Ola i le Talalelei

I le avea ai o se faatoa fanua sili, taitai faale malo ma le Ekalesia, ma så e tausia lona aiga, sa faataitai e Peresitene Polika Iaga le ola moni ai i le talalelei. Sa ia faamamafa i ana aoaoga ma lona soifuaga o le talalelei a Iesu Keriso o le ala lea i le faaolataga mo tagata, ma soifua ai i le talitonuga, ma faaaoga i galuega o aso fai soo ma meatonu o loo tutupu i le soifuaga.

Aoaoga a Polika Iaga

O lo tatou tuputupuae faaletagata i le talalelei e oo mai i lea mataupu i lea mataupu, o lea fuaiupu i lea fuaiupu ao tatou ola ai i mataupu faavae ua tatou aoao ai.

Ua tatou … ave ia tulafono uma, sauniga ma tuutuuga o loo iai i Tusitusiga Paia ma faatino i le mea e sili ona mafai, ma faaauau ona aoao ma faalelei seia oo ina ua tatou ola ai i afioga uma e tulei mai i le fofoga o le Atua (DBY, 3).

Ua ia i tatou le Talalelei o le ola ma le faaolataga, e faalelei ai tagata ua leaga ma faaleleia atili ai tagata ua lelei (DBY, 6).

I se talanoaga e le o mamao atu ma se tagata asiasi o le ua toe foi atu i Amerika i Sasae, sa ia faapea mai, “O outou, i le avea ai ma tagata, pe ua outou lagona ea ua atoatoa outou?” “Oi e leai;” sa ou fai atu ai, “e leai i soo se tulaga… . O mataupu faavae ua matou talia e atoatoa; ae ina ua tatou vaai i tagata, e tusa le tele o o tatou faaletonu e pei ona fesiligia ai. E le atoatoa i tatou; ae o le Talalelei o loo tatou talaiina ua fuafuaina e faatoatoaina tagata ina ia latou maua le toetu manumalo ma ulufale atu ai i le afioaga o le Tama ma le Alo” (DBY, 7).

E [le mafai ona maua] e tagata tulafono i lo latou tulaga atoatoa; ae mafai ona latou maua se vaega iinei ma se vaega iina, o se vaega nei o se vaega taeao, o se isi vaega sili i le vaiaso o lumanai, ma se vaega silisili atu mo le tausaga a sau, afai latou te faia se tulaga faaleleia ma le atamai i mea laiti latou te maua; ae afai latou te le mafai, ua tuua i latou i le pogisa, ma o le malamalama ua faaali mai e le Alii o le a faaali mai i le pouliuli ia i latou, ma o le malo o le lagi o le a faaauau pea ae tuua i latou e taase. O lea, afai tatou te mananao e galulue i luga o le tumu o le malamalama ua fuafuaina e le Alii e faaali mai, o lea vaega ma lea vaega, i e o loo aumau i le lalolagi, e tatau ona tatou faaleleia i mea laiti uma e pei ona faaalia mai (DBY, 4).

Ou te … lagona e uunai atu i le Au Paia le taua o le ola faaeteete i mataupu faavae o le Talalelei i o tatou olaga, i le amio ma upu ma mea uma tatou te fai; ma e manaomia le tagata atoa, le ola atoa e tuuina atu i le faaatoatoaina ina ia maua le malamalama o le upumoni e pei ona iai ia Iesu Keriso. O le malamalama i le upumoni, o le atoaga lea o le faaatoatoaina. Sa faamatalaina mai i le soifuaga o lo tatou Faaola; e ui o na o se vaega ae o se molimau i tagata, o se mafuaaga o lo latou le mauaina. O mea uma na latou sauni e maua sa Ia tuuina atu ia i latou. O mea uma ua tatou sauni tatou te maua e foaiina mai e le Alii; o mea uma ua sauni nuu uma o le lalolagi e latou te maua, ua ia tuuina atu ia i latou (DBY, 11–12).

