O le Malo o le Atua ma le Faapotopotoina o Isaraelu.

Ia Iulai 26, 1847, i ni nai aso talu ona ulu atu ia uluai paionia i le Vanu Tele o Sate Leki, sa aeaina ai e Peresitene Polika Iaga ma se vaega toaitiiti o taitai perisitua, se mapuepue i le itu i matu o le nofoaga, lea o le a avea mulimuli ane ma Aai o Sate Leki. Sa latou faaigoaina le mauga o le Tumutumu o le Tagavai, e faamanatu ai le valoaga a le perofeta o Isaia:“E sii i luga foi e ia le tagavai i nuu ese o mamao … ma, faauta foi, latou te faataalise ona vave o mai” (Isaiah 5:26). Na iloa mulimuli ane e Peresitene Iaga lenei mauga, o le nofoaga lenei na ia vaai ai i se faaaliga, o se nofoaga o le a lauolaola ai le Au Paia, lea o le a mafai ai ona fausia le malo o le Atua, ma o le a faapotopotoina i ai Isaraelu o aso e gata ai. I tausaga o le a mulimuli mai ai, na auina atu ai e faifeautalai le savali o le talalelei i le lalolagi atoa, ma e faitauafe le Au Paia fou faatoa liliu mai, na o atu i le Aai o Sate Leki. I aso nei o le fausiaina o le malo ma le faapotopotoina o Isaraelu o loo faaauauina pea i le fia selau o atunuu. Na saunoa mai Peresitene Iaga e faapea, “O le faapotopotoina o Isaraelu, e matuai taua tele lava, o se vaega o le galuega tele lea o loo tatou i ai nei, lea e faatumulia ai o tatou manatu, ma o loo tatou popole ina ia tuuina mai fesoasoaniga uma ma aafiaga” (BYL).

Aoaoga a Polika Iaga

E saili tagata o le Atua ina ia fausia le malo o le Atua.

O tagata sa i luma atu o au, faatasi ai ma le fia afe o loo i ai i le fogaeleele, o tagata o le Atua… . E pei lava le saosaoa o lo tatou mafai ona fuafuaina ia mataupu autu o le malosiaga, o le malamalama, o le atamai, o le poto, o le tamaoaiga, o le lagi, ma le lalolagi, e faapei o le vave ona tuuina mai i luga o nei tagata (DBY, 438).

O le a tupu mai i lenei Ekalesia le Malo, lea na vaaia e Tanielu. O tagata lava nei, ia na vaai i ai Tanielu o le a faaauau pea ona tuputupu ae, ma faasalalauina, ma faauluolaina [vaai Tanielu 2:44]; ma afai tatou te le faatuatua, o le a aveina e isi o tatou tulaga, aua o le Ekalesia lenei ma tagata nei, o le a latou umia le Malo e faavavau, faavavau lava (DBY, 438).

O la tatou galuega o le aumaia lea o Siona, ma atinaeina le Malo o le Atua i lona matagofie ma lona atoatoa i luga o le fogaeleele (DBY, 443).

O le Malo o loo tatou talanoa i ai, ma talai atu ai ma taumafai e fausia o le Malo lea o le Atua i luga o le fogaeleele, ae le o i fetu o le lagi, e le o i le la foi. O loo tatou taumafai e faavaeina le Malo o le Atua i luga o le fogaeleele lea o loo i ai mea uma e faatatau mo tagata—o o latou faalogona, o lo latou faatuatua, o o latou lagona, o o latou faanaunauga, ma soo se gaoioiga o o latou olaga—o loo i ai ina ia mafai ona latou pule i le faaleagaga ma le faaletino (DBY, 339).

Afai o le a faatuina ma faavaeina ma le atoatoa le Malo o le Atua i le fogaeleele, ma lauiloa i isi atunuu ma malo uma, o le a puipuia ai tagata i lo latou olioli ai i a latou aia tatau uma, e tusa lava po o le a le mea latou te talitonu i ai, po o a mea latou te faalauiloa mai, po o le a foi le mea latou te tapuai i ai (DBY, 440).

Na ou aoaoina i tausaga ua mavae e faapea, o le Alii o loo faatautaia mea uma e tutupu i Siona … . Sei vagana ua tatou faia tonu le mea o loo poloai mai ai le Alii, aua a leai, o le a ulagia a tatou galuega. O le mea lenei na ou maitauina talu mai le amataga. I soo se ituaiga auala lava o o tatou olaga, e tatau ona tatou aoao, ina ia tatou matuai gauai atu i le upu moni. E ao ia i tatou ona tatou iloa le mea e tatau ona faia, ona fai lea. E ui lava e le tatau ona i ai se faamoemoega faalelalolagi o lona faataunuuina, ae e mafai lava ona tatou taumafai; ma afai tatou te taumafai ma lo tatou malosi atoa, o lena gaoioiga, o le a faamaonia ai se faamoemoega mautu ma se mafaufau mautinoa, e teuteuina i le onosai ma le tutumau. Ma afai, ua tatou faia taumafaiga uma, ae le mafai lava ona tatou faataunuuina lo tatou faamoemoega, o le a aapa mai lava le aao o le Alii ma tuuina mai le manumalo (DBY, 441).

