Galuega Faafaifeautalai

E toaitiiti lava nisi o loo auai i le galuega faafaifeautalai e pei ona faia e Peresitene Polika Iaga. O le faamatalaga o lona taunuu atu i Katelani, Ohio—ina ua maea lena o sana misiona mo se tausaga e tasi—o se tala faamomoiloto lea i le osigataulaga na ia faia mo lenei galuega: “Ina ua matou taunuu i Katelani [ia Setema 1833], afai e i ai se tagata na faapotopoto faatasi ma le Au Paia e sili atu lona mativa nai lo a’u—na mafua ona e leai ma se mea na ia te ia… . E toalua la’u fanau sa tausi—e na o le pau lava lena. O au o se tasi ua oti le toalua. ‘Le uso e Polika, e i ai ni ou seevae?’ E leai; e aunoa ma se seevae i o’u vae, sei vagana ai se pea seevae na nonoina mai. E leai ni ou lavalava mo le taumalulu, sei vagana ai se ofu mafanafana sa suiina pe tusa ua tolu i le fa tausaga o faaaoga. ‘E i ai ni ou ofuvae?’ E leai. ‘O le a lau mea sa fai? Na e alu lava e leai ma se ofuvae?’ E leai; na ou nonoina mai se ofuvae ma ou ofuina seia oo ina mafai ona ou mauaina mai se isi ofuvae. Sa ou malaga ma talai atu ma tuuina uma atu au tupe mai au meatotino. E laitiiti lava sina aoga o a’u meatotino na i ai ina ua faatoa amata ona ou talai… . Sa ou femalagaai ma talai atu seia oo lava ina ua leai ma se mea ou te alu ma au i le mea o loo faapotopoto ai le Au Paia; ae sa faapea mai Iosefa: ‘Sau i Katelani, Ohio’; ma sa ou alu atu ma le mea sili sa ou mafaia” (DNSW, 9 Mar. 1867, 2).

Aoaoga a Polika Iaga

O le a talaiina atu le talalelei i tagata uma.

Na valaauina au e le Alii i lenei galuega, ma ua ou lagonaina o le a ou faia. O le a tatou auina atu le Talalelei i atunuu; ma afai o le a tulieseina i tatou e le tasi malo o le a tatou o atu i le isi malo ma faapotopoto mai i latou o e faamaoni i le loto, ae o le toatele o le a tatou feutagai seia tatou o atu i Mauga o Siona e avea i tatou ma faaola, ina ia auai i sauniga o le maota o le Atua mo i latou [vaai Opetaia 1:21] (DBY, 319).

E tatau ona talaiina atu le talalelei i le lalolagi, ina ia aunoa e amioleaga ma se alofaga (DBY, 319).

E talafeagai ona mauaina e tagata uma le avanoa e taliaina ai pe teenaina ai foi le upu moni e faavavau, ina ia mafai ai ona latou saunia e faasaoina, po o le saunia foi e faasalaina (DBY, 319).

O lo tatou Tama o i le Lagi, o Iesu lo tatou Uso Matua ma le Faaola o le lalolagi, ma le aiga atua uma, o loo valaau mai i nei tagata ina ia saunia e faasaoina ia malo o le lalolagi, faapea foi le faitau miliona o e ua maliliu e aunoa ma le Talalelei (DBY, 319).

a toefuataiina mai e le Alii le perisitua i o tatou aso mo le faaolataga o Isaraelu. Pe na ia fuafuaina ea ina ia faasaoina ai se isi tagata? Ioe; o le a ia faasaoina le Aiga o Esau, ma ou te faamoemoe ina ia ou ola seia ou vaai i le Mauga o Siona ua faatuina, ma o mai faaola ina ia faasaoina nei tagata leaga ma faasaua o e o loo faaauau pea ona faasaua mai ia i tatou—o i latou uma o e lei agasala i le Agaga Paia. O la tatou galuega o le faasaoina lea o i tatou lava, ia faasaoina le Aiga o Isaraelu, ia faasaoina le Aiga o Esau, ma malo uma o Nuu Ese—o i latou uma lava e mafai ona faasaoina (DBY, 319).

O le a ou matuai fiafia lava pe a mafai ona ou iloaina … o tagata i motu uma ma konitineta, o e maualuluga ma e maualalalo, o e valea ma e popoto, ua latou mauaina upu o le ola e faavavau, ma ua faaeeina i o latou luga le mana o le Perisitua e faavavau a le Alo o le Atua (DBY, 320).

