu o le Keriso? Aisea e le lava ai vavega e mafai ai e le tagata ona maua le atoatoa o le malamalama o Iesu o le Keriso? Aisea e taua tele ai lenei malamalama i lo tatou faaolataga?
O le galuega a ai na faia e Iesu ina ua Ia talai atu i tagata o le lalolagi? O a mea tatou te aoao mai faataitaiga a Iesu ma faatino i o tatou olaga? E faapefea ona tatou aoao ma talia o tatou valaauga mai le Alii?
Sa faamanatu mai e Peresitene Iaga ia i tatou e oo mai le aso “o le a tootuli uma tulivae uma ma tautau atu e laulaufaiva uma” o Iesu o le Keriso (Mosaea 27:31; vaai Filipi 2:9–11). I le ola ai o se soo moni o Iesu Keriso, ua sili atu ona faigata nai lo le na o le tau atu o Iesu o le Keriso. O le a e aumaia le malosi e ola ai i le talalelei o se soo faamaoni?

O le Agaga Paia o le peresona o agaga e molimau i le upumoni.

O le a le misiona a le Agaga Paia? E faapefea ona Ia galue i olaga o fanau a le Atua?
E faapefea ona eseese le peresona o le Agaga Paia mai le Atua le Tama ma Lona Alo o Iesu Keriso? (Vaai MFF 130:22.) E faapefea ona “tasi” le Aigaatua?
E faapefea ona avea le Agaga Paia ma fesoasoani mo le Tama ma le Alo?
O a ni aafiaga ua e oo i ai, e molimau ai ia te oe le gafatia e le Agaga Paia, ona aoao ma taitai ia te oe?

First Vision — O le malamalamaaga o se tusiata i le Uluai Faaaliga ia Iosefa Samita. Na saunoa Peresitene Iaga o Iosefa Samita sa ia “aumaia le lagi i lalo i le lalolagi” i le faaalia mai lea o le natura moni o le Aigaatua (DBY, 458).