O Aso Mulimuli

Ina ua faauuina Polika Iaga e avea ma Aposetolo, sa tuuina atu ai ia te ia le lu’i ina ia “alu atu ma faapotopotoina le au filifilia, e sauniuni ai mo le aso tele o le afio mai o le Alii” (HC, 2:188). Na ia auauna atu faamisiona i Egelani, lea na faataatia ai e ia ma ona uso a faifeautalai se polokalama atoatoa o le talaiga, faasalalauga, ma le saunia o tagata liliu mai mo le faimalaga atu i le nofoaga tutotonu o le Ekalesia i Amerika. I se lipoti atu i le Perofeta o Iosefa Samita e otooto atu ai a latou taumafaiga, na faailoa atu e Elder Iaga e faapea: “Ua salalau le Talalelei, ua le fiafia le tiapolo; e tusa ai ma le mea ua ou iloaina, … ua latou fusifusia titania, ua faapotopotoina le saito, ua gatete malo, ma ua le mautonu atunuu: ‘e matata’u foi loto o tagata, ma ua faatalitali i mea e oo mai i le lalolagi’ ” (HC,4:114). I le avea ai ma se taitai o le Ekalesia mo le sili atu ma le 40 tausaga, na aoao atu ai e Peresitene Iaga le Au Paia, ina ia faaauau pea i le galuega togiola a le Alii, ma ia aua nei fefefe i faigata na valoia mo aso e gata ai.

Aoaoga a Polika Iaga

O aso mulimuli o le a avea ma se vaitaimi o faigata uiga ese.

O mea uma o le a tatou faalogo i ai ma mea na tatou oo i ai, ua na o se faatomuaga i le lauga lea o le a laugaina mai. Afai o le a le toe tuuina mai molimau a alii faifeautalai, ma faapea atu le Alii ia i latou, “O mai; o le a ou talaiina atu lava e au ia a’u lauga i malo o le lalolagi,” o mea uma ua outou iloaina nei, ua na o se faatomuaga i le savali o le a talaiina mai ma le afi ma taua, o matagi, mafuie, uato’a, timu, faititili ma uila, ma le faatafunaina. O le a se afaina o le faatafunaina o ni nai auala taavale? O le a outou faalogo i ni aai ofoofogia, lea ua matuai alolofa lava i ai tagata, ua goto ifo i le eleele, ma tanumia ai e o nonofo ai. O le sami o le a siitia ma salalau atu i ona tuaoi, ma siosiomia ai aai tetele. O le a sosolo le oge i atunuu uma, ma o le a sii taua le tasi malo i le isi malo ma le tasi pulega i le isi pulega ma isi setete i isi setete, i totonu o lo tatou lava atunuu ma atunuu ese; ma o le a faatamaia e le tasi le isi, e aunoa ma le popole i le toto ma ola o o latou tuaoi, o o latou aiga, poo o latou lava foi ola (DBY, 111–12).

E le’i i ai lava se aso mo le tele o tausaga, talu mai ona faatafunaina le ekalesia moni ina ua mavae aso o Aposetolo, na manaomia ai le faatuatua ma le malosi o alii ma tamaitai amioatua, ma le tomai, faautauta ma le mana o le Silisiliese ina ia faatasi ma i latou, e pei ona matuai manaomia e nei tagata i le taimi nei. E lei i ai lava lena tulaga manaomia; e lei i ai lava se taimi i lenei lalolagi, talu mai le taimi na faatafunaina ai le ekalesia, ma ua aveesea le Perisitua mai le lalolagi, ma sa matuai ogaoga ai le malosi o le pogisa ma malosiaga o le lalolagi ma seoli, ma inosia ai ma itagia le Atua ma le Amioatua i le lalolagi, e pei ona i ai i le taimi nei (DBY, 112).

Ua matua faatautee lava le Tiapolo ia Iesu i le taimi nei e pei ona ia faatautee i ai i le lagi. Ma ao faateleina e le Tiapolo lana vaega, i le faatosinaina lea o tagata ina ia amioleaga, e faapena foi ona faateleina e Iesu Keriso lana vaega, ma faamalosia e ala lea i le aumaia o tagata ina ia faalotomaualaloina ma amiotonu. O loo filifili pea le fanau a tagata i lea taimi ma lea taimi, ma o loo latou moomoo pea, ina ia latou iloa po o fea le vaega e manumalo (DBY, 112).