Afai e usitaia e nei tagata mataupu faavae na latou taliaina, o le a mafai ona agavaa i latou mo le fautuaina o malo; aua ua tatou atinae i luga o se faavae amiotonu, ma o a tatou mataupu faavae e moni, amiotonu, ma paia. Ia tatou tutumau ai la i na mataupu faavae seia oo lava ina latou nutipalaina ia le faatalanoa,… ma avea ai i tatou ma aoao o le faautauta i malo (DBY, 441).

O le a le taunuuga faaiu o le toefuataiina o le Talalelei, ma le iuga o le Au Paia o Aso e Gata Ai? Afai latou te faatuatua i le Perisitua na tuuina atu e le Atua ia i latou, o le a pule le Talalelei i le lalolagi atoa o tagata; o le a faapaiaina le lalolagi, ma o le a faamamaluina e le Atua, ma o le a nonofo ai le Au Paia i le afioaga o le Tama ma le Alo (DBY, 438).

O le galuega o le malo o le Atua, e aofia ai le faapotopotoina mai o le aiga o Isaraelu.

O loo i ai so tatou faamoemoega i o tatou mafaufau, o le faa-aafiaina lea o tagata uma o i le lalolagi, mo le faamoemoega o le faavaeina o le Malo o le Atua i lana amiotonu, mana ma le mamalu, ma ia faaeaina i le suafa o le Atua, ma ia faamamaluina lena igoa i soo se mea lava tatou te ola ai ina ia mafai ona faamamaluina ai o ia, ina ia mafai ona faamamaluina ai ana galuega, ina ia tatou faamamaluina ai foi i tatou lava, ma ia tatou amio a’i ina ia agavaa i tatou i uiga o ana fanau (DBY, 438–39).

Tatou te atinaeina … Siona, faapotopotoina le aiga o Isaraelu, ma togiolaina malo o le lalolagi [vaai MFF 115:4–6]. O nei tagata o loo i ai lenei galuega latou te faia, e tusa lava pe tatou te ola e vaai i ai pe leai. O lo tatou tiutetauave uma lenei (DBY, 437).

E moomia lo tatou vaai atu, ua talaiina atu le Talalelei, i le Aiga o Isaraelu (DBY, 437).

O lenei ua tatou i ai i le [1863] o faapotopotoina le fanau a Aperaamo o e na tupuga mai ia Iosefa ma ona atalii, aemaise ai lava i latou e ui mai ia Efaraima, o ana fanau ia e fefiloi faatasi ma malo o le lalolagi (DBY, 437).

O ai Isaraelu? O i latou na o fanau a Aperaamo, o e na latou mauaina le folafolaga e ala mai i o latou augatama [vaai Kenese 22:17–18]; ma le isi vaega uma o le fanau a tagata, o e na taliaina le upu moni, o Isaraelu foi. E masani pea ona ou popole ma alofa mo i latou, i soo se taimi ou te tatalo ai (DBY, 437).

O Isaraelu ua faatapeapeina i atunuu uma o le lalolagi; o le toto o Efaraima ua feusuai ma isi tagata o le lalolagi. O fanau a Aperaamo ua tuufaatasia ma fanau fouvale a le lalolagi atoa o tagata (DBY, 437).

O tagata o atumotu [o le Pasefika] ma tagatanuu moni o [Amerika], o i latou na, o le Aiga o Isaraelu—o le fanau a Aperaamo, ma o i latou na sa i ai le folafolaga; ma o agaga uma o i latou, o le a faasaoina i se taimi vave pe a mulimuli mai i le Malo o le Atua, pe faatafunaina foi ona augatuaa ma fanau (DBY, 437).

Ina ia maua ma faatumauina le agaga o le Talalelei, faapotopoto Isaraelu, togiola Siona, ma laveai le lalolagi, e ao ona faamuamua, ma avea ma naunautaiga faifaipea i agaga o le Au Peresitene Sili, o toeaiina o Isaraelu, ma tagata mautofi uma i le Ekalesia ma le malo o le Atua (DBY, 137).

E le mafai ona faatamaiaina le malo o le Atua.

Ua amata ona faatuina e le Atua lona Malo i le lalolagi, ma o loo faatautee uma atu i ai seoli ma ana ‘au. Ua tatalaina e seoli ona faitotoa ma auina mai ana ‘au. Mo le a? Ina ia faatamaiaina le Malo o le Atua mai le lalolagi. Ae le mafai ona latou faia (DBY, 442).