Ua tusia e uiga i le Faaola i le Tusi Paia, ua ia alu ifo i lalo o mea uma ina ia alu ae o ia i luga o mea uma. Pe le faapea ea i tagata uma lava? Ioe e faapena. E fetaui, o lea la, e tatau ona tatou o ifo i lalo o mea uma ma o ae lemu, ma aoao ni mea laiti i le taimi nei ma mulimuli ane, maua le upu i le upu, mataupu i le mataupu, sina mea itiiti iinei ma sina mea itiiti iina” [vaai Isaia 28:9–10; MFF 98:12] (DBY, 60) seia o tatou oo atu i le faavavau ma talia le tumu o le mamalu, matagofie ma le malosi (DBY, 3).

O le tulaga faaleagaga ma le faaletino o le talalelei e tasi.

I le iai o le Atua, ma i latou ua malamalama i mataupu faavae o le ola ma le faaolataga, o le Perisitua, o le puna o le upumoni ma meaalofa ma valaauga a le Atua i fanau a tagata, e leai se eseesega i galuega faaleagaga ma le faaletino— o mea uma lava e tasi ia. Afai e tusa ai ma lou tiute, o loo ou faia le finagalo o le Atua, poo ou talai, tatalo, galue i ou lima mo se lagolago faaaloalo; poo ou i le faatoaga, fale inisinia, poo le mulimuli i le pisinisi, poo fea lava e valaauina i ai, o loo ou auauna i le Atua i se nofoaga e faapei foi o se isi nofoaga; ma e faapena tagata uma, taitasi i o latou valaauga, avanoa ma le taimi (DBY, 8).

I le finagalo o le Atua e leai se mea faapea e vaevae le faaleagaga mai le faaletino, poo le faaletino mai le faaleagaga; aua e tasi i laua i le Alii [vaai MFF 29:34–35] (DBY, 13).

Soo se mea e patino i le atinaeina o le malo o le Alii i le lalolagi, poo le talaiga o le Talalelei poo le fausiaina o malumalu i lona suafa, ua aoaoina i tatou e manatua ia le galuega faaleagaga, e ui ina o loo manaomia le malosi o le tino faanatura e faataunuu lea mea (DBY, 13).

E le mafai ona tatou ulu atu i le malumalu pe a maea ona fausia, ma faia sauniga e oo atu i faamanuiaga faaleagaga, e aunoa ma le faia o galuega faaletino. O galuega faaletino e ao ona faataunuuina ina ia maua ai faamanuiaga faaleagaga o loo saunia e le Atua Silisiliese mo ana fanau faatu- atua. O gaioiga uma e muamua o gaioiga faaletino. Ua saunoa le Aposetolo, e oo mai le faatuatua i le faalogo [vaai Roma 10:17]. O le a le mea e tatau ona faalogoina ina ia maua ai le faatuatua? O le talaiina o le Upu. O lea e ao ai ona iai so tatou failauga; ae e le o ia o se agaga e le vaaia, ae o se tagata faaletino e pei o i tatou, ma mulimuli i tuutuuga uma ma tulafono o le olaga. O le talaiina o le Talalelei o se galuega faaletino, ma o le talitonu i le Alii o Iesu Keriso o le taunuuga o galuega faaletino. O le papatisoga o se galuega faaletino, i le tagata o loo papatisoina ma le o loo faia le papatisoga. O au o se molimau soifua i le moni o lenei faamatalaga, aua sa tiga ou vae i le tele o taimi, ma tigaina i le femalagaaiga ma le talaiga, a o faalogo ai i le talalelei ia maua ai e tagata le faatuatua. O faamanuiaga o loo tatou naunau iai e oo mai ia i tatou i le faia lea o galuega i le tino o loo manaomia, ma saunia ai mea uma e tatau ai e maua ai le faamanuiaga e le vaaia ua saunia e Ieova mo ana fanau (DBY, 13–14).

O le talalelei o se taiala i le olaga i aso uma – o se talitonuga faatino

O le talitonuga o Iesu Keriso o se talitonuga faatino, ma faaaoga i galuega o aso fai soo ma mea tonu o loo tutupu i le soifuaga (DBY, 12).