O le a manumalo le amiotonu i le iuga o le lalolagi.

O le a oo mai le taimi e tootutuli ai tulivae uma, ma tautau atu e laulaufaiva uma, ma faailoa atu o ia, ma afai o i latou o e na ola ai i le lalolagi ma ua latou teena le manatu o se Agaga o le Atua ma faaaliga e mai ia te ia, o le a pauu ma le matatau i latou ma faamaulalo i latou lava i ona luma, ma alalaga atu, “E i ai se Atua! Le Atua e, na matou teenaina oe ma le talitonu i lau afioga, ma manatu faatauvaa i au fautuaga, ae o lenei ua matou ifo atu ma le matamuli tele, ma matou faailoa atu e i ai se Atua, ma o Iesu o le Keriso.” O le a oo mai lava lenei taimi, e matuai mautinoa lava. O loo ia te i tatou le faatuatua i le Talalelei a le Alii o Iesu (DBY, 112–13).

O le a la latou mea o le a fai? O le a latou faalogo i le faautauta o Siona ma tupu ma pulega o malo o le a o atu i Siona ina ia latou saili i ala o le Alii, ma latou saili i le atamai silisili, faautauta ma le malamalama na faaalia mai i le Au Paia a le Silisiliese (DBY, 113).

O le a tootutuli tulivae ma tautau atu o ia o le Atua, ma o Iesu o le Keriso, o le na puapuagatia mo agasala a le lalolagi, o ia moni lava o le Togiola; ma o le faamaligiina o lona toto ua togiolaina ai alii, tamaitai, fanau, manu o le vao, manufelelei, i’a, o le lalolagi ma mea uma lava o i ai lea na vaaia e Ioane ma faalogoina o viia ai i le lagi [vaai Faaaliga 5:13] (DBY, 113).

A mavae sina taimi, o le a liua le lalolagi e tusa ai ma afioga a perofeta, ma o le a tatou vaaia ai le oo mai o le nofotupu o le amiotonu, ae o le a aveesea le agasala ma le leaga. Ae o mana ma mataupu faavae a le tiapolo, pe afai e mafai ona taua o mataupu faavae, o le a le gauai atu lava i sina vaega o le savaliga agai i luma a le Faaola, sei vagana ua latou faavaivai i lea taimi ma lea taimi, ma o le a tatou tuliese ai loa le tiapolo e ala i le faamalosi. Ioe, e ala i le malosi o le faatuatua, ma galuega lelei, ma o le a faatupulaia ai lava le savaliga agai i luma o le Talalelei, ma faasalalauina, ma tupu ma olaola, seia oo ai ina lagonaina e le lalolagi o loo ia Iesu le aia, e pule ai o se Tupu o malo, e pei ona ia faia o se Tupu o le Au Paia (DBY, 113).

Ua outou iloa o le ituaso e sefulu ma le tasi lenei o le nofoaiga a Satani i le lalolagi? O le a oo mai Iesu e nofotupu, ma o outou uma o e matatau ma gatete ona o o outou fili, ia aua nei toe fefefe ia i latou, ma ia aoao ia iloa ona fefefe e faatiga i le Atua, ia fefefe e soli ana tulafono, ia fefefe i le faia o soo se mea leaga i lou uso, poo soo se tasi o tagata i le lalolagi, ma aua nei fefefe ia Satani ma lona mana, po o i latou foi o loo i ai le mana e fasioti ai na o le tino, aua o le a faasaoina e le Atua ona tagata (DBY, 114).

I le alualu i luma o le augatupulaga o loo tatou ola ai, tatou te iloatino ai le faataunuuina o valoaga, ma le sauniuniga mo le afio faalua mai o lo tatou Alii, ina ia nofo ai i lenei lalolagi. Tatou te faamoemoe o le a soloia ese le faupuega o pepelo, ma o le aai, malo, faigamalo, po o le atunuu e lå auauna i le Atua, ma lå gauai i mataupu faavae o le upu moni ma le talitonuga, o le a matuai tuulafoaiina lava ma faatafunaina (DBY, 114).