Afai o i ai ni loto po o ni agaga o i lenei aai po o se isi mea, o loo fefefe ma manatunatu pe o le a faatamaiaina i tatou pe leai, pe o le a tumau ea lenei Ekalesia ma avea ma malosiaga uiga ese i le lalolagi, e tusa ai ma valoaga a auauna a le Atua, ou te faapea atu i na ituaiga agaga uma, e le manaomia ona ia te outou na ituaiga popolega. E na o le tasi lava le popolega e manaomia ona outou maua, ma e faatatau lea ia te outou lava, ina nei outou tuua le malamalama ua tuuina atu e le Alii ia te outou, ma outou taase ai i le pouliuli, ma toe foi atu i mea faatauvaa o le lalolagi, ma tuinanau atu i mea a le lalolagi, i o latou tulaga agasala (DBY, 442).

Afai e i ai i e amioleaga le mana, e taofia ai le susulu o le la, o le a le toe susulu; afai e ia te i latou le mana, e faamutaina ai le gaoioiga a elemene, ma aveeseina le natura o mea uma, ma avea foafoaga a le Atua e faamalie ai o latou tuinanauga leaga, e mafai ona latou manatu ane faapea, e toe iloilo lelei le “talitonuga faaMamona” i lona tulaga, taofia ai faamoemoega lå ma suia a le lagi [vaai MFF 121:33]. E mafai e tagata ona faasauaina tagata o e talitonu i ana aoaoga, faia lipoti ma lomia ni faamatalaga pepelo, ina ia aumaia ai faigata i o latou luga, e mafai ona tuufaatasia le lalolagi ma seoli i se ‘au tele e tasi ma faasagatau i ai, ma faaaogaina o latou malosiaga inosia i le mea e gata ai, ae o le a tumau pea e le maluelueina i le totonugalemu o mea uma e pei o poutu o le faavavau. E mafai e tagata ona sauaina le Perofeta, ma i latou o e talitonu ia te ia ma taofia o ia, e mafai ona latou tuliesea le Au Paia ma fasiotia i latou, ae o le a le aafia ai lava le moni o le “talitonuga faaMamona” i se iota e tasi, aua o le a latou tutumau pea pe a mavae foi ‘au uma o le lagi, e taataaia le lagi e pei o se tusi ma o le a soloia le lalolagi [vaai Isaia 34:4; MFF 88:95] (DBY, 442–43).

I totonu o lena pepe meamea o loo i le fatafata o lona tina, tatou te vaaia ai se tagata, o se Aposetolo, o se Au Paia—ioe, o augatupulaga o tagata ma malo, o nofoalii, ma pulega. Ona faatumulia ai lea o le olaga o lena tino augavaivai i taunuuga uiga ese ma maoae, ma o lona taua e le mafuatiaina. Afai e moni lenei mea e uiga i pepe, o le a se mea e mafai ona tatou faamoemoeina, ina ia tupu mai le Malo o lenei pepe? E mafai ona tatou tulimatai atu i mea lelei uma ma silisiliese, i le malosi ma le mana, i le pule ma le mamalu. Ae faapefea ona tatou puipuia, ma le manatu faapito, ia aia tatau a lenei pepe? E ao ona tatou tumau ma mauai i le faatumauina o mea e fiafia i ai, ma lagolagoina ona tulafono ma aoaoga paia!.

Ua faamafanafanaina lo’u loto. Ua ou vaaia tagata o le Atua, ua sueina, ua tulia, ua aveesea mai luma o tagata. O mana o le lalolagi ma seoli, ua taumafai malosi, ina ia faatamaiaina le Malo mai le lalolagi. Ua faamanuiaina e amioleaga i le faia o na mea i augatupulaga ua mavae; ae o lenei Malo, e le mafai ona latou faatamaiaina (DBY, 442).

“O le Malo o le Atua po o le leai o se mea.”

O le Malo o le Atua, e na o le pau lena o le mea e moni lona taua [vaai Mataio 6:33]. O isi mea uma o i ai, e leai se aoga e umia ai, e tusa lava po o iinei, po o le isi foi olaga. A aunoa ma lea malo, o isi mea uma, o le a pei o se laau mago ua saunia e susunuina—e mu uma lava ma o ona lefulefu o le a lelea lea i le matagi (DBY, 444).

Ia te au lava ia, o le Malo o le Atua, a aunoa ma lena ua leai se mea i luga o le fogaeleele. Ana leai lena, ou te le tuuina atu se sene mo le tamaoaiga, mamalu, tulaga ma le malosi o le lalolagi uma o loo aofia ai; aua e pei o le sau i le mutia, e mavae atu ma le toe vaaia, ma e pei o le fuga o le mutia e magumagu, ae o le malo lea e leai. O le oti e laugatasia uma ai faigamalo malolosi ma tagata faatauvaa; ma o i latou uma e tutu i luma o le nofoa faamasino o Keriso e tali atu mo a latou galuega sa faia i la le tino nei [vaai Faaaliga 20:12] (DBY, 444–45).