O mataupu faavae o le faavavau ma le faaeaga e faavavau e le aoga mo i tatou, sei vagana ua tuuina mai i lalo i lo tatou malamalamaaga ina ia mafai ai ona tatou faaaogaina i o tatou olaga (DBY, 14).

Ua ou faaitiitia le Talalelei e oo i le taimi nei, o vaega ma tulaga o tagata (DBY, 8).

O le faatulagaga e aumaia le saogalemu ma le filemu i le taimi nei ua sili ona ola ai, ma oti ai; e sili i le faia o pisinisi; e sili i le galueaina o faatoaga; i le fausiaina o aai ma malumalu, ma o lena faatulagaga o le tulafono a le Atua. Ae manaomia le usitai faamaoni. O le tulafono o le sao, ma aiaiga ua maea ona faia e le Atua mo tagata e savavali ai e mautinoa ai le filemu, mafanafana, ma le fiafia i le taimi nei ma le mamalu e faavavau ma le faaeaga; ae le mafai ona maua lenei mea sei vagana ua usiusitai ma le faamaoni i tulafono a le Atua (DBY, 8).

I nisi o taimi pe a ou mafaufau e talanoa ia outou, e oo mai ia te au se lagona o le lauga sao atu i mataupu e faatatau i le lumanai mamao, poo le toe faamanatu o le talafaasolopito o mea ua tutupu, e le taumate e faafiafiaina ai ma faamananao ai se vaega o i latou o loo faalogologo ia te au; ae o lau faamasinoga ma le agaga o le atamai o loo ia te au ua aoao mai, o le faia o lea tulaga, o le a le aoaoina ai tagata e faatatau i o latou tiute faifaipea. O le mafuaaga lea, ua ou le fiafia ai e aoaoina outou i tiute e faia i le selau tausaga mai le taimi nei, ae aoaoina outou e faatatau i le taimi nei, i lo tatou savavali ma ola, ina ia tatou iloa le ala e faamanuiaina ai i tatou lava mai le taimi ua tuanai, ma le taimi nei, ina ia faataatia ai se faavae mo le fiafia i aso o i luma (DBY, 12).

O lau misiona i tagata o le aoao o i latou e uiga i lo latou ola i aso fai pea. Ou te talitonu e toatele i latou iinei ua latou faalogo ua ou faapea atu, i le tele o tausaga ua mavae, ou te le popole tele i mea o le a tutupu pe a mavae le Meleniuma. O faifeau o le a lauga uumi i mataupu e faatatau i mea na tutupu i aso o Atamu, sa tutupu ao lei iai le foafoaga, ma mea o le a tutupu i le afe o tausaga mai le taimi nei, taua mea ua tutupu poo le a tutupu, ua latou le malamalama iai, fafagaina tagata i le ea; ae le o lau auala lea e aoao ai. Ou te naunau e aoao ia tagata ina ia latou faia nei, ae tuu le Meleniuma ia te ia lava. O le aoaoina o i latou e auauna i le Atua ma faatuina lona malo, o la’u misiona lea. Sa ou aoao i le faatuatua, salamo, papatisoga mo le faamagaloina o agasala, ma le faaeeina o aao mo le talia o le Agaga Paia. E ao ona aoaoina i tatou e faatatau i lo tatou ola i aso uma i le itu faaletino (DBY, 8–9).

Tatou te le tuuina atu i tatou lava e o atu i le faatoaga e sua le eleele e aunoa ma le ola ai i o tatou talitonuga; e le mafai ona tatou o i se ofisa, i tua o se laulau faatau, i se ofisa suetusi, poo soo se mea lava e auai iai pe o le faia o se pisinisi e aunoa ma le aveina o lo tatou talitonuga faatasi ma i tatou. Afai tatou te tietie nofoaafi poo se malaga tafafao, e ao ona iai faatasi lo tatou Atua ma lo tatou talitonuga faatasi ma i tatou (DBY, 8).