O le Meleniuma o le a avea ma se taimi o le tuufaatasia, filemu, ma galuega faalemalumalu.

O le Meleniuma o loo aofia ai i lenei— loto o tagata uma i le Ekalesia ma le Malo o le Atua ua faatasia; o le Malo ua faateleina i le faatoilaloina o mea uma e faatautee atu i le puleaina o le lagi, ma ua fusifusia Satani, ma ua faamaufaailogaina o ia. O isi mea uma o le a i ai e pei ona i ai nei, tatou te aai, feinu, ma fai o tatou lavalava (DBY, 115).

Ia avea tagata o ni tagata paia, ma o le lalolagi oi o latou vae o le a paia. Ia avea tagata o ni tagata paia, ma ia faatumulia i le Agaga o le Atua, ma o meaola uma ma manu fetolofi o le a faatumulia i le filemu; o le eleele o le lalolagi o le a faaalia lona malosi, ma o fua o loo i ai o le a avea ma meaai a le tagata. O le tele lava o le tulaga mama e i ai, o le tau leai foi lea o se feteenaiga; o le tele lava o lo tatou agalelei i a tatou meaola, o le a tele foi le filemu e i ai, ma o le natura feai o manu feai o le a aveesea. Afai o le a le auauna atu tagata i le Tiapolo i sina taimi ao latou ola ai, afai e umiaina e lenei faapotopotoga lena agaga ma lena naunautaiga e le auauna atu i le tiapolo, ua i ai le Meleniuma i totonu o lenei fale. Ia maua e tagata uma o lenei aai lena agaga, ia maua uma e tagata o lenei laueleele lena agaga. Ma o le Meleniuma lena. Ia i ai i tagata uma … lena agaga ma o le Meleniuma lena, ma ia faasalalauina atu ai i le lalolagi atoa (DBY, 115–16).

I le Meleniuma, pe a faavaeina le Malo o le Atua i le lalolagi i le mana, mamalu ma le atoatoa, ma o le a faamutaina le nofo tupu o le amioleaga lea ua leva ona i ai, o le a maua ai e le Au Paia a le Atua le avanoa e fausia ai o latou malumalu, ma o lo latou ulu atu i ai i totonu o le a avea lea e pei o poutu i malumalu o le Atua [tagai i le Faaaliga 3:12], ma o le a latou faia ai tiute faaositaulaga mo o latou aiga ua maliliu. Ona tatou vaaia ai lea o a tatou uo ua latalata mai, ma atonu o nisi sa tatou masani ai iinei… . Ma o le a tatou mauaina faaaliga ina ia tatou iloa ai ma le manino o tatou augatuaa e tau atu lava i le Tama o Atamu ma le Tina o Eva, ma o le a tatou ulu atu i totonu o malumalu e faia galuega mo i latou. Ona faamauina ai lea o [fanau] i [matua] seia oo lava ina fesootai aiga ma ua atoatoa e tau atu lava ia Atamu, ina ia i ai se sootaga atoatoa o le Perisitua mai lava ia Atamu e oo atu i iuga o le lalolagi.

O le galuega lenei a le Au Paia o Aso e Gata Ai o le a fai i le Meleniuma (DBY, 116).

E tatau ona tatou faapaiaina i tatou lava i le sauniuni atu mo le Afio Faalua Mai o Iesu Keriso.

Aua le popole tele mo le Alii ina ia faanatinati lana galuega. Ia faaautu lo tatou popole i le mea e tasi, o le faapaiaina lea o o tatou lava loto, o le faamamaina o o tatou lagona, o le saunia lea o i tatou lava mo le latalata mai o mea e tutupu, ia o loo faanatinati mai ia i tatou. O lo tatou popolega lea e tatau ona i ai, o la tatou suesuega lea e tatau ona i ai, o la tatou tatalo lea e tatau ona i ai i aso taitasi, ae lå o le faavavevave ina ia vaai i le faatoilaloina o e amioleaga (DBY, 117).

Pe susunuina le lalolagi i se tausaga e tasi, po o se afe tausaga, e leai se afaina itiiti o lena mea ia te outou ma au. O loo ia te i tatou upu o le ola e faavavau, o loo ia te i tatou le avanoa o le mauaina o le mamalu, tino ola pea, ma ola e faavavau, pe o le a outou mauaina ea nei faamanuiaga? (DBY, 117).