Faatasi ma i tatou, o le Malo o le Atua, po o le leai o se mea; ma o le a tatou faatumauina, po o le oti foi i le taumafai ai—e ui lava e le tatau ona tatou feoti ai i le taumafai i ai. O se matuai faamafanafanaga lava i le toatele ina ia mautinoa e le tatau ona tatou oti i le taumafai i ai; ae tatau ona tatou ola i le taumafai. O le a tatou faatumauina le Malo o le Atua, ia ola pea; ma afai tatou te le faatumauina, o le a tatou iloaina lo tatou feoti e le gata i le tino nei, ae o le oti foi e faavavau. O lea ia galulue ai ina ia ola (DBY, 445).

Afai e te tuuina atu soo se mea mo le atinaeina o le Malo o le Atua, ia tuu atu i ai mea silisili o loo ia te oe. O le a le mea sili o loo ia te oe e te ofoina atu i le Malo o le Atua? O taleni ua tuuina atu e le Atua ia te oe. E fia? O taleni uma lava. O ni taleni matagofie! O se meaalofa matagofie! … O lea, ia tatou ofoina atu ai mea uma ua tatou mafaia ma tatou umiaina, i le fausiaina o le Malo o le Atua, ma o le a outou mauaina ai mea uma e tele (DBY, 445).

Fautuaga mo Suesuega

E saili tagata o le Atua ina ia fausia le malo o le Atua.

O le a sou lagona i lou iloaina lea, o le avea o oe ma se tagata o le Ekalesia, ua avea ai oe ma se vaega o le taumafaiga, ina ia fausia le malo o le Atua i le lalolagi? O a tiutetauave e aofia ai lenei taumafaiga? O a faamanuiaga o le a oo mai, pe a faavaeina ma le atoatoa le malo o le Atua i le lalolagi?
E mafai faapefea ona tatou mautinoa, o a tatou gaoioiga o loo “ogatasi ma le faatulagaga ua faailoa” mai e le Alii? O le a le mea o le a tupu, pe afai tatou te faia le mea lea?
E mafai faapefea ona avea tagata o le Ekalesia, ma “aoao o le faautauta i malo” i le avea ai o ni tagata taitoatasi pe toatele foi?
O le a le “taunuuga o le Au Paia o Aso e Gata Ai” pe afai tatou te faatuatua?

O le galuega o le malo o le Atua e aofia ai le faapotopotoina mai o le aiga o Isaraelu.

E mafai faapefea ona “tatou amio a’i ina ia tatou agavaa’ i o tatou tulaga, i le avea ai ma fanau a le Atua? E mafai faapefea e au gaoioiga, ona aumaia le mamalu ma le faaaloalo, i le Alii ma Ana galuega?
O ai e o latou le aiga o Isaraelu? E mafai faapefea ona e auai i le faapotopotoina o le aiga o Isaraelu?

E le mafai ona faatamaiaina le malo o le Atua.

O a ni faamaoniga ua e vaai i ai, o loo taumafai moni lava Satani ma ana ‘au e faatamaiaina le malo o le Atua i aso nei? E mafai faapefea ona tatou faamalolosia o tatou aiga, ina ia teena a latou taumafaiga? E mafai faapefea e le malamalama faapea e le mafai ona faatamaiaina le malo o le Atua, ona tatou maua ai le malosi, e tetee atu ai i faaosoosoga ma onosaia tofotofoga?
E tusa ai ma le saunoaga a Peresitene Iaga, o le a le popolega e tasi lea e tatau ona tatou manatu i ai i le avea ai ma tagata o le Ekalesia? O le a se mea e mafai ona tatou faia, ina ia mautinoa ai o lenei popolega, o le a le faataunuuina? E mafai faapefea e lou faatuatua i le Atua ma lou suesue i le talalelei, ona fesoasoani ia te oe e aveesea nisi popolega o loo ia te oe?

“O le Malo o le Atua po o le leai o se mea.”

O le a sou manatu, aisea na faapea mai ai Peresitene Iaga o le malo o le Atua e na o le pau lea o le mea e taua ona i ai? O le a se uiga o le “malo o le Atua po o le leai o se mea” ia te oe?
O a ni taleni po o ni meaalofa ua e naunau e ofoina atu i le fausiaina o le malo o le Atua?

Salt Lake Temple in 1892 — Ata pu’e o le Malumalu o Sate Leki i le 1892. O lenei malumalu ua tu e avea ma faamanatu o le faatuatua ma le tautinoga a uluai tagata o le Au Paia.