Tatou te mananao i le Au Paia e faateleina lo latou lelei, sei vagana o a tatou inisinia, mo se faataitaiga, ua matua faamaoni ma faatuatuaina ua faapea mai ai le Kamupani Ala o Nofoaafi, “Aumai se Faifeau ‘Mamona’ e fai ma a tatou inisinia, ona leai lea o se tasi e fefe e tietie, aua afai na te iloa o loo iai se faafitauli, o le ia faia mea uma lava e tatau ai, e faaolaina ai le ola o i latou ua faatuatuaina lana galuega.” Ou te manao ou te vaai ia tatou Faifeau ua tumu i le faamaoni ina ia manaomia i latou e lenei Kamupani e fausia a latou afi, tagata leoleo, inisinia, failautusi, ma pule o pisinisi. Afai tatou te ola i la tatou talitonuga ma ta’u agavaaina igoa o tagata o le Au Paia, o i tatou lava o tagata ua faatuatuaina e nei pisinisi e maua ai le saogalemu atoa; afai e leai o le a faamaonia ai tatou te le o ola i lo tatou talitonuga (DBY, 232–33).

O lo tatou talitonuga o loo aofia ai gaioiga ma upu uma a le tagata. E leai se tagata e tatau ona alu i se pisinisi e fefaatauai ai oloa sei vagana ua ia galue ona o le Alii; e leai se tagata e tatau ona alu i le faatoaga poo se isi lava pisinisi sei vagana ua ia faia ona o le Alii. E leai se tagata o se pulega e nofo e faamasino i tagata sei vagana ua ia faia ona o le Alii, ina ia faia ai i le amiotonu ma le leai o se faaituau e iloa ai le sao ma le sese, moni ma le le moni, malamalama ma le pogisa, faamasinoga tonu ma le faamasinoga le tonu (DBY, 9).

I le faitau ma le faaeteete i le Feagaiga Tuai ma le Feagaiga Fou tatou te maua ai o le tele o faaaliga ua tuuina mai i tagata anamua ua faatatau lea i o latou tiute i aso uma; ua tatou mulimuli i le auala lea e tasi. O faaaliga o loo i le Tusi Paia ma le Tusi a Mamona o ni faataitaiga ia i tatou, ma o le Mataupu Faavae ma Feagaiga o loo iai faaaliga tuu sao i lenei Ekalesia; o taiala ia i tatou, ma e tatou te le mananao e aveesea ma i tatou; tatou te le mananao ina ia le toe faaaogaina ae ia teu lelei. Tatou te mananao ina ia faaauau i faaaliga a le Alii o Iesu Keriso mai lea aso i lea aso, ma ia iai pea lava pea lona Agaga faatasi ma i tatou. Afai tatou te faia lea mea, o le a tatou le toe savavali i le pogisa ae o le a savavali i le malamalama o le ola (DBY, 12).

Afai tatou te mananao ina ia maua faamanuiaga i le Agaga o Siona, e ao ona tatou ola ai. O lo tatou talitonuga ua le na o ni manatunatuga, o se talitonuga e faatinoina, ina ia aumai ai le fiafia i agaga uma (DBY, 12).

O le galuega o le atinaeina o Siona i ona tulaga uma o le galuega e faatino; ua le na o se manatunatuga. O le talitonuga e faavae i luga o manatu e itiiti se lelei poo se manuia i soo se tagata. Ina ia maua lo latou tofi i Siona poo Ierusalema ua le na o se manatu — e le na o ni mafaufauga – ua tutusa lea ma le leai o se tofi. E ao ona iai le aia tatau e maua ai le tofi e faatinoina, tele ma tauia. O lea e le tatau ona tatou nofoai ma malilie i se talitonuga ua na o ni teori, ae ia iai sona faatinoga, mama ma tutumau, e tumau ai le alofa o le Atua i totonu ia i tatou, ola ai i upu uma, i tulafono uma, ma upu uma lava ua tuuina mai e taitaiina ai i tatou (DBY, 12).

Afai ou te iai i le aso i mea ua tuuina mai ia te au e fai, ona fai lea o mea e oo mai a taeao, ma faapena ai lava, afai e oo mai le faavavau o le a ou saunia e ulufale atu i mea o le faavavau. Ae o le a ou le saunia mo lena vaega o gaioiga, sei vagana ua mafai ona ou faatulaga mea e oo iai lou malosi. E ao ona outou aoao uma e fai lenei mea (DBY, 11).