O le a oo mai le aso o le a tuuina atu ai le Talalelei i tupu ma masiofo ma e silisili o le lalolagi; ma o le a tuuina atu i se isi aafiaga e ese mai le tuuina atu i e matitiva, ae o le Talalelei lava e tasi. E le tatau ona tatou tuuina atu lava se isi Talalelei; e tutusa lava mai le vavau e oo i le faavavau (DBY, 320).

Ua talai atu foi Toeaiina i atunuu eseese i Europa i mea na mafai ona faatagaina ai i latou. I nisi o atunuu o le a le faatagaina ai i latou e tusa ai ma le tulafono; ae o le a toe foua e le Alii na malo seia oo lava ina tatalaina faitotoa ma o le a talaiina atu ai le Talalelei i atunuu uma (DBY, 320).

Tatou te faapotopotoina mai tagata e sili ona matitiva, o e le aoaoina, ma nai tagata aoaoina; ae i lona aotelega, tatou te faapotopotoina mai e matitiva, o e mananao ina ia togiolaina; o e ua latou lagonaina le lutiaina ona e malolosi ma maualuluga ma o le lotomimita ua latou tutumau ai; ua latou lagonaina se moomooga ina ia mafai ona laveaiina, ma o le a faapea ona tatalaina o latou taliga ina ia maua ai le upu moni. Afai tou te mafaufau e tuuina atu le talalelei ia i latou o e o loo fiafia i tuinanauga o lenei olaga, o le a tapunia o latou taliga; e le mafai ona latou faalogo (DBY, 321).

Ma afai o le a valaauina oe e te talaiina atu le talalelei i misiona ese, ia fai se galuega, ina ia faasaoina tagata uma. E leai se alii po o se tamaitai ua ia mauaina le alofa tunoa o le Atua e le agavaa o ia mo le faasaoina o agaga. E leai se tagata poto, sei vagana ai i latou ua agasala i le Agaga Paia, e le agavaa, ou te faapea atu ai, i taumafaiga uma [o le olaga] a se faifeautalai ina ia faasaoina ai i le Malo o le Atua (DBY, 321).

E tatau i faifeautalai ona tulimatai atu o latou mafaufau ma loto i a latou misiona ma galulue ma le faamaoni ina ia aumaia agaga ia Keriso.

E leai se alii po o se tamaitai i lenei Ekalesia e le o i ai o ia i se misiona. O lena misiona o le a i ai pea e fua lava i le umi latou te ola ai, ma o le faia lea o le lelei, ina ia siitiaina le amiotonu, ina ia aoao atu mataupu faavae o le upu moni, ma ina ia manumalo ia i latou lava ma tagata uma latou te masani ina ia ola ai i na mataupu faavae ina ia mafai ona latou maua ai le ola e faavavau (DBY, 322).

Ina ua ou auai mai i lenei Ekalesia, sa ou amata tonu lava i le avea ai ma se faifeautalai, ma aveina se savali, ma amata loa ona femalagaai i ni faigamalaga e faia galuega talai. O le upu moni o la’u savali lea, o le Talalelei o le faaolataga o lau mataupu, o le lalolagi atoa o la’u sini lea (DBY, 322).

Matou te le mananao i se alii e ulu atu i se misiona, sei vagana ua i ai lona loto atoa (DBY, 322).

O alii ua valaauina e talai i misiona i fafo atu o o latou atunuu ua matou faamoemoe o le a latou tali atu ma le fiafia i le valaau (DBY, 322).

O atu ia ma talai le talalelei, ia maua mai ni o outou malamalamaaga, ma savavali ma le faamaulalo i luma o le Atua, ina ia mafai ona outou mauaina le Agaga Paia ina ia taitaiina ma faatonutonuina ai outou, ma aoaoina outou i mea uma ua tuanai, ma mea o le taimi nei, ma mea o le a oo mai (DBY, 322).

O atu ia ma le faatuatua i le Atua, ma ia faaauau pea ona faatuatuaina o ia, ma o le a ia saunia le ala mo outou ma o le a ia faateleina foi faamanuiaga i outou luga, ma o le a faamalieina o outou agaga i lona lelei. E le mafai ona ou folafolaina atu nei ia te outou soo se mea lelei pe a outou uia se ala amioletonu; o outou olaga e tatau ona avea ma faataitaiga o galuega lelei (DBY, 322).

Ou te fia faagaeetiaina mafaufau o le au uso, o le na te alu atu i le suafa o le Alii, ma faatuatua ia te ia ma lona loto atoa, o le a lå faaitiitia lava lona faautauta e tali atu ai i soo se fesili e fesiligia ai o ia, po o le tuuina atu o soo se fautuaga atonu e moomia e taitaiina atu ai tagata i le ala o le ola ma le faaolataga, ma o le a le faatoilaloina lava o ia i ni feupuaiga seia oo mai le faavavau. O atu ia i le suafa o le Alii ma faatuatua i le suafa o le Alii, faalagolago i le Alii, ma valaau atu ma le faatauanau i le Alii e aunoa ma le masalosalo, ma aua nei gauai atu i le lalolagi. O le a outou vaai i le tele o le lalolagi—o le a i ai pea i o outou luma i taimi uma—ae afai tou te ola ina ia outou mauaina le Agaga Paia o le a mafai loa ona outou malamalama atili i lona uiga i se aso e tasi nai lo ni aso se tele e te le mauaina ai, ma o le a outou vaaia ai le eseesega i le atamai o tagata ma le atamai o le Atua, ma o le a mafai loa ona outou faamasinoina mea uma ma fuafua faatatau i ai lo latou taua (DBY, 323).

Afai e le mafai e alii faifeautalai ona o atu ma ni lima mama ma ni loto mama, e sili atu ai pe a latou nonofo e aua nei o. Aua tou te o atu ma mafaufau faapea, a e taunuu loa i le Vaitafe o le Misuri, po o le Misisipi, po o le Ohaio, po o le Atalani, ona outou faamama ai lea; ae amata atu iinei i lima mama ma loto mama, ma ia mama mai le tumuai e oo i alofi vae; ma ia ola ai i taimi uma [vaai Salamo 24:4]. Ia outou o atu faapena, ma ia outou auauna atu foi faapena, ma toe foi mai e pei o se fasi pepa paepae le mama. O le ala lenei e o atu ai; ma afai tou te le faia lena mea, o le a outou maua le faanoanoa (DBY, 323).

O femalagaaiga ma auaunaga a alii faifeautalai ua sauni e o atu i misiona o le a tuuina atu ai i latou i ni tulaga o le a latou saili atu ai i le Alii. E manaomia lo latou ola ai e tusa ai ma lo latou talitonuga faalelotu, ina ia latou o atu ma ni loto mama ma ni lima mama, ma ia talai atu le Talalelei e ala lea i le mana o le Atua ua auina ifo mai le lagi. E le tatau ona latou pa’i atu pe tofo foi i le agasala, ma afai o le a latou foi mai e tatau ona latou mama ma manino, ma saunia e fetaiai ma le Au Paia e aunoa ma se tauleagaina (DBY, 325).

Afai e te alu atu i se misiona ina ia talai atu le Talalelei ma le manatu faatauvaa i ai, su’e atu lea mea ma saili atu lea mea, ma aoao ai po o a mea o loo i le lalolagi, e aunoa ma se tulimatai atu o o outou mafaufau—ioe, e mafai ona faapea atu ia tulimatai atu—i le togiola a Keriso, o le a outou o atu ma toe foi mai e aunoa ma se aoga. O atu ia ma le naunautai, ma ia fua mai ni fua lelei, ma ia faatumuina i le mana o le Atua, ma ia tumu i le faatuatua e faamaloloina ai ma’i i le na o le pa’i atu i ai o le lima, tuliese ma aoaiina temoni, ma faafiafiaina e matitiva, ma o le a outou foi mai ma aumai a outou fusi saito ma le fiafia [vaai Salamo 126:5–6]. Ia tulimatai atu o outou mafaufau i a outou misiona ma auauna ma le faamaoni ina ia aumaia agaga ia Keriso (DBY, 325).

Ia ofo atu i latou [o e pele ia te oe] i le Alii le Atua o Isaraelu, ma tuu i latou i le fale; ma afai e te malaga i Egelani, po o isi atunuu, e tusa lava po o fea, pe afai tou te tatalo mo o outou aiga, ia tatalo mo i latou … ma aua ne’i e faalatalataina mai i latou ia te oe, e pei o loo i totonu o lau ato. Tatalo mo i latou i le mea o loo latou i ai. E tatau ona outou lagonaina—afai latou te ola, ua lelei; afai latou te oti, ua lelei; afai ou te oti, ua lelei; afai ou te ola, ua lelei; aua o i tatou o fanau a le Alii ma e le pine ae tatou toe feiloai (DBY, 324).

Afai e fiafia alii i le agaga o a latou misiona ma latou iloaina o latou valaauga ma tutu i luma o le Alii ma tagata, o le a aofia ai lea i le vaega sili ona fiafia o o latou olaga (DBY, 328).

O le Agaga, e le fefinauai pe feupuai, e faaliliuina ai tagata i le talalelei a Iesu Keriso.

Sa na o sina taimi puupuu lava na ou faimalaga atu ai ma molimau atu i tagata, ae ou te le’i aoaoina lenei mea moni, lea atonu e mafai ona outou faamaoniaina mai i aoaoga mai le Tusi Paia seia oo i le aso faamasino, ma e seasea lava ona faatalitonuina ai tagata, ae o le a le faaliliuina mai ai foi i latou. Atonu ua outou faitau mai le Kenese e oo i le Faaaliga, ma faamaonia ai i aoaoga uma o loo i ai, le leai o se aafiaga o le faaliliuina mai ai o tagata. E leai se mea e sili atu nai lo se molimau e ala lea i le mana o le Agaga Paia o le a aumaia ai le malamalama ma le iloa ia te i latou—aumaia i o latou loto le salamo. E leai se isi mea e sili atu nai lo lena ma o le a aoga. Ua outou faalogo soo mai o o’u faapea atu e sili atu ia te au lo’u faalogo atu i se alii faifeautalai, e tusa lava po o iinei po o le lalolagi, o tautala atu i ni upu se lima ae o loo faatasi ai le mana o le Atua, ma o le a latou faia mea e sili atu ona lelei, nai lo le faalogo atu i ni lauga uumi e aunoa ma le Agaga. E moni lava lena mea, ma ua tatou iloaina (DBY, 330).

Ia alu atu le tagata ma le matuai faaeteete tele ina ia faamaonia mea uma na ia tautala ai e ala lea i le tele o upu sii mai faaaliga, ae ia alu atu foi le tasi e malaga ma ia o le na te mafai ona faapea atu, e ala lea i le mana o le Agaga Paia, Ua faapea mai ai le Alii, ma ta’u atu i tagata mea e tatau ona latou talitonu i ai—o mea e tatau ona latou faia—pe faapefea foi ona latou ola, ma aoao atu ia i latou ina ia gauai atu i mataupu faavae o le faaolataga,—e ui lava atonu e le mafai ona ia faatupuina sina fefinauaiga se tasi, e ui lava atonu o le a fefe o ia ona o sona lagona i ona vaivaiga, ae o le faalagolago atu i le Alii, e pei ona masani ai nei alii, o le a mafai ai ona e sailia le tagata o le na te molimau atu i le mana o le Agaga Paia o le a ia faatalitonuina le toatele o e amiotonu ma faamaoni nai lo le na te matuai auiliiliina mea uma e faamaonia ai (DBY, 330).

O faaaliga o manatu ma finauga e leai se aafiaga o le faaolaina nai lo le molimau atu i le upu moni e pei ona faaalia atu e le Alii i alii faifeautalai e ala i le Agaga. Ou te manatu o le a outou malilie uma lava i le mea lenei; o se mea na ou oo lava au i ai. Ou te le manao ina ia ou malamalama e ala lea i lo’u faalavelave lea i alii faifeautalai i le tuuina lea i o latou mafaufau o finauga uma e mafai ona latou aoina maia ina ia uunaiina ai i latou e puipuia lo latou talitonuga, ou te le manao foi e taofia i latou mai aoaoga uma e mafai ona latou maua e faatatau lea i talitonuga ma faigamalo. O le tele lava o le malamalama o alii faifeautalai o le lelei foi lena (DBY, 330).

O le agaga o le upu moni o le a faia mea e sili atu ina ia aumaia ai tagata i le malamalama ma le iloa, nai lo upu faatosina (DBY, 333).

O le na te talai atu na te moomia le mana o le Agaga Paia ina ia tuuina atu ai i loto taitasi se savali e talafeagai mo lena tagata e faalogo i ai, ma e moomia foi e tagata faalogologo le Agaga Paia ina ia faaalia mai ai galuega lelei e talafeagai ma le afioga a le Atua na faalogologo i ai ma ia viia ai o ia [vaai MFF 50:17–22] (DBY, 333).

E leai se tagata ua ia talaiina atu se lauga o le Talalelei, sei vagana ai o le meaalofa ma le mana o le Agaga Paia e auina ifo mai le lagi. A aunoa ma lena mana, o le a leai se musumusuga mai le Atua i le talaiga (DBY, 333).

Afai o se alii faifeautalai i le talaiina atu o le Talalelei, na te le o lagonaina le i ai o le mana ina ia talaiina atu ai le faaolataga i tagata, ma agavaa ina ia tuuina atu ai sauniga, ma o le tuuina atu foi o sauniga, e ala i le mana o le Atua, o le a ia le lagonaina ai le faamamaluina o lana misiona, o le a le maua ai foi e tagata se lelei, ma le faalauteleina ma le mamalu o le Malo o le Atua. Mai mea uma e mafai ona ou faitauina, mai mea uma e mafai ona ou aoina maia, mai faaaliga uma mai le Atua i le tagata, ma mai faaaliga a le Agaga ia te au, e leai se tagata e mafai ona faamanuiaina i le talaiina atu o le Talalelei ma avea ma tagata o le Atua, ma faamanuiaina, ma faailoaina atu i le lagi, seiloga na te talai atu e ala i le mana o le Atua e ala i faaaliga tuusa’o (DBY, 336).

Ia faaauau pea ona galue ma le faamaoni ma tausia pea le agaga o le talaiga ma le talalelei.

Ou te manao e tuuina atu lenei talosaga: o alii faifeautalai uma ua foi mai a latou misiona e tatau ona fuafuaina i latou e pei lava o loo i ai i se misiona iinei e pei foi ona i ai i Egelani po o se isi vaega o le lalolagi (DBY, 328).

Matou te valaau atu pea i alii ina ia o atu i ni misiona ina ia talai atu ai le Talalelei, ma o le a latou o atu ma galulue e pei ona faia ai e ni alii faamaoni, malolosi i le agaga, i le tatalo, i le faaee atu o lima, i le talai atu ma le aoao atu i tagata o le ala e faasaoina ai. I ni nai tausaga o le a latou toe foi mai ai i le fale, ma aveese o latou peleue ma pulou, o le a latou faapea ane, “Ou te le toe popole i le lotu, o le a ou galue nei ina ia maua se mea aoga mo au ma lo’u aiga.” O se matuai manatu sese lava lenei. Afai e foi mai se alii mai se misiona lea sa ia talaiina atu ai le Talalelei, e ao ona ia saunia e sau i lenei pulelaa ma folafola atu ai e pei lava ona ia faia ai i Egelani, Farani, Siamani, po o motu foi o le vasa. Ma afai ua foi atu o ia i le fale pe tusa o se vaiaso, se masina, se tausaga, po o le sefulu foi tausaga, e ao pea ona tumau ia te ia le agaga o le talaiga ma le agaga o le Talalelei e pei lava o se vai o loo tafe atu i tagata e ala i upu lelei, aoaoga, mataupu, ma faataitaiga. Afai e le o le tulaga lea o loo i ai, na te lei faaumaina lana misiona (DBY, 328–29).

Foi mai i le fale ma le faatuatua ma le mautinoa. Ia tausia pea outou ina ia mama, e amata mai le tumua’i e oo i alofivae, ia mama i le loto, —a leai o le a outou foi mai ma le faanoanoa i le agaga ma ni foliga le mautonu, ma o le a e lagonaina se lagona e te le toe foi i se lelei (DBY, 328).

O na alii faifeautalai o e na molimau atu i lenei galuega i le faitauafe o tagata i konitineta ma motu o le vasa o le a vaaia le fua o a latou galuega, e tusa lava pe na latou tauina atu ni upu se lima po o le afe foi. Atonu o le a latou le vaaia nei fua i se taimi vave, ma atonu foi, i le tele o tulaga, o le a faatoa vaai i ai i le Meleniuma; ae o le aafiaga o a latou molimau o le a tuufaasolo mai le tama i le atalii (DBY, 329).

Fautuaga mo Suesuega

O le a talaiina atu le talalelei i tagata uma.