O loo ia te i tatou le Malo o le Atua ina ia fausiaina, o le togiolaina lea o Siona; tatou te faapaiaina i tatou lava ina ia mafai ai ona tatou saunia ina ia mafai ona tatou siitia faatasi ma le Ekalesia a le Ulumatua, ma afai tatou te alualu i luma i aso taitasi ma taimi uma, ae pe a tatou oti e tatau ona faamaonia lo tatou agavaa. Ae afai o le a faaauau pea ona tatou ola, e tatau ona avea i tatou ma Au Paia i soo se mea, a leai o le a tatou le mauaina le atoatoaga o le mamalu o le Atua lea ua faaalia mai (DBY, 444).

O le taimi o le Alii e le mo au ina ia ou iloaina; ae agalelei o ia, faapalepale, ma onosai, ma o lona toasa e tumau lona filemu, seiloga ua fiu le alofa tunoa, ona pule ai lea o le faamasinoga tonu. Ou te le iloa pe faapefea, ou te le iloa foi i le taimi nei ae ou te moomoo ina ia ou iloa. Ua lava ma totoe mo i tatou lo tatou iloaina pe faapefea ona tatou auauna i le Atua ma ola ai i lo tatou talitonuga, ma o le a tatou faapea ai ona tatou alualu i luma i le fiafia i le Atua (DBY, 117–18).

Fautuaga mo Suesuega

O aso mulimuli o le a avea ma se vaitaimi o faigata uiga ese.

E tusa ai ma le saunoaga a Peresitene Iaga, o a tofotofoga ia o le a oo mai i aso mulimuli? Aisea o le a oo mai ai nei faamasinoga i le lalolagi?
O le a le faamatalaga a Peresitene Iaga e uiga i le mafuaaga e tasi o le a taofia ai sauaga i le Ekalesia?
O faapefea ona tauina pea le taua lea na faia i le lagi i le lalolagi i aso nei? O le a le mea e moomia mai i “alii ma tamaitai amioatua” i aso mulimuli?

O le a manumalo le amiotonu i le iuga o le lalolagi.

O le a faapefea ni uiga o tagata o le lalolagi pe a latou “faalogo i le faautauta o Siona”?
O le a le mea e tatau ona tatou aoao ina ia tatou fefefe i ai i lenei “taimi o le nofoaiga a Satani i le lalolagi”? E mafai faapefea ona tutumau lo tatou lå fefefe i fili o le amiotonu?
Na saunoa mai Peresitene Iaga o e amioleaga o le a “faavaivai” a o le “savaliga i luma o le Talalelei o le a faateleina” e ala lea “i le malosi o le faatuatua ma galuega lelei.” E mafai faapefea ona avea le faatuatua ma se malosiaga faalemafaufau? E faapefea ona faatoilaloina e galuega lelei le amioleaga? E mafai faapefea ona tatou fesoasoani i le savaliga o le talalelei ina ia “faateleina, faasalalauina, faatupuina ma faauluolaina”?

O le Meleniuma o le a avea ma se taimi o le tuufaatasia, filemu, ma galuega faalemalumalu.

E tusa ai ma le faamatalaga a Peresitene Iaga, o le a le Meleniuma? (Vaai foi MFF 43:30–31; 88:110.)
E faapefea ona faafilemuina ma faapaiaina le lalolagi ma e o nonofo ai?
O le a le galuega a le Au Paia o Aso e Gata Ai i le Meleniuma?

E tatau ona tatou faapaiaina i tatou lava i le sauniuni atu mo le Afio Faalua Mai o Iesu Keriso.

Na saunoa mai Peresitene Iaga e faapea e tatau ona tatou faapaiaina i tatou lava i le sauniuni atu mo le Afio Faalua Mai o Iesu Keriso. E faapefea ona tatou faapaiaina? (Vaai Helamana 3:35; MFF 20:31.)
Aisea e le tatau ai ona tatou popole tele i le taimi tonu o le Afio Faalua Mai?

Christ returning to earth — O le a afio mai Iesu Keriso i ao mamalu, e faailoa mai le taimi o le meleniuma.