O le faamoemoega moni o lo tatou soifua ai iinei, o le taulimaina lea o elemene faaletino o lenei lalolagi ma pulea le laueleele, faateleina laau ma manu ua fuafuaina e le Atua e ola ai (DBY, 15).

O le olaga e mo i tatou, ma o la tatou matafaioi e maua i le aso, ae le faatali i le Meleniuma. Tatou malaga atu i se ala e faaolaina ai i le aso, ma, a oo mai le po, iloilo gaioiga o le aso, salamo ia tatou agasala, pe afai e iai ni agasala ina ia salamo ai, ma fai a tatou tatalo; ona tatou taooto lea i lalo ma momoe i le filemu seia aulia le taeao, alafai i le faafetai i le Atua, amatalia galuega o le isi aso, ma taumafai e ola i le aso atoa i le Atua ae le o se isi (DBY, 16).

O le matafaioi o le tausia o i tatou lava ma o tatou aiga, o se faatinoga taua o le talalelei.

Sa ou taumafai pea ina ia mafai e nei tagata ona mulimuli i se faiga e mafai ai ona ola i latou lava, tausia o latou tagata matitiva, o e pipili, o e tauaso, siitia le valea mai lo latou le maua o se avanoa e sailiili ai i ala o le lalolagi, ma le malamalama i le poto masani o loo maua e fanau a tagata, ia aumaia faatasi i latou mai itu e fa o le lalolagi, ma saunia i latou e avea o ni tagata popoto, faaeteete, ma ola lava i latou (DBY, 16).

O la’u taua e pei ona iai i le tele o tausaga, o le aumaia lea o tagata ina ia malamalama afai latou te le tausia i latou lava, o le a le lelei ona tausia i latou; afai tatou te le faatuina se faavae e fafaga ma faalavalava ma fai ni fale o i tatou lava, o le a malaia i tatou i le fiaai ma le maluluina; o le a tatou tigaina foi i le taumafanafana mai ave tuusao o le la i o tatou tino le lavalava (DBY, 16–17).

O ai ua alagatatau iai viiga? O tagata ua tausi ia i latou lava poo i latou ua faalagolago i le alofa tunoa o le Alii e tausia i latou? E faapei foi o lo tatou faamoemoe i le Alii na te auina mai ia i tatou fua o laau, ae tatou te le totoina ni laau; pe faamoemoe foi e faaolaina i tatou mai le fiaai ae tatou te le suo tosina ma toto fatulaau. E ao ona tatou tagi atu i le Alii e laveai i tatou mai le manao, e faapei foi ona tatou faamoemoe i le Atua e laveai i tatou mai taunuuga o lo tatou le usiusitai, valea, ma le ola faamaumau (DBY, 293).

Aua nei o tatou saili atu poo le a le mea e fai e le Alii mo i tatou, ia tatou fesili ifo poo le a le mea tatou te faia mo i tatou lava (DBY, 293).

Ona o le iai o lo tatou lauelele lafulemu i lenei vanu, ma fatulaau e toto, e le tatau ona tatou fesili atu i le Atua e fafaga i tatou, poo le mulimuli mai ia i tatou ma se falaoa ma tauanau mai ina ia tatou aai ai. O le a le faia e ia lea mea, ou te le mafaia foi, pe a faapea o au o le Alii. E mafai ona tatou fafaga i tatou lava iinei; ae afai o le a iai se tulaga o le a le mafai ai, o le a lava le taimi o le Alii e faaali mai ai se vavega e tausia ai i tatou (DBY, 294).

Afai e le mafai ona e tausia lou olaga faalenatura, e faapefea ona e faamoemoe e te maua le atamai e maua ai le ola e faavavau? Ua aumai e le Atua ia te oe le ola– o lou tino ma lou agaga, ma faamanuiaina oe i le tomai, ma o lea ua faatuina ai le faavae o le poto atoa, atamai, ma le malamalama, ma le mamalu atoatoa ma le ola e faavavau. Afai e te le i maua le tomai e tausia ai ou lava manaoga faalenatura, ma se toalua ma ni nai fanau, o le a lau mea o le a fai i mea faalelagi? (DBY, 13).