Na saunoa mai Peresitene Iaga e faapea, afai o le a talaiina atu le talalelei i tupu ma masiofo, o le a “tuuina atu i se isi aafiaga e ese mai le tuuina atu i e matitiva.” Aisea e eseese ai tagata e tali atu i auala eseese o aoaoga? E faapefea ona tatou faafetauiina auala tatou te aoao atu ai ina ia aoao ai tagata eseese e aunoa ma le fesuiai ai o upu moni o le talalelei?
Na saunoa mai Peresitene Iaga “o le a toe foua e le Alii na malo” o loo i ai a latou tulafono e le faatagaina ai ona aoao atu le talalelei. O faapefea ona faataunuuina lenei valoaga?
E tusa ai ma le faamatalaga a Peresitene Iaga, o ai “e tatau ona faasaoina”?(Vaai foi MFF 18:10–16.)

E tatau i faifeautalai ona tulimatai atu o latou mafaufau ma loto i a latou misiona ma galulue ma le faamaoni ina ia aumaia agaga ia Keriso.

E tusa ai ma le saunoaga a Peresitene Iaga, o alii uma ma tamaitai o loo i ai i lenei Ekalesia o loo i ai i se misiona. O a o tatou tiutetauave? O a ni uiga patino ua faamanuiaina ai oe po o isi foi i a outou taumafaiga faafaifeautalai? O a ni mea ua outou aoaoina mai i a outou taumafaiga faafaifeautalai o le a fesoasoani ai ia te oe ina ia faaleleia atili le valaau atu i tagata ina ia o mai ia Keriso? (Vaai foi Moronae 10:32.)
Na aoao mai e Peresitene Iaga faapea e tatau i faifeautalai ona i ai o latou agaga i le galuega. O le a le uiga o lea faaupuga, e fuafua i mea na e faitauina i lenei mataupu.
O le a le mea na folafolaina atu e Peresitene Iaga ia i latou o e talaiina atu le talalelei ma faatuatua i le Atua? Aisea e tatau ai ona tatou saili atu i le faaaumeaina e le Agaga Paia ao tatou fetufaai atu le talalelei?
Aisea e taua ai i faifeautalai le mama ao lei amataina la latou auaunaga? O le a le fautuaga a Peresitene Iaga e uiga i faifeautalai e agavaa i le taimi a o latou talai e faapea foi i le toe foi mai?
Aisea e tatau ai i faifeautalai ona “tulimatai” atu o latou mafaufau i lo tatou Faaola, o Iesu Keriso? O le a le fautuaga a Peresitene Iaga i faifeautalai faamisiona o e o loo feagai ma le manatu i aiga?

O le Agaga, e le fefinauai pe feupuai, e faaliliuina ai tagata i le talalelei a Iesu Keriso.

Aisea e lelei ai le taunuuga o faifeautalai o e latou te molimau atu i le talalelei e ala lea i le mana o le Agaga Paia nai lo i latou e aoao atu ona o ni mafuaaga po o ni finauga? Aisea e le aoga ai le fefinauai e avea o se auala lelei e fetufaai ai le talalelei?
Aisea e leai ai se malamalama faaleagaga i le talaiga a i latou e le o i ai le Agaga Paia ma i latou?
O le a le mea na folafolaina atu e Peresitene Iaga ia i latou o e talai atu “e ala i le mana o le Atua e ui mai i faaaliga tuusa’o” ma faatuatua ia te Ia?

Ia faaauau pea ona galue ma le faamaoni ma tausia pea le agaga o le talaiga ma le talalelei.

Aisea e “matuai sese” ai lava i faifeautalai le tuuese o lo latou talitonuga pe a latou foi atu i le fale?
A faamaloloina i tatou mai se valaauga, e mafai faapefea ona tatou tausia “le agaga o le talaiga ma le agaga o le Talalelei … ia pei o se vai e tafe atu i tagata e ala i galuega lelei, aoaoga, mataupu, ma faataitaiga”?
O le a le mea na folafolaina atu e Peresitene Iaga i faifeautalai faamaoni o e molimau atu i le galuega a le Alii?

O le ata o Elder Thomas C. Griggs, o se faifeautalai i Atumotu o Peretania, i le 1880.

church missionaries — O faifeautalai o le Ekalesia i Echo Canyon, i Utah, i le 1867. O uluai faifeautalai o le Ekalesia sa aoaoina atu le talalelei i Egelani, Europa, ma motu o le Vasa Pasefika.