O le Fesootaiga i le va o le Atua ma Tagata

Sa aoao mai Peresitene Iaga o lo tatou “uluai tiute sili o le sailia lea o le Alii seia oo ina tatou tatala auala o fesootaiga mai le Atua i o tatou loto.” E lei umi ona mavae le maliu o le Perofeta o Iosefa Samita, ae sa faamatalaina e Polika Iaga se miti sa asiasi mai ai Iosefa Samita ma faatonuina o ia: “Sa savali mai ia i maua Iosefa, ma silasila mai ma le faanaunau, ae fiafia, ma faapea mai: ‘Tau atu i tagata ina ia lotomaulalo ma faatuatua, ma ia mautinoa o loo tausisia le agaga o le Alii ona taitaiina ai lea o i latou i le sao. Faaeteete ma aua nei fulitua ese mai le leo itiiti ma le filemu; na te aoao mai i latou i mea e fai ma mea e o i ai; o le a aumaia fua o le malo… . Tau atu i uso uma pe afai latou te mulimuli i le Agaga o le Alii, o le a sao mea latou te fai’” (JH). O fanau uma a le Atua ua maua le avanoa e faamalamalama ai e le Agaga o Keriso, ma maua faaaliga a le tagata lava ia e ala i le Agaga Paia a o latou saili ma le faatauanau i le Alii.

Aoaoga a Polika Iaga

O le Agaga o Keriso ua tuuina atu i fanau uma a le Atua e faamalamalama ia i latou ma fesoasoani ia i latou ia iloa le lelei mai le leaga.

Ole Agaga o le Alii na te faamalamalamaina tagata uma lava e oo mai i le lalolagi. E leai se tasi e ola i luga o le fogaeleele ua le faamalamalamaina e le Agaga o le Alii o Iesu, pe tele pe itiiti. Ua faapea mai e uiga ia te ia, o ia o le malamalama o le lalolagi. Ua ia faamalamalama i tagata uma e oo mai i le lalolagi ma i latou uma, i nisi o taimi, ua iai le malamalama o le agaga o le upumoni i luga ia te ia [vaai Ioane 1:9; 8:12; Moronae 7:16; MFF 84:46](DBY, 32).

Ou te le talitonu i se taimi e tasi sa iai se alii poo se tamaitai i luga o le fogaeleele, mai aso o Atamu seia oo mai i le aso, sa le faamalamalamaina, poloaiina, ma aoaoina i faaaliga a Iesu Keriso. “E a! o tagata faapaupau valea?” Ioe, tagata ola uma ua maua le mafaufau lelei. Ou te le talitonu faapea o fanau a tagata ua latou le maua le avanoa e maua ai le Agaga o le Alii e aoao ai i latou i mea sao mai le sese (DBY, 32).

Ou te talitonu ma le fiafia e leai se mea e iloa sei vagana o le faaaliga a le Alii o Iesu Keriso, poo mea faalelotu, saeanisi, poo le poto salalau (DBY,38).

E iai tagata talenia, popoto, tamaoaiga i mafaufauga, ma le atamamai i faiga taufaasese uma; ua popoto i latou i na mea, e ui lava ina latou le iloa le mea ua latou maua mai ai lea poto. E le i maea ona finau o le Agaga o le Alii ma i latou, e tuuina atu iai le poto ma le atamai; ma o le a le pine, ona faaali ia te i latou, faatonu i latou, aoao ia i latou, ma taitai ia i latou (DBY, 33).

O loo iinei le Atua: o lona aafiaga ua faatumulia ai le vasaloloa. E iai ana avefeau i galuega uma a ona aao. Na te silasila i meaola uma; o a latou amioga ma lagona, o mafaufau ua ia silafia uma; aua o lona poto ma lona mana ua faatumulia ai le vasaloloa [MFF 88:6–13]. E le o lona tagata ua faia, ae o lona Agaga; ma o loo iinei o ia o loo aoao, faatonu, ma taitai nuu o le lalolagi (DBY, 32).

Ua fetalai mai le Atua i Ana Fanau e ala i faaaliga.

O tagata nei e talitonu i faaaliga. O tagata nei sa talitonu ma o loo talitonu ua fetalai mai le Alii mai le lagi. Sa latou talitonu ma o loo latou talitonu ua auina mai e le Atua agelu e talai le Talalelei e faavavau, e tusa ai ma le molimau a Ioane [vaai Faaaliga 14:6–7] (DBY, 38).

E masani ona tatou faalogo o faapea mai, o faaaliga e tatau ona maua i le Ekalesia, ina ia mafai ai ona faatuina le malo o le Atua ma faateleina i luga o le fogaeleele. O le a ou tauina atu le tasi uiga o lenei lagona. Ou te faapea atu o le molimau ola o le Atua, poo le Agaga o faaaliga, e tatau ona i ai i tagata taitoatasi uma, ina ia latou iloa le ata o le faaolataga ma tutumau ai i le ala e tau atu i le afioaga o le Atua (DBY, 38).

E lå i ai i mea uma le Alii i le tino; ae o loo i ai ana auauna o loo tautala ma galulue mo ia. O ana agelu, o ana avefeau, o ana aposetolo ma auauna ua tofia ma tuuina i ai le pule e galulue ai i lona suafa. O ana auauna ua tuuina i ai le pule e aoao ma faatonu i mea sili ona taua, e aoao, faatonu ma taitai ai lana Au Paia (DBY, 41).

E leai se tagata na te maua se aafiaga i lenei malo, ma taofi ia te ia lava, faalauteleina lona valaauga e aunoa ma le mana o le Atua ia te ia. E ao i tagata ona ola ina ia latou maua le malamalama o le Agaga Paia, po ua leai so latou faatuatuaga ia i latou lava, i lo latou talitonuga, poo lo latou Atua, ma o le a le pine ona liliu ese mai le faatuatua (DBY, 33).

Sa fesili mai ia te au se tasi o alii pe faapefea ona ou taitai tagata e ala i faaaliga. Ou te aoao ia i latou e ola ina ia mafai ona faaali atu e le Agaga o faaaliga ia i latou o latou tiute i lea aso ma lea aso ina ia mafai ai ona latou taitai ia i latou lava. Ina ia mafai ona maua lea faaaliga, e ao i tagata ona ola ina ia mafai e o latou agaga ona mama atoatoa e faapei o se pepa e le i faaaogaina o loo i luga o se laulau ao le i tusia ai e le tagata tusitala se maka (DBY, 41).

E leai se finauga faalelalolagi, leai se mafuaaga faalelalolagi e tatalaina mafaufau o tagata popoto ma faaali atu iai mea faalelagi; ua na o le Agaga o faaaliga e mafai ona faia lea mea [vaai 1 Korinito 2:9–14] (DBY, 37).

O faaaliga a le Alii o Iesu Keriso, o le agaga o le upumoni o le a faaalia mea uma, ma maua ai e i latou uma ua maua ia mea le malamalama i le sao mai le sese, malamalama mai le pogisa, o mea a le Atua mai mea e lå a le Atua ia. Ua na o le pau lea o le mea e mafai ai ona tatou malamalama i le Talalelei o le Alo o le Atua, le finagalo o le Atua, ma le ala e faasaoina ai i tatou. Mulimuli i ai, ma o le a tau atu i le Atua. O le puna o le malamalama, o le a tatala ai le faitotoa, ma o le a faamalamalamaina ai le mafaufau ina ia mafai ai ona tatou vaai, iloa ma malamalama i mea e pei ona iai (DBY, 34).

E leai se tagata na te iloa Iesu le Keriso sei vagana ua faaalia mai le lagi ia te ia [vaai 1 Korinito 12:3] (DBY, 37).

A aunoa ma faaaliga tuusao mai le lagi, e le mafai e se tasi ona malamalama atoatoa i le ata o le faaolataga (DBY, 38).

A aunoa ma faaaliga a le Atua tatou te le iloa i tatou, le mea na tatou o mai ai, poo ai foi na fausia le lalolagi o loo tatou ola, gaioi, ma maua ai i tatou (DBY, 37).