Vaai ia te outou lava i o outou tulaga o ni Aualofa i lenei aai ma i le atumauga atoa. Vaai i lou tulaga. Iloilo ia te oe lava, ma fai se faaiuga pe fai se galuega ma aoao i le aafiaga o loo ia te oe, ma tuuina atu lena aafiaga mo le faia o mea lelei ma fesoasoani ai i le matitiva o tagata (DNW, 17 Aug.1869, 3).

Fautuaga mo Suesuega

O lo tatou tuputupu ae faaletagata i le talalelei e oo mai i lea mataupu i lea mataupu, o lea fuaiupu i lea fuaiupu ao tatou ola ai i mataupu faavae ua tatou aoao ai.

Aisea e aoao ai e le Alii i tatou i le upumoni o le talalelei “o sina mea itiiti nei ma sina mea itiiti taeao”? (vaai foi Isaia 28:9–10; 2 Nifae 28:30; MFF 98:12.) O le a le mea tatou te fai ina ia maua ai se vaega tele o le upumoni o le talalelei? (Vaai foi Alema 12:9–11.) O le a le mea e ono tupu pe a fai tatou te maua le upumoni sili ae tatou te le i sauni ina ia maua?
Aisea o nisi o taimi e taua ai le ola i se mataupu faavae i le aoaoina o lena mataupu faavae? (Vaai foi Ioane 7:17; MFF 93:28.)
E faapefea ona tatou faatapulaaina mea e mafai e le Atua ona aoao ai i tatou?

O le tulaga faaleagaga ma le faaletino o le talalelei e tasi.

Na saunoa Peresitene Iaga “E leai se mea e ta’ua o se vaevaega o le faaleagaga mai le faaletino.” Aisea e aafia ai lo tatou faataunuuina o o tatou tiute o aso uma i lenei faamatalaga?

O le talalelei o se taiala i le olaga i aso uma – o se talitonuga faatino

Sa aoao atu e Peresitene Iaga le Au Paia e faaaoga mataupu faavae o le talalelei i auala e faatinoina ai i o latou olaga. E tatau faapefea ona faaosofiaina e le talalelei a tatou faaiuga e uiga i o tatou aiga, galuega, ma isi matafaioi?
O le a sou lagona o le a le uiga o le saunoaga a Peresitene Iaga na ia faapea mai ai e le tatau ona tatou o “i soo se mea lava e auai iai pe o le faia o se pisinisi e aunoa ma le aveina o lo tatou talitonuga faatasi ma i tatou”? E faapefea ona tatou ave lo tatou talitonuga ma i tatou i mea uma tatou te o i ai ma faaeteete i talitonuga o isi? E faapefea ona tatou faalagolago i le Agaga e fesoasoani ia i tatou e tauave lo tatou talitonuga ma i tatou i mea uma tatou te iai?
Faatasi ai ma galuega faafaifeautalai ma sauniga o le Ekalesia, o le a la tatou matafaioi i le nuu?

O le matafaioi o le tausia o i tatou lava ma o tatou aiga o se faatinoga taua o le talalelei.

O le a le mea ua aoao mai e Peresitene Iaga e uiga i la tatou matafaioi e tausia ai i tatou lava? E mafai faapefea ona tatou ola faalagolago ia i tatou lava i le faaleagaga, aoaoga, faaletino, lagona ma mea tau tupe? E mafai faapefea ona tatou fesoasoani i isi ina ia latou ola ai?
Aisea e avea ai le ola faalagolago o le tagata ia te ia lava, ma vaega taua o le talalelei?
Na saunoa Peresitene Iaga i le mama ma le taua o le galulue mo tatou lava. O a faamanuiaga e oo mai i o tatou olaga pe a tatou faia lenei mea? O le a le tulaga e pei ona saunoa ai Peresitene Iaga e faapea “o le a faia e le Alii se vavega e tausia ai i tatou”?