A musuia se tasi e le Agaga o faaaliga mai le Atua, o le a mataala lona mafaufau ina ia tumau ai le matagofie, faatulagaga, ma le mamalu o le foafoaga o lenei lalolagi ma ona tagata, o le mafuaaga o le foafoaga, ma le faamoemoe o le na foafoaina i le faaainaina i ana fanau. O le a ia malamalama manino ai o lo tatou ola ai iinei, e mo le faamoemoe tutasi o le faaolataga ma le toe faatulaiina i le afioaga o lo tatou Tama ma le Atua (DBY, 37).

I vaega ma tulaga taitasi o faaaliga a le Atua e pei ona tuuina mai i fanau a tagata, poo se tasi lava i le lagi poo le lalolagi, ina ia malamalama lelei iai, e manaomia e le tagata le Agaga o loo tuuina mai ai—o le Agaga ua faaalia ai nei mea ina ia malamalama, ma faafaigofie i le mafaufau (DBY, 39).

Ae ao ina tatou ola uma ina ia mafai e le Agaga o faaaliga ona tautino ma faamauina i le loto ma tau mai ia i tatou le mea e ao ona fai, ae le o aga a o tatou matua ma faiaoga. Ae ina ia mafai ona fai lenei mea, e tatau ona avea i tatou e faapei o tamaiti; ma ua fetalai Iesu, afai e leai, e le mafai ona tatou ulu atu i le malo o le lagi. E ese le faigofie! Ola saoloto mai le mataua, faauigaese, ita, lagona leaga, ma le tautala leaga i o tatou aiga ma o tatou tuaoi ma uo ma tagata uma o le lalolagi, poo fea lava tatou te feiloai iai. Ola ina ia saoloto o tatou mafaufau, mama ma manino (DBY, 36).

Afai e te maua se vaaiga poo se faaaliga mai le Silisiliese, ua tuuina atu e le Alii ia te oe e faatatau ia te oe lava, poo nei tagata, ae le tatau ona e faaalia ona o mafuaaga ona e le tatau ai ia te oe, pe e le tatau ona iloa e tagata o loo auai, e ao ona e tapunia ma faamauina e faapei ona faamauina le lagi ia te oe, ma faalilolilo e pei o le tuugamau. E leai se faatuatuaga o le Alii ia i latou e faaalia mea faalilolilo, aua e le mafai ona ia faaali o ia lava i nei tagata (DBY, 40–41).

E faapefea ona tatou iloa sa tusia e perofeta afioga a le Alii? O faaaliga. E faapefea ona tatou iloa sa valaauina Iosefa Samita e le Atua e faatuina lona malo i luga o le fogaeleele? O faaaliga. E faapefea ona tatou iloa o taitai o nei tagata ua aoaoina le upumoni? O faaaliga (DBY, 38).

E faapefea ona e iloa o le galuega i aso e gata ai e moni? E te iloa i le agaga o faaaliga tuusao mai i le lagi. E faapefea ona faamaonia lenei galuega e moni ia te oe … ? E le o le agaga ea o le faaaliga na oo atu i ou luga? … E ao ona e faaopoopo iai i lea aso ma lea aso; e ao ona e faatele e faapei ona foai mai le Alii— o si mea itiiti iinei ma si mea itiiti iina, ma faaputuina le upumoni i lo outou faatuatua ma le malamalama, seia atoatoa outou i luma o le Alii ma saunia e taliaina nisi mea o le malo o le Atua (DBY, 36).

Afai e te galue ma le faamaoni mo tausaga, o le a e aoaoina lenei mea faigofie—afai e sao lou loto, ma tumau i lou usiusitai, faaauau le auauna atu i le Atua, tumau i le tatalo, o le a oo mai ia te oe le agaga o faaaliga e faapei o se punavai ola e puna ae i le olaga e faavavau [vaai MFF 19:38; 63:23]. Ia aua nei i ai se tasi e taofia le tatalo ona ua le maua e ia le agaga o le tatalo, pe iai foi se mea o lenei lalolagi e faalavelave ia te oe ao faia lenei tiute taua. A o punou ifo i luma o le Alii ma valaau atu ia te ia e faamanuia ia te oe, o le a e maua le tali— o le a faateleina e le Atua faamanuiaga ia te oe faaletino ma le faaleagaga (DBY, 46).

O se tasi o o tatou tiute sili ona taua, o le sailia lea o le finagalo o le Atua i le tatalo i aso uma.

Afai ou te faia se faatusatusaga o tiute uma e manaomia ai le fanau a tagata, mai le muamua seia oo i le mulimuli, o le a ou tuuina e faamuamua le tiute o le saili atu i le Alii lo tatou Atua seia tatala mai ala o fesootaiga mai le lagi i le lalolagi–mai le Atua i o tatou lava loto. Ia faatumauina vaega uma o o outou loto i le mama ma le le pona i ona luma (DBY, 41).

Afai tatou te faalatalata atu ia te ia, o le a ia faalatalata mai foi ia i tatou; afai tatou te vave saili ia te ia, o le a tatou maua o ia; afai tatou te faaaoga o tatou mafaufau i le faatuatua ma le poto i lea aso ma lea aso, ina ia iloa ma malamalama i le mafaufau ma le finagalo o le Atua, e faigofie e faapei lava o le ioe, ou te faapea atu e sili atu ona faigofie nai lo le iloa o mafaufau o tagata taitasi (DBY, 42).

Ia tatou lotomaulalo, faatauanau, gauai, tuuina atu i tatou lava i le finagalo o le Alii, e leai se faafitauli ae ao ona i ai lona Agaga e taitaiina i tatou. Afai e tatala o tatou laugutu ma valaau atu i lo tatou Tama oi le lagi, i le suafa o Iesu, o le a tatou maua le agaga o le tatalo (DBY, 44).

Ua fetalai mai le Alii, o le a saili mai ou tagata ia te au mo faamanuiaga latou te manaomia. Nai lo le faapea o le faia o tatalo o se tasi o tiute e manaomia mo i tatou o tagata o le Au Paia, e ao ona tatou ola ma faia, o se tasi o tofi sili ua tuuina mai ia i tatou; aua a na leai le taua o le tatalo, o le a le mea e oo ia i tatou i le avea ai o se nuu ma ni tagata taitoatasi? (DBY, 43).

O le tiute o tagata o le Au Paia o le tatalo e le aunoa, ma avae le faafetai i mea uma lava, ia faafetaia le aao o le Alii i mea uma, ma usitaia ana poloaiga (DBY, 42).

E tatau i alii ma tamaitai uma ona valaau atu i le suafa o le Alii, ma o lena foi, ia mai le loto mama, ao galulue i latou faapea foi i o latou afeafe; a o iai i nofoaga faitele faapea foi i nofoaga paganoa, ma valaau atu i le Tama i le suafa o Iesu, e faamanuia i latou, ia faasaoina ma taitaiina, ma aoao i latou, i le ala o le ola ma le faaolataga ma ia mafai ai e i latou ona ola ina ia latou maua le faaolataga e faavavau o loo latou manaomia (DBY, 43).

E le afaina pe o oe po o au tatalo e maua le lagona ina ia tatalo, afai e oo mai le taimi e tatalo ai, tatalo. Afai e le o maua se lagona e tatalo, e ao ona tatou tatalo seia oo mai lena lagona (DBY, 44).

Ua oo mai ia te au nisi tagata o le Ekalesia ma faapea mai, Le uso e Polika, o sou tiute ea le tatalo pe a le o ia te au sina vaega itiiti o le agaga o le tatalo?” Ioe, i nisi o taimi, ua le manino ai tagata ma ua tumu i le faaeteete ma le faafitauli, ua le ola a latou suotosina ma isi masini, ua sosola ese a latou manu ma o le tele o mea ua latou le mautonu ai; ae peitai o la tatou faamasinoga ua aoao mai ia te i tatou o lo tatou tiute le tatalo, tusa pe o iai le agaga o le tatalo pe leai. O lau mataupu faavae e faapea, o lo outou tiute le tatalo; afai e oo mai le taimi e tatalo ai, e ao ona faapea mai Ioane po o soo se isi lava, “O le nofoaga lenei ma o le taimi lenei e tatalo ai; ia tootuli tulivae i le fola, ma ia faia loa i le taimi nei.” Ae ua faapea mai Ioane, “Ou te le manao e tatalo; ou te le o mauaina se lagona.” Tootuli i lalo, na ou faapea atu ai; ma ua o ifo i lalo tulivae, ma ua amata ona ia mafaufau ma mafaufau loloto. E mafai ona e faia se upu? E le mafai ea ona e tautala atu, Le Atua e, alofa mai ia te au le tagata agasala? Ioe, e mafai ona fai e ia, pe afai foi e mafai ona ia tu i luga ma fetuu lona tuaoi ona o ni mea sese. O lenei, Ioane, tatala lou gutu ma fai atu, Le Alii, ia e alofa mai ia te au. “Ae ou te le o lagona le agaga o le tatalo.” E le avea lena ma ou ‘alofaga, aua ua e iloa lou tiute (DBY, 45).

Afai e faapea mai le Tiapolo e le tatau ona e tatalo ona o loo e ita, tau atu ia te ia e leai sana pisinisi, ma ia tatalo seia oo ina alu ese lena mea ma ua toe oo mai le filemu i le mafaufau (DBY, 45).

Afai e te ala i le taeao, ao le i e saunia e ai se meaai, valaau atu i lou toalua faatasi ma lau fanau, punonou i luma o le Alii, fai atu ia te ia ina ia faamagalo au agasala, ma ia puipuia mai outou i le aso atoa, ia faasaoina mai outou i faaosoosoga ma le tiapolo, ina ia taitai a outou galuega i le sao ina ia e faia se mea i lena aso e aoga mo le malo o le Atua i le lalolagi. Pe iai ea so outou taimi e faia ai lenei mea? Uso e, tuafafine, o iai sou taimi e te tatalo ai? (DBY, 44).

Ia outou tatalo e le aunoa ao le i malaga atu i le galuega. Aua nei galo lena mea. O le tama—o le ulu o le aiga—e le tatau ona misi le faapotopoto faatasi o lona aiga ma tuuina atu o ia lava ma i latou i le Alii o Au, tatalo atu mo se taitaiga ma le faasinoala a le Agaga Paia e taitaiina ai i latou i le aso atoa– i lena lava aso. Taitai i matou i lenei aso, faatonu i matou i lenei aso, faasaoina i matou i lenei aso, puipuia i matou mai le agasala ia te oe poo se isi o loo soifua i le lagi poo le lalolagi i lenei aso! Afai tatou te faia lenei mea i aso uma, o le aso mulimuli tatou te ola ai, o le a saunia ai i tatou e maua le fiafia i se mamalu maualuga (DBY, 44).

Tou te iloa o se tasi lenei o mea e ese ai lo tatou faatuatuaga ma talitonuga, ia aua nei tagi atu i le Alii e faia se mea e aunoa ma se naunautai e fesoasoani ia te ia i mea uma tatou te mafai; ona faia ai lea e le Alii o mea o loo totoe (DBY, 43).

E le tatau ona ou fesili atu i le Alii na te faia se mea ou te le manao ou te faia (DBY, 43).

Afai ou te fesili atu ia te ia e tuuina mai ia te au le poto e faatatau i soo se mea e manaomia ai i le soifuaga, poo se mea mo au lava, poo au uo, aiga, lau fanau, poo i latou o loo ou faamalumalu ai ae leai se tali mai ia te ia, ona faia ai lea o le mea e sili ona mafai e tusa ai ma lau faamasinoga ua aoaoina ai au, o le a le taumate ua ia talia ma faamamaluina lena faaiuga, ma e na te faia i mea uma lava (DBY, 43).

Ia faia e tagata uma o le Au Paia, pe a tatalo, ia ole atu i le Atua i mea ua ia manaomia e fesoasoani ai ia te ia ina ia faia le mea tonu i le lalolagi. Afai e te le iloa le mea e ole atu ai, o le a ou tau atu le ala e tatalo ai. Afai tou te tatalo faalilolilo ma lo outou aiga, afai e te le iloa se mea e ao ona ole atu ai, tuuina atu oe lava i le Tama oi le Lagi ma augani ia te ia e fesoasoani ia te oe e ala i musumusuga a le Agaga Paia, ma poloaiina ona tagata, ma taitaiina mea a lona malo i luga o le fogaeleele, ona uma ai lea. Tau atu ia te ia ina ia tuu oe i le mea o ia finagalo iai mo oe, ma tau mai ia te oe le mea ua ia finagalo e te faia, ma ia e lagona o loo e avanoa e faia lena mea (DBY, 45–46).

Ia tatalo faatauanau tagata uma, seia latou iloa mea a le Atua mo i latou lava ma mautinoa o loo savavali i latou i le ala e tau atu i le ola e faavavau; ona te’a ese ai lea o le mataua, o le fua o le loto maaa, ma o le a le iai se avanoa i soo se tagata e tuu ai e ia o ia lava i luga ae o se isi tagata; aua o lenei lagona e le tusa ai ma faatulagaga o le lagi. Sa le finagalo Iesu e ese mai o ia mai lona Tama. O i laua e tasi. Afai o taitaiina tagata e faaaliga a Iesu Keriso, ma ua latou iloa lea tulaga e ala i lo latou faatuatua, e leai se fefe po o se matau, ae o le a tasi i latou ia Keriso, ma lotogatasi (DBY, 42).

Fautuaga mo Suesuega

O le Agaga o Keriso, ua tuuina atu i fanau uma a le Atua, e faamalamalama ia i latou, ma fesoasoani ia i latou, ia iloa le lelei mai le leaga.

Mafaufau i le galuega a le malamalama o Keriso poo le Agaga o le Alii. MFF 88:6–13; Moronae 7:12–19.) O le a le uiga o le “faamalamalamaina e le Agaga o le Alii o Iesu”?
E faapefea ona tatou iloa tulaga e faavavau o le “sao mai le sese”?
E tusa ai ma saunoaga a Peresitene Iaga, o a ni auala o loo “finau ai pea le Agaga o le Alii ma tagata”?
O le a le mana o loo “faatumulia ai le vavaloloa” e faaaafia ai e le Alii Lana fanau? O le a se lagona i le tulaga o le Atua e le o mamao ma i tatou uma lava? (Vaai Galuega 17:27.) O a ni faamaoniga ua outou vaaia, e iloa ai e silafia e le Atua mea uma o loo tutupu i le lalolagi?

Ua fetalai mai le Atua i Ana Fanau e ala i faaaliga.

O ai ua tuuina iai e le Alii le pule e maua faaaliga mo le Ekalesia atoa?(Vaai MFF 21:4–5; 28:2; 43:3–4; 90:3–5.) O ai “faaaliga ola”? O le a la tatou matafaioi e faatatau i faaaliga ola?
Ua saunoa mai Peresitene Iaga, o aoaoga o le faaolataga e mafai ona maua e ala i faaaliga. O a faaaliga e tuuina mai e le Alii ia i tatou taitoatasi? (Vaai 2 Nifae 32:5; Numera 11:29.)
E tusa ai ma saunoaga a Peresitene Iaga, e faapefea ona tatou iloa ua taitaiina i tatou e tusa ai ma le finagalo o le Atua? O le a le tulaga e ao ai ona tatou maua faaaliga e taitaiina ai “lea aso ma lea aso” o o tatou olaga?
O le a le folafolaga ua tuuina atu ia i latou e galulue ma le “faamaoni i le tele o tausaga” e tatalo, usiusitai, ma le auauna atu? O a ni mea na tutupu ao tatalo e fesoasoani i le aumaia o le Agaga i o outou olaga?

O se tasi o o tatou tiute sili ona taua, o le sailia lea o le finagalo o le Atua i le tatalo i aso uma.

E tusa ai ma le saunoaga a Peresitene Iaga, o le a lo tatou tiute “muamua ma le sili” i le avea ai ma uso o le Ekalesia?
O le a le tulaga tatou te maua ai le “Agaga e taitaiina i tatou”? (vaai 3 Nifae 19:9, 24.)
O le a le aoaoga patino na tuuina mai e Peresitene Iaga e uiga i le tatalo?
O le a le aoaiga malosi na tuuina mai e Peresitene Iaga ia i latou e le maua se lagona e tatalo